Taa,

ero wa panatanmekno riitîkache tak Xesus cekn̂e en̂exa Karireia poi.

Xuteia raconho pona tak cekn̂e Xotaw yeco pona.

2 Iito exitaw mer̂pono pîn komo mokyatken̂e xa hara Xesus yaka.

Ahna so na cetaw Noro yakro cetken̂e.

Okohme cehsom komo marha n̂ekyatken̂e yîhyaka.

N̂examro nakir̂wamekn̂e Xesus.

3 Ero yimaw Parisew komo marha mokyatken̂e Xesus yaka.

Noro yukukmaxi mak mokyatken̂e kica,

kicicme na nîmtapowa,

kachome makî.

On wara ketken̂e yîwya,

Apa,

ahce wa mîîke cihyem komo yetowtopo poko?

On wara ketu anarî komo,

On wara nai opici kica.

Ero ke ketowya kyam yîhyai,

ketu.

Kpanatanmetopo yanwekn̂e pîn me tai awya ero wara ketowyataw?

4 On wara n̂eyukyakn̂e Xesus,

Kaan Karitan yenîhra ma matu tooto yakîhtotoponho Kaan ya.

Yihcitoponhîrî yimaw tooto nakîhcekn̂e Kakîhton̂enhîrî kom ha.

Kîîrî me nakîhcekn̂e,

woosî me marha nakîhcekn̂e.

Ero wa nakîhcekn̂e.

5 Ero wa akîhtorî ke so tîîm komo nahsîpînkexe kîrkomo.

Tînocwan komo marha nahsîpînkexe cipici komo yahsîtome tak.

Cewn̂an me tak nasî yupun komo asaknonhîrî.

6 Ero ke asak hakno me exihra tak naxe.

Cewn̂an me tak naxe etahsîxapu kom ha.

Ero ke Kaan nahsîmexpotho etahsîpînkara ro mak n̂ehcowpe tooto yanme hara,

kekn̂e Xesus yîwya so hara.

7 Ai ha,

ketken̂e tak Xesus ya.

Ahce kacho ketowtopo komo poko nîmtapowakn̂e Moises penî reha?

On wara tî kekn̂e noro pen,

Apici komo yai awetow xe awexitaw so awetowtopo komo ka mewrecoko karita.

Ero yipu mewreche tîmcoko ahcinhîrî komo ya.

Men̂epexe tak eroromero,

kekn̂e tî,

ketken̂e hara yîwya.

8 On wara Xesus n̂eyukyakn̂e hara,

Ero wara rma re kekn̂e Moises pen cihyem komo poko,

Cetow xe cexitaw so anarî komo n̂etowcowpe rma,

kekn̂e awya so.

Ero wa kacho mewrekn̂e apantanmetopo komo me ceipuru wara exirî ke mak aropotarî komo,

Ero warahra tko kekn̂e Kaan pahxa akîhtono r̂iyataw.

9 On wara tko wîîkes Owî awya so,

apici komo yai awetowyataw so anarî yahsîtome apici hara,

kicicme men maxe.

Apici yai rono me tak maxe okwe.

Anarî poko roro exitaw tko apici komo,

kicicme awehtopo komo pînî rma mîn anarî yahsîtopo awya so.

On wara awexitaw so tko kicicme maxe,

ciin̂o yai etowxapu yahsîyataw apici komo me.

Ero wa awexitaw so apici komo yai rono me marha maxe kica,

kekn̂e Xesus yîwya so.

Ero wa kekn̂e yîwya so.

10 Ero yinhîrî on wara ketken̂e Xesus npanatanmekrî komo yîwya,

Ero wa exitaw kîîrî cipici poko,

yipitara ro mak na cexpore nai okwe,

ketken̂e yîwya.

11 On wara xa Xesus n̂eyukyakn̂e hara,

On wara wîîkes awya so ero poko,

anarî komo n̂entarî mak tan wîîkes awya so,

Kaan mak men̂ekesî on warai me cehsom komo.

12 Yipitanî ro me naxe anarî komo.

Ewnuku me thakwa n̂ewruyaxe.

Anarî komo reha tooto komo tak n̂iir̂axe ero yipu me.

Anarî komo reha ewnuku me naxe tanme ro so Kaan yanton me xa tak cehtome so.

Ero wa naxe anarî komo reha.

Ero yipu yentan̂e me awexitaw so entacoko,

kekn̂e tak Xesus.

Ero wa kekn̂e tînpanatanmekrî komo ya.

13 Taa,

ero yimaw tak rikomo komo n̂ekyatken̂e iitono komo Xesus yaka.

On wara ketken̂e yîwya,

Apa,

moxam cik amna xîkrî.

Yîhtîpîrî komo cma re mahsîyasî.

Kaan yakro amtapotachome poko so,

ketken̂e Xesus ya.

Anarî me tko ketken̂e yînpanatanmekrî komo yîwya so,

rikomo yekn̂e komo ya.

Ahce kacho rikomo komo mekyatu kica Xesus yaka?

ketken̂e yîwya so.

14 On wara tko kekn̂e Xesus yîwya so,

Mohcowpe rma rikomo komo ohyaka.

Porohkara ro mak ehcoko.

Rikomo wara cesehtînosom komo mak naxe Kaan maywen me,

kekn̂e yîwya so.

15 Ero ke rikomo komo tîpîrî tak nahsîyakn̂e Xesus.

Ero yinhîrî tak cekn̂e Xesus anana hara.

Ero wa xakn̂e.

16 Taa,

ero yinhîrî kar̂pamxan tak mokyakn̂e hara Xesus yaka.

On wara kekn̂e yîwya,

Apa,

amna panatanmekn̂e xa Amoro ham kir̂wanî ro okre.

Ero ke on wara wîîkes awya,

kir̂wan poko oyexi xe wasî waipîn me tak oyehtome.

Ahce poko wai ero wara oyehtome?

kekn̂e Xesus ya.

17 On wara Xesus n̂eyukyakn̂e hara,

Ahce kacho kir̂wanî ro me Ow metahca?

Cewn̂e mak nasî kir̂wanî ro,

Kaan mak ha.

Wara rma waipîn me ro mak tak awexi xe awexitaw apanatanmetopo komo ewetko,

kekn̂e Xesus yîwya.

18 Ai ha,

kekn̂e mohxapu Xesus ya.

Ahce wa kacho xa wewehca ha ke?

kekn̂e hara noro Xesus ya.

On wara kesî apanatanmetopo komo,

kekn̂e Xesus yîwya,

Waihkano cirihra ro mak ehcoko,

apici yai rono me exihra ehcoko,

aan̂o yai rono me marha exihra ehcoko wooxam komo,

en̂epamra ro mak ehcoko,

cemarontara ro mak ehcoko apoyino komo poko.

19 Aamo komo ponaro ehcoko,

anocwan komo ponaro marha,

apoyino komo xe ehcoko etîxe rma maxe ero wa xa marha,

kesî apanatanmetopo komo.

Ero wa kacho ewetko ha,

kekn̂e Xesus yîwya.

20 Ero wa kacho mko yewetîn̂e rma ow ha,

kekn̂e kar̂pamxan yîwya.

Mehxa ro wewehcasî omrenai ro.

Ahce poko wai hara awya?

kekn̂e hara noro Xesus ya.

21 Taa,

kekn̂e tak Xesus yîwya,

kir̂wanî ro me xa tak awexi xe awexitaw awemyawnonhîrî tak tîmtîkata puranta pona.

Puranta yahsîche tak awya tîmko yupurantamnî komo ya hara.

Ero wa esko mer̂pora tak ehtome awemyawno kah yaw,

cepethîkem xa tak okre.

Apurantanthîrî tîmîche amoko tak oyakro,

kekn̂e Xesus yîwya.

22 Ero yipu yentache tak nahwokekn̂e noro,

kar̂pamxan.

Ahwora tak cekn̂e hara mer̂pora ro mak exirî ke emyawno.

Ero ke ahwora xakn̂e.

Ero wa xakn̂e.

23 Ero yinhîrî on wara kekn̂e Xesus tînpanatanmekrî komo ya,

Yaaro tan wîîkes awya so,

On wara naxe cemyawnoyem komo,

n̂ehn̂exe ro mak kah yawno maywen me cehtopo komo poko.

24 Ahce wa nai kameru kuusa yewtarî yaro tîto xe cexitaw awya?

Tohra ro thakwa mak nas okwe,

n̂ehn̂esî ro mak ha.

Soroso xa tak n̂ehn̂exe mer̂pono pîn ke cemyawnoyem komo Kaan maywen me cehtopo komo poko,

kekn̂e Xesus tînpanatanmekrî komo ya.

25 Okwe,

ketken̂e n̂examro ero yipu yentache.

N̂eserepoketken̂e ro mak tak.

On wara ketken̂e Xesus ya,

Onoke thakwa re n̂etakir̂wame okwe?

ketken̂e.

26 On wara tko kekn̂e hara Xesus yîwya so,

Akir̂wamano cirihra ro mak naxe tooto komo reha.

N̂ehn̂exe makî thakwa ero poko.

Kaanî reha ahce wa so na ciino n̂iir̂asî ehn̂an me ro mak,

kekn̂e.

Ero wa kekn̂e Xesus tînpanatanmekrî komo ya.

27 Ero yinhîrî on wara Petru kekn̂e Xesus ya,

Apa,

amna reha nîpînînkekn̂e cemyawnonhîrî,

tîyanan komo meero marha.

Ahnoro mak amna nîpînînkekn̂e awenari roro tmohtome.

Ero ke ahce tak amna nahsîya amn̂e ero yipu yîpînînkarî ke amna ya?

kekn̂e yîwya.

28 On wara kekn̂e Xesus yîwya,

Yaaro tan wîîkes awya,

amn̂e Kaan nakîhces hara kaapu,

roowo,

ahnoro mak.

Ero yimaw kayaritomo yapon pona tak n̂eremesî,

Tooto me Ewruxapu.

Tîroromutwe xa tak n̂esenpesî ero yimaw.

Amyamro marha tak meremexe hara anarî pona so kayaritomo yapon pona,

12 pona.

Ixaw tribun komo yenîn̂e me maxe 12 tribu yenîn̂e me ha.

Ero wa maxe amyamro.

29 On wara marha naxe anarî komo,

yîpînîn yaw cehtoponhîrî komo nîpînînkexe oyosotî ponaro xa cexirî ke so mak.

Tîmînthîrî komo nahsîpînkexe,

takno komo,

cepeka komo,

tîîm komo,

tînocwan komo,

cipici komo,

tîmxîkrî komo,

tmararînthîrî komo,

ero warai komo nîpînînkexe.

Ero yipu pînîn̂kan̂enho komo mer̂pora tak nahsîyaxe hara ero yipu xa marha.

Cewn̂e mak yîpînînketaw 100 tak nahsîyaxe hara ero yipu xa marha.

Waipînî ro me cehtopo komo marha nahsîyaxe.

30 On wara tko naxe poturme ehxapunhîrî komo ero yimaw,

mapitawno me tak naxe hara.

Mapitawno me ehxapunhîrî komo tak naxe poturme hara.

Ero wa tak naxe mer̂pono pîn komo ero yimaw,

kekn̂e.

Ero wa kekn̂e Xesus tînpanatanmekrî komo ya.