Taa,

on wara xakn̂e Xesus ero kaamo po rma,

n̂epatakekn̂e tak mîîmo yai.

Tuuna imo yecihtaka cekn̂e eremaxi.

2 Iito exitaw tooto pen komo tak mokyatken̂e xa hara yîhyaka.

Xesus wamcetken̂e mak mer̂pora exirî ke so.

Ero ke Xesus tak n̂esenkayakn̂e kanawa yaka.

Iina tak n̂eremekn̂e.

Ecihtaw rma xatken̂e yîhyaka mohxapu komo piiri.

3 Ero wa tak panatanmekno n̂iir̂akn̂e Xesus mîn hak poko.

Anarî pokono warai mak n̂ekatîmyakn̂e yîwya so.

On wara kekn̂e yîwya so,

Pahxa xakn̂e naatî ciin̂e.

Mararî pona cekn̂e tînatîrî yatho ciiso.

Puh sarara me mak pahyakn̂e mararî pona rma.

4 On wara tko xakn̂e yînpaputhîrî,

esama porero mak n̂epahyakn̂e anarî mko.

Amn̂e tak torowo komo mokyatken̂e ahso.

Nahtîketken̂e mak okwe.

5 On wara tak xakn̂e anarî mko hara roowo pona rma re n̂epahyakn̂e,

toh ken̂arî pona mak okwe.

Yohno rma natîkwakn̂e panape exirî ke roowo.

6 Amn̂e kaamo yawomuche atîhtaxapu ciki n̂etîyekn̂e kaamo ke.

Naawaiyakn̂e tak okwe yimicimra cexirî ke thakwa okwe.

Ero wa xakn̂e toh ken̂arî pona epahxapu okwe.

7 Anarî mko tak n̂epahyakn̂e peen cheka ro mak okwe,

cekyekyem cheka.

Amn̂e tak peen natîkwakn̂e naatî yopo.

Naatî tak n̂ipin̂oyakn̂e okwe.

Ero wa thakwa xakn̂e peen cheka epahxapu hara.

8 On wara tak xakn̂e anarî mko hara,

ewtî mexan pona tak n̂epahyakn̂e.

Ero ke n̂eperwakn̂e tak okre.

100 me n̂eperwakn̂e anarî mko okre.

60 me n̂eperwakn̂e anarî mko hara,

30 me tak n̂eperwakn̂e anarî mko hara.

Ero wa so n̂eperwakn̂e ewtî mexan pona epahxapu reha.

9 Ero wa kacho men entacoko entan̂e me awexitaw so ha,

kekn̂e.

Ero wa kekn̂e Xesus tîhyaka mohxapu komo ya.

10 Ero yinhîrî tak Xesusu npanatanmekrî komo cetken̂e yîhyaka.

On wara ketken̂e yîwya,

Ai Apa,

ahce kacho anarî pokono wa mak mîmtapowa n̂examro n̂entarî me?

ketken̂e yîwya.

11 On wara Xesus n̂eyukyakn̂e,

Camkîra maxe amyamro reha kah yawno maywen me awehtopo komo poko.

Kaanî cma ero yipu n̂entamexpes awya so entanînhîrî rma.

N̂examro ya reha entamexpora nasî.

12 On wara naxe kah yawno maywen me cehtopo yentan̂e komo,

anarî komo reha naxe sara wara entan̂e me okre.

Ero wa exitaw so yuhnari entan̂e me n̂he tak naxe okre.

Miya xe n̂he tak n̂encetîkexe okre.

Sara wara entan̂e pîn me exitaw so tko,

n̂etowtîkesî tak yîn̂entathîrî rma cik okwe.

13 Ero ke ero wa kîmtapowasî noro yipu komo yakro.

Kayaritomo me Kaan yehtopo yenîn̂e wara cma re naxe,

enîhra rma tko naxe okwe.

Entan̂e wara marha cma re naxe,

sara wara entara rma naxe okwe.

Ero wa exirî ke so anarî pokono wa mak wekatîmyasî yîwya so.

14 Isaias penî mtapotachonho yaw roro rma thakwa naxe okwe.

On wara kekn̂e noro pen,

Kaanî mtapotarî mencexe cma ha re,

sara wara entara rma tko maxe okwe.

Kayaritomo me Kaan yehtopo meen̂axe roro marha cma ha re.

Enîn̂e pîn wara rma tko maxe okwe.

15 Ceipamxapu wara ro mak n̂ehtîkekn̂e okwe moxam ropotarî.

Kentan̂e pîn me marha nasî panarî komo.

N̂esewyahruyatken̂e marha okwe.

Ero ke kenîn̂e pîn me mak naxe okwe cewkem komo rma.

Kentan̂e komo rma re naxe kentan̂e pîn me hara.

Ero wa cexi xe nat ham okwe,

ero ke akir̂wamara was okwe.

Ero wa thakwa naxe,

kekn̂e Isaias pen.

16 Ero warahra maxe amyamro reha,

Kenîn̂e me nas awewru komo reha,

kentan̂e me marha nas apanarî kom hara.

Ero ke tawake maxe okre.

17 Camkîra maxe Kaan maywen me awehtopo komo poko.

Ero yipu meen̂axe amyamro,

mencexe marha.

Yaaro tan wîîkes awya so,

mer̂pora xatken̂e pahxan pen komo aweroman̂enhîrî komo.

Kir̂wan komo marha xatken̂e mer̂pora hara.

N̂examro penî rma enî xe xatken̂e,

meen̂axe amyamro,

ero.

Enta xe marha xatken̂e,

mencexe amyamro,

ero xa marha,

kekn̂e.

Ero wa kekn̂e Xesus tînpanatanmekrî komo ya.

18 Taa,

wentamexpesî awya so naatî pahn̂e pokono,

kekn̂e tak Xesus tînpanatanmekrî komo ya.

On wara kacho mîn,

19 Kah yawno maywen me cehtopo komo rma re n̂encexe anarî komo.

Camkî mak n̂encexe okwe.

Entache amn̂e Kicicitho tak mokyasî yîn̂entathîrî komo yowso,

yîropotaka so pahxapunhîrî.

Esama porero pahxapu wara nasî noro yipu komo ya n̂entatho.

20 On wara naxe anarî komo hara,

toh ken̂arî pona pahxapu wara nasî yîn̂entathîrî komo hara.

Kaanî mtapotarî yentache rma tak nahwowaxe ero poko yohno.

21 On wara tko naxe ero wa entan̂e komo,

yimicimnî wara mak naxe okwe.

Ero ke yohno mak naxe tahwore Kaan poko.

Amn̂e tak n̂esemetanmekyaxe hara okwe.

Kaanî mtapotarî ponaro exirî ke so n̂emetanmekyaxe yiixatî pîn komo okwe.

Ero ke nahwokexe tak tahworemînhîrî kom okwe.

22 Anarî komo tak n̂encexe hara.

Cekyekyem ken̂arî pona pahxapu wara tak nasî yîn̂entathîrî kom hara.

Kaanî mtapotarî rma re ka n̂encexe kir̂wan̂he ha kapu.

Amn̂e tak roowo po cehtopo ro komo poko n̂esemyarîcetîkexe okwe.

Tahworen̂e me nîhtînoyaxe cemyawno komo.

Tohnaw mak ero wara nîhtînoyaxe kica.

Ero ke yipin̂oxapu wara mak nas okwe Kaanî mtapotarî yîn̂entathîrî kom ha.

Ero ke epetan me thakwa mak naxe okwe.

23 Anarî komo tak naxe on wara hara,

ewtî mexan pona pahxapu wara tak nasî yîn̂entathîrî komo okre.

Kaanî mtapotarî yencetaw sara wara n̂encexe okre.

Cepetaxmu me tak naxe okre noro yipu komo reha.

Anarî komo 100 me n̂eperwaxe,

anarî komo 60 me n̂eperwaxe,

anarî komo 30 me n̂eperwaxe hara.

Ero wa cepetaxmu me naxe okre,

kekn̂e.

Ero wa kekn̂e Xesus tînpanatanmekrî komo ya.

24 Taa,

ero yinhîrî tîhyaka mohxapu komo panatanmekyakn̂e xa hara Xesus.

Anarî pokono warai tak n̂ekatîmyakn̂e xa hara.

On wara kekn̂e yîwya so,

On wara marha nasî kah yawno maywen komo yehtopo,

mararî pona tînatîrî ciin̂e wara nasî.

Pahxa on wara xakn̂e mararî ciin̂enho,

kir̂wan komo re mak n̂iir̂akn̂e naatî yatho tmararîn pona.

25 Amn̂e tooto komo yîwînîkyataw mararî yosom xatî pîn tak mokyakn̂e okwe.

Noro yipu tak peen yatho n̂iir̂akn̂e hara kica.

Iina xa marha n̂iir̂akn̂e naatî yatho cheka rma kica.

Peen yatho ciriche cekn̂e hara.

26 Amn̂e tak naatî yatho natîkwakn̂e,

n̂eperwakn̂e marha.

Ero yimaw rma peen yatho tak natîkwakn̂e hara kica,

yiixatî pîn n̂iritho ha.

27 Ero ke mararî yosom yanton komo tak cetken̂e yîhyaka.

On wara ketken̂e yîwya,

Apa,

kir̂wan ma re miire ha ke amararîn pona naatî yatho.

Ahce kacho peen natîhta hara okwe?

ketken̂e yîwya.

28 Ai ha,

kekn̂e mararî yosom.

Kîîxatî pîn n̂iirî ham okwe.

Ai ha okwe,

ketken̂e tak maywen komo.

Ahce amna yexi xe mai?

Peen yatkaxi,

amna cee,

enmeso marha?

ketken̂e yîwya.

29 Pîra,

atkara ka ehcoko,

kekn̂e hara tko mararî yosom.

Peen yatketaw awya so naatî meero tko na mîmohkatu okwe.

30 N̂expe makî ka.

Amn̂e mak naatî yeperîrî yenmetopo me exitaw ero yimaw mak wantomesî enmekn̂e komo.

On wara wîîkesî yîwya so,

Peen cokorî ka atkacoko.

Awrutamicoko peen yeputho.

Miya kr̂a tak aacoko akn̂iso ha.

Ero yinhîrî naatî yeperîrî tak enmecoko hara omîn yaka,

wîîkesî yîwya so,

kekn̂e mararî yosom tanton komo ya,

kekn̂e Xesus yîwya so.

Ero wa kekn̂e Xesus tîhyaka mohxapu komo ya.

31 Ero yinhîrî anarî pokono wara xa hara n̂ekatîmyakn̂e Xesus yîwya so.

On wara kekn̂e yîwya so,

On wara marha nasî kah yawno maywen komo yehtopo,

mostata yatho wa mak nas hara.

Ero yipu n̂iir̂akn̂e naatî yosom tmararîn pona.

32 Wahraitho cik mîn mostata yatho anarî yatho mko xawyakan.

Atîhtache por̂mamtîkesî tak anarî yopo ro mak.

Weewe me tak nas okyo.

Tarin̂em komo tak mokyaxe peremru pona etahsîso.

Ero wa nasî mostata yatho,

kekn̂e.

33 Ero yinhîrî anarî pokono wara xa hara n̂ekatîmyakn̂e Xesus.

On wara kekn̂e yîwya so,

On wara marha nasî kah yawno maywen komo yehtopo,

puruma wahrututpamnotopo wa nas hara.

Ero yipu n̂esmekn̂e wooxam puruma cheka,

22 ritru cheka.

Ero yinhîrî wahrututpamyakn̂e tak puruma ahnoro,

kekn̂e Xesus yîwya so.

34 Ero wara n̂ekatîmyakn̂e Xesus iitono komo ya.

Anarî pokono warai mak n̂ekatîmyakn̂e yîywa so.

35 Ero warai n̂ekatîmyakn̂e Xesus kweronoman̂e penî mtapotachonho yaw roro rma cehtome.

On wara kekn̂e noro pen,

Anarî pokono warai mak wekatîmyasî yîwya so.

Mehxa ro ekatîmnînhîrî tak wekatîmyasî yîwya so,

roowo yakîhtotoponho n̂ixa ro ekatîmnînhîrî ha,

kekn̂e noro pen.

Ero wa kachonho yaw roro rma xakn̂e Xesus.

36 Taa,

ero yinhîrî tak centan̂enhîrî komo n̂en̂epekn̂e Xesus.

Toche so mîîmo yaka tak n̂ewomyakn̂e Noro.

Ero yimaw yînpanatanmekrî komo tak cetken̂e yîhyaka.

On wara ketken̂e yîwya,

Apa,

ahce wai pokono mîn mekatmo naatî chew peen yatîhtacho ha?

Mentamexpesî cma re amna ya,

ketken̂e yîwya.

37 Taa,

kekn̂e tak Xesus yîwya so,

on pokono xa mîn wekatmo naatî yatho ciitopo poko,

Tooto me Ewruxapu pokono rma mîn,

Kir̂wan n̂iir̂akn̂e,

naatî,

kacho.

38 Ahnoro roowo pono komo pokono mîn hara mararî,

kacho.

Kaan xîkrî komo pokono reha mîn,

Naatî yatho,

kacho.

Kicicitho ro xîkrî komo pokono reha mîn peen yatho kacho hara.

39 Ciabu pokono reha mîn,

Peen yatho n̂iir̂akn̂e,

mararî yosom xatî pîn,

kacho ha.

On wara awehtopo yenatîtopo yimawno pokono reha mîn naatî yenmetopo,

kacho hara.

Ancu komo pokono reha mîn hara,

Naatî yenmekn̂e komo,

kacho.

Ero warai pokono xa mîn wekatmo awya so.

40 On wara kacho mîn hara,

mararî yosom maywen komo tak peen natketken̂e,

akn̂itome,

kacho.

Ero wa xa marha men ciino wîîr̂as amn̂e.

On wara rma awehtopo komo yenatîtopo yimaw ero wa wîîr̂asî,

kacho mîn hara.

41 Ero yimaw on wara nasî Tooto me Ewruxapu,

tancun komo n̂en̂epesî enmekno rin̂e.

N̂examro tak Kaan maywen chewnonho n̂enmekyaxe.

Kicicitho poko pohkano rin̂enho komo n̂enmekyaxe.

Apanatanmetopo yewetîn̂e pîn komo marha n̂enmekyaxe.

42 Noro yipu komo tak nar̂mexe thakwa okwe wehto imo ywaka.

Iito tak nîwracexe ro mak okwe.

Nîyokrececenwaxe marha cerewîmrî ke oko.

43 Ero yimaw tak kir̂wan komo reha n̂esenpexe kir̂wanî ro me xa okre,

Tîîm komo maywen me.

Kaamo wara tak n̂esenpexe miyan komo n̂enîrî me rma.

Ero wa naxe kir̂wan komo ero yimaw.

Ero wa kacho men n̂entacowpe entan̂e me cehsom kom ha,

kekn̂e.

Ero wa kekn̂e Xesus tînpanatanmekrî komo ya.

44 Ero yinhîrî anarî pokono wara n̂ekatîmyakn̂e xa hara Xesus.

On wara kekn̂e,

On wara marha nasî kah yawno maywen komo yehtopo,

puranta wa nasî eyamxapu wa.

Ero wa tî xakn̂e puranta,

mararî po xakn̂e ceyamso mer̂pono pîn.

Amn̂e tak n̂een̂akn̂e iina mohxapu.

Ero ke tak n̂eyamyakn̂e hara.

Tawake ro mak xakn̂e puranta yenîrî ke.

Ero ke cemyawnonhîrî tak nîmtîkekn̂e epethîrî pona.

Ero yinhîrî cemyawnonhîrî yepetho pona tak nahsîyakn̂e mararî hara puranta xakn̂e iipo ero,

kekn̂e Xesus tînpanatanmekrî komo ya.

45 Ero yinhîrî anarî pokono warai n̂ekatîmyakn̂e xa hara yîwya so.

On wara kekn̂e hara,

On wara marha nasî kah yawno maywen komo yehtopo,

twarawantaxmu wa nasî.

Pahxa twarawantaxmu xakn̂e.

Perora cik n̂epor̂akn̂e.

Kir̂wan mak n̂epor̂akn̂e tînahsîrî ha.

46 Amn̂e tak kir̂wanî ro xa tak n̂een̂akn̂e perora.

Ero ke tak cekn̂e hara.

Cemyawnonhîrî tak nîmtîkekn̂e epethîrî pona.

Ero pona tak nahsîyakn̂e perora ciki,

tîn̂enîthîrî.

Ero wa xakn̂e noro,

kekn̂e Xesus yîwya so.

47 Ero yinhîrî anarî pokono warai n̂ekatîmyakn̂e xa hara Xesus.

On wara kekn̂e,

On wara marha nasî kah yawno maywen komo yehtopo,

mîîye wa nasî porin wa.

Pahxa mîîye nar̂metken̂e otî yemcinon̂e komo n̂ikitho kwaka.

Ero yaka tak n̂emciyakn̂e ootî komo mer̂pono pîn.

Anarmerpan komo n̂emciyakn̂e mîîye yaka miyan komo rma.

48 Copoyi exiche mîîye tak n̂ihxikyatken̂e emcinon̂e komo ecihtaka.

Iina n̂eremetken̂e ootî men̂ekachome.

Kir̂wan komo n̂enkayatken̂e kahxapu yaka.

Poxumnîtho komo reha nar̂metken̂e kr̂a.

Ero wa xatken̂e ootî yemcinon̂e komo.

49 Ero wa xa marha naxe tooto komo amn̂e roowo po ehtopo komo yenatîtopo yimaw,

ero yimaw tak ancu komo mokyaxe yîcherenonkano riso.

Kicicme cehsom komo nîcherenonkexe kir̂wan komo chewnonho komo.

50 Kicicme cehsom komo nar̂mexe wehto imo ywaka oco.

Iito tak nîwracexe ro mak okwe.

Nîyokrececenwaxe marha cerewîmrî ke so oco,

kekn̂e.

Ero wa kekn̂e Xesus tînpanatanmekrî komo ya.

51 Taa,

on wara kekn̂e xa hara Xesus tînpanatanmekrî komo ya,

Mîn hak tak wekatmo awya so.

Sara wara mentacow ha na ahnoro?

kekn̂e.

Nhnk,

amna n̂enta ahnoro,

ketken̂e yîwya.

52 Taa,

kekn̂e Xesus yîwya so,

Apanatanmetopo mewren̂e komo naxe tan achew so.

N̂examro tak n̂encexe omtapotarî hara.

Ero poko tak n̂ehcamhokexe.

Ero ke on wara naxe noro yipu komo,

mîîmo yosom wa naxe.

On wara naxe mîîmo yosom komo anarimaw so,

tîmîn yawnonho tak n̂enpexe anarmerpan.

Pahxantho n̂enpexe anarimaw,

yaxan marha n̂enpexe anarimaw hara.

Ero wa naxe mîîmo yosom komo.

Ero wa xa marha naxe apanatanmetopo mewren̂e kom hara.

Kah yawno maywen komo yehtopo poko cehcamhokaxi naxe,

kekn̂e.

53 Taa,

ero wa Xesus n̂ekatîmyakn̂e anarî pokono warai mko.

Ero yinhîrî anana tak cekn̂e.

54 Cekenhîrî pona tak cekn̂e hara.

Iito cexitaw Xutew yesenmetopo yaka cekn̂e.

Esenmexapu komo tak panatanmekyakn̂e.

Yîmtapotarî yencetaw n̂eserepoketken̂e iitono komo.

On wara ketken̂e Noro poko,

Onoke xa Moso nîhcamhokekn̂e takîhso xa ekatîmtome?

Onoke yanme xa cirihnî mko n̂iir̂a okyo?

55 Mîîmo ciin̂e ro mumutho mexe re ta Moso ha.

Maria mrerî mexe Moso.

Akno komo marha mexe naxe tan kîmîtwo so.

Ciaku,

Xose,

Simaw,

Xutas,

ero wa naxe akno komo.

56 Epeka komo marha naxe tan kakro so.

Ahto wa n̂ehcamhokekn̂e ero wara cehtome hara?

ketken̂e tî Xesus poko.

57 Ero ke Xesus takî tî nîîxatîmnoketken̂e okwe iitono komo.

Ero ke on wara Xesus kekn̂e hara yîwya so,

On wara naxe weronomano rin̂e komo,

anarî ro komo chew exitaw so naxe rma re iito yîmtapotarî ponarono komo.

Ekenî ro komo po exitaw so tak,

iyanan komo chew,

yîmtapotarî ponarono komo exihra tak naxe iito okwe,

kekn̂e Xesus yîwya so.

58 Ero wara rma xatken̂e iitono komo,

Xesus yekenho pono komo.

Noro pona enîhra xatken̂e okwe.

Ero ke yaake cirihra xakn̂e cirihnî mko iito okwe.

Ero wa xakn̂e Xesus.