Cirihnî Ika Cirko Amna N̂enîrî, Kexe Parisew Komo, Satusew Komo Marha
16
Taa,
ero yinhîrî Parisew komo makîrha tak mokyatken̂e Xesus yaka Satusew komo yakro.
On wara ketken̂e yîwya,
Apa,
cirihnî cma re miir̂asî amna wero ro,
Kah yawno yanme xa nai ham,
kachome amna ya apoko,
ketken̂e yîwya.
Xesus mak tî nukukmetken̂e ero wa kacho poko.
2 On wara tko n̂eyukyakn̂e Xesus,
Kaapu rma re meen̂axe amyamro.
On wara mîîkexe kokon̂i,
Kaamo me tak nai ham amn̂e pahxaxa.
Enko xe,
cucure nasî kaapu,
mîîkexe.
3 Enmapuche tak on wara mîîkexe hara,
Tuuna me nai ham amn̂e oroto,
Enko xe,
cucure nas hara kaapu.
Tuuna yewru ken̂e marha nasî,
mîîkexe.
Tohnaw cesenposom komo amyamro okwe.
Camkîra maxe kaapu poko.
Camkî tko maxe okwe Kaan ya ciino ritopo kuknon poko,
kekn̂e Xesus yîwya so.
4 Kicicme awexirî ke so mak ero wa mîîkexe owya,
Cirihnî ika cirko,
Kah yai mohxapu Mîk ham,
kachome amna ya,
mîîkexe owya.
Cipici yai ro cehsom warai mak amyamro okwe.
Ero ke ero wa mîîkexe owya.
Kaan yanme oyehtopo kuknon yenpora rma nasî Kaan awya so.
Xonas pen yehtoponho makî reha nasî ero wa oyehtopo kuknon me an̂enîrî kom ha,
kekn̂e Xesus yîwya so.
Ero wa mak kekn̂e Parisew komo ya,
Satusew komo ya marha.
Ero wa kache yîhyai so tak cekn̂e Xesus anana.
Ero wa xakn̂e.
Kuuru Komo Wahrututpamnotopo Warai Pokohra Ehcoko, Kesî Xesus
5 Taa,
ero yinhîrî eeco pona tak cetken̂e Xesusu npanatanmekrî.
Tuuru komo yarîhra ro mak xatken̂e okwe.
Nîtwen̂ekarînwatken̂e mak okwe.
6 Ero ke tak on wara kekn̂e Xesus yîwya so,
Twerî men ehcoko puruma wahrututpamnotopo poko,
Parisew komo yaw nasî,
Satusew komo yaw marha nasî,
ero poko twerî ehcoko,
kekn̂e yîwya so.
7 Camkî tko n̂encetken̂e yîmtapotarî.
Ero ke n̂esencetken̂e ero poko.
Ahce kacho ero wa nîîke kîwya so?
Poramra kmokrî ke so xa na ero wa nîîke kîwya so?
ketken̂e.
Ero wa n̂esencetken̂e.
8 Esentacho komo rma tko nîhtînoyakn̂e Xesus.
Ero ke on wara kekn̂e yîwya so,
Opona enîn̂e pîn wara maxe ha re okwe.
Ahce kacho poramra kmohtopo komo poko mesencetu?
9 Camkî rma ma mat okwe?
Mîtwen̂ekarîntace katî 5.000 komo iyurmachonho poko 5 maknonhîrî ke cuure.
Etîmtoxapu mamehce kahxapu yaka,
yakeno yaka,
ero yipu poko ma mîtwen̂ekarîtacow?
10 4.000 komo yurmachonho poko twen̂ekarî marha mat ham okwe,
7 maknonhîrî ke hara.
Ero yimaw marha etîmtoxapu mamekyatken̂e hara kahxapu yaka,
porinî mko yaka.
Yakeno yaka xa marha mamekyatken̂e hara,
ero yipu poko marha ma mîtwen̂ekarîntace hara okwe?
11 Ahce kacho camkî mentacow omtapotarî?
Kuuru wahrututpamnotopo pokono pînî ro mak mîn omtapotarî,
Twerî men ehcoko puruma wahrututpamnotopo poko.
Parisew komo yawno poko twerî ehcoko,
Satusew komo yawno poko marha,
wîîka rma re anarî men poko mak ha tko,
kekn̂e yîwya so.
12 Ero yipu yentache sara wara xa tak n̂encetken̂e yîmtapotachonhîrî.
Puruma wahrututpamnotopo poko kahra n̂ex ham.
Parisew komo ya panatanmekno ritopo poko mak nîîka ham,
Wahrututpamnotopo,
kacho.
Satusew komo ya panatanmekno ritopo poko marha nîîka ham,
ketken̂e tak.
Ero wa ketken̂e.
Kristu Xa Amoro, Kesî Petru Xesus Ya.
13 Taa,
ero yinhîrî miya tak cekn̂e Xesus Sesareia Piriposu pona tak.
Iito cexitaw on wara kekn̂e tînpanatanmekrî komo ya,
Tooto me Ewruxapu Ow ha.
Ahce wa xa katî ketu tooto komo opoko?
Noro mîk ham kacho yîwya so ekatîmcoko owya,
kekn̂e yîwya so.
14 Ero ke on wara n̂eyukyatken̂e n̂examro,
Xuaw Bacista xa Mîk,
kexe anarî komo apoko.
Eriasî tko na Mîk owya,
kexe anarî kom hara.
Xeremias tko na Mîk owya,
kexe anarî komo xa hara.
Anarî xa na Mîk owya weronomano rin̂enho pen komo yakrononho,
kexe anarî kom hara apoko,
ketken̂e yîwya.
15 Taa,
ahce wa mîîketu amyamro hara opoko,
kekn̂e tak Xesus yîwya so,
onoke xa Ow awya so hara?
kekn̂e yîwya so.
16 On wara n̂eyukyakn̂e Simaw Petru,
Kristu xa Amoro,
Kaan Mumuru xa,
waipînî ro mumuru ha,
kekn̂e yîwya.
17 On wara kekn̂e hara Xesus yîwya,
Simaw amoro Xonas mumuru ha.
Kaan nakronomatho xa amoro.
Tooto mak ero wa oyehtopo enpora xakn̂e awya.
Apapa kah yawno mak nîhtînomexpoi awya.
18 On wara marha wîîkes awya,
Petru amoro,
toopu kacho rma.
Ero pono me tak oyakrono komo wiir̂as amn̂e toh pono me ha.
Mîîmo warai me on̂irirî mîkyam oyakrono komo,
toh pona ciisom ha.
Ero ke wehto imo metatan nukurunkexe ero wa ciixapu komo,
iyopono me so exihra ro mak nasî,
kekn̂e Petru ya.
19 Amn̂e Kaan maywen me tooto komo yehtopo yewkacho tak wîmyas awya.
Ahce na yahruyataw awya tan roowo po ero xa marha nahruyas hara Kaan kah yaw.
Ahce na yahrunketaw hara awya tan roowo po ero xa marha Kaan nahrunkes hara kah yaw.
Ero wa mas amn̂e,
kekn̂e Xesus Petru ya.
20 Ero yinhîrî on wara kekn̂e hara Xesus tînpanatanmekrî komo ya,
Ow ekatîmra ro mak men ehcoko.
Kristu xa Mîkro Xesus,
kahra ro mak ehcoko opoko,
kekn̂e yîwya so.
Ero wa kekn̂e.
Twaihkacho N̂ekatîmyasî Xesus, Tpakacho Marha N̂ekatîmyasî
21 Ero yinhîrî on wara kekn̂e hara Xesus tînpanatanmekrî komo ya,
Amn̂e tak Xerusaren pona kîwces hara.
Kaan yanme rma kîwcesî.
Iito oyexitaw oyemetanmekyaxe poritomo komo,
tîmsom pokono yenîn̂e komo marha,
apanatanmetopo mewren̂e komo marha.
Miya xe xa oyemetanmeyaxe.
Owaikexe marha amn̂e okwe.
Osorwaw ro enmapuche tko oyenpakes hara Kaan,
kekn̂e.
Ero yimaw xa twaihtopo yekatîmtopo n̂ihciyakn̂e Xesus.
22 Ero yipu yentache Petru ya Xesus tak naar̂akn̂e anana n̂he,
nîtwermekn̂e takî tî.
On wara tî kekn̂e yîwya,
Apa,
ero wa kahra ro mak esko okwe,
kekn̂e tî yîwya.
Awemetanmekîra ro mak wa naxe ha,
awaikara marha wa naxe ha,
kekn̂e tî.
Ero wa tî kekn̂e Petru Xesus ya.
23 On wara takî tî Xesus n̂eyukyakn̂e hara Petru ya,
Omkai kr̂a esko Satanas.
Anarî me ro mak amtapotarî wencesî kica.
Kaan yanmen ponarora mas okwe,
tooto yanmen ponaro mak masî kica,
kekn̂e Petru ya.
Ero wa tî kekn̂e Xesus yîwya.
24 Ero yinhîrî on wara kekn̂e hara Xesus tînpanatanmekrî komo ya,
Owenari roro amoku xe awexitaw so yiixe awehtoponhîrî komo tak yîpînînkacoko.
Tpanaxkem marha tak anîmcoko anarîrî ro komo.
Ero wa awexitaw so owenari tak amohcoko,
kekn̂e.
25 Anarimaw yiixe awehtopo komo yîpînînkara na matu.
Ero wa awexitaw so mahsîpînkexe rma thakwa amn̂e okwe.
Mîpînînketu rma na anarimaw ooxe awexirî ke so mak.
Ero wa awexitaw so reha,
ahyaw so rma nasî anpînînkathîrî komo.
26 Ahce wa nai tooto ahnoro roowo pono yahsîtîketaw na,
cekatî yakir̂wamapora mak cexitaw Kaan ya?
Tawake ma re nai noro yipu?
Pîra thakwa okwe,
twaihsom me mak nas okwe.
Ahce ma re kekatî yepetho yecenarîno me nai?
Pîra ro mak okwe.
27 On wara marha wîîkes awya so,
kekn̂e,
Tooto me Ewruxapu mokyas hara amn̂e.
Kir̂wanî ro me tak Noro meen̂axe ero yimaw.
Apapa wa xa marha Noro meen̂axe kir̂wanî ro me.
Noro yancun komo yakro marha mokyasî.
Ero yimaw tak awepemexe so Noro ahce na poko awehtoponhîrî komo yepetho yecenarî.
28 Yaaro tan wîîkes awya so,
kayaritomo me xa tak n̂esenpes amn̂e Tooto me Ewruxapu.
Waipîra rma ka maxe ero yimaw.
Ero ke ero wa Noro yesenpotopo meen̂axe,
anarî komo mak,
kekn̂e yîwya so.
Ero wa kekn̂e Xesus tînpanatanmekrî komo ya.