Taa,

ero yinhîrî tak Xesus cekn̂e hara tînpanatanmekrî komo yakro.

Esama yaw cetken̂e mararî pore.

Sabatu po rma cetken̂e.

Ero yimaw nîromanatken̂e thakwa yînpanatanmekrî komo.

Ero ke puruma yeperîrî cik naxikwetken̂e ha re tînahrî komo me.

2 Ero yipu yahrî tko n̂een̂atken̂e Parisew komo.

Ero ke on wara ketken̂e Xesus ya,

Enko hara kica,

Moises pen nmewretho yewetîra naxe kica anpanatanmekrî komo.

Kepokaretopo po etapickara ro mak ehcoko,

kacho yewetîra naxe kica,

ketken̂e yîwya.

3 On wara tko n̂eyukyakn̂e Xesus,

Amyamro xa matko Kaan Karitan yenîhra matu ke Tapi pen yehtoponho ha?

Pahxa tî nîromanakn̂e thakwa Tapi pen okwe.

Akrono komo marha tî nîromanatken̂e.

4 Ero ke tak tî Kaan mîn yaka n̂ewomyakn̂e Tapi.

Iitono takî tî nokyakn̂e cuure Kaan ya tîmxapu.

Akrono komo meero nokyatken̂e.

Tîmsom pokono komo yuru mak mîn cuure,

kacho rma mîn xakn̂e.

Ero yipu rma tî nokyatken̂e Tapi komo.

Ero wa kacho yenîhra ma matu ke Kaan Karitan?

5 Anarî marha enîhra mat hara Moises pen nmewretho hara.

Sabatu po rma n̂ekaricexe tîmsom pokono komo cemyawno komo poko,

Kicicme maxe kica,

kacho mera rma naxe,

kesî.

6 On wara marha wîîkes awya so,

ponaro kehtopo rma re mîn Kaan mîn.

Anarî tko nasî tan ponaro awehtopo komo xa tak Kaan mîn yopono.

7 On wara marha kes hara Kaan Karitan,

Ahwokaxapu komo pînîn yaw awexi xe so xa wasî.

Yîpînîn yaw so exihra rma awexitaw so poxumra men ween̂asî anîmrî komo owya,

kesî.

Ero wa kacho sara wara xa entara mat ham ke.

Encetaw ketaw ha re awya so,

Kicicme naxe kica,

kahra mexirî ha re kicicme exihnî komo poko ha.

8 On wara marha wîîkes awya so,

Aporin komo rma Mîk Tooto me Ewruxapu.

Ero wa ehcoko sabatu po,

kan̂e rma Noro ha,

kekn̂e Xesus.

Ero wa kekn̂e Parisew komo ya.

9 Taa,

ero yinhîrî en̂exa tak cekn̂e hara Xesus.

Iitono komo yesenmetopo yaka cekn̂e.

10 Iito xakn̂e amohnî,

kîîrî.

Iito marha xatken̂e Xesus xatî pîn kom hara.

Kicicme Xesus yîmtapotare xe mak xatken̂e kica noro yen̂ekapotome kayaritomo komo ya.

Ero ke on wara ketken̂e yîwya,

Ai Apa,

ahce wa xa mîhtînoya Amoro,

Kir̂wan̂he nai Kaan ya sabatu po okoh komo yakir̂wamacho?

ketken̂e yîwya.

11 On wara n̂eyukyakn̂e Xesus,

Ahce wa xa matu awoku exitaw oper̂a?

Cewn̂e mak na nai.

Noro yipu rma na n̂epîrke ewtarî yaka sabatu po rma.

Ero wa epîrkache anmîra katî matu ero po ha?

Manîmyaxe rma wa ha,

kekn̂e.

12 Taa,

awoh komo pînîn yaw rma re maxe oper̂a pînîn yaw.

Miya xe xa tak tooto pînîn yaw cexpore nasî hara oper̂a yopo.

Ero ke akir̂wamano cirpore rma nasî sabatu po,

kekn̂e Xesus yîwya so.

13 Ero yinhîrî amohnî ya kekn̂e hara Xesus.

Ai,

oyakno,

etamoyankak ha,

kekn̂e yîwya.

Ero ke n̂etamoyankekn̂e tak amohnînhîrî rma.

Kir̂wan̂he tak xakn̂e hara amorî eeco wara rma okre.

14 Ero ke Kaan mîn yai tak n̂epataketken̂e Parisew komo.

Xesus waihkacho poko takî tî n̂esencetken̂e okwe.

Ero wa tî xatken̂e Parisew kom okwe.

15 Twaihkan̂e me rma tko tî nîhtînoyakn̂e Xesus.

Ero ke en̂exa tak cekn̂e hara.

Wenari rma cetken̂e mer̂pono pîn komo.

N̂examro tî nakir̂wamekn̂e Xesus,

ahnoro kar̂pen komo.

16 Akir̂wamache roro so on wara kekn̂e Xesus akîrwamaxapu komo ya,

Ow men ekatîmra ro mak ehcoko.

Xesus Mîk oyakir̂wama,

kahra ro mak ehcoko,

kekn̂e tî yîwya so.

17 Ero wa kekn̂e Xesus kweronoman̂e penî mtapotarî yaw roro cehtome,

Isaias penî mtapotarî yaw roro.

18 On wara tî kekn̂e Isaias pen pahxa,

Oyantonî ro Mîk,

ero warai me Noro wiir̂akn̂e ha,

yiixe oyehtopo xa okre.

Tawake xa wasî Noro poko okre.

Oyekatî wiir̂asî yîropotaka amn̂e Xenciu komo panatanmetome takîhso ehtopo komo poko.

19 Kîmtayar̂man̂e pînî ro mak Mîk.

Emtarakan marha Mîk.

Yîmtapotarî esentara nasî ewto roron po.

20 Cesemetanmesom komo naxe etatukmaxapu wara ha re,

noro yipu komo yaxikwon̂e pîn Mîk.

Eseikaporono wara naxe anarimaw.

Ero yipu yeihkatîkan̂e pîn marha Mîk.

Noro yipu Mîk.

Ero wa nasî Noro miya roro kicicme kehtoponhîrî komo yopono me ehtome takîhso kehtopo kom ha.

21 Amn̂e tak Noro yosotî ponaro naxe Xenciu komo,

kekn̂e tî Isaias pen.

Ero wa kachonho yaw roro rma xakn̂e Xesus.

22 Taa,

ero yinhîrî worokyam ken̂arî tak n̂ekyatken̂e hara yîhyaka.

Ewuhnî ro thakwa mîk xakn̂e yîn̂ekîthîrî okwe,

yîmtapotan marha thakwa.

Ero ke noro tak nakir̂wamekn̂e Xesus.

Ero ke tak nîmtpowakn̂e yîmtapotanînhîrî rma,

cewke tak xakn̂e hara ewuhnînhîrî rma.

23 Ero ke n̂eserepoketken̂e ro mak tak enîn̂e komo.

Tapi pen yepamtho rma tko na Moso okre,

ketken̂e.

Ero wa n̂eserepoketken̂e Xesus poko.

24 Yîmtapotarî komo tko tî n̂encetken̂e Parisew komo.

Ero ke on wara ketken̂e n̂examro hara,

Tanme ro mak worokyam yen̂epera nasî moso.

Bewsebu yanme mak worokyam n̂en̂epesî kica,

ketken̂e okwe Xesus poko.

25 Ero wa cesehtînosom me rma tko n̂examro nîhtînoyakn̂e Xesus.

Ero ke on wara kekn̂e yîwya so,

Ahce wa nai kayaritomo noro maywen komo re yetar̂metaw so n̂examro re rma?

Xehxan komo na n̂etar̂metu mehxan komo yakro noro maywen komo re mak okwe.

Ero wa etar̂metaw so n̂emaywenkesî kayaritomonînhîrî pen okwe.

Ero wa xa marha naxe ewto pono kom hara.

N̂examro re rma etar̂metaw so ero pono re rma,

n̂etwîrîmetîkexe ro mak tak okwe.

Ero wa xa marha naxe mîîmo yawno kom hara,

ero re yawno komo.

N̂examro re rma etar̂metaw so n̂etahsîpînkexe mak okwe.

26 Ero wa xa marha nasî Satanas hara.

Worokyam yen̂epen̂e me cexitaw ahce wa thakwa re worokyam kayaritomon me rma nai ha re?

Pîra ro makî.

27 Satanas yanme worokyam yen̂epen̂e Mîk ha,

mîîkexe opoko.

Ero ke on wara wîîkes awya so hara,

onok yanme wa worokyam n̂en̂epetu amumuru kom hara awya so?

Kacoko ika yîwya so.

N̂examro tak n̂ekatîmyaxe awya so.

28 Kaan Yekatî yanme rma tko worokyam yen̂epetaw owya kayaritomo me xa Kaan yehtopo n̂esenpesî tanî rma,

kacoko,

kekn̂e Xesus Parisew komo ya.

29 Ero yinhîrî on wara kekn̂e hara Xesus yîwya so,

On wara marha wîîkes awya so,

Ahce wa nai cen̂epan̂em karitî yemyawno yarî xe cexitaw?

Ewomra rma nasî emyawno wece kar̂pe exirî ke osom.

Noro yipu yapomiche mak yîmîn yaka tak n̂ewomyasî,

emyawnonhîrî tak naar̂asî,

kekn̂e.

Ero wa kekn̂e Xesus Parisew komo ya.

30 On wara wîîkes awya so,

oyakrono pîn me awexitaw so ooxatî pîn me thakwa maxe okwe.

Naatî yeperîrî yenmekn̂e wara wasî tooto komo poko.

Oyakro ro rma ero poko exihra awexitaw so,

ohyai akpan̂e me thakwa maxe okwe.

31 On wara marha wîîkes awya so,

kicicme awehtoponhîrî komo nîhcamnoyasî Kaan ahnoro rma re.

Tpoko kicicme amtapowataw so na ero wa awehtoponhîrî komo meero nîhcamnoyasî.

Kaan Yekatî poko reha kicicme amtapowataw so,

ero wa kacho tak nasî yîhcamnopîn me ro mak okwe.

32 Tooto me Ewruxapu yîwîrîyaketaw awya so ero wa awehtopo komo nîhcamnoyasî Kaan.

Kir̂wanî ro Yekatî yîwîrîyaketaw reha awya so ero wa awehtopo komo men yîhcamnopîra ro mak nasî Kaan roowo po rma ka awexitaw so,

awaipuche so meero okwe,

kekn̂e.

Ero wa kekn̂e Xesus Parisew komo ya.

33 On wara marha kekn̂e Xesus yîwya so,

Weewe mko warai rma amyamro.

On wara nasî weewe mko,

kir̂wanî mko reha n̂eperwasî kir̂wan me okre.

Kicicitho reha n̂eperwasî apupnî me thakwa okwe.

Ero ke eperîrî ceenasî,

kirwan on,

kicicitho mîn hara kachome kîwya.

34 Okoi yepamtho komo mak amyamro okwe.

Ahce wa thakwa re kir̂wan̂he mîmtapowatu amyamro kicicme cehsom kom ha?

Ponaro xa kehtopo komo poko thakwa tîmtapowaxe.

35 Kir̂wan me awexitaw so reha kir̂wan poko mîmtapowaxe merpora exirî ke aropotaw so kir̂wan̂he awesehtînotopo komo.

Kicicitho me awexitaw so reha kicicitho poko mîmtapowaxe kica merpora exirî ke aropotaw so kicicitho me awesehtînotopo komo kica.

36 On wara marha wîîkes awya so,

amn̂e en̂ekano ritopo po tak awen̂ekexe so Kaan amtapotachonhîrî komo poko.

Watohnî me ro mak amtapotachonhîrî komo poko awen̂ekexe so,

ero pîntho poko amtapotachonhîrî komo poko meero.

37 Kir̂wan̂he exitaw amtapotachonhîrî komo,

Kir̂wan amoro ham,

kesî tak Kaan ero yimaw awya so.

Kicicme exitaw reha amtapotachonhîrî komo,

Kicicitho amoro ham,

kesî tak Kaan awya so hara okwe ero yimaw.

Ero wa kesî Kaan awya so amn̂e en̂ekano ritopo po,

kekn̂e.

Ero wa kekn̂e Xesus Parisew komo ya.

38 Taa,

ero yinhîrî Parisew komo tak Xesus n̂eyukyatken̂e,

kpanatanmetopo mewren̂e komo marha.

On wara ketken̂e yîwya,

Apa,

cirihnî cma re miir̂asî amna wero ro,

Kaan yanme mohxapu xa Mîk ham,

kachome amna ya apoko,

ketken̂e yîwya.

39 On wara tko n̂eyukyakn̂e Xesus yîmtaka so hara,

Kicicitho me awexirî ke so mak cirihnî yenî xe mat ham ke,

Kaan yanme mohxapu Mîk ha mî,

kachome awya so.

Cipici yairono wara mak maxe kica.

Cirihnî yenpora rma was awya so.

Aweronoman̂enhîrî xakn̂e pahxa Xonas pen.

Noro yehtoponho rma re mencexe.

Noro penî rma nasî Kaan yanme oyehtopo yenpon̂e me.

40 Pahkî xakn̂e Xonas pen ootî imo ropotaw.

Osorwaw ro n̂enmayakn̂e iito.

Osorwaw ro marha kokmamyakn̂e hara iito.

Ero wicakî pahkînon xa marha nasî Tooto me Ewruxapu hara amn̂e roowo yatumnaw.

41 On wara marha wîîkes awya so,

amn̂e en̂ekano ritopo po tak N̂in̂ipe pono komo men n̂ekatîmyaxe kicicme awehtoponhîrî komo.

On wara kexe awya so,

Xonasî mtapotarî yanme rma amna poxunkekn̂e cehtoponhîrî komo.

Xonasî yopono ro makî tko xakn̂e ahyaw so.

Noro yanme rma tko poxunkara mîxatken̂e kica awehtoponhîrî komo,

kexe awya so ero yimaw.

Yaaro xa ero wa kexe.

42 Suu n̂ixan komo kayaritomonînho marha n̂ekatîmyasî kicicme awehtoponhîrî komo amn̂e en̂ekano ritopo po,

wooxam ha.

Noro cekn̂e Saromaw penî mtapotarî yentaxi takîhso tîmtapotaxmu me exirî ke.

Mooxe xa cekn̂e entaxi roowo yenatîtopo n̂ixa.

Ahyaw so reha nasî takîhsom xa tak,

Saromaw pen yopono xa tak,

kekn̂e.

Ero wa kekn̂e Xesus Parisew komo ya.

43 Ero yinhîrî on wara kekn̂e hara Xesus yîwya so,

On wara marha wîîkes awya so,

on wara naxe anarî komo,

kicicitho yekatî ken̂e naxe.

Amn̂e tak na yîropotai so rma n̂epatakesî noro.

Epatakache miya so tak n̂etar̂asî yîken̂arînhîrî.

Woskara pore cesî turpem pore.

Anarî yeposo cesî tîmîn xa hara.

Enîhra rma tko nas okwe.

44 Ero ke on wara tak kesî,

Omîntho yaka tak kîwce hara mî,

kesî.

Ero ke ces hara.

Tîmînthîrî yaka cewomuche hara yarîhra tak n̂een̂as okwe,

taiwaxi marha n̂een̂asî.

Takriso marha n̂een̂asî cemyawnonhîrî.

45 Ero ke worokyam yahsîso xa hara cesî.

7 tak nahsîyasî okwe.

Kicicitho ro mak tak nahsîyas hara,

cehtoponhîrî komo yopono xa kica.

Ahnoro rma tak n̂ewomyaxe iina re yîmînthîrî yaka.

Iitono ro me tak naxe okwe.

Ero ke kicicme xa tak n̂ehtîkesî worokyam kenarî pen okwe pahxa cehtoponhîrî yopo xa tak.

Ero wa xa marha maxe amyamro hara tantono kom okwe,

kekn̂e.

Ero wa kekn̂e Xesus Parisew komo ya,

kpanatanmetopo mewren̂e komo ya marha.

46 Taa,

ero wa panatanmekno n̂iir̂akn̂e Xesus.

Mer̂pono pîn komo panatanmekyakn̂e.

Ero wa ketaw rma Xesus yon tak mokyakn̂e iina,

akno komo marha.

Mîîmo mkai makî tî n̂ecececetken̂e.

Xesus yakro tîmtapota xe tî re xatken̂e.

47 Ero ke iitono n̂ekatîmyakn̂e Xesus ya,

Mînto tî nai anocwan mîîmo mkai.

Awakno komo marha tî nat iito.

Awakro tîmtapota xe tî natu,

kekn̂e yîwya.

48 On wara tko Xesus kekn̂e ero wa kan̂e ya,

Onoke warai komo xa natu onocwan me awya so,

oyakno kom hara?

kekn̂e.

49 Ero wa kache tak n̂etapoyankekn̂e tînpanatanmekrî komo wece.

On wara kekn̂e,

Moxam onocwan komo,

moxam marha oyakno kom hara.

50 Apapa kah yawno mtapotarî yewetîn̂e me awexitaw so oyakno me maxe,

oyepeka me marha maxe,

onocwan me marha,

kekn̂e Xesus yîwya so.

Ero wa kekn̂e iitono komo ya tîhyaka esenmexapu komo ya.