Taa,

on wara marha kekn̂e Xesus yîwya so îh pona toxapu komo ya,

Yîwîrîyakano cirihra ro mak ehcoko.

Yîwîrîyakano riyataw awya so awîrîyakexe so tak men anarî kom hara okwe.

2 Ahce wa na mîîketu yîwîrîyakano riyataw?

Ero wa xa marha kexe anarî komo apoko hara amn̂e.

Miya xe xa yîwîrîyakano riyataw awya so,

miya xe marha awîrîyakexe so men anarî kom hara okwe.

3 On wara na matu anarimaw,

weewe pupuntho ciki na meen̂atu awakno komo yewru kwawno.

Ero yipu yenîn̂e rma porin yenîhra ro mak maxe weewe awewru kwawno kom hara okwe.

Ahce kacho ero wa mat hara kica?

4 Ek ha ka wowsî awewru kwawno,

weewe pupuntho ciki,

mîîketu awakno komo ya.

Ahce kacho ero wa mîîketu porin exitaw rma weewe awewru komo kwaw hara okwe.

5 Tohnaw cesenposom komo mak amyamro okwe.

Porin ka towcoko awewru kwawnonho kir̂wan̂he tak entome awya so.

Ero yimaw tak awakno komo yewru kwawnonho cik mowyas hara weewe pupuntho ciki.

6 On wara marha wîîkes awya so,

Ahce warai tîmyatu xapari ya wooto?

Kaan ya tîmsom katî tîmyatu xapari ya?

Pîra ro mak.

Ahce wa miir̂atu toopu ciki enporixapu ha?

Kuuxi yaka katî mar̂metu?

Pîra marha.

Kuuxi yaka ar̂metaw napikyasî mak anar̂mathîrî kom okwe.

Apikîche awece tak mokyas aweskax hara oko,

kekn̂e tî.

Ero wa tî kekn̂e Xesus tînpanatanmekrî komo ya.

7 Taa,

on wara marha wîîkes awya so,

kekn̂e hara tî Xesus yîwya so,

Ahce na xe awexitaw so kacoko Kaan ya ahsîtome tak awya so.

Epon̂e wara marha ehcoko.

Ero yimaw tak Kaan n̂enpes awya so.

Anarimaw metata ke wahkotoxapu wara na matu okwe.

Ero wa awexitaw so awahkototopo komo poko rma knei knei kan̂e wara tak ehcoko.

Ero yimaw tak cetahrunkaxmu wara nasî cewomsom me tak awehtome so okre.

8 Ero wa taxe,

yiixe kehtopo komo poko kîmtapowataw so Kaan yakro,

tahsîyaxe tak okre.

Epor̂ataw marha ceen̂axe.

Knei knei ketaw marha kîwya so kwahkoton̂e komo poko,

n̂etahrunkesî tak kîhyaka so okre.

9 Ahce wa matu amxîkrî komo poko?

Oyuru xe was apa,

ketaw amumuru komo,

ahce xa katî mîmyatu yîwya?

Toopu katî mîmyatu yîwya?

Pîra ro mak.

10 Oyotî xe was apa ootî,

ketaw hara,

okoi katî mîmyatu yîwya?

Pîra marha thakwa.

11 Kir̂wan mak mîmyaxe amxîkrî komo ya.

Ero wa maxe kicicitho komo rma.

Soroso xa Aamo komo kah yawno kir̂wan nîmyas awya so,

Ero xe cma re was Apa,

kan̂e komo ya.

12 On wara marha wîîkes awya so,

ahce wa exi xe so matu tooto komo apoko so?

Ero wa xa marha ehcoko amyamro n̂examro poko hara.

Ero wara rma apanatanmekyatken̂e so Moises pen,

aweronoman̂enhîrî pen komo marha,

kekn̂e tî Xesus yîwya so.

13-14 On wara marha wîîkes awya so,

kekn̂e hara Xesus yîwya so,

asakî men nasî esama,

yaw awtotopo kom ha.

Amtapen̂e xa nasî anarî.

Amtapen̂e marha nasî ero potawno metata.

Awehcamnotopo komo yakanî tko mîn okwe amtapen̂an esama.

Ero yipu metatan yaro n̂ewomyaxe mer̂pono pîn komo okwe.

Anarî nas hara esama amtaci tak.

Ahruru marha nas amtaci me hara.

Waipîn me ro mak awehtopo komo yesamarî reha mîn esamaci.

Asakî mak cexe ero yaw okwe.

Amtacmen yaro ewomcoko amyamro,

kekn̂e tî Xesus.

15 On wara marha wîîkes awya so,

kekn̂e hara Xesus,

Ahyaka so men mokyaxe amn̂e Kaanî mtapotarî yekatîmn̂e komo tî re.

Tohnawno yekatîmn̂e komo tko mîkyam kica.

Ero ke noro yipu komo mtapotarî ponarora ro mak men ehcoko.

Oper̂a wa mak n̂esenpexe awya so mayamnî wa.

Robu wara tko naxe hara tîropotaw so keskan̂e wara mak okwe.

16 Kicicme noro yipu komo yehtopo mîhtînoyaxe yeperîrî yenîrî ke awya so.

Anarme katî n̂eperwa anatîrî komo awya so?

Uupa yeperîrî katî mowyatu cekyekyem yeperîrî?

Pîra thakwa.

Piiku yeperîrî katî mîpohcatu pomn̂uko yeperîrî hara?

Pîra marha thakwa.

17 On wara nasî weewe,

kir̂wan n̂eperwasî kir̂wan me okre.

Kicicitho yeperîrî reha nasî apupnî me mak kica.

18 Kir̂wan me exitaw weewe apupnîtho me epetara ro mak nasî.

Kicicitho me exitaw hara tahsom me epetara thakwa nas okwe.

19 Anatîrî komo chew exitaw apupnî me cepetaxmu ahce wa miir̂atu?

Mamexe kr̂a mak akn̂itome tak awya so.

20 Ero ke kicicme noro yipu komo yehtopo mîhtînoyaxe eperîrî yenîrî ke awya so,

kekn̂e tî Xesus yîwya so.

21 On wara marha wîîkes awya so,

kekn̂e xa hara tî Xesus,

anarî komo rma re naxe Tporin me oyetacin̂e komo.

Apa,

Kporin komo xa Amoro okre,

kan̂e me naxe owya.

Kah yawno maywen mera rma tko naxe okwe anarî komo ero wa kan̂e komo rma.

Apapa kah yawno mtapotarî yewetîn̂e komo makî reha naxe omaywen me.

22 Amn̂e en̂ekano ritopo po tak on wara kexe owya mer̂pono pîn komo,

Apa,

apa,

amtapotarî yekatîmn̂enho amna.

Xesusu mtapotarî tan amna n̂ekatîmyas,

kekn̂e thakwa amna.

Worokyam marha amna n̂en̂epekn̂e tooto komo ropotai so.

Awetacirî me rma amna n̂en̂epekn̂e.

Cirihnî mko marha amna n̂iir̂akn̂e emapona awetacirî me,

kexe owya ero po.

23 Yîmtaka so tko weyukyasî,

Oyakrono me ahtînopîra so wasî.

Etocoko kr̂a.

Kpanatanmetopo yanwekn̂e komo ro mak amyamro kica,

wîîkesî yîwya so,

kekn̂e tî.

Ero wa tî kekn̂e Xesus tînpanatanmekrî komo ya.

24 Taa,

ero wa wîîkes awya so,

kekn̂e takî tî Xesus.

Mîn hak poko kpanatanmecow so.

Ero ke on wara maxe omtapotarî yentan̂enho komo,

mîîmo ciin̂e wara maxe.

Omtapotarî yewetîn̂e me awexitaw so takîhso ciin̂e wa maxe.

On wara wîîkesî,

asakî xatken̂e mîîmo ciin̂enho komo.

Anarî xakn̂e takîhsom okre,

ero ke toh pona n̂iir̂akn̂e tîmîn.

25 Ero yinhîrî tuuna tak mokyakn̂e mer̂pono pîn.

Eepu nukmekn̂e.

Kar̂pe marha xakn̂e ocowo.

Yîmîn n̂ewsîyakn̂e ha re.

Emacakara rma tko xakn̂e toh po exirî ke.

Ero wara maxe omtapotarî yewetîn̂e me awexitaw so.

26 Omtapotarî yewetîn̂e pîn me awexitaw so reha akpîra ciin̂e wara maxe hara.

Anarî xakn̂e hara tîmîn ciin̂e,

akpîra ciin̂e ha.

Axawa pona mak n̂iir̂akn̂e noro reha.

27 Ero yinhîrî tuuna tak mokyakn̂e mer̂pono pîn hara.

Kar̂pe marha xakn̂e ocowo hara,

mîîmo yewsîn̂e.

Ero pen tak n̂emacakekn̂e yîmînthîrî pen okwe.

N̂etakuhr̂apekn̂e ro mak okwe.

Ero wa xakn̂e akpîra ciin̂e n̂iritho pen.

Ero ke ero wa xa marha maxe amyamro hara omtapotarî yentan̂enho komo,

mîîmo ciin̂e wa maxe,

kekn̂e tî yîwya so.

Ero wa tî kekn̂e Xesus tînpanatanmekrî komo ya,

îh pona toxapu komo ya.

28 Ero wa panatanmekno n̂iir̂akn̂e Xesus.

Yîmtapotarî yentache n̂eserepoketken̂e xa takî tî entan̂e komo.

29 Moises mtapotarî mewren̂e komo warahra ro mak tî nîmtapowakn̂e Xesus.

Cewetîsom me makî tî panatanmekno n̂iir̂akn̂e Xesus reha.

Ero ke tî n̂eserepoketken̂e entan̂e komo.

Ero wa tî xatken̂e.