Kaan Nakronomarî Me Xa Kehtopo Pokono
5
Taa,
ero wa exitaw tak mer̂pora ro mak mîkyam xatken̂e Xesus wenarino komo.
Noro yipu komo yenîrî ke îîpî takî tî nawnukyakn̂e.
Iina tak n̂eremekn̂e.
Yîhyaka takî tî n̂esenmekyatken̂e yînpanatanmekrî komo.
2-3 Ero ke tî n̂examro panatanmekyakn̂e.
On wara tî kekn̂e yîwya so,
On wara ehcoko tawake awitome so Kaan ya,
kyopono pîn me mak esencoko.
Ero wa awesen̂ataw so kah yawno maywen komo kayaritomon me tak maxe amn̂e.
4 On wara na matu anarimaw,
mîwracet ha na kapu.
Ero wa awehtopo komo poko rma tko tawake ehcoko.
Kaanî rma awahworexe so amn̂e.
5 On wara marha ehcoko tawake awitome so Kaan ya,
tîrwonporem me ehcoko.
Ero wa awexitaw so roowo yosom me tak maxe amn̂e,
miyan komo rowon yosom me rma.
6 Kir̂wan me awehtopo komo xe marha ehcoko.
Ero wa awehtopo komo wece tîroman̂em wa mak ehcoko,
awokru xatî wa marha ehcoko.
Ero wa awexitaw so kir̂wan me awehtopo komo rma nîmyasî Kaan.
7 Cesemetanmesom komo pînîn yaw marha ehcoko.
Ero wa awexitaw so apînîn yaw so xa marha tak nasî Kaan awesemetanmekyataw so hara.
8 On wara marha ehcoko tawake awitome so Kaan ya,
kir̂wan poko mak esehtînocoko,
kicicitho poko rma esehtînopîra ro mak ehcoko.
Ero wa awexitaw so Kaan yenîn̂e me maxe okre.
9 Cetîrwonmesom komo yîrwoxinkan̂e me marha ehcoko.
Ero wa awexitaw so,
Kaan xîkrî xa mîkyam ham,
kacho me tak maxe.
10 On wara na naxe amn̂e Kaan xatî pîn komo apoko so,
kir̂wan̂he awehtopo komo poyero rma awemetanmekyaxe so okwe.
Ero wa exitaw apoko so tawake rma ehcoko.
Kah yawno maywen komo kayaritomon me tak maxe amn̂e.
11-12 Anarimaw so kicicme so nîmtapowaxe aaxatî pîn komo apoko so tohnaw ro mak,
awîrîyakexe so ro mak okwe.
Cemaronwaxe mak apoko so,
awemetanmekyaxe so marha.
Ero wa awir̂axe so oyakrono me awexirî ke so mak.
Ero wa awir̂ataw so tawake rma ehcoko,
ahwotacoko ro mak.
Mer̂pora tak nas amn̂e kah yaw awepethîrî komo.
Ero wa xa marha nîîxatîmnoketken̂e aweronoman̂enhîrî pen komo,
pahxan pen kom ha,
kekn̂e tî.
Ero wa tî kekn̂e Xesus tînpanatanmekrî komo ya.
Yîmîtî Wara Kehtopo Komo Pokono, Weeyu Wara Kehtopo Komo Pokono Marha.
13 On wara marha tî kekn̂e Xesus yîwya so,
On warai xa amyamro,
yîmîtî warai xa amyamro,
roowo pono komo poxuretopo warai ha.
Ahce wa tko nai yîmîtî epoxunkache?
Ahce wa thakwa re ero yipu ke erewsî tîtpoxure hara?
Pîra thakwa okwe.
Tpoxwe exihra ro mak tak nas okwe.
Tar̂maxmu me kr̂a mak nas ero yipu yîmîtî.
Tapihsom me mak tak nasî kica.
14 Weeyu warai marha amyamro,
roowo pono komo weyuru warai ha.
Ewto warai marha amyamro îh pono warai ha.
Ahce wa nai îh pono ewto awya so?
Eyamnî me thakwa nasî.
15 Ahce wa ciir̂atu ramha hara potuhtoche,
tahruya katî tahrem ke?
Pîra ro mak okwe.
Aapo pona xa matko ciir̂asî ahnoro mîîmo yawno komo weipotome.
16 Ero wa xa marha ehcoko amyamro hara.
Weeyu wara xa esenpocoko miyan komo n̂enîrî me.
Ero wa awexitaw so kir̂wan̂he awehtopo komo tak n̂een̂axe.
Ero ke Aamo komo pona tak n̂een̂axe,
kah yawno pona.
Kir̂wan̂he xa Kaan nai ham okre,
kexe tak awenîrî so.
Ero ke ero wa ehcoko,
kekn̂e tî.
Ero wa tî kekn̂e Xesus tînpanatanmekrî komo ya.
Moises Pen Nmewretho Pokono
17 On wara marha tî kekn̂e Xesus yîwya so,
On wara kahra ro mak ehcoko opoko,
N̂expe kr̂a Moises pen nmewretho,
kaxi mokyakn̂e ham Xesus,
kahra ehcoko.
N̂expe kr̂a aweronoman̂enhîrî pen komo nmewretho,
kaxi wa mokyakn̂e,
kahra marha ehcoko.
Yînmewrethîrî komo yîhcamnoso kr̂a mokyakn̂e Noro,
kahra ro mak ehcoko opoko.
Yînmewrethîrî komo yaw roro oyehtome xa matko kmokyakn̂e.
18 Yaaro tan wîîkes awya so,
miya roro nasî Moises pen nmewretho ehcamnopîra ro mak.
Pahkî xa nasî kaapu ehcamnopîra,
roowo marha nasî pahkî.
Ero wicakî pahkînon xa marha nasî noro pen nmewretho hara ehcamnopîra.
Ero poyino cik meero ehcamnopîra ro makî ka nasî see kacho cik ha.
Cewetîtîkacho pona roro ehcamnopîra nasî.
19 On wara na matu amn̂e,
Moises pen nmewretho na mewehcat ha re.
Cewn̂antho cik mak na ewetîra matu ero pîntho pokono mak ha.
Anarimaw panatanmekno na miir̂atu.
Ai,
oyakno komo,
owara xa marha ehcoko,
mîîketu na.
Ero wa awexitaw so Kaan maywen me rma re maxe,
Mapitawno mîkro,
kacho me mak ha tko.
Taa,
on wara na matu anarî komo reha,
ahnoro rma na mewehcatu Kaan ya apanatanmetopo komo.
Ewetîtîkacho poko marha na panatanmekno miir̂at hara.
Ero wa awexitaw so kah yawno maywen me xa tak maxe,
Kyopono xa mîkro,
kacho me ha.
Ero wa maxe amn̂e.
20 On wara marha wîîkes awya so,
kir̂wan̂he cexpore nasî Parisew komo yopo,
apanatanmetopo mewren̂e komo yopo marha.
Kir̂wan̂he exihra awexitaw so n̂examro yopo Kaan maywen mera thakwa maxe okwe,
kekn̂e tî yîwya so.
Ero wa tî kekn̂e Xesus tînpanatanmekrî komo ya.
Etîxera Kehtopo Komo Pokono
21 Taa,
on wara tî kekn̂e hara Xesus yîwya so,
On wara kacho mencexe pahxan pen komo mtapotachonho,
Waihkano cirihra ro mak ehcoko.
Waihkano riche awya so cen̂ekaxmu me men maxe amn̂e kopi,
kacho,
kekn̂e.
22 On wara tko wîîkes Ow awya so,
arwonataw so mak awakno komo poko ceisom me men matu okwe.
Noro pîntho mak amoro kica,
ketaw awya so awakno komo ya,
en̂ekano rin̂e komo n̂en̂ekarî me men mat hara.
Akpîntho ro mak amoro ham kica,
ketaw xa matko awya so awakno komo ya wehto imo ywaka tar̂maxmu me tak men mat okwe.
23 On wara marha wîîkes awya so,
anarimaw Kaan mîn yaka na mîmokyatu ahce na tîmso Kaan ya.
Tîmsom yakn̂itopo mîtwo xa na matu.
Iito awexitaw so awakno komo ponaro tak na mat hara.
Kuu,
mîîket ha na,
kicicme wîxakn̂e kica oyakno poko,
ahwora na nai opoko okwe,
mîîketu,
24 Ero wa ketaw awya so,
iina rma ka tînomcoko anîmrî komo tîmsom yakn̂itopo mîtkoso.
Awakno komo yakro cokorî ka etîrwoxinkatatko.
Awetîrwoxinkache so mak tak amohcoko hara anîmrî komo tîmso tak ha,
25 On wara marha wîîkes awya so,
Ahce wa xa natu apoyino komo apoko so cepeman̂e pîn me awexitaw so?
Ken̂ekan̂e ro yaka men awar̂atu so.
Ero ke ero wa awar̂ataw so yohno men yîrwoxinkacoko apoko so esama yaw rma.
Yîrwonataw rma na apoko so awar̂atu so ha men ken̂ekan̂e ro komo yaka.
Noro tak men awahsîpetu so hara porisia komo ya awahrutome so tak okwe.
26 Yaaro men wîîkes awya so,
iito thakwa maxe okwe kahrutopo yaw.
An̂epethîkathîrî komo yepematîkache mak tak awahrunkexe so hara,
kekn̂e tî Xesus yîwya so.
Ero warai poko panatanmekno n̂iir̂akn̂e.
Kicicme Kehtopo Komo Pokono
27 On wara marha tî kekn̂e Xesus yîwya so,
On wara mencexe pahxan pen komo mtapotachonho.
Apici yai ro exihra ro mak ehcoko,
kachonho mencexe.
28 On wara xa tko wîîkes Ow awya so,
wooxam wece na meen̂atu anarimaw.
Awepokacho me so na meen̂atu.
Ahsîtopo rma mîn ero wa entopo awya so.
Aropotaw so ahsîn̂e me rma maxe okwe.
29 On wara marha na matu,
anarimaw kicicitho poko na mepohketu awewru komo yanme mak,
kaari n̂ixan yanme mak.
Ero wa awexitaw so awewthîrî komo kr̂a tak towcoko apohkan̂enhîrî kom ha.
Ar̂macoko kr̂a tak tohra awehtome so wehto imo ywaka ero yanme.
Wara n̂he maxe eecome mak cewke awexitaw so.
Merewaxe xa tak men okwe ahnoro apunthîrî komo yetar̂mache iina wehto imo ywaka oco.
30 Anarimaw kicicitho poko rma na matu awamorî ke so hara kaari n̂ixan ke.
Ero wa awexitaw so yîhkotocoko kr̂a awamothîrî komo tohra awehtome so wehto imo ywaka ero yanme.
Wara n̂he maxe eecome mak tamoke awexitaw so.
Mesemetanmekyaxe xa tak men okwe ahnoro apunthîrî komo yar̂mache wehto imo ywaka oco.
Ero ke ero wa men ehcoko,
kekn̂e tî Xesus yîwya so.
31 On wara marha ketken̂e pahxan pen komo,
Apici komo yai awetow xe awexitaw so karita mewrecoko,
Moso yai ketowyasî eroromero ohcinho yai,
kacho ka mewrecoko.
Ero yipu tak tîmcoko ahcinhîrî komo ya awetowtome so tak,
ketken̂e ka awya so.
32 On wara tko wîîkes Ow ha awya so,
apici komo yai etowra ro mak cexpore nasî.
On wara men nasî cipici yai cetowsom,
kicicme thakwa nîir̂asî cihcinhîrî,
ciin̂o yai rono me rma okwe.
Anarimaw tko ciin̂o yai rono me roro nai wooxam.
Noro yipu yai etowyataw iin̂o,
kicicme cihcinhîrî cirihra rma nas hara.
On wara marha wîîkesî,
anarimaw wooxam nai ciin̂o yai etowxapu.
Noro yipu ahsîra ehcoko apici komo me hara.
Noro yipu yahsîyataw awya so kicicme men maxe apici komo yai rono wara rma kica,
wîîkes Ow ha,
kekn̂e tî Xesus yîwya so.
Ero warai poko panatanmekno n̂iir̂akn̂e.
Yaaro Mak Amtapotacoko, Kachonho
33 On wara marha kekn̂e Xesus yîwya so,
On wara marha ketken̂e pahxan pen komo,
Ahce na poko amtapowataw so,
amtapotarî komo yewetîmexpotopo na metahcatu.
Ero yipu yetaciche awya so emîknono cirihra ro mak men ehcoko.
Kporin komo n̂entarî me xa wîîkesi tan,
mîîketu na.
Ero wa ketaw awya so amtapotachonhîrî komo yaw roro men ehcoko,
ketken̂e awya so.
34 On wara tko wîîkes Ow ha awya so,
amtapotarî komo yewetîmexpotopo etacira ro mak ehcoko.
Kaapu etacira ehcoko amtapotarî komo yewetîtopo me Kaan yapon me exirî ke.
35 Roowo marha etacira ehcoko amtapotarî komo yewetîtopo me hara yîhtarî yapon me exirî ke ero hara.
Xerusaren marha etacira ehcoko amtapotarî komo yewetîtmexpotopo me kayaritomo yewton me exirî ke,
iyopono ro yewton me exirî ke ha.
36 Ahtîpîrî komo marha etacira ehcoko amtapotarî komo yewetîmexpotopo me.
Ahce wa na cirihra ro thakwa mak maxe ahtîpîrî komo anarme cirihra.
Cewn̂anî rma ahpoci komo yumuturera ro mak maxe cicwiyemînhîrî.
Yicwirira marha maxe tumutwemînhîrî hara.
Ero ke ero wa etacira ro mak ehcoko ahtîpîrî komo amtapotari komo yewetmexpotopo me.
37 Yaaro mak amtapotacoko.
Nhnk,
ero wa xakn̂e,
ketaw awya so iina mak kacoko.
Pîra,
ero warahra xakn̂e,
ketaw hara awya so iina mak kacoko hara.
Ero yopo amtapowataw so kicicitho ro yanme xa mîmtapowaxe kica,
kekn̂e tî Xesus yîwya so.
Ero warai poko panatanmekno n̂iir̂akn̂e.
Aaxatî Pîn Komo Xe Rma Ehcoko, Kacho
38 On poko marha tî kekn̂e Xesus yîwya so,
On wara marha mencexe pahxan pen komo mtapotachonho ha,
Awewkan̂enhîrî komo cewkapore xa hara nasî.
Ayokan̂enhîrî marha tîyokapore nas hara,
kachonho marha mencexe.
39 On wara tko wîîkes Ow awya so,
awemetanmekn̂e komo poko esepanpîra ro mak ehcoko.
Eeco me awewkatapache so eeconhîrî enpocoko hara yîn̂etaparî kom hara.
40 Anarimaw awen̂eketu so na tooto komo tponon komo towtopo poko.
Oponontho rma mîn.
Naare ham kica,
ketu na ken̂ekan̂e komo ya aponon komo poko rma.
Ero wa ketaw apoko so tîmcoko yîwya so apononthîrî komo rma.
Yaarino meero tîmcoko yîwya so apononthîrî kom hara.
41 Anarimaw na apoyino awantome taatopo poko.
Ow men arko 1 kirometru wicakî mak,
nîîke ha na awya so.
Ero wa ketaw awya so on wara tak eyuhcoko,
Taa,
kaar̂asî rma.
Ero yopo n̂he xa matko kaar̂asî.
2 kirometru rma kaar̂asî awto xe awexitaw,
kacoko yîwya so.
42 Anarîmaw hara na awemyawno komo naponukya amîtwono.
On xe cma re wasî,
nîîke ha na awya so.
Ero wa ketaw awya so tîmcoko rma yîwya so.
On wara na nîîke anarî hara awya so,
Awemyawno ka waar̂asî yohno mak.
Amn̂e wekyas hara,
nîîke awya so.
Ero wa ketaw awya so,
Taa,
arko ha,
kacoko yîwya.
Amemra ro mak ehcoko,
43 On wara marha wîîkes awya so,
on wara marha mencexe pahxan pen komo mtapotarî,
Amîtwono komo xe ehcoko.
Aaxatî pîn komo xera ro mak ehcoko,
kachonho mencexe.
44 On wara tko wîîkes Ow awya so,
aaxera so exitaw anarî komo yiixe rma ehcoko.
Kaan xa awîrîma xe kr̂a wasî,
ketaw awya so,
Kaan ya xa awakronoma xe so was ow hara,
kacoko mak yîwya so.
Aaxatî pîn komo akronomacoko.
Awemetanmekn̂e komo poko rma amtapotacoko Kaan yakro,
awîrîyakan̂e poko marha.
Apa kah yawno,
n̂examro cma re makronomesî,
kacoko mak Kaan ya.
45 Ero wa awexitaw so aaxatî pîn komo poko,
Apapa wara xa marha tak maxe kah yawno wara.
Ero wa xa marha nasî Noro hara tîîxatî pîn komo poko.
Enko xe,
tînakîtothîrî n̂en̂emhatakesî roro kaamo kir̂wan komo katparen̂e me,
kicicitho komo katparen̂e me marha.
Ero wa xa marha tuuna n̂ekmexpesî Kaan knatîrî komo yatîkren̂e me hara.
Kir̂wan komo mararîn pona n̂ekmexpesî,
kicicitho komo mararîn pona marha.
Ero ke ero wa xa marha ehcoko amyamro hara.
46 Aaxatî komo xe mak awexitaw so ero yepetho ma re mahsîyat amn̂e awya so?
Pîra ro mak okwe.
Ero wa xa marha naxe kicicitho kom hara.
Kayaritomo purantan yahsîn̂e komo meero ero wa naxe.
Tîîxatî komo xatî me rma naxe noro yipu komo meero.
47 Awakno komo mak yîmtapotaretaw awya so kir̂wan̂he ma re mat ha anarî komo yopo awya so?
Pîra ro mak okwe.
Kayaritomo purantan yahsîn̂e komo meero rma re takno komo nîmtapotarexe.
48 Ero ke kir̂wan̂he xa tak ehtîkacoko.
Kir̂wan̂he xa nas Aamo komo kah yawno.
Ero ke Noro wa xa marha ehtîkacoko amyamro hara,
kekn̂e yîwya so.
Ero wa kekn̂e Xesus tînpanatanmekrî komo ya îh po.