Taa,

Karireia po exitaw Xesus Noro yekaci takî tî n̂encekn̂e Eroces.

Kayaritomo mîk xakn̂e Eroces,

mer̂pono pîn komo kayaritomon.

2 Xesus yekaci yentache on wara tî kekn̂e noro tmaywen komo ya,

Xuaw Bacista mîk owya.

Pakai hara mî.

Ero ke cirihnî mko n̂iir̂a,

kekn̂e tî yîwya so.

Ero wa tî kekn̂e Eroces Xesus poko rma.

3 On wara tî xakn̂e Eroces,

pahxa rma tî Xuaw pen nahsîyakn̂e,

napomiyakn̂e marha,

nahruyakn̂e marha okwe.

Erocias yanme tî nahruyakn̂e.

Eroces yakno cinho tî mîk xakn̂e Erocias,

Piripi cinho ha.

4 On wara tî kekn̂e Xuaw Eroces ya,

Awakno komo cinho ahsîra ro mak ehcoko,

kesî kpanatanmetopo,

kekn̂e tî yîwya.

5 Ero wa karî ke Xuaw pen nahruyakn̂e Eroces.

Waihka xe marha tî xakn̂e.

Nukurunanîyakn̂e ha tko tî Xuaw mtapotarî yentan̂enho komo pona.

Merpono pîn mîkyam xatken̂e entan̂enhîrî komo.

Weronomano rîn̂e me tî noro nîhtînoyatken̂e.

Ero ke n̂examro pona nukurunanîyakn̂e Eroces.

6 Ero yinhîrî takî tî Eroces yewrutoponho me n̂enmayakn̂e.

Ero po Eroces maywen komo tî mokyatken̂e eseresmaxi noro yakro.

Eseresmetaw so Erocias yemsîrî takî tî mokyakn̂e manîmso ceseresmaxmu komo n̂enîrî me.

Kir̂wan̂he xa tî Eroces n̂een̂akn̂e emasî manîmrî.

7 Ero ke on wara tî kekn̂e Eroces yîwya,

Ahce xe mai ha okopuci?

Ero xe wasî,

kasko mak owya.

Yiixe awehtopo wîmyas awya.

Yaaro xa tan wîîkes awya esemîknopîn me ro makî,

kekn̂e tî Eroces yîwya.

8 Ero ke on wara takî tî emasî n̂eyukyakn̂e,

Xuaw Bacista pîtho xe mak wasî.

Owya cma re mîmyasî paayu yaw,

kekn̂e tî Eroces ya.

Tînocwan yanme makî tî ero wa kekn̂e.

9 Ero yipu yentache nahwokekn̂e takî tî Eroces okwe.

Esemîknopîn me thakwa tko tî kekn̂e emasî ya.

Ceseresmayem komo n̂entarî me marha tî kekn̂e.

Ero ke emasî takî tî n̂ewehcakn̂e.

On wara takî tî kekn̂e tanton ya,

Taa,

Xuaw pîtho ehta tîmtome emasî ya.

10 Yîpîmkotota kahrutopo yaw rma,

kekn̂e yîwya.

Ero ke yîmtapotarî yaw roro rma xakn̂e Eroces yanton.

11 Yîhtîpîthîrî takî tî n̂ekyakn̂e paayu yaw.

Emasî ya tî nîmyakn̂e.

Noro takî tî naar̂akn̂e tîson yaka.

Ero wa tî Xuaw pen waihyakn̂e okwe.

12 Ero yinhîrî takî tî mokyatkn̂e noro penî npanatanmekîtho komo okoputhîrî yaaso,

ahrutome tak.

Ahruche takî tî Xesus yaka cetken̂e waihtoponhirî yekatîmso.

Ero wa tî xatken̂e.

13 Taa,

Xuaw pen waihtoponho yentache kanawa yaw tak Xesus cekn̂e anana.

Pohnîntaka cekn̂e cewyaro n̂he cehtome cma ha re.

Totopo tko tî n̂encetken̂e ewto pono komo,

mer̂pono pîn.

Ero ke Xesus yenso takî tî cetken̂e îh pore mak.

14 Amn̂e tak Xesus nawomyakn̂e ecihtaka.

Iito tak tooto pen n̂een̂akn̂e hara mer̂pono pîn xa hara.

Yîpînîn yaw so rma tko xakn̂e.

Ero ke tamotosom komo tak nakir̂wamekn̂e yîn̂ekîthîrî komo.

Ero wa xakn̂e.

15 Taa,

kokon̂i xa tak Xesus yaka tak cetken̂e yînpanatanmekrî komo.

On wara ketken̂e yîwya,

Ai Apa,

kokmamyasî tak okwe,

pohnîntaw ro mak taxe tan okwe.

Ero ke moxam en̂epeko hara ewto pona so totohme so tînahrî komo yaponso,

ketken̂e Xesus ya.

16 On wara tko Xesus n̂eyukyakn̂e hara,

En̂epeno cirihra cexpore nasî.

Amyamro rma xa matko yînahmano ciicoko,

kekn̂e yîwya so.

17 Okyo,

ketken̂e yînpanatanmekrî komo yîwya hara,

5 mak nas amna yaw cuure cik okwe.

2 mak nas ootî.

Ero wicakî cik mak nas amna yaw okwe,

ketken̂e Xesus ya.

18 Taa,

ero rma ek ha,

kekn̂e Xesus yîwya so.

19 Ero yinhîrî tak eremanmekno n̂iir̂akn̂e Xesus cuh pona.

Ero yinhîrî cuure cik tak nahsîyakn̂e,

5.

Ootî marha nahsîyakn̂e,

2.

Kahsî n̂een̂akn̂e,

Kaan yakro nîmtapowakn̂e.

Apa,

kir̂wan̂he amna yuuru cirko,

amna yotî marha.

Amna kariton̂e me cirko,

kekn̂e.

Ero wa kache cuure tak poikekn̂e.

Tînpanatanmekrî komo ya tak n̂ekampekn̂e.

Ootî marha n̂ekampekn̂e yîwya so.

N̂examro tak n̂ekamyatken̂e mohxapu komo yotî me,

iyuru komo me marha.

20 Ero ke ahnoro rma tak n̂eseresmetken̂e tmaxmitaxi ro so.

N̂etîmcekn̂e rma cuure,

ootî marha.

Ero ke etîmtoxapu namekyatken̂e yînpanatanmekrî komo mer̂pora okyo.

12 een narîhcetken̂e etîmtoxapu ke.

21 Ero wa n̂eseresmetken̂e mer̂pono pîn komo rma.

Kîrkomo reha xatken̂e 5.000 okyo.

Wooxam komo meero xatken̂e iito,

rikomo komo marha.

Ero wa erewusmano n̂iir̂akn̂e Xesus.

22 Taa,

ero wa erewusmano riche yohno rma on wara kekn̂e Xesus tînpanatanmekrî komo ya,

Kanawa yaka tak esenkacoko.

Eeco pona tak etocoko.

Tan ka was Ow,

en̂epeno wiir̂asî,

kekn̂e yîwya so.

Ero ke cetken̂e n̂examro.

Iito rma xakn̂e Xesus en̂epeno rir̂î poko.

23 En̂epeno riitîkache îîpî tak tî nawnukyakn̂e Xesus.

Pohnîntaka tî cekn̂e yîmtapotaxi Kaan yakro.

Iito tî kokmamyakn̂e cewn̂e.

24 Ero yimaw kanawa yawno komo xatken̂e tuuna rakataw.

Kir̂wan̂he tohra xakn̂e kanawa kar̂pe ocowonîmrî ke yîramanîn̂e me.

Kanawa pen n̂ewsîyakn̂e yamarataka kopi.

Ero wa xakn̂e.

25 Taa,

amn̂e tak enmaporo Xesus cekn̂e yîhyaka so.

Tuuna ratari mak cekn̂e,

capicapi kekn̂e.

26 Noro yenîche tak yînpanatanmekrî komo n̂eraswatken̂e ro mak kopi.

Ekatînho tko mîkro kopi,

ketken̂e Noro poko.

N̂emtaraketken̂e ro mak cerahtîmrî ke so.

27 Yohno rma tko Xesus nîmtapowakn̂e.

Tahwore ehcoko,

kekn̂e.

Ow rma Ow ha,

ero ke erasîra mak ehcoko,

kekn̂e yîwya so.

Ero wa kekn̂e.

28 Taa,

on wara tak kekn̂e Petru Xesus ya,

Apa,

Xesus na Amoro.

Owî ika an̂ihko.

Tuuna ratari amok ha ohyaka,

kasko,

kekn̂e yîwya.

29 Taa,

amok ha,

kekn̂e Xesus.

Ero ke Petru tak nîhcekn̂e yukwaka,

curuhtow.

Capicapi,

tuuna ratari rma tak cekn̂e Xesus wece.

30 Amn̂e tko yamarataka n̂een̂akn̂e Petru.

Kar̂pe exirî ke ocowo porin me so xakn̂e yamarataka kopi.

Ero yipu yenîrî ke tak n̂eraswakn̂e.

Ero yimaw tak n̂enor̂akn̂e ha re Petru.

Apa,

ow ahsîko,

kekn̂e tak Xesus ya.

31 Ero ke yohno rma tak Xesus n̂etapoyankekn̂e Petru yahsîtome.

Ahsîche tak on wara kekn̂e yîwya,

Opona enîn̂e pîn wara n̂he mak mai ham okwe.

Ahce kacho opona enîhra meexi okwe?

kekn̂e yîwya.

Ero wa kekn̂e Xesus Petru ya.

32 Ero yinhîrî kanawa yaka tak n̂esenkayakn̂e Xesus.

Petru marha n̂esenkayakn̂e.

Ero yimaw rma nîtîtîn̂ekn̂e.

33 Ero ke tak Xesus mîtkoso cetken̂e kanawa yawno komo.

Nutupenwatken̂e Noro mamaka.

On wara ketken̂e yîwya,

Yaaro ham,

Kaan mumuru Amoro ham,

ketken̂e yîwya.

34 Ero yinhîrî eeco pona tak cetken̂e Xesus komo.

Xen̂esare pona tak nawomyatken̂e.

35 Xesus Mîkro ham,

ketken̂e tak iitono komo.

Ero ke Xesus yekaiporen̂e komo n̂en̂epetken̂e miyan komo yaka rma.

Xesus tak moko,

kacho yentache yîwya so yîhyaka tak n̂ekyatken̂e tamotosom komo ahnoro.

36 On wara ketken̂e Xesus ya,

Apa,

moso tamotosom.

Aponon perî makî cma re mapepesî yîwya,

ketken̂e yîwya.

Ero ke Xesus ponon perî tak napeyatken̂e.

Kir̂wan̂he tak xatken̂e hara okre apen̂enhîrî komo ahnoro.

Ero wa xatken̂e okre.