Taa,

ero yinhîrî 6 ro enmapuche Petru komo takî tî naar̂akn̂e Xesus îh pona,

kawno pona.

Petru,

Ciaku,

Xuaw,

ero wa mak naar̂akn̂e.

Ciaku yakno rma mîk xakn̂e Xuaw.

N̂examro re makî tî iito xatken̂e cewyaro.

2 Iito cexitaw so takî tî anarme ro mak Xesus n̂esenpekn̂e.

Tîroromutwe ro mak takî tî xakn̂e Noro yeepatarî kaamo wa mak oco.

Ponon marha tî xakn̂e tîroromutwe,

weeyu wara ro mak oco.

3 Ero wa Xesus yesenpetaw Moises takî tî n̂esenpekn̂e yîwya so,

Erias marha tî.

Xesus yakro tî nîmtapowatken̂e n̂examro.

Ero wa tî xatken̂e.

4 Ero ke on wara tî kekn̂e Petru Xesus ya,

Apa,

keken mexe nasî on okre.

Ero ke cma re oona amna n̂iir̂asî mîîmo osorwaw.

Amîn,

Moises mîn,

Erias mîn,

ero wa.

Ahce wa kat awya?

kekn̂e tî Petru yîwya.

5 Ero wa ketaw rma kaweresî takî tî n̂examro nahruyakn̂e.

Tîroromutwemu rma tî mîn xakn̂e kaweresî.

Kaweresî chewno mtapotarî takî tî n̂esencekn̂e.

On wara tî kekn̂e,

Omumuru Moso okwe yîpînîn yaw oyehtopo cik.

Tawake xa wasî Moso poko.

Ero ke yîmtapotarî men entacoko,

kekn̂e.

Ero wa kacho tî n̂esencekn̂e kaweresî chewno.

6 Ero yipu yencetaw n̂esewnapetken̂e takî tî Xesusu npanatanmekrî komo.

N̂eraswatken̂e ro makî tî.

7 Amn̂e takî tî Xesus mokyakn̂e yîhyaka so.

Cei kekn̂e tî poko so.

Awomcoko tak ha.

Erasîra rma ehcoko,

kekn̂e tî yîwya so.

8 Ero ke n̂esewyar̂atken̂e takî tî Petru komo.

Anarî komo yenîhra tak xatken̂e.

Xesus mak takî tî n̂een̂atken̂e.

Ero wa tî xatken̂e.

9 Taa,

ero yinhîrî takî tî cetken̂e hara Xesus komo.

Îîpî yenîhcetaw on wara tî kekn̂e Xesus yîwya so,

An̂enîthîrî komo ekatîmra ro mak men ka ehcoko,

oroto mencow ero.

Amn̂e mak Tooto me Ewruxapu waihyasî,

ero yinhîrî tak pakes hara.

Ero yimaw mak ekatîmcoko,

pakache mak ha,

kekn̂e tî yîwya so.

10 Taa,

on wara ketken̂e hara Xesusu npanatanmekrî komo yîwya,

On wara kexe amna panatanmetopo mewren̂e komo,

Erias pen mokyas hara amn̂e,

kexe.

Ahce kacho ero wa ketu?

ketken̂e yîwya.

11 On wara n̂eyukyakn̂e hara Xesus,

Yaaro rma wa kexe.

Eriasî rma wa mokyas amn̂e akir̂wamano riso.

Ahnoro rma nakir̂wamesî noro.

12 On wara tko wîîkes hara awya so,

mokye rma tko Erias.

Erias mîkro,

kahra ro mak xatken̂e anarî komo.

Noro pen n̂emetanmekyatken̂e.

Ahce wa na emetanmetopo yîhtînoyataw yîwya so,

ero wara rma n̂emetanmekyatken̂e okwe.

Ero wa xa marha Tooto me Ewruxapu n̂emetanmekyaxe hara amn̂e,

kekn̂e yîwya so.

13 Ero yimaw takî tî Xesusu mtapotarî n̂encetken̂e yînpanatanmekrî komo sara wara xa tak.

Xuaw Bacista pen poko wa nîîke ham,

ketken̂e takî tî tîhnaw so.

Ero wa tî ketken̂e îîpî yenîhcetaw.

14 Taa,

îîpî yenîhtoche yîwya so iito rma xatken̂e Xesus yaka mohxapu komo,

mer̂pono pîn.

Ero yimaw Xesus mîtkoso tak mokyakn̂e anarî,

iitono.

N̂eremekn̂e tak Xesus yamrinaka tosokmuru po.

15 Apa,

kekn̂e,

tîrohsom moso okwe omumuru.

Yîpînîn yaw cma re mas ha.

Emapona roro nîrohyasî okwe.

Wehto ywaka n̂epîrkesî roro,

tuuna kwaka meero n̂epîrkesî.

16 Anpanatanmekrî komo yaka thakwa re weekî.

Pîra ham okwe,

n̂ehn̂acow mak ha tko okwe akir̂wamacho poko,

kekn̂e Xesus ya.

17 Ero ke on wara kekn̂e Xesus,

Opona enîhra rma mat ham okwe.

Kaan yanwekn̂e komo mak amyamro ham okwe.

Atî wicakî pahkînon ahyaw so wai?

Atî wicakî pahkînon na ero wa awehtopo komo wînîmya?

kekn̂e yîwya so.

Taa,

yîîm ya tak kekn̂e hara,

Ek ha xiya amumuru,

kekn̂e yîwya.

18 Ekîche tak worokyam n̂eiyakn̂e Xesus,

yumumuru ropotawno.

Ero ke yîropotai tak n̂epatakekn̂e.

Ero yimaw rma kir̂wan̂he tak rikomo xakn̂e hara.

Ero wa xakn̂e.

19 Taa,

ero yinhîrî Xesus mîtkoso n̂he cetken̂e yînpanatanmekrî komo.

On wara ketken̂e yîwya ro mak,

anarî komo n̂entarî mera.

Apa,

ahce wa amna exirî ke amna n̂ehn̂a rikomo ropotawno yen̂epetopo poko?

ketken̂e yîwya.

20 On wara n̂eyukyakn̂e Xesus,

Opona enîhra awexirî ke so mak mehn̂acow okwe.

On wara wîîkes awya so,

wahra cik nasî mostata yatho.

Ero wicakî cik mak exitaw opona entopo awya so îîpî yen̂epen̂e me rma maxe yiixe awexitaw so.

Ai,

îîpî,

mîîna etok ha,

mîîkexe îîpî ya rma.

Ero wa kache awya so îîpî tak awewecaxe so.

Ahce na poko ehnara ro mak maxe ero wa opona een̂ataw awya so.

21 Wara rma rikomo ropotaw n̂eexi worokyam noro yipu yen̂epera rma maxe yohno.

Kaan yakro amtapowataw so mak,

pahkî eseresmara awexitaw so marha,

ero yimaw mak noro yipu komo men̂epexe,

kekn̂e Xesus yîwya so.

Ero wa kekn̂e.

22 Taa,

ero yinhîrî tak Karireia rowon pore rma cetken̂e Xesus komo.

Ero yimaw on wara kekn̂e Xesus tînpanatanmekrî komo ya,

On wara men wîîkes awya so,

Tooto me Ewruxapu tak men n̂ekanîyaxe waihkapotome tak yiixatî pîn komo ya.

23 Ero ke tak Noro pen waihkexe.

Kaanî tko n̂enpakes hara amn̂e osorwaw ro enmapuche,

kekn̂e yîwya so.

Ero yipu yentache ahwora ro mak tak xatken̂e yînpanatanmekrî komo.

Ero wa xatken̂e.

24 Taa,

ero yinhîrî Xesus komo tak cetken̂e Kapanaun pona hara.

Iito exitaw so iitono komo tî mokyatken̂e Petru yaka.

Tîmsom pokono komo purantan yahsîn̂e tî mîkyam xatken̂e.

On wara tî ketken̂e yîwya,

Ai Petru,

ahce wa nai apanatanmekn̂e kom ha?

Tîmsom pokono komo purantan nîmya,

tîmîhra katî nai?

ketken̂e tî yîwya.

25 Nîmyasî rma wa ha,

kekn̂e tî Petru yîwya so.

Amn̂e tak mîîmo yaka cekn̂e hara Petru.

Iito tî xakn̂e Xesus mîîmo yaw.

Yîmtapotara rma ka exitaw Petru,

on wara tak Xesus kekn̂e yîwya,

Ai Simaw,

ahce wa natu kayaritomo komo,

mîn hak pono komo,

awya?

Onok purantan xa nahsîyatu cepethîrî komo me awya?

Tumururu purantanî rma katî nahsîyatu awya,

tîyanan pîn komo puruntan katî?

kekn̂e Xesus yîwya.

26 Anarî komo ya mak n̂epemapetu,

kekn̂e Petru yîwya.

Yaaro mîîkesî,

kekn̂e Xesus yîwya.

Ero ke epeman̂e pîn me naxe yumumuru komo.

27 Wara rma n̂examro yepemara kexitaw so kicicme men keen̂atu so okwe.

Ero ke n̂ikitho kwaka etoko amoro.

Iina tak ar̂makî akiwin.

Yihcirî me anîmxapu yîmtayankakî.

Karantaw tak meen̂asî exepeyu.

Ero rma tak arko tîmsom pokono komo yaka.

Oyepetho me tîmko,

awepethîrî me marha,

kekn̂e Xesus yîwya.

Ero wa kekn̂e Xesus Petru ya.