Taa,

ero wa xakn̂e Xesus,

tînpanatanmekrî komo nantomekn̂e,

12 kom ha.

Ero yinhîrî tak iitono komo yewton pore cekn̂e.

Ewto po so panatanmekno n̂iir̂akn̂e roro,

Kaanî mtapotarî n̂ekatîmyakn̂e roro yîwya so.

Ero wa xakn̂e Xesus.

2 Ero yimaw tî Xuaw xakn̂e tahruso thakwa okwe.

Kahrutopo yaw rma tî Xesus yekaci n̂encekn̂e.

Ero ke tînpanatanmekrî komo takî tî n̂en̂epekn̂e Xesus yaka esentaxi.

2 makî tî xatken̂e Xesus yaka Xuaw n̂en̂epetho komo.

3 On wara men kacoko Xesus ya amn̂e,

kekn̂e tî Xuaw yîwya so,

Onoke xa Amoro,

Apa?

kweronoman̂e xa mokyas amn̂e,

kachonho na Amoro ha?

Noro pîn katî Amoro?

Anarî katî mokya amn̂e,

kweronoman̂e xa tak?

kacoko Xesus ya amn̂e,

kekn̂e tî Xuaw yîwya so.

Ero wa tî kekn̂e yîwya so.

4 Ero ke Xesus yaka takî tî cetken̂e Xuaw n̂en̂epetho komo.

Yîmtapotarî tî n̂ekatîmyatken̂e yîwya.

On wara tak n̂examro n̂eyukyakn̂e hara Xesus,

On wara xa wîîkes awya so,

etocoko hara Xuaw yaka.

An̂enîthîrî komo ekatîmcoko yîwya,

an̂entathîrî komo marha.

5 On wara kacoko yîwya,

Ewuhnînhîrî komo tak n̂een̂axe,

yîhrepunînhîrî komo tak n̂etar̂axe,

repra ken̂arî komo tak naxe tupunpore hara,

panahnînhîrî komo tak n̂encexe,

waixapunhîrî komo tak pakexe,

yupurantamnî komo ya n̂esekatîmyasî marha Kaan ya kahworetopo komo,

kacoko.

Ero wa esekatîmcoko yîwya.

6 On wara marha kacoko yîwya,

On wara nîîke Xesus,

Tawake maxe ahwokanî ro me awexitaw so opoko,

nîîke,

kacoko yîwya,

kekn̂e Xesus Xuaw n̂en̂epetho komo ya.

Ero wa kekn̂e yîwya so.

7 Ero wa kacho yentache tak cetken̂e hara Xuaw npanatanmekrî komo.

Ero yimaw mer̂pora ro mak xatken̂e Xesus yaka mohxapu komo.

On wara kekn̂e yîwya so,

Pahxa mîîcetken̂e pohnîntaka Xuaw yenso.

Onoke warai yenso wa mîîcetken̂e,

ocowo ke wananxapu warai yenso katî wa mîîcetken̂e?

Pîra ro mak.

8 Onoke warai yenso xa katî mîîcetken̂e,

cepethîkem ke tponoyem yenso katî mîîcetken̂e?

Pîra marha.

Kayaritomo mîn yaw so mak reha naxe cepethîkem ke tponoyem komo.

9 Taa,

onoke warai yenso xa katî wa mîîcetken̂e ha ke?

Aweronoman̂e komo yenso katî mîîcetken̂e?

Nhnk,

noro yipu yenso xa mîîcetken̂e ham.

Aweronoman̂e komo yopono rma mîk Xuaw.

10 On wara kesî Kaan Karitan noro poko,

Yarî men wen̂epes amn̂e oyekaiporen̂e awesamaka.

Noro cesî awesamarî yakir̂wamaxi,

kesî.

Xuaw pokono rma mîn ero wa kacho,

kekn̂e Xesus yîwya so.

11 On wara marha kekn̂e Xesus Xuaw poko hara,

Yaaro tan wîîkes awya so,

ayopono komo xa mîkî Xuaw Bacista.

Ahnoro wooxam ropotainonho komo yopono mîk ha.

On wara tko naxe Kaan maywen komo reha amn̂e,

Xuaw yopono me naxe ahnoro,

mapitawno warai komo meero naxe noro yopono me.

12 Taa,

on wara xakn̂e Xuaw,

weronomano rin̂e me xakn̂e.

Ero yimawnonhîrî rma n̂epamtîkexe Kaan maywen me cehsom komo.

Ero wa cehtopo poko n̂ekaricexe ro mak.

13 Ero yipu rma n̂ekatîmyatken̂e pahxan pen komo,

weronomano rin̂enho pen komo ahnoro.

Moises pen marha n̂ekatîmyakn̂e.

Ero wa xatken̂e weronomano rin̂enho pen komo,

yaake.

Okomn̂i xa tak Xuaw xakn̂e hara.

Ero wa xatken̂e weronomano rin̂enho komo.

14 Xuaw poko tak kîmtapowasî awakro so,

omtapotarî yenta xe awexitaw so,

Eriasî tak mokyas hara amn̂e,

kachonho rma mîk Xuaw,

wîikesî.

15 Ero wa kacho men entacoko omtapotarî yentan̂e me awexitaw so,

kekn̂e.

Ero wa kekn̂e Xesus iitono komo ya.

16 On wara marha kekn̂e Xesus yîwya so,

Onoke warai xa amyamro hara Ixaw Yana kom ha?

Rikomo wa mak mat ham ke.

On wara naxe rikomo komo anarimaw so,

kwarawantacho roron po n̂eseman̂iyaxe.

17 On wara kexe ceseman̂iyem komo ya,

Eei,

raatî cma re amna n̂eceu awahwotachome so.

Manîmra rma mehcow hara kica.

Amna nîwrata hara an̂entarî komo me,

Okwe okwe okwe,

kahra marha mehcow hara kica amna yakro,

kexe anarimaw so ceseman̂iyem komo ya.

18 Noro yipu komo warai xa marha amyamro okwe.

Enko xe,

Xuaw mîwîrîyaketken̂e kica.

Worokyam ken̂arî mîkro kica,

mîîketken̂e noro poko.

Ero wa mîîketken̂e Xuaw poko wahra mak eseresmarî ke,

wok yeen̂e pîn me exirî ke marha,

kekn̂e.

19 Taa,

acheka so tak kmokye,

Tooto me Ewruxapu reha.

Owî reha keseresmesî,

wok marha weer̂asî.

On wara tak mîîkexe opoko hara,

Tîyopo ceseresmaxmutho ro mak Moso kica,

tîyopo twokru yeen̂e marha kica.

Kayaritomo purantan yahsîn̂e yakrono marha Mîkro,

kicicitho komo yakrono marha kica,

mîîkexe opoko hara.

On wara kexe takîhsom komo reha,

Yaarono Mîkro ham,

kexe takîhsom poko xa marha,

kekn̂e.

Ero wa kekn̂e Xesus tîhyaka mohxapu komo ya.

20 Taa,

ero yinhîrî ewto mko poko tak nîmtapowakn̂e hara Xesus.

Ero pono komo yein̂e me nîmtapowakn̂e kopi.

Noro ya cirihnî ciitopo yenîn̂enho rma re mîkyam xatken̂e.

Kicicme cehtoponhîrî komo poxunkara rma tko tî xatken̂e okwe.

Ero ke n̂examro yîwîrîmacho n̂ekatîmyakn̂e.

21 On wara kekn̂e yîwya so,

On wara wîîkes awya so Koraxin̂i pono komo,

Becsaita pono komo marha,

metwîrîmexe ro mak men amn̂e okwe.

Cirihnî ciitopo cma re meen̂atken̂e amyamro iitono komo,

kar̂pe xa Kaan yesenpotopo ha.

Ero yipu yeen̂ataw ketaw ha re Ciru pono komo ya,

Siton pono komo ya marha pahxa rma cehtoponhîrî komo poxunkacerî ha re n̂examro reha.

Wemronho cheka mak n̂eremacerî.

Kicicitho marha namrucerî ha re poonotho cehtoponhîrî komo poxunkacho.

Ero wa n̂ehcerî ha re n̂examro.

22 On wara wîîkes awya so,

Ciru pono pen komo rma re nar̂mesî Kaan amn̂e,

Siton pono pen komo marha.

Ero wa n̂examro n̂iir̂asî amn̂e en̂ekano ritopo me exitaw.

Soroso xa tak Koraxin̂i pono pen komo nîwîrîmesî Kaan,

Becsaita pono pen komo marha.

23 Amyamro marha Kapanaun pono kom hara,

on wara wîîkes awya so hara,

miyan komo n̂entarî me cekaiporesom me maxe,

kah yawno komo n̂entarî me meero.

Wara rma metar̂mexe wehto imo ywaka.

Emapona cma re meen̂atken̂e cirihnî ciitopo.

Ero warai ciitopo yeen̂ataw ketaw ha re Sotoma pono pen komo ya,

iito rma wa nasî ewtonthîrî komo oroto.

24 On marha wîîkes awya so Kapanaun pono komo ya,

kicicme maxe kica,

kesî rma re Kaan Sotoma pono komo ya amn̂e en̂ekano ritopo po.

Kicicme xa tak maxe kica amyamro reha,

kesî tak Kaan awya so reha,

Kapanaun komo ya,

kekn̂e.

Ero wa kekn̂e Xesus ewto pono komo poko.

25 Taa,

ero yinhîrî tak Tîîm yakro nîmtapowakn̂e hara Xesus.

On wara kekn̂e yîwya,

Kaapu yosom xa Amoro Apa,

roowo yosom marha Amoro.

Kir̂wan̂he xa mai ham okre on wara awexirî ke,

yaana komo ya on̂ekatîmîtho yenpora mîxakn̂e,

ehcamhokaxapu komo ya marha enpora mîxakn̂e.

Rikomo warai me cehsom komo ya makî reha menpekn̂e ham.

26 Yaaro,

kir̂wan̂he mîhtînoye ero wa ciino ritopo,

kekn̂e.

Ero wa kekn̂e Xesus Tîîm ya.

27 Ero yinhîrî on wara kekn̂e hara Xesus iitono komo ya,

Miyan komo yosom me rma oriyakn̂e Apapa.

Kaan Mumuru yîhtînon̂e xa exihra ro mak nasî.

Apapa mak reha nîhtînoyasî.

Ero wa xa marha Apapa yîhtînon̂e exihra nas hara.

Yumumuru makî reha Noro n̂een̂asî.

Anarî komo ya rma tko Tîîm n̂enpesî Noro,

enpo xe cexitaw,

kekn̂e.

28 On wara marha wîîkes awya so,

kekn̂e hara Xesus,

mekaricetu xa na anarimaw ahce na poko.

Cekar̂kaxi ro metapicketu roro.

Tawsîn̂em yaan̂e wara xa na matu.

Ero wa awexitaw so,

on wara kacoko owya,

Awakrono me roro oyexi xe mak was apa,

kacoko.

Ero wa ketaw owya cepokaresom me tak kiiraxe so.

29 Oyanton me mak ehcoko.

Oyehtopo poko tak ehcamhokacoko.

Oyanme ro mak wehsî,

kan̂e pînî ro mak Ow ha.

Anarî komo yoponkacho yîhtînopîra ro mak wasî.

Ero wa xa marha awexitaw so mepokarexe tak aropotaw so.

30 Ayopono pîn mak mîn ahce na poko awantomacho komo owya.

Taponukyem me mak nasî onarporî awya so,

kekn̂e hara Xesus.

Ero wa kekn̂e Xesus iitono komo ya Karireia pono komo ya.