Taa,

ero yinhîrî kanawa yaka takî tî n̂esenkayakn̂e hara Xesus n̂ikitho watotome.

Cewtonî ro pona takî tî cekn̂e hara.

2 Iitono komo takî tî pokumnî ro n̂ekyatken̂e yîhyaka.

Tîrapo mak tî n̂ekyatken̂e aam rataw.

N̂examro yenîche on wara tî kekn̂e Xesus tîhnaw,

Opona enîn̂e kom ham moxam,

kekn̂e tî.

Ero ke on wara takî tî kekn̂e pokumnî ro ya,

Mîmoko okopuci?

Taa,

tahwore tak esko.

Oroto tak wîhcamnopu kicicme awehtoponhîrî,

kekn̂e tî yîwya.

3 Iito tko tî xatken̂e Xutew panatanmetopo mewren̂e komo.

On wara tî ketken̂e n̂examro tîhnaw so,

Kica,

kicicitho me ro mak Moso nîmtapowasî kica,

ketken̂e tî.

4 Esehtînotopo komo tko tî nîhtînoyakn̂e Xesus.

Ero ke on wara tî kekn̂e yîwya so,

Ai,

oyakno komo,

ahce kacho kicicitho me omtapotarî mencet okwe?

kekn̂e tî yîwya so.

5 Omtapotarî yanme n̂ehcamnoyasî kicicme tooto komo yehtoponho.

Apehceme rma n̂ehcamnoyasî.

Apehceme marha n̂etakir̂wamexe kar̂penînhîrî komo omtapotarî ke makî.

Ero ke ahce wa xa wîîke moso ya?

Kicicme awehtoponhîrî tak wîhcamnoyasî,

wîîke katî?

Piri awomko,

atar̂ko tak ha,

wîîke katî.

6 On wara kan̂e me tko awexi xe so wasî,

Kicicme kehtoponhîrî komo yîhcamnon̂e rma Mîk ham Tooto me Ewruxapu,

ka xe was awya so opoko,

kekn̂e tî yîwya so.

Ero ke pokumnî ro ya takî tî kekn̂e hara,

Okopuci,

piiri awomko,

amîn yaka tak etoko.

Awamthîrî marha arko,

kekn̂e tî yîwya.

7 Ero ke piiri takî tî nawomyakn̂e pokumnînhîrî.

Tîmîn yaka tî cekn̂e hara.

8 Ero yipu yenîche tak iitono komo takî tî n̂eserepoketken̂e ro makî tî.

Kir̂wan̂he xa Kaan nai ham okre,

ketken̂e tî.

Tooto mak moso.

Noro yipu rma tko karihce ham Kaan ero wa karihtono ritohme,

ketken̂e tî.

Ero wa tî ketken̂e Xesus poko.

9 Taa,

en̂exa takî tî Xesus cekn̂e hara.

Tîcetaw rma tooto n̂een̂akn̂e hara Xesus,

Mateus mîk noro yosotî.

Kayaritomo purantan yahsîtopo yaw tî xakn̂e.

On wara kekn̂e Xesus yîwya,

Ai,

oyakno,

oyakro amok ha,

kekn̂e.

Ero ke yohno rma tak nawomyakn̂e Xesus yakro totohme.

10 Amn̂e tak Xesus n̂eseresmekn̂e yîmîn yaw.

Yaake n̂eseresmetken̂e iito ero yimaw.

Xesus npanatanmekrî komo xatken̂e iito.

Anarî komo marha n̂eseresmetken̂e akro so.

Kayaritomo purantan yahsîn̂e komo,

kicicme cehsom komo,

ero warai komo n̂eseresmetken̂e iito.

11 Noro yipu komo tak n̂een̂atken̂e Parisew komo.

Ero ke on wara ketken̂e Xesusu npanatanmekrî komo ya,

Ahce kacho apanatanmekn̂e komo n̂eseresme kayaritomo purantan yahsîn̂e komo yakro kica,

kicicitho komo yakro marha kica?

ketken̂e yîwya so.

12 Xesusu rma tko n̂encekn̂e yîmtapotarî komo.

Ero ke on wara kekn̂e yîwya so,

Ai,

on wara wîîkes awya so,

kehceman̂e yaka tohra naxe kar̂pe cehsom komo.

Kar̂pen komo mak cehceman̂e xe naxe.

13 Kaan Karitan entatko ha ke.

On wara kacho xa encoko,

Owya tîmsom xera wasî.

Etpînîn yawno me awexi xe so xa matko wasî,

kacho.

Ero wa kacho poko tak ehcamhokacoko.

Kicicme cehsom komo yan̂ihso xa kmokye.

Amohcoko kicicme awehtopo komo poxunkaxi,

wîikesî yîwya so.

Ero wa kahra ro mak wasî kir̂wan komo ya,

kekn̂e.

Ero wa Xesus kekn̂e Parisew komo ya.

14 Ero yinhîrî anarî komo tak mokyatken̂e hara Xesus yaka.

Xuaw npanatanmekrî komo mîkyam xatken̂e.

On wara ketken̂e Xesus ya,

Ai Apa,

on wara nas amna,

pahki eseresmara amna nasî emapona roro.

Ero wa xa marha naxe Parisew kom hara.

Anpanatanmekrî komo reha n̂eseresmexe roro.

Pahkî eseresman me exihra ro mak naxe anpanatanmekrî komo reha.

Ahce kacho ero wa nat ha?

ketken̂e Xesus ya.

15 On wara n̂eyukyakn̂e hara Xesus,

Ahce wa natu awya so cipitaxmu yakrono komo cipitaxmu exitaw ka akro so?

Nîwracetu ha ma re awya so?

Pîra ro mak.

Amn̂e tak cipitaxmu warai tak naar̂as hara Kaan yîhyai so.

Ero yimaw tak pahkî eseresman me naxe oyakrononho komo,

kekn̂e yîwya so.

Ero wa kekn̂e.

16 On wara marha kekn̂e Xesus yîwya so,

Ahce wa miir̂atu poonotho etahyaxkache?

Yaxan katî mawocetu ero yeemitopo hara?

Pîra ro mak.

Yaxan ke rma eemiyataw awya so pahxantho tak n̂etahyaxketîkes okwe.

17 Ero wa xa marha maxe uupa yukun yen poko hara.

Pahxantho yaka arkara maxe ciixan,

uupa yukun.

Pahxantho yaka arketaw rma enhîrî tak n̂etahyaxkesî,

wok pen tak ces okwe.

Enhîrî pen marha tak n̂etwîrîmesî.

Ero ke yaxan yaka mak markexe ciixan,

uupa yukun.

Ero yipu yaka arketaw reha awya so,

kir̂wan̂he tak nasî wooku,

een marha nasî kir̂wan̂he hara,

kekn̂e.

Ero wa kekn̂e Xesus Xuaw npanatanmekrî komo ya.

18 Taa,

ero wa ketaw rma anarî tak mokyakn̂e hara Xesus yaka,

Xutew komo yenmekn̂e.

Xesus mamaka tak nutupenwakn̂e.

On wara kekn̂e Xesus ya,

Apa,

waipo oyemsîrî okwe.

Oroto xa waipo.

Ero ke cma re mîmokyasî meretîyasîso enpakachome hara,

kekn̂e yîwya.

19 Ero ke noro yakro cekn̂e Xesus emsîrî yenso.

Yînpanatanmekrî komo marha akro cetken̂e.

20 Cetaw so rma anarî tak mokyakn̂e hara Xesus yaka wooxam.

Tkamxutaxmu roro thakwa tî mîk xakn̂e okwe.

Yîtîtmamnî me ro makî tî kamxukwakn̂e.

12 cimn̂ipu tî ero wa xakn̂e okwe.

Ero yimaw takî Xesus yaka mokyakn̂e yîmkai mak.

Noro ponon perî napeyakn̂e.

21 On wara tî kekn̂e tîhnaw,

Xesus ponon perî yapeche mak owya,

kir̂wan̂he tak wasî,

kekn̂e tî.

Ero wa tî nîhtînoyakn̂e wooxam.

22 Ero ke wooxam wece tak n̂etaknamekn̂e Xesus.

Noro yeen̂ataw on wara kekn̂e yîwya,

Tahwore tak esko okopuci.

Opona enîrî ke awya tîtîtmamso tak nasî akamxutachonhîrî,

kekn̂e yîwya.

Ero yimaw rma takî tî nîtîtmamyakn̂e noro kamxutachonho.

Ero wa tî xakn̂e.

23 Ero yinhîrî takî Xesus cekn̂e rma Xutew yenmekn̂e mîn yaka.

Cewomche tak iitono komo n̂een̂akn̂e.

Raatî yecen̂e komo n̂een̂akn̂e,

tîwrataxmu komo marha n̂een̂akn̂e mer̂pono pîn komo.

Wara hakî karî komo marha n̂encekn̂e.

24 Ero ke on wara tak kekn̂e Xesus yîwya so,

Miya ka epatakacoko.

Waipîra nasî mîkro emasî.

Nîwînîkyasî mak wara.

Ero wa entache n̂ewretken̂e takî iitono komo Xesus poko.

25 N̂examro tko n̂en̂epekn̂e Xesus.

Epatakatîkache so tak Xesus cekn̂e emasî yaka.

Noro yamorî tî nahsîyakn̂e.

Ahsîche rma takî tî nawomyakn̂e emasî piiri.

Kar̂pe takî tî xakn̂e hara.

26 Ero yinhîrî noro yekaci takî tî n̂encetken̂e miyan komo rma mîn hak ewto pono kom ha.

Ero wa tî n̂encetken̂e.

27 Ero yinhîrî tak en̂exa cekn̂e hara Xesus.

Cetaw rma ewuhnî komo tak mokyatken̂e Noro wenari asakî,

kîrkomo.

On wara ketken̂e yîwya,

Apa,

Tapi pen yepamtho Amoro.

Amna pînîn yaw thakwa esko ha,

ketken̂e yîwya.

28 Amn̂e mîîmo yaka tak n̂ewomyakn̂e Xesus.

Ero yimaw tak yîhyaka mokyatken̂e hara ewuhnî komo.

Ero ke on wara kekn̂e yîwya so,

Awewtanîren̂e me xa Ow mîhtînoyatu,

kekn̂e.

Nhnk Apa,

amna yewtanîren̂e me xa ahtînoyas amna,

ketken̂e Xesus ya.

29 Ero ke tak teme kekn̂e n̂examro yewru poko.

Ero yimaw rma on wara kekn̂e yîwya so,

Taa,

cewke tak ehcoko opona enîrî ke mak awya so,

kekn̂e.

30 Ero ke ero yimaw rma tak n̂een̂atken̂e okre.

Taa,

n̂examro cetaw hara on wara kekn̂e hara Xesus yîwya so,

Ekatîmra ro mak men ehcoko awewtanîretoponhîrî komo,

kekn̂e yîwya so.

31 Ero yinhîrî cetken̂e tak ewuhnînhîrî komo.

N̂ekatîmyatken̂e rma tko tî iitono komo ya,

mîn hak ewto pono komo ya.

Ero wa tî n̂ekatîmyatken̂e takir̂wamachonhîrî komo.

32 Ero yinhîrî tak Xesus cekn̂e xa hara tînpanatanmekrî komo yakro.

Cetaw so rma anarî komo tak mokyatken̂e hara Xesus yaka.

Worokyam ken̂arî n̂ekyatken̂e.

Yîmtapotanî ro thakwa tî mîk xakn̂e okwe.

33 Ero ke tak worokyam n̂en̂epekn̂e Xesus yîropotai.

Epatakache tak nîmtapowakn̂e yîmtapotanînhîrî okre.

Ero ke n̂eserepoketken̂e ro mak Xesus wenari tîtosom komo.

On wara ketken̂e,

Ixaw Yana komo rma re kîwyam.

Kn̂enîhtorî komo tko cencow oroto kopi.

Kporin pen komo n̂enîhtorî meero cencow kopi,

ketken̂e.

N̂eserepoketken̂e ro makî tî.

34 On wara tko ketken̂e Parisew komo,

Worokyamu rma re n̂en̂epe ham Moso.

Worokyam kayaritomon yanme makî tko n̂en̂epesî kica,

ketken̂e Xesus poko.

Ero wa ketken̂e Parisew komo kica.

35 Taa,

ero yinhîrî iitono komo yewton pore cekn̂e Xesus miyan pore rma.

Xutew yesenmetopo yaw so panatanmekno n̂iir̂akn̂e roro.

Pahnoke tak nasî kayaritomo me xa Kaan yesenpotopo okre,

kekn̂e roro marha.

Kar̂pen komo marha karihcekn̂e roro.

Anarmerpan ke ceper̂ayem komo marha nakir̂wamekn̂e.

36 Xesus yaka mokyatken̂e tooto pen mer̂pono pîn.

N̂examro yeen̂ataw yîpînîn yaw so xakn̂e Xesus.

Ahwokaxapu me tî n̂een̂akn̂e okwe,

etakpaxapu me marha.

Kahn̂eru wa mak xatken̂e okwe osomumnî wa.

Ero ke yîpînîn yaw so xakn̂e.

37 Ero ke on wara kekn̂e Xesus tînpanatanmekrî komo ya,

Naatî wa mak naxe tooto komo ceperkem wa.

Miya rma naxe naatî warai komo.

Asakî cik mak naxe okwe eperîrî yenmekn̂e komo.

38 Ero ke on wara kacoko naatî yosom ya,

Apa,

yaake n̂he cma re men̂epesî naatî yeperîrî yenmekn̂e komo amararîn pona,

kacoko,

kekn̂e Xesus yîwya so.

Ero wa kekn̂e.