Yupurantamnî Komo Wakrecho Pokono
6
Taa,
on wara xa hara kekn̂e Xesus îh pona mohxapu komo ya.
Yupurantamnî komo wakretaw awya so tooto komo n̂enîrî me mak tîmîhra ehcoko.
Ero wa tîmyataw awya so ero yipu yepetho men tîmîhra ro mak nasî Aamo komo kah yawno amn̂e awya so.
2 Ero ke yupurantamnî komo wakretaw awya so tuu kahra ehcoko.
Ero wa kexe kir̂wan wara cesenposom komo kica.
Kir̂wan mîkro okre,
kachome mak cenîn̂e komo ya ero wa kexe.
Cesenmetopo komo yaw ero wa kexe,
esama yaw so marha.
Yaaro tan wîîkes awya so,
cepethîrî komo yahsîra thakwa naxe noro yipu komo amn̂e kah yaw,
oroto rma ahsîrî ke.
3 On wara ehcoko amyamro reha yupurantamnî komo wakretaw awya so.
Awamorî wen̂ekarî mak tîmcoko.
Kaari n̂ixan ke tîmyataw awya so poowa n̂ixan wen̂ekarî mak tîmcoko.
4 Esenpon me mak wakreno ciicoko.
Ero wa awexitaw so Aamo komo tak awepemexe so amn̂e.
Esenpon yenîn̂e rma Mîk awepemexe so kir̂wantaw tak,
kekn̂e tî Xesus yîwya so.
Ero wa panatanmekno n̂iir̂akn̂e.
Kaan Yakro Kîmtapotacho Komo Pokono
5 On wara marha kekn̂e Xesus yîwya so,
Taa,
Kaan yakro amtapowataw so hara kir̂wan wara cesenposom komo warahra mak ehcoko.
Tpoxwe xa nasî yîwya so on wara yîmtapotacho komo Kaan yakro.
Cesenmetopo komo yaw nîmtapowaxe piiri.
Esama motaw so marha nîmtapowaxe.
Tooto komo n̂enîrî me mak ero wa nîmtapowaxe kica.
Yaaro tan wîîkes awya so,
cepethîrî komo yahsîra ro mak naxe noro yipu komo amn̂e kah yaw,
oroto rma ahsîrî ke.
6 On wara ehcoko amyamro reha Kaan yakro amtapowataw so,
amîn komo yaka mak ewomcoko amtakpo yaka xa tak.
Metata marha ahrucoko.
Ero yimaw tak amtapotacoko Aamo komo yakro,
enîhnî yakro.
Ero wa amtapotache so Noro tak awepemexe so amn̂e esenpon yenîn̂e rma.
Kir̂wantaw awepemexe so okre.
7 On wara nîmtapowaxe Xenciu komo reha.
Emapona roro n̂etahcaxe yiixe cehtopo komo twen̂ekano wara kica.
On wara kexe noro yipu komo,
Kaan panapicketîketaw mak kîwya so kencexe so tak,
kexe.
8 Ero warahra amtapotacoko Kaan yakro amyamro reha.
Yiixe awehtopo komo ponaro rma nasî Aamo komo pahxa rma,
Ero xe was Apa,
kahra rma ka awexitaw so.
9 On wara xa kacoko Kaan yakro amtapowataw so,
Apa kah yawno,
on wara cma re wîîkes awya,
amna yopono ro xa Amoro,
twerî cetacisom.
Ero wa ahtînon̂e me cirko miyan komo rma.
10 Yohno cma re kayaritomo me xa awehtopo menpesî roowo pono komo ya.
Awewetîn̂e me tak n̂examro cirko.
Kah yawno komo naxe awewetîn̂e me ero wa xa marha cirko roowo pono kom hara.
11 On wara marha wîîkes awya Apa,
kaamo po roro amna yuru yenpon̂e Amoro.
Ero ke on po tohsom cma re mîmyasî.
12 On wara marha wîîkes Apa,
kicicme amna nai anarimaw so apoko.
Ero wara amna yehtoponho cma re mîhcamnoyasî.
Ero wara xa marha nas amna tpoyino komo poko hara.
Kicicme naxe anarimaw so amna poko.
Wara rma ero wara ehtoponhirî komo amna nîhcamnoyasî.
Ero ke ero wa xa marha cma re mîhcamnoyas kicicme amna yehtoponho hara.
13 On wara marha cma re wîîkes awya Apa,
Amna yemetanmetopo mko nai.
Ero ke ero yipu yai ro makî cma re amna maar̂asî.
Kicicitho ro mak nas amna chew okwe,
amna pohkan̂e.
Ero ke amna yukurunpen̂e me xa esko Amoro.
Ero wa wîîkes awya.
Kayaritomo xa Amoro Apa karitî xa.
Kir̂wanî ro marha Amoro.
Ero wa mas Apa miya roro anarme exihnî me ro mak.
Amen,
kacoko.
Ero wa kacoko Kaan yakro amtapowataw so,
kekn̂e Xesus yîwya so.
14 On wara marha wîîkes awya so,
on wara nasî Aamo komo kah yawno,
awemetanmekyataw so apoyino komo ero wara ehtoponhîrî komo na mîhcamnoyatu.
Ero ke ero wara xa marha nasî Noro apoko so hara.
Kicicme awehtoponhîrî komo marha tak nîhcamnoyas hara.
15 Awemetanmekn̂enhîrî komo yehtoponho yîhcamnopîra tko awexitaw so ero wa xa marha men nasî Aamo kom hara.
Kicicme awehtoponhîrî komo yîhcamnopîra xa marha nas hara okwe,
kekn̂e tî.
Ero wa tî kekn̂e Xesus tînpanatanmekrî komo ya.
Pahkî Eseresmara Kehtopo Pokono
16 On wara marha wîîkes awya so,
kekn̂e hara Xesus yîwya so,
pahkî eseresmara awehtopo komo poko awexitaw so ahwora esenpora ehcoko.
Ero wa n̂esenpexe kir̂wan wara cesenposom komo reha.
Anarî me n̂iir̂axe ceepatarî komo ahwon wara cesenpotome so mak kica.
Tooto komo n̂enîrî me mak ero wa n̂esenpexe,
Pahkî eseresmara cehsom mîk ham,
kachome yîwya so.
Yaaro tan wîîkes awya so,
cepethîrî komo yahsîra ro mak naxe noro yipu komo amn̂e kah yaw,
tanî rma ahsîrî ke.
17 On wara xa ehcoko amyamro reha,
pahkî eseresmara awexitaw so ehkapecoko rma,
esewkorokacoko marha.
18 Ero wa awexitaw so,
Pahkî eseresmara cehsom mîkro,
kahra tak naxe tooto komo reha apoko so.
Aamo komo makî reha n̂een̂asî ero wara awehtopo komo.
Enîhnî Mîk Aamo komo,
esenpon yenîn̂e marha.
Ero ke Noro rma tak awepemexe so amn̂e.
Ero wa nas Aamo komo,
kekn̂e.
Ero wa kekn̂e Xesus tînpanatanmekrî komo ya.
Kemyawno Komo Pokono
19 On wara marha wîîkes awya so,
kekn̂e xa hara tî Xesus yîwya so,
tan roowo po awemyawno komo epamnopîra ehcoko yîmtotopo yaka.
Xîkîwî mak nîîwe kica anarimaw,
weke na anarimaw,
cen̂epan̂em na naar̂a anarimaw.
Ero wa nai okwe awemyawno komo,
tan mak epamnoxapu ha.
20 Kah yawno xa matko epamnocoko awemyawno komo.
Iitono reha emetanmekîra nasî xîkîwî,
wekahra marha nasî.
Iina marha tohra nasî cen̂epan̂em awemyawno komo yaan̂e.
21 On wara maxe,
tantono yepamnoyataw mak awemyawno komo cepethîkem,
tantono ponaro thakwa mak maxe okwe.
Kah yawno yepamnoyataw reha awya so kah yawno ponaro tak maxe okre.
Ero ke kah yawno xa epamnocoko awemyawno kom ha.
22 On wara marha wîîkes awya so,
kupun weyuru me nasî kewru.
Kir̂wan̂he exitaw awewru komo tweike nas apun komo ahnoro.
23 Kicicme exitaw awewru komo awarpanaw thakwa nasî apun komo ahnoro.
Ero ke weyumra exitaw aropotarî komo awarpan chewno wara ro thakwa mak maxe okwe.
24 On wara marha wîîkes awya so anarî poko hara,
awantoman̂e komo yewetîra thakwa maxe okwe asakî exitaw.
Ero wa exitaw awantoman̂e komo xehxan xera na mat okwe,
mehxan xe makî reha maxe.
Anarimaw xehxan xe rma na matu,
mehxan xera tak maxe hara okwe.
Ero wa xa marha maxe Kaan poko hara.
Kaan yewetîn̂e pîn me thakwa maxe puranta ponaro xa awexitaw so ha.
25 Ero ke eserepokara ro mak ehcoko anahrî komo exihra exitaw,
awokru komo exihra marha exitaw.
Ahce wa tak wai okwe?
kahra ehcoko.
Aponon komo poko marha eserepokara ehcoko.
Ahce thakwa re oponon okwe?
kahra ehcoko.
Ahce wa awehtome so awakîcetken̂e so Kaan?
Anahrî komo yahn̂e me mak katî awakîcetken̂e so?
Aponon komo yapon me mak katî apun komo nakîhcekn̂e?
Pîra ro mak.
Ero yopono me xa awakîcetken̂e so Kaan.
26 Enko xe,
torowo komo.
Noro yipu komo rma nînahmesî Aamo komo kah yawno.
Tînatîrî cirihra ro mak nasî torowo.
Eperîrî marha yîhkotora nasî.
Enmekîra marha nasî mîîmo yaka.
Noro yipu komo tko nînahmesî Aamo komo kah yawno.
Tîpîn̂em xa tak amyamro torowo komo yopo ro mak.
27 Ahce wa matu apor̂mamtopo komo poko,
awanme ro so ma re mekawnoretu meia metru wicakî kaw n̂he awehtome so?
Pîra ro thakwa mak okwe.
28-29 Ero ke ahce kacho meserepoketu aponon komo poko hara?
Ero warahra reha nasî epemrutunu reha.
Natîkwasî mak epemrutun.
Ekaritora ro mak nasî.
Mawrî yekposîra marha nasî tponon me kahsom.
Wara rma cenpore xa nas okre.
Cenpore rma re xakn̂e Saromaw pen cepethîkem yaw cesenpetaw tponon yaw ha.
N̂eserepoketken̂e ro makî tî enîn̂enhîrî pen komo.
Cenpore xa tak nasî epemrutunu noro pen yopo.
30 Cuupu na rma Kaan n̂iir̂asî cenpore yohnonotho rma.
Oroto ka ceen̂axe cuupu.
Enmapuche tak takn̂isom me nas hara okwe.
Ero yipu rma cenpore n̂iir̂asî Kaan.
Soroso xa apononmexe so Noro.
Apononmara so katî nai awya so?
Kaan pona enîn̂e pîn wara rma maxe okwe,
kekn̂e tî Xesus yîwya so.
31 Ero ke eserepokara ro mak ehcoko ero yipu poko.
Ahce thakwa re tahyat okwe?
Ahce thakwa re ceer̂at okwe?
Ahtono thakwa re kponon komo okwe?
kahra ro mak ehcoko.
32 Ero yipu poko n̂eserepokexe Xenciu komo reha.
N̂examro warahra ehcoko amyamro.
Ero yipu xe awehtopo komo ponaro rma wa nasî Aamo komo kah yawno.
33 Kaan maywen me awehtopo komo ponaro xa ehcoko ahce na ponaro awehtopo komo yopo xa.
Kir̂wanî ro me Kaan yehtopo ponaro marha ehcoko.
Ero ponaro xa awexitaw so anahrî komo tak nîmyasî rma Aamo komo awya so,
awokru komo marha,
aponon komo marha,
ahnoro ero yipu nîmyas Aamo komo awya so yiixe awehtopo kom ha.
34 Ero ke eserepokara ro mak ehcoko pahxaxarono poko,
yiixe awehtopo komo poko.
Orotono ponaro mak ehcoko.
Mahwokexe mak okwe miyan ponaro rma awexitaw so,
kekn̂e yîwya so.
Ero wa tî kekn̂e Xesus tînpanatanmekrî komo ya îh pona toxapu komo ya.