12 Komo N̂en̂epesî Xesus Ekatîmn̂e N̂e
10
Taa,
ero yimaw tak tînpanatanmekrî komo nan̂ikyakn̂e Xesus,
12 kom ha.
Kicicitho yekatî yen̂epen̂e me tak n̂examro n̂iir̂akn̂e.
Kar̂pen komo karihton̂e me marha n̂iir̂akn̂e,
tamotosom komo yakir̂waman̂e me marha.
Ero wa ciino rin̂e me 12 komo n̂iir̂akn̂e.
2-4 Xesus nantomarî me tak xatken̂e n̂examro,
12 komo.
Osotî komo tak wekatîmyasî.
Poturme xakn̂e Simaw.
Petru rma mîk ha.
Noro yakno tak Antre.
Ciaku marha Sebetew mumuru,
noro yakno tak Xuaw.
Piripe,
Batoromew,
Tome,
Mateus,
kayaritomo purantan yahsîn̂enho ha.
Anarî tak xakn̂e hara Ciaku.
Awpew mumuru tî mîk xakn̂e.
Tatew marha,
Simaw marha,
anarî hara Xeroce kacho rma tî mîk xakn̂e noro,
Simaw.
Taa,
Xutasî tak,
Iskar̂otes kacho rma ha.
Xesus yekanîn̂e mîk xakn̂e okwe.
Ero wicakî xatken̂e Xesus nantomarî komo.
5 Ero ke tak n̂examro nantomekn̂e.
Miya so n̂en̂epekn̂e.
En̂epetaw on wara tak kekn̂e yîwya so.
Xenciu komo chere tohra ehcoko.
Samaritanu komo yewton pore tohra marha ehcoko.
6 Ixaw Yana komo chere makî reha etocoko.
Oper̂a wara naxe n̂examro,
tacixapu wara thakwa.
7 N̂examro yewton po awexitaw so on wara kacoko iitono komo ya,
Pahnoke tak men nasî kayaritomo me kah yawno yesenpotopo,
kacoko yîwya so.
8 Ero ke kar̂pen komo karihtocoko,
Repra ken̂arî komo akir̂wamacoko marha.
Waixapu komo enpakacoko marha,
Worokyam komo marha en̂epecoko tooto komo ropotai so.
Ero poko ehcoko.
Awakretken̂e so Kaan.
Ero ke wakreno ciitatko amyamro hara.
9 On wara etocoko,
apurantan komo arîhra ehcoko apakaran komo yaw.
Ooru,
prata,
kobre,
ero warai arîhra ehcoko.
10 Akumixin komo marha arîhra ehcoko.
Asakî arîhra ehcoko aponon komo.
Ahtarî komo marha arîhra ehcoko.
Awamoyin komo arîhra marha ehcoko.
Ero wa mak etocoko emyarîra ro mak.
Anahmexe so awentan̂e komo.
Tînahmapore wa nasî cetapickaxmu komo,
kekn̂e.
Ero wa kekn̂e Xesus tîn̂en̂eperî komo ya.
11 On wara marha kekn̂e yiwya so,
Ewto pona awepatakache so iitono komo mtapotarî ka entacoko takîhsom poko.
Takîhsom mîkro,
kacho yentache awya so noro mîn yaka etocoko.
Iito mak enmacoko noro yaw,
ero po ka awexitaw so.
12 Yîmîn yaka awewomuche so ero yawno komo yakro amtapotacoko.
13 Kir̂wan̂he ero yawno komo yeen̂ataw awya so Kaan yakro amtapotacoko poko so.
Moxamu cma re miir̂asî esemetanmekîn me Apa,
kacoko Kaan ya.
Kicicme exitaw so reha ahyaka so rma yîramancoko hara amtapotachonhîrî komo,
Esemetanmekîn me cirko,
kachonho.
14 Awetarî komo yenpora rma na natu anarî komo.
Amtapotarî komo yentara marha na natu.
Noro yipu mîn yai tak awepataketaw so ahtarî komo yupupunkacoko,
ewton komo poi awcetaw so marha.
15 Yaaro tan wîîkes awya so,
Kaan men nîrwonasî iitono komo poko amn̂e ken̂ekatopo ro po.
Sotoma pononho pen komo poko rma re nîrwonasî,
Komoha pononho pen komo poko marha nîrwonasî.
Awentan̂e pîn komo poko tak nîrwonîmtîkesî ro mak amn̂e,
kekn̂e Xesus.
Aaxera So Men Naxe Tooto Komo Amn̂e, Kesî Xesus
16 Taa,
on wara marha wîîkes awya so,
kekn̂e hara Xesus,
oper̂a warai mak amyamro.
Robu warai cheka rma ken̂epexe so aweskan̂e komo warai cheka.
Ero ke takîhso mak ehcoko,
takîhso nasî okoyi,
ero wara.
Potkuku wara rma tko ehcoko keskan̂e pîn wara rma.
Ero wa xa ehcoko.
17 On poko kweronomexe so,
awahsîyaxe so men amn̂e aaxatî pîn komo okwe.
En̂ekano rin̂e komo yaka awar̂axe so marha.
Cesenmetopo komo yaw so marha ahyokyaxe so oco.
18 Kayaritomo komo yaka marha awar̂axe so okwe.
Yîxawyakan komo yaka mak awar̂axe so anarimaw.
Noro yipu komo yaka awarîche so awen̂ekexe so oyakrono me awexirî ke so.
Ero wa awir̂axe so oponarono me xa awesekatîmtome so yîn̂entarî komo me,
Xenciu komo n̂entarî me marha.
19 Awahsîche so esewrucpera ro mak ehcoko awesekatîmtopo komo poko.
Ahce wa wîîke kopi yîwya so,
kahra ehcoko.
Takîhsom me xa oyesekatîm xe wasî yîwya so,
kahra marha ehcoko.
Ero yimaw rma n̂esehtînomexpesî awya so awesekatîmtopo komo.
20 Awen̂ekan̂e komo ya awesekatîmyataw so amyamro pînî rma mesekatîmyaxe.
Aporin komo Yekatî xa matko nîmtapowasî amtari so.
Ero wa maxe amn̂e ha,
kekn̂e Xesus amna ya.
21 On wara marha kekn̂e,
Xesus tînpanatanmekrî komo ya,
On wara men naxe anarî komo amn̂e,
takno komo rma n̂ekanîyaxe waihkapotome so kayaritomo ya okwe.
Anarimaw so tîmxîkrî pen komo marha n̂ekanîyaxe yîîm komo waihkapotome so hara okwe.
Anarimaw so hara tîîm pen n̂ekanîyaxe yîmxîkrî komo rma waihkapotome so.
Ero wa men n̂etîxatîmnokexe amn̂e okwe.
22 Miyan komo rma tak aaxatîmnokexe so ahnoro mak okwe.
Oyakrono me awexirî ke so mak aaxatîmnokexe so.
Ooxatîmnokan̂e pîn me awexitaw so miya roro akurunpexe so Kaan.
23 On wara na matu ewto po so awexitaw so.
Iitono komo na awemetanmekyatu so okwe.
Ero ke tak emahcicoko tak anarî ewto pona hara.
Ero wa so etocoko mîn hak pona Kaanî mtapotarî yekatîmso.
Yaaro tan wîîkes awya so,
Ixaw Yana komo yewton yirihtîkara rma maxe okwe Tooto me Ewruxapu mokyataw,
kekn̂e Xesus tînpanatanmekrî komo ya.
24 On wara marha kekn̂e,
On wara marha wîîkes awya so,
panatanmekno rin̂e yopono me exihra ro mak naxe yînpanatanmekrî komo.
Antomano rin̂e yopono me exihra marha naxe yînantomarî komo.
25 Eserepokara tasî panatanmekno rin̂e wara rma exitaw yînpanatanmekrî komo.
Eserepokara marha tasî antomano rin̂e wara marha exitaw yînantomarî komo.
Bewsebu mak Amoro kica,
kacho me rma nasî mîîmo yosomo.
Soroso yîhyawno komo,
Kicicitho amoro,
kacho me naxe.
Erasîra Ehcoko Aaxatî Pîn Komo Pona, Kesî Xesus
26 On wara marha kekn̂e Xesus,
Erasîra rma tko ehcoko aaxatî pîn komo pona.
Ahnoro ekatîmnînhîrî tak n̂esehtînomexpesî rma amn̂e.
Kir̂wantaw marha tak n̂esenpesî ahnoro eyamxapunhîrî amn̂e.
27 Amyamro marha ekatîmcoko omtapotarî amn̂e.
Awarpanawno wara wekatîmyas omtapotarî awya so.
Ero yipu rma tak ekatîmcoko amyamro katpanaw hara.
Ehtun wara na mencetu omtapotarî anarimaw.
Ero yipu rma tak ekatîmcoko mîîmo meretîrî po mîyan komo n̂entarî me rma.
28 Naxe rma apun waihkan̂e komo.
Awekatî komo waihkan̂e pîn me tko naxe.
Ero ke erasîra ro mak ehcoko noro yipu komo pona.
Anarî tko nai hara apun komo waihkan̂e rma re.
Awekatî komo yar̂man̂e meero Mîk wehto imo ywaka oco.
Noro pona xa erahtîmcoko.
29 On wara nasî Aporin komo,
torowo ponaro meero nasî.
Epethîmnî cik mîk torowo.
Asakî torowo tahsîyasî exepeyu pona cewn̂an pona mak.
Noro yipu ponaro rma nasî.
Roowo pona epîrketaw noro yanme mak n̂epîrkesî,
cewn̂e n̂hema epîrkara nasî Noro yanmera.
30 Miya xe xa tak nasî Kaan aponaro so.
Ahpoci komo meero nukuknomesî iyakenon,
ahtîpîrî komo pokono.
31 Ero ke erasîn me ro mak ehcoko ahce na pona.
Tîpîn̂em xa amyamro torowo komo yopo ro mak,
mer̂pono pîn komo yopo,
kekn̂e Xesus.
Xesus Yakrono Me Kesekatîmtopo Pokono
32 On wara marha wîîkes awya so,
kekn̂e xa hara Xesus,
Xesus yakrono ow ha,
ketaw awya so tooto komo n̂entarî me,
ero wa xa marha wîîkes amn̂e Apapa ya hara,
kah yawno ya.
Oyakrono komo moxam,
wîîkesî yîwya apoko so hara.
33 Ero warahra reha ketaw awya so,
Xesus yakrono pîn ow ha,
ketaw reha awya so tooto n̂entarî me,
ero wa xa marha men wîîkes hara amn̂e Apapa kah yawno ya.
Oyakrono pîn moxam okwe,
wîîkesî yîwya,
kekn̂e marha Xesus.
Kyanan Komo Pokono
34 On wara marha wîîkes awya so,
kekn̂e xa hara Xesus,
Ahce wa ciino riso kmokye oona roowo pona awya so?
Etpoko tawake ciino riso katî wa kmokye awya so?
Pîra okwe.
Kicicme etpoko ciino riso xa matko kmokye oona roowo pona.
35 On wara ciino riso kmokye,
tîîm komo xatî pîn me wiir̂asî yumumuru komo rma.
Tînocwan xatî pîn me marha wiir̂asî emsîrî kom hara.
Ciin̂o nocwan xatî pîn me marha wiir̂asî wooxam kom hara.
36 Ero wa naxe amn̂e ahyawno komo rma,
aaxatî pîn me naxe okwe.
37 On wara tko wîîkes hara awya so,
Ooxe xa mak ehcoko.
Anarimaw aamo komo xe xa na matu,
anocwan komo xe,
amumuru komo xe,
awemsîrî komo xe,
ero warai komo xe xa na matu,
ooxera n̂he okwe.
Ero wa awexitaw so oyakrono mexera thakwa maxe okwe.
38 Anarîrî ro komo tanîmpore marha nasî tpanaxkem.
Owenari rorono me cexpore marha nasî.
Ero wa exihra awexitaw so oyakrono mexera thakwa maxe.
39 On wara marha wîîkesî,
anarimaw yiixe xa awehtopo komo yîpînînkara rma na matu.
Ero wa awexitaw so mahsîpînkexe rma thakwa amn̂e okwe.
Anarimaw mîpînînketu rma oyakrono ro me awehtome so.
Ero wa awexitaw so reha ahyaw so rma tak nasî anpînînkathîrî komo rma okre.
40 On wara marha wîîkes awya so,
amtapotarî komo tak n̂ewehcaxe anarî komo mak.
Ero wa awewecataw so oyewetîtopo rma mîn awewetîtopo kom ha,
kekn̂e.
Ero wa kekn̂e Xesus.
Wakreno Ritoponho Yepetho Nîmyasî Kaan Awya So, Kacho
41 On wara marha wîîkes awya so,
kekn̂e xa hara on wara na mat amn̂e,
weronomano rîn̂e na makronometu weronomano rin̂e me exirî ke.
Noro yipu yakronomachonho yepetho tak nîmyasî Kaan amn̂e awya so.
Weronomano rin̂enho wa xa marha awepemexe so.
Kir̂wan na makronometu anarimaw hara kir̂wan me exirî ke marha.
Noro yipu yakronomachonho yepetho marha nîmyasî Kaan awya so,
kir̂wan wa xa marha awepemexe so.
Ero wa awepemexe so Kaan.
42 On wara ehcoko rikomo komo poko hara.
Tuuna xe exitaw cik rikomo tîmcoko rma yîwya,
twotmem ha.
Ero yipu ke mîwakretu oyakrono ro me awexirî ke so.
Ero wa awexitaw so awepethîrî komo rma nîmyasî Kaan yîtwen̂ekarîntara ro mak,
kekn̂e Xesus.
Ero wa kekn̂e Noro tînpanatanmekrî komo ya.