Taa,

ero yinhîrî tînpanatanmekrî komo panatanmekyakn̂e xa hara Xesus.

On wara kekn̂e yîwya so,

On wara marha nasî Kaan maywen me awehtopo komo,

tînatkem wara nasî.

Pahxa xakn̂e uupa ke tînatkem.

Pahxaxaro ka cekn̂e cetapickaxmu komo yeposo,

tînatîrî poko tantomaxmu kom ha.

2 Ero ke noro yipu komo yakro tak n̂esencekn̂e epethîrî komo poko.

Cewn̂e kaamo awetapickache so cewn̂e so wîmyas awya so tenar̂u awepethîrî kom ha,

kekn̂e yîwya so.

Taa,

ero wa ham,

ketken̂e cetapickaxmu komo.

Ero ke cetken̂e tak etapickaxi.

3 Amn̂e 9 to exitaw tînatkem cekn̂e xa hara ewto roron pona hara.

Iito emyarîn komo n̂een̂akn̂e hara.

Cececetoso mak xatken̂e ahce na pokohra ro mak.

4 Ero ke n̂examro marha nantomekn̂e hara.

On wara kekn̂e yîwya so,

Etocoko omararîn pona etapickaxi.

Amn̂e tak awepethîrî komo wîmyasî.

Kir̂wan̂he kepemexe so,

kekn̂e yîwya so.

Ero ke n̂examro marha cetken̂e etapickaxi,

kekn̂e Xesus amna ya.

5 Amn̂e tînatkem cekn̂e xa hara cetapickaxmu komo yenso xa hara.

Kamarakataw ka cekn̂e,

3 to cekn̂e xa hara.

Ero yimaw so marha cetapickaxmu komo nantomekn̂e xa hara tînatîrî pokono me.

6 Amn̂e kokon̂i xa tak 5 to kaamo exitaw cekn̂e xa hara roro pona.

Iito tak n̂een̂akn̂e xa hara anarî komo emyarîn kom hara.

On wara kekn̂e yîwya so,

Ahce kacho tan matu emyarîra ro mak?

Kaamo poko tan mehcow okwe,

kekn̂e yîwya so.

7 Amna yapickan̂e thakwa exihra n̂ex okwe,

ketken̂e yîwya.

Ai okwe,

kekn̂e tînatkem.

Taa,

amyamro meero etocoko ha ke etapickaxi onatîrî poko,

kekn̂e yîwya so.

Ero ke cetken̂e tak n̂examro hara etapickaxi kokon̂i xa tak.

Ero wa antomano n̂iir̂akn̂e tînatkem.

8 Taa,

kokmamyataw tak on wara kekn̂e tmaywen ya,

Cetapickaxmu komo an̂ihta.

Oona mokuche so epemano cirko.

Yihcirî me ka epemakî kokon̂i xa onantomatho komo.

Amn̂e pahxa n̂he onantomatho komo tak epemak hara.

Okomn̂i xa tak yihcirî me onantomatho komo epemak hara.

Ero wa men epemano cirko,

kekn̂e tmaywen ya.

Ero ke mokyatken̂e etapickaxapu komo cepethîrî komo yahsîso.

9 Yihcirî me ka 5 to antomaxapunhîrî komo nahsîyatken̂e cepethîrî komo.

Cewn̂e so tenar̂u nahsîyatken̂e.

10 Amn̂e tak mokyatken̂e yihcirî me antomaxapunhîrî kom hara.

Yaake na tahsîyatu exepeyu kîwyam reha,

ketken̂e.

Wara rma n̂examro meero nahsîyatken̂e cewn̂e so mak tenar̂u.

11 Ero ke kicicme tak nîmtapowatken̂e tînatkem yakro.

12 On wara ketken̂e yîwya,

Kokon̂i xa mak moxam n̂etapickacow,

1 ora mak okyo.

Amna reha n̂etapicka cekar̂kaxi ro.

Kaamo thakwa amna n̂ipika oco.

Ahce kacho n̂examro mepema hara amna yecenarî xa marha?

ketken̂e yîwya.

13 Ero ke ero wa kan̂e n̂eyukyakn̂e hara tînatkem.

On wara kekn̂e anarî ya mak,

Oyakno,

kir̂wan̂he rma kepema.

Awya so rma re wîîka hara,

Kaamo poko awetapickache cewn̂e wîmyasî awya so tenar̂u,

wîîka rma re awya so.

Taa,

ero wa ham,

mîîka hara re owya.

14 Ero ke etoko tak ha.

Onî rma arko awepethîrî.

Ero wicakî xa marha epema xe wasî kokon̂i onantomatho kom hara.

15 Opurantan thakwa tan.

Ero ke oyanme ro mak epemano wiir̂asî iike.

Awewresawra so katî wai anarî komo wakren̂e me?

kekn̂e hara tînatkem yîwya so.

16 Ero ke ero wara xa marha maxe amyamro hara amn̂e,

kekn̂e tînpanatanmekrî komo ya.

Mapitawno me ehxapunhîrî komo tak naxe amn̂e poturme hara.

Poturme ehxapunhîrî komo reha tak naxe mapitawno me hara.

Mer̂pora ro mak naxe an̂ihxapu komo.

Asak makî tko naxe men̂ekaxapu komo reha,

kekn̂e.

Ero wa kekn̂e Xesus tînpanatanmekrî komo ya ha.

17 Taa,

ero yinhîrî Xerusaren yesamarî yaw tak cekn̂e Xesus tînpanatanmekrî komo yakro.

Esama yakumyaka tak naar̂akn̂e n̂examro 12 kom ha.

Iito tak n̂examro weronomekn̂e.

On wara kekn̂e yîwya so,

18 Xerusaren pona men wa tîhcexe.

Iito tak Tooto me Ewruxapu n̂ekanîyaxe.

Moso men kicicitho me xa tîmtapotaxmu,

kexe tîmsom pokono yenîn̂e komo ya,

Xutew panatanmetopo mewren̂e komo ya marha.

On wara tak kexe n̂examro hara,

Twaihkaxmu me kr̂a nasî Moso,

kexe Noro poko.

19 Ero wa kache tak naar̂axe Xenciu komo yaka hara.

Xenciu komo tak n̂etaporexe poko,

nîhyokyaxe marha,

namowexe marha tak tpanaxkem pona.

Osorwaw ro enmapuche tak pakes hara,

kekn̂e.

Ero wa kekn̂e Xesus tînpanatanmekrî komo ya.

20 Taa,

ero yinhîrî Xesus yaka tak mokyakn̂e Sebetew mumuru komo yon.

Tîmrerî komo n̂ekyakn̂e Xesus yaka.

Xesus yamrinaka tak n̂eremekn̂e tosokmuru po.

Yiixe cehtopo poko nîmtapowakn̂e Noro yakro.

21 Ero ke on wara kekn̂e Xesus yîwya,

Ahce xe wa mai?

kekn̂e yîwya.

On wara kekn̂e noro,

Apa,

kayaritomo me xa awesenpetaw amn̂e moxamu cma re omrerî komo miir̂asî kayaritomo me xa tak.

Apanaka cma re meremanmekyasî,

anarî kaari n̂ixa,

anarî poowa n̂ixa hara,

kekn̂e Xesus ya.

22 Ai ha,

kekn̂e Xesus yîwya.

Camkî mak maxe ero yipu poko.

Owokru ma re meer̂atu,

Ow weer̂as amn̂e ero yipu xa marha?

Cerewrem kwaka emicixapu wara was amn̂e.

Ero yipu kwaka xa marha memihcatu amyamro hara?

kekn̂e Xesus yîwya so.

Nhnk,

ketken̂e yîwya,

Amna rma nasî ero yipu yînîmn̂e me,

ketken̂e.

23 Yaaro rma wa mîîkexe,

kekn̂e Xesus yîwya so.

Owokrutho poi rma re meer̂axe amn̂e.

Oyerewîmtopo yeen̂e wara rma maxe amn̂e oko.

Cerewrem kwaka emicixapu wara was amn̂e,

ero yipu kwaka xa marha re memihcaxe amyamro hara.

Wara rma opanaka ceremaxmu komo men̂ekan̂e pîn Owî.

Apapa ha tko.

Pahxa rma iina ceremaxmu nîhtînoyakn̂e Noro.

Apon komo marha n̂iir̂akn̂e opanaka.

Anarî kaari n̂ixa n̂iir̂akn̂e,

anarî poowa n̂ixa n̂iir̂akn̂e hara,

kekn̂e hara yîwya so.

Ero wa kekn̂e Xesus yîwya so.

24 Taa,

ero yipu yentache anarî komo ya,

10-înhîrî ya,

n̂examro tak nîrwonatken̂e Sebetew mumuru komo poko ha,

2 komo poko.

25 Ero ke tînpanatanmekrî komo nan̂ikyakn̂e Xesus.

On wara kekn̂e yîwya so,

Xenciu kayaritomon komo meen̂axe ha re.

On wara naxe n̂examro,

tmaywen komo nîyoponkexe ro mak okwe.

Maywen komo tak tînantomarî komo nantometîkexe hara.

26-27 Ero warahra ro mak maxe amn̂e amyamro reha.

Awakrono komo yopono me awexi xe awexitaw so n̂examro yanton me xa matko ehcoko.

Poturme awexi xe awexitaw so anton me xa matko ehcoko.

28 Ero warai me xa marha wa mokye Tooto me Ewruxapu.

Antomano riso mokuhra n̂ehxe.

Awanton me xa matko wa mokye.

Etwaikaposo marha wa mokye mer̂pono pîn komo yepetho me ha,

kekn̂e hara.

Ero wa Xesus kekn̂e tînpanatanmekrî komo ya.

29 Taa,

ero yinhîrî Xer̂ko pona tak cekn̂e Xesus tînpanatanmekrî komo yakro.

Amn̂e tak ero poi cetken̂e hara.

Ero poi cetaw so mer̂pono pîn komo cetken̂e Xesus wenari.

30 Iito xatken̂e ewuhnî komo esama yakumyaw.

Asakî xatken̂e ewuhnî re kîrkomo.

Ero yimaw tak Xesus torî n̂encetken̂e.

Xesus Mîk ces ha oroto,

kacho tî n̂encetken̂e.

Ero ke on wara ketken̂e n̂examro Xesus ya,

Ai Apa,

Tapi yepamtho Amoro.

Amna pînîn yaw n̂he thakwa esko,

ketken̂e yîwya.

Kar̂pe xa ketken̂e.

31 Anarî me tko tî ketken̂e yîwya so Xesus wenari tîtosom komo.

N̂eiyatken̂e okwe ewuhnî pen komo.

Atîtmamcoko mak ha kica,

ketken̂e tî yîwya so.

Kar̂pe xa matko tî ketken̂e ewuhnî komo.

Apa,

Tapi yepamtho Amoro.

Amna pînîn yaw n̂he thakwa esko,

ketken̂e Xesus ya.

32 Ero ke Xesus tak n̂ecececekn̂e.

Ewuhnî komo tak nan̂ikyakn̂e.

On wara kekn̂e yîwya so,

Ahce wa awiri xe so wa mat ha owya?

kekn̂e Xesus yîwya so.

33 Apa,

cewkem me cma re amna miir̂asî,

ketken̂e Xesus ya.

34 Ero ke yîpînîn yaw xakn̂e Xesus.

Teme kekn̂e ewru komo poko.

Tîtîk,

n̂een̂atken̂e tak okre.

Ero yinhîrî Xesus wenari tak cetken̂e.

Ero wa xatken̂e.