Onoke Xa Kaan Maywen Komo Poturme Nai? Kachonho
18
Taa,
ero yinhîrî on wara tak ketken̂e Xesusu npanatanmekrî komo yîwya,
Apa,
onoke xa Kaan maywen komo poturme nai?
ketken̂e.
2 Ero ke rikomo tak nan̂ikyakn̂e Xesus.
Noro tak n̂eremanmekyakn̂e tînpanatanmekrî komo cheka rma.
3 On wara tak kekn̂e Xesus yîwya so,
Kyopono me esehtînopîra tak ehcoko.
Rikomo warai me cik tak esehtînocoko,
moso yipu warai me makî.
Ero wa esehtînopîra awexitaw so Kaan maywen mera ro mak maxe okwe.
4 Anarî komo xawyakan mak ow ha,
rikomo warai cik makî,
kan̂e me awexitaw so Kaan maywen komo poturme tak maxe.
Ero wa maxe.
5 Ero ke rikomo xe ehcoko ooxe awexirî ke so.
Ooxe awehtopo komo rma mîn rikomo xe awehtopo kom ha.
6 On wara marha wîîkes awya so,
opona n̂een̂axe anarî komo moso warai rikomo komo.
Kicicitho ponarono tko na nai anarimaw okwe.
Noro yipu yanme tak kicicme nai rikomo hara cewn̂e mak na.
Ero wa exitaw n̂esemetanmekyasî ro mak okwe kicicme ciin̂enhîrî.
Wara n̂he re nasî noro pen tuuna imo kwaka cetar̂metaw toh ke cexenawnoi.
7 N̂etwîrîmexe rma re okwe roowo pono komo kicicme ciino rin̂e komo exirî ke yîchew so okwe.
Naxe rma thakwa noro yipu komo yîchew so okwe.
Wara rma n̂etwîrîmexe xa tak kicicme ciino rirî ke okwe.
8 On wara marha kekn̂e Xesus yîwya so,
Kicicme na matu awamorî komo yanme.
Anarimaw na kicicitho poko ehso mîîcetu ahtarî komo po hara.
Ero wa awexitaw so awamothîrî komo yîhkotocoko ar̂machome kr̂a.
Ahtathîrî marha yîhkotocoko.
Ero yipu yîhkotoche eeco me mak tamoke maxe,
eecome tîhtake marha.
Ero ke thakwa mesemetanmekyaxe,
wara n̂he ha tko.
Yîhkotora awexitaw so ececoka rma tamoke maxe,
ececoka tîhtake marha.
Wara rma mesemetanmekyaxe xa tak okwe wehto imo cheka awetar̂metaw so okwe.
Eseikanî ro mîn wehto imo oco.
9 Ero wa xa marha wîîkesî awewru komo poko hara,
kicicitho poko na matu awewru komo yanme.
Ero wa awexitaw so awewthîrî komo towcoko ar̂machome kr̂a.
Mesemetanmekyaxe rma ha re eecome mak cewke awexitaw so wara n̂he ha tko.
Mesemetanmekyaxe xa tak okwe wehto imo cheka awetar̂mache so ececoka cewkemu rma.
Ero ke awîrîman̂enhîrî komo towcoko awewthîrî komo iina tohra ro mak awehtome so,
kekn̂e marha Xesus amna ya.
Ero wa kekn̂e.
10 Ero yinhîrî rikomo komo poko nîmtapowakn̂e xa hara Xesus,
iito exitaw so rma.
On wara wîîkes awya so,
kekn̂e hara,
moso yipu cik rikomo komo yîwîrîyakara ro mak men ehcoko.
Naxe ha men n̂examro yakronoman̂e ro komo ancu komo kah yaw.
Iito Apapa yeepatarî n̂een̂axe roro.
Tacixapunhîrî Pokono Oper̂a Pokono
11 Tacixapu komo yeposo mokyakn̂e Tooto me Ewruxapu,
ahsîso marha.
12 Ahce wa xa natu oper̂a yosom komo awya so.
100 na nai iyoku oper̂a.
Tahca tko na anarî iyoku cewn̂e mak.
Ero wa taciche ahce wa nai osom?
99 komo ka nînomyasî.
Miya so tak cesî îh pona tacixapu yeposo.
13 Enîche tak tawake ro mak tak nasî noro poko okre.
Tawake rma re nasî 99 komo poko,
tacihnî komo poko,
wara n̂he ha tko.
Tawake xa tak nasî tacixapunhîrî yenîrî ke.
14 Ero wa xa marha nasî Aamo komo kah yawno moso yipu poko,
rikomo poko ciki.
Ehcamnopu xera ro mak wa nasî,
kekn̂e.
Ero wa kekn̂e Xesus tînpanatanmekrî komo ya.
Kakno Yakro Kesentacho Pokono, Kemetanmekn̂enhîrî Yakro Ha
15 Taa,
on wara kekn̂e hara Xesus yîwya so,
On poko wîîkes hara awya so,
anarimaw awemetanmekyatu so na awakno komo.
Ero wa exiche tak etok ha yîhyaka.
Ekatîmko tak yîwya kicicme ehtoponhîrî apoko.
Taixa mak esentacoko ero poko,
awemetanmekn̂enhîrî,
amoro,
ero wicakî mak.
Kir̂wan̂he aweyukyataw tawake tak maxe etpoko hara.
16 Awentara exitaw tko takronoi tak etoko yîhyaka xa hara.
1 mak arko awakrono,
2 anarimaw.
N̂examro yakro tak etocoko yxihyaka esentaxi xa hara awemetanmetoponhîrî poko.
Yaaro tak na n̂ence amtapotarî asakî awexirî ke so iito re ekatîmn̂e,
osorwaw awexirî ke so anarimaw.
17 Awentara exitaw rma Kaan xîkrî komo ya tak ekatîmko,
iina re cesenmesom komo ya.
Noro yipu komo yentara exitaw anarme tak encoko.
Kaan ponarono pîn wara tak encoko,
kayaritomo purantan yahsîn̂e wara rma.
18 Yaaro tan wîîkes awya so,
ahce na yahruyataw awya so tan roowo po ero xa marha Apapa nahruyas hara kah yaw.
Ahce na yahrunketaw awya so tan roowo po,
Apapa marha tak nahrunkes hara kah yaw.
19 On wara marha wîîkes awya so,
Kaan yakro amtapotacho komo poko tan kîmtapowas hara,
Kaan yakro na mîmtapowatu amn̂e yiixe awehtopo komo poko.
Asak mak na mîmtapowatu anarimaw,
2 mak ha na.
Iito re awesehtînoyataw so rma tko Noro yakro amtapotacho komo poko,
Noro tak awewecaxe so Apapa kah yawno.
20 Asak mak na mesenmekyatu 2 mak ha na,
3 n̂he na anarimaw.
Oyosotî ponarono me mak na mesenmekyatu.
Ero wa awesenmekyataw so iito was achew so,
kekn̂e marha.
Ero wa kekn̂e Xesus tînpanatanmekrî komo ya.
Kemetanmetoponhîrî Komo Yîhcamnotopo Pokono
21 Ero yinhîrî tak Petru mokyakn̂e Xesus yaka.
On wara kekn̂e yîwya,
Apa,
ahce wa kyam wai oyakno poko oyemetanmekyataw roro yîwya?
Emapona oyemetanmetoponho wîhcamnoya mak ha?
7 ro oyemetanmekyataw yîwya wîhcamnoya rma?
kekn̂e Petru yîwya.
22 On wara n̂eyukyakn̂e Xesus hara,
7 ro mak awemetanmetoponhîrî yîhcamnoko,
kahra was awya.
7 x 70 me exitaw rma awemetanmetoponhîrî yîwya ero wicakno rma yîhcamnoko,
wîîkesî xa matko awya.
23 Ero ke on wara wîîkes awya so ero yipu poko rma,
On wara naxe Kaan maywen komo anarimaw,
tooto kayaritomon maywen wa xa marha naxe.
Pahxa xakn̂e kayaritomo.
Ero yimaw tak tmaywen n̂epethîkatho ponaro xakn̂e.
Karita yaw tmewreso xakn̂e osotî komo.
Ero ke tanton komo ya tak noro yipu komo nan̂ikpekn̂e cepethîrî yahsîtome tak.
24 Ero yinhîrî tak noro yipu komo nan̂ikpekn̂e tanton komo ya.
Ero yimaw tak anarî n̂ekyatken̂e yîhyaka epethîkan̂enhîrî xa tak.
10.000 tarentu xakn̂e epethîkacho okyo.
25 Yupurantamra exirî ke thakwa epemacho exihra xakn̂e yîhyaw.
Ero ke on wara kekn̂e kayaritomo porisia komo ya,
Moso tak tîmcoko puranta pona cetapickaxmu yosom ro ya.
Yihcinhîrî marha tîmcoko,
yîmxîkîthîrî marha,
emyawnonhîrî marha,
ahnoro mak tîmcoko puranta pona.
Ero wa tîmcoko epethîrî yahsîtome tak owya,
kekn̂e yîwya so.
26 Okwe,
okwe,
kekn̂e tak epethîkan̂enhîrî kayaritomo ya.
Ahri kapu.
Kepemetîkesî rma wa yamoro ka,
kekn̂e.
Tosokmuru po marha n̂eremekn̂e mamaka.
27 Yîmtapotarî yentache kayaritomo ya yîpînîn yaw tak n̂ehtîkekn̂e.
Ero ke tak wakrekn̂e.
On wara kekn̂e yîwya,
Taa,
n̂expe mak.
Ow men epemakî,
kahra tak was awya,
kekn̂e yîwya.
Ero wa noro wakrekn̂e kayaritomo.
28 On wara tko xakn̂e noro,
kayaritomo nwakretho rma,
akrono xakn̂e kayaritomo maywen xa marha.
Pahxa n̂he noro ya 100 exepeyu cik nîmyakn̂e.
Ero wicakî cma re ka mîmyasî owya,
amn̂e awya wîmyas hara,
kan̂enho mîk xakn̂e.
Ero ke tak noro n̂epor̂akn̂e kayaritomo nwakretho.
Enîche yîpîmtaw thakwa nahsîyakn̂e oko.
Opurantantho tîmko hara men owya oroto ha,
kekn̂e yîwya.
29 Okwe,
kekn̂e xa marha noro hara yîwya.
N̂eremekn̂e xa marha tosokmuru po hara.
Okwe okwe,
ahri kapu.
Wîmyasî rma awya opurantan exitaw amn̂e,
kekn̂e yîwya.
30 Pîra ha men.
Oroto xa matko tîmko ha,
kekn̂e yîwya.
Ero yimaw rma porisia ya nahrupekn̂e okwe.
Opurantantho tîmtîkache mak tak kahrunkapes hara,
kekn̂e ahrupon̂e yîwya.
31 N̂examro yakrono komo tko n̂een̂atken̂e ahrupotopo thakwa.
Ahwora ro makî tî xatken̂e ero wa ehtopo yenîrî ke.
Ero ke kayaritomo ya tak n̂ekatîmtîketken̂e noro pen yemetanmetoponho.
32 Ero ke tmaywen tak nan̂ikpekn̂e xa hara kayaritomo,
tînwakrethîrî ha.
On wara tak kekn̂e yîwya,
Kicicitho ro mak amoro ha kica.
Mer̂pora ro mak xakn̂e okwe,
Amn̂e wîmyas hara awya,
kachonho awya.
Okwe okwe,
mîîkekn̂e tko owya.
Ero ke n̂expe rma,
owya tîmîhra rma esko,
wîîkai tak awya.
33 Ero ke awakrono pînîn yaw xa marha cexpore nai hara,
apînîn yaw wîxakn̂e,
ero wa xa marha,
kekn̂e yîwya kayaritomo.
34 Nîrwonakn̂e ro mak tak kayaritomo noro poko.
Ero ke noro pen makîrha tak narpekn̂e emetanmekn̂e komo yaka tak ha.
Iitono ro me tak nahrupekn̂e.
Amn̂e mak kahrunkapes hara oyepematîkache mak tak awya,
kekn̂e yîwya.
35 Ero wa xa marha nas Apapa kah yawno apoko so hara awakno komo ya awemetanmetoponhîrî komo yîhcamnopîra awexitaw so.
Tpoko kicicme awehtoponhîrî komo yîhcamnopîra xa marha nasî Noro hara okwe,
kekn̂e.
Ero wa kekn̂e Xesus tînpanatanmekrî komo ya.