Taa,

ero yinhîrî tak Xesus yaka mokyatken̂e Parisew komo,

Xerusaren pono komo.

Kpanatanmetopo mewren̂e komo yakro mokyatken̂e.

2 On wara ketken̂e Xesus ya,

Ai Apa,

ahce kacho poritomo penî mtapotarî yewetîra nat hara anpanatanmekrî komo?

Esemokara rma n̂eseresmexe kopi.

Ahce kacho ero wa natu kica?

ketken̂e Xesus ya.

3 Yîmtaka so tko Xesus n̂eyukyakn̂e on wara,

Ahce kacho Kaanî mtapotarî yewetîra matu amyamro hara?

Aporin pen komo mtapotarî ponaro awexirî ke so Kaan yewetîra maxe okwe.

4 On wara kekn̂e Kaan awya so,

Ayopono me so encoko aamo komo anocwan komo.

Tîîm yeremkan̂e exitaw waihkacoko,

tîson yeremkan̂e marha waihkacoko,

kekn̂e.

Ero wa kekn̂e Kaan awya so.

5 On wara mîîkexe amyamro reha,

Anarimaw ahce na nai ahyaw so aamo komo ya tîmsomu cma re,

anocwan komo ya tîmsom marha.

Yiixe ehtopo komo rma mîn ahyawno.

Wara rma Kaan ya xa matko wîmye,

mîîkexe.

6 Ero wa awemyawno komo tîmyataw Kaan ya,

aamo komo ya tîmîhra ro mak cexpore nasî,

anocwan komo ya marha tîmîhra cexpore,

mîîkexe kica amyamro.

Kaan yanwetopo rma mîn ero wa awehtopo komo.

Aporin pen komo mtapotachonho yewetîtopo mak mîn kica.

7 Tohnaw cesenposom komo mak amyamro kica.

Yaaro xa kekn̂e Isaias pen apoko so ham.

8 On wara kekn̂e noro pen,

Oponarono wara rma re nîmtapowaxe moxam.

Ooxera rma tko naxe okwe.

9 Oporinî ro Amoro okre,

kexe cma re opoko.

Tooto mtapotarî poko makî tko n̂epanatanmekyaxe okwe,

kekn̂e apoko so Isaias pen.

Yaaro kekn̂e ham okwe,

kekn̂e Xesus yîwya so.

10 Taa,

ero yinhîrî mer̂pono pîn komo rma tak nan̂ikyakn̂e Xesus.

On wara kekn̂e yîwya so,

Omtapotarî men entacoko.

Takîhso marha ehcoko an̂entathîrî komo poko.

On wara wîîkes awya so,

11 Akiciciren̂e komo mera nasî amtaka so ciixapu reha.

Amtai so cepatakaxmu makî reha nasî akiciciren̂e komo me,

kekn̂e Xesus yiwya so.

12 Ero yinhîrî Xesus mîtkoso tak cetken̂e yînpanatanmekrî komo,

akro tîmtapotachome so.

On wara ketken̂e yîwya,

Ero wa kacho kicicme n̂entacow Parisew kom okwe.

Ero wara rma katî n̂examro mîhtînopu?

ketken̂e yîwya.

13 On wara tko kekn̂e hara Xesus yîwya so,

Naatî ciixapu wara rma naxe tooto komo.

Anarî komo naxe Apapa n̂iritho pîn wara,

kah yawno n̂iritho pîn wa ha.

Amn̂e tak n̂emohketîkexe okwe ero warai komo reha.

Yimicinthîrî komo meero n̂emohketîkesî.

14 Ero ke Parisew komo ponarora ro mak ehcoko,

n̂ehcowpe mak.

Awan̂e komo me tî re natu n̂examro.

Ewuhnî me makî tko naxe okwe.

Ahce wa thakwa re ewuhnî komo naar̂atu ewuhnî komo xa marha kopi?

Asakno roro rma thakwa n̂epîrkexe ewtarî yaka okwe,

kekn̂e Xesus yîwya so.

Ero wa kekn̂e.

15 Ero yinhîrî on wara tak kekn̂e Petru Xesus ya,

Camkî amna n̂enta okwe amtapotarî anarî pokono wara mekatmo oroto,

ero.

Mentamexpesî cma re amna ya,

kekn̂e yîwya.

16 Ero ke on wara kekn̂e Xesus yîwya so,

Yuhnari yîhtînon̂e pîn me rma mat amyamro meero?

17 Camkî ma mat okwe?

Kîmtarî yaro cermomyaxe knahrî komo,

kwethîrî yaka cesî.

Amn̂e kupun yai rma ces hara.

Ero wa mak reha nasî knahrî komo.

18 Anarme reha nasî kîmtai so cepatakaxmu reha.

Kropotai so rma mokyasî.

Kicicme kiin̂e xa mîn ero yipu.

19 On warai mokyasî tooto komo ropotai,

kicicitho poko esehtînotopo komo,

waihkano ritopo,

cipici yai ro ehtopo komo,

mîk hak wooxam poko ehtopo komo,

en̂epan komo,

tpoyino komo poko cemarontacho komo,

kicicme yîmtapotacho komo Kaan poko marha.

20 Ero wa ehtopo komo xa nasî kicicitho me ciin̂e me tak ha.

Kicicitho me awirira so nasî esemokara aweseresmacho komo,

kekn̂e.

Ero wa kekn̂e Xesus tînpanatanmekrî komo ya.

21 Taa,

ero yinhîrî anana tak cekn̂e hara Xesus.

Miya n̂he tak cekn̂e Ciru mîtwono pona,

Siron mîtwono pona marha.

22 Iito exitaw wooxam tak mokyakn̂e yîhyaka,

Kanan pono ha.

On wara kekn̂e Xesus ya,

Apa,

Tapi yepamtho Amoro,

opînîn yaw n̂he thakwa esko.

Oyemsîrî ropotaw nasî worokyam.

Nîwîrîmesî ro mak okwe,

kekn̂e Xesus ya.

23 Eikura ro makî tko xakn̂e Xesus.

Ketîkekn̂e rma tko wooxam yîwya.

Ero ke tak on wara tak ketken̂e yînpanatanmekrî komo yîwya,

Apa,

noro en̂epeko.

Kewrucpexe so mak kica.

Yîtîtmamra ro mak kes okwe,

ketken̂e yîwya.

24 On wara mak kekn̂e Xesus yîwya so,

Ixaw Yana komo yaka makî reha oyen̂epekn̂e Apapa.

Tacixapu thakwa mîkyam okwe,

oper̂a wara,

25 Ero yinhîrî Xesus yaka xa tak mokyakn̂e wooxam.

Tosokmuru po tak n̂eremekn̂e Noro mamaka.

Apa,

kekn̂e,

owî n̂he akronomak okwe,

kekn̂e tak yîwya.

26 On wara tko n̂eyukyakn̂e Xesus,

Kîmxîkrî komo iyurkara cexpore nasî xaparî xîkrî yuru me tîmtome hara,

kekn̂e yîwya.

27 On wara tak n̂eyukyakn̂e hara wooxam,

Yaaro Apa,

xapari xîkrî rma tko nokyasî tosom xîkrî nahrî mîtîtho,

apon poi emarakaxapu ciki,

kekn̂e Xesus ya.

28 On wara kekn̂e Xesus yîwya,

Okopuci,

opona enîn̂e xa amoro ham okre.

Ero ke yiixe awehtopo yaw roro tak n̂expe awemsîrî,

kekn̂e yîwya.

Ero wa Xesus kekn̂e wooxam ya.

Ero ke ero yimaw rma tak kir̂wan̂he xakn̂e emsîrî worokyam ken̂arînho.

Ero wa xakn̂e.

29 Taa,

ero yinhîrî en̂exa tak Xesus cekn̂e hara.

Karireia n̂ikithon yecihtari cekn̂e.

Îîpî nawnukyakn̂e hara.

Iina tak n̂eremekn̂e îh pona.

30 Iito exitaw merpono pîn komo tak mokyatken̂e xa hara yîhyaka.

Okopu komo n̂ekyatken̂e yîhyaka.

Yîhrepun komo,

ewuhnî komo,

amohnî komo,

yîmtapotan komo,

anarmerpan ke ceper̂ayem komo,

ero warai komo n̂ekyatken̂e Xesus yaka.

Noro yamrinaka n̂ir̂mekyatken̂e.

N̂examro tak nakir̂wamekn̂e Xesus.

31 Ero ke n̂eserepoketken̂e tak mohxapu komo Xesus poko,

akir̂wamano ritopo poko yîwya.

Yîmtapotanînhîrî komo nîmtapowatken̂e hara okre.

Amohnînhîrî komo marha tamoke tak xatken̂e hara,

yîhrepunînhîrî komo tak n̂etar̂atken̂e hara,

ewuhnînhîrî komo cewke tak xatken̂e hara.

Ero yipu yenîrî ke n̂eserepoketken̂e ro mak.

Kir̂wan̂he nai ham okre Kporin komo,

ponaro Ixaw Yana komo yehtopo,

ketken̂e tak ero yimaw.

Ero wa ketken̂e.

32 Ero yinhîrî tak tînpanatanmekrî komo nan̂ikyakn̂e Xesus.

On wara kekn̂e yîwya so,

Moxam pînîn yaw was okwe.

Osorwaw ro n̂enmacow tan ohyaw.

Yînahrî komo exihra tak nas okwe.

Eseresmara rma en̂epeno ciri xera wasî.

Ero wara rma en̂epetaw so owya n̂ekar̂kexe ro mak tak okwe esama yaw,

kekn̂e yîwya so.

33 On wara tak n̂eyukyatken̂e n̂examro,

Okyo,

mer̂pono pîn komo moxam okyo.

Ahtono thakwa re ceen̂atu iyuru komo?

Tanî thakwa taxe pohnîntaw okwe,

ketken̂e hara yîwya.

34 Atî wicakî cik nai awru kom ha?

kekn̂e hara Xesus yîwya so.

7 mak nas okwe,

ketken̂e.

Ootî cik marha nasî asak mak,

wahrai komo mak okwe,

ketken̂e.

Ero wa ketken̂e Xesus ya.

35 Ero ke tak eremanmekno n̂iir̂akn̂e Xesus roowo pona.

36 Ero yinhîrî tak cuure nanîmyakn̂e 7 mko ha.

Ootî marha nanîmyakn̂e.

Kaan yakro ka nîmtapowakn̂e.

Kir̂wan tan amna yuru anmîthîrî Apa,

kekn̂e yîwya.

Ero wa kache poikekn̂e,

tînpanatanmekrî komo ya nîmyakn̂e.

N̂examro tak n̂ekamyatken̂e yînahrî komo.

37 Ero ke mohxapu komo tak n̂eseresmetken̂e ahnoro,

tmaxmitaxi ro so okre.

Eseresmache so etîmtoxapu tak namekyatken̂e.

Kahxapu yaka tak namekyatken̂e.

7 tî xakn̂e een porin komo rma.

Ero wicakî xakn̂e etîmtoxapu rma.

38 4.000 mîkyam xatken̂e eseresmaxapu komo kîrkomo kuknomacho mak.

Wooxam komo marha xatken̂e iito,

rikomo komo marha.

39 Ero yinhîrî tak en̂epeno n̂iir̂akn̂e hara Xesus.

Toche so kanawa yaka tak n̂esenkayakn̂e.

Makatan pona tak cekn̂e.

Iina nawomyakn̂e hara.

Ero wa xakn̂e Xesus.