Taa,

ero yinhîrî takî tî îîpî n̂en̂îhcekn̂e Xesus.

Ero yimaw tooto pen takî tî cetken̂e Xesus wenarî mer̂pono pînî ro mak.

2 Ero wa cetaw so repra ken̂arî takî tî mokyakn̂e hara Xesus yaka.

Noro yamrinaka tî n̂eremekn̂e tosokmuru po.

On wara tî kekn̂e yîwya,

Apa,

oyakir̂waman̂e me keen̂asî.

Ero ke owî cma re makir̂wamesî yiixe awexitaw mak,

kekn̂e tî yîwya.

3 Ero yipu yentache Xesus takî tî n̂etapoyankekn̂e.

Teme,

kekn̂e takî tî repra ken̂arî poko.

On wara tî kekn̂e yîwya,

Awakir̂wama xe rma wasî.

Kir̂wan̂he tak esko ereh ken̂ehra tak ha,

kekn̂e tî.

Ero ke ero yimaw rma takî tî kir̂wan̂he tak xakn̂e yupun,

repra ken̂ehra.

4 Ero yinhîrî on wara tî kekn̂e Xesus yîwya,

Awakir̂wamachonhîrî ekatîmra ro mak men esko.

Esenpota mak Kaan yaka cewomsom ya.

Noro ya akn̂ipoko Kaan ya tîmsom Moises pen nmewretho yaw rorono ha.

Ero wa esko,

Kaan nakir̂wamatho moso ham,

kan̂e me ehtome noro,

akrono komo marha,

kekn̂e yîwya.

Ero wa tî kekn̂e Xesus repra ken̂arînho ya.

5 Taa,

ero yinhîrî ewto pona takî tî cekn̂e Xesus Kapanaun pona.

Iito exitaw takî tî sowtatu yantoman̂e mokyakn̂e yîhyaka.

Tmaywen yakir̂wamacho poko tî nîmtapowakn̂e Xesus yakro cerewre.

6 On wara tî kekn̂e yîwya,

Apa,

okoh me nas oyanton okwe.

Omîn yaw nasî kama po.

Pokumra ro mak nas okwe.

N̂erewasî ro mak oko,

kekn̂e tî yîwya.

7 Taa,

kekn̂e tî Xesus yîwya,

kmokyas awakro akir̂wamaxi,

kekn̂e tî.

8 Ai ha,

kekn̂e tî sowtatu yantoman̂e Xesus ya.

On wara xa matko wîîkes awya Apa,

oyopono ro mak Amoro.

Ero ke omîn yaka mokuhra na mai ha.

Xehxa mak na mîmtapowa omaywen yakir̂wamachome tak.

9 Ero wa xa marha nasî oyantoman̂e hara.

Cewetîsom me nasî yîmtapotarî.

Ero wa xa marha was ow hara.

Omtapotarî n̂ewehcaxe oyanton kom hara sowtatu kom ha.

Miya etok ha,

wîîkesî anarî ya.

Ero ke cesî omtapotarî yanme.

Anarî ya wîîkesî,

Xiya amok ha,

wîîkesî.

Ero ke mokyasî.

Anarî ya xa hara wîîkesî,

On poko esko,

wîîkesî.

Ero ke ero poko tak nas omtapotarî yanme,

kekn̂e tî Xesus ya.

Ero wa tî kekn̂e sowtatu yantoman̂e.

10 Yîmtapotarî yentache n̂eserepokekn̂e xa takî tî Xesus.

On wara takî tî kekn̂e twenari mohxapu komo ya,

Yaaro tan wîîkes awya so,

opona xa n̂een̂a ham moso okre.

Ero wa opona enîn̂e komo xa enîhra ro mak wasî,

Ixaw Yana komo meero.

11 On wara men naxe kah yawno maywen komo amn̂e,

anarî ro komo tak mokyaxe meyenonhîrî komo.

Mehxa mehxa wa mokyaxe.

Resce n̂ixa rono komo mokyaxe.

Oesce n̂ixa rono komo marha mokyaxe.

Abraaw yakro tak n̂eremexe ceseresmachome so.

Isake yakro marha n̂eremexe,

Xako yakro marha.

Ero wa naxe amn̂e kah yawno maywen komo.

12 Naxe anarî kom hara Noro maywen me cehsomu cma re.

N̂examro penî reha tak n̂en̂epesî Kaan miya awarpanaka.

Ero wa cexirî ke so nîwracexe tak okwe,

nîyokrececenwaxe marha cerewîmrî ke so oko,

kekn̂e tî.

13 Ero wa kache sowtatu yantoman̂e ya takî tî kekn̂e xa hara Xesus,

Taa,

etok hara.

Opona meen̂a ham.

Ero ke awanton tak wakir̂wamesî amtapotarî yaw roro rma,

kekn̂e tî Xesus yîwya.

Ero ke ero yimaw rma kar̂pe takî tî xakn̂e hara noro yanton.

Ero wa tî xakn̂e.

14 Taa,

ero yinhîrî Petru mîn yaka takî tî cekn̂e hara Xesus.

Iito takî tî n̂een̂akn̂e Petru pici yon.

Kama po tî xakn̂e,

ocoro tî xakn̂e okwe.

15 Ero ke amorî takî tî nahsîyakn̂e Xesus.

Ahsîche rma tak n̂ecocoronkekn̂e yohno rma.

Ero ke takî tî nawomyakn̂e.

Yînahrî komo takî tî n̂etakekn̂e amotoxapunhîrî rma.

Ero wa tî xakn̂e Petru pici yon.

16 Ero yinhîrî takî tî kokon̂i tooto pen mokyatken̂e hara Xesus yaka.

Worokyam ken̂arî komo tî n̂ekyatken̂e yîhyaka mer̂pono pîn.

Ero ke yîropotawnonhîrî komo takî tî n̂en̂epekn̂e kr̂a Xesus tîmtapotarî ke mak.

Okoh me cehsom komo marha tî nakir̂wamekn̂e yîn̂ekîthîrî komo ahnoro.

17 On wara tî kekn̂e kweronoman̂enhîrî pen pahxa,

Isaias pen,

Kamototoponhîrî komo tak nowyakn̂e Noro,

miya kr̂a tak naar̂akn̂e,

kekn̂e tî.

Ero ke ero wa kachonho yaw roro rma akir̂wamano n̂iir̂akn̂e Xesus.

18 Taa,

iito rma tî xatken̂e tooto pen Xesus yakro.

Mer̂pora tî xatken̂e.

Ero ke on wara tî kekn̂e Noro tînpanatanmekrî komo ya,

Kaikatko miya eeco pona,

kekn̂e tî.

Ero wa tî kekn̂e Xesus.

19 Ero yimaw rma tko ka mokyakn̂e kpanatanmetopo mewren̂e Xesus yaka.

On wara tî kekn̂e yîwya,

Apa,

kpanatanmekn̂e xa ham Amoro.

Ero ke awakro kmokyasî.

Ahna so na awcetaw kmokyasî rma awakro,

kekn̂e tî.

20 Ai ha,

kekn̂e tî Xesus yîwya.

On wara mak nasî Tooto me Ewruxapu,

yîwîntopo exihra ro mak nasî.

Rokohci yîwîntopo reha nasî ewtarî.

Torowo komo yîwîntopo marha nasî yîmîn kom hara.

Tooto me Ewruxapu yîwîntopo reha exihra ro mak nasî,

kekn̂e tî Xesus yîwya.

Ero wa tî kekn̂e.

21 Taa,

ero yimaw rma anarî takî tî kekn̂e hara Xesus ya,

yînpanatanmekrî rma,

Apa,

kmokyasî cma re awakro.

Owto xe cokorî ka wasî Apapa yaka.

Noro waihtopo mîtwo ka wasî.

Waipuche tak kmokyasî awakro,

kekn̂e tî yîwya.

22 On wara tko tî n̂eyukyakn̂e Xesus hara,

Oyakro xa matko amok ha.

Waixapu komo makî reha n̂ehcowpe tporin komo waihtopo mîtwo,

kekn̂e tî.

Ero wa tî kekn̂e Xesus yîwya.

23 Taa,

ero yinhîrî kanawa yaka takî tî n̂esenkayakn̂e Xesus.

Yînpanatanmekrî komo marha tî n̂esenkayatken̂e,

akro totohme so.

24 Toche so n̂he tak ponan̂e rma tî nocowonakn̂e okwe.

Kar̂pe ro makî tî kekn̂e kopi.

Ero ke takî tî tuuna tî n̂ekahximekn̂e ro mak.

Kanawa pen yopono me tî xakn̂e yamarataka kopi.

Nîwînîkyakn̂e makî tko tî Xesus.

25 Ero ke takî tî yînpanatanmekrî komo yenpaketken̂e.

On wara tî ketken̂e yîwya,

Apa,

kîîwî n̂he yukurunpeko kopi.

Cenor̂asî men okwe,

ketken̂e tî yîwya.

26 On wara tko tî n̂eyukyakn̂e Xesus,

Ahce pona meraswat okwe?

Opona enîn̂e pîn wara mak maxe okwe,

kekn̂e tî yîwya so.

Ero wa kache piiri takî tî nawomyakn̂e Xesus.

Ocowo tak n̂eeyakn̂e,

tuuna marha.

On wara kekn̂e,

N̂eexi tak ha,

atîtmamko ha,

kekn̂e tî.

Ero wa kache,

tîî,

nîtîtîn̂ekn̂e ro mak takî tî ero yimaw rma.

27 Ero ke n̂eserepoketken̂e xa takî tî Xesusu npanatanmekrî komo.

Onoke xa Moso hara kopi?

ketken̂e tî Xesus poko.

Yîmtapotarî n̂ewehcasî ocowo kopi,

tuuna marha kopi,

ketken̂e tî.

Ero wa tî ketken̂e.

28 Taa,

ero yinhîrî eeco pona takî tî cetken̂e.

Katarenu komo cheka tî cetken̂e.

Iitono komo takî tî mokyatken̂e Xesus yaka asakî.

Worokyam ken̂arî komo tî mîkyam xatken̂e.

Tooto yocho yahrutopo mko yawno mak mîkyam xatken̂e.

Keraspeto xa tî mîkyam xatken̂e kopi.

Kîwtotopo mera ro makî tî xakn̂e yîhyari so.

29 On wara takî tî ketken̂e n̂examro Xesus ya,

Ai,

Xesus Amoro,

Kaan Mumuru rma.

Ahce wa wa amna miir̂a kopi?

Amna yemetanmetopo mera ka exitaw mîmoko amna yemetanmeso hara okwe,

ketken̂e tî Xesus ya.

Ero wa tî ketken̂e.

30 Taa,

iito tî xatken̂e kuuxi mer̂pono pîn.

Tînahrî komo tî nahyatken̂e iito.

31 Ero ke on wara takî tî ketken̂e worokyam komo Xesus ya,

Moxam ropotai amna yen̂epetaw awya,

kuuxi ropotaka makîrha cma re amna men̂epes hara,

ketken̂e tî yîwya.

32 Taa,

iina etocoko,

kekn̂e takî tî Xesus yîwya so.

Ero ke tooto ropotai takî tî cetken̂e worokyam.

Kuuxi ropotaka takî tî n̂ewomyatken̂e hara.

Ero ke takî tî kuuxi n̂emerketken̂e pupyaka.

Kar̂pe ro makî tî n̂emahciyatken̂e.

Tuuna kwaka roro tî cetken̂e okyo.

Komomomomo,

n̂enor̂atken̂e thakwa tî ahnoro okwe.

33 Ero ke n̂emahciyatken̂e thakwa kuuxi nahman̂enho komo ewto pona.

Iitono komo ya tî n̂ekatîmyatken̂e worokyam ken̂arînhîrî yehtoponho,

kuuxi yemerkachonho marha tî.

34 Ero yipu yentache ewto pono komo takî tî mokyatken̂e Xesus yenso.

Ahnoro ro makî tî mokyatken̂e.

Noro yenîche on wara takî tî ketken̂e yîwya,

Miya cma re mîîcesî amna yai,

ketken̂e tî.

Cerewre tî ketken̂e yîwya.

Ero wa tî ketken̂e.