Taa,

ero yinhîrî miya takî tî cekn̂e hara Xesus pohnîntaka.

Kaan Yekatî rma tî iina naar̂akn̂e Ciabu ya yukukmapotome.

2 Iito cexitaw takî tî eseresmara ro makî tî xakn̂e Xesus pahkî.

40 tî n̂enmayakn̂e,

40 marha tî kokmamyakn̂e.

Ero wicakî kaamo tî eseresmara xakn̂e.

Ero ke nîromanakn̂e thakwa.

Ero wa tî xakn̂e Xesus.

3 Ero yimaw takî tî kicicitho poko kpohkan̂e ro mokyakn̂e yîhyaka.

On wara takî tî kekn̂e yîwya,

Kaan Mumuru me awexitaw onînhîrî tak akîhtoko awru me toopunhîrî.

Amtapotarî ke mak akîhtoko,

kekn̂e tî yîwya.

4 On wara tko tî kekn̂e Xesus yîmtaka,

On wara kesî Kaan Karitan,

kecehton̂e rma re mîn kuuru komo,

ero mak pîn ha tko.

Kaanî mtapotarî marha nasî kecehton̂e komo me hara.

Ero wa nasî Kaanî mtapotarî ahnoro,

kesî Kaan Karitan,

kekn̂e tî Xesus yîwya.

5 Ero yinhîrî takî tî Xesus naar̂akn̂e anana hara Ciabu Kaan yewtonî ro me cehsom pona.

Kaan mîn meretkoso tî naar̂akn̂e,

potucicinthîrî pona xa tak,

kawno pona.

6 On wara takî tî kekn̂e Ciabu yîwya,

Kaan Mumuru Ow ha,

mîîkesî re.

Xehxa ika ahromko.

On wara kesî Kaan Karitan,

Tancun komo n̂en̂epesî Kaan akurunpen̂e me.

Cemyaw so rma awahsîyaxe so ehtakatapara awehtome toh pona,

kesî,

kekn̂e tî Ciabu yîwya.

7 On wara takî tî Xesus n̂eyukyakn̂e hara yîmtaka xa hara,

On wara marha kesî Kaan Karitan,

Aporin komo yukukmara ro mak ehcoko kicicitho poko kica,

kekn̂e tî Xesus Ciabu ya.

8 Ero yinhîrî tak Xesus takî tî naar̂akn̂e xa hara Ciabu.

Îh pona tî naar̂akn̂e kawno pona xa.

Iito tak tî kayaritomo komo n̂enpekn̂e Xesus ya.

Roowo poko hakno komo tî n̂enpetîkekn̂e yîwya.

Yîmîn komo marha tî n̂enpekn̂e yîwya,

emyawno komo pen marha cepethîkem.

9 On wara takî tî kekn̂e Xesus ya,

On wara xa wîîkes awya,

atupentakî makî ka omamaka.

Oporinî ro xa amoro,

kasko marha owya.

Ero wa awexiche tak opoko n̂examro kayaritomon me tak kiir̂asî,

emyawno komo marha wîmyas awya kir̂wanî ro okre,

kekn̂e tî Ciabu yîwya.

10 On wara takî tî Xesus n̂eyukyakn̂e yîmtaka xa hara,

Miya kr̂a etoko Satanas.

On wara marha kes anarî hara Kaan Karitan yawno rma,

Aporin komo mamaka mak atupentacoko.

Oporinî ro Amoro,

kasko Noro ya mak.

Noro mak ewetîcoko ponaro awehtopo komo xa,

kesî Kaan Karitan,

kekn̂e hara tî Xesus yîwya.

11 Ero yinhîrî takî tî Ciabu cekn̂e hara,

Xesus tî nînomyakn̂e.

Ero yinhîrî takî tî ancu komo mokyatken̂e Xesus yînahmaxi.

Ero wa tî xakn̂e Xesus.

12 Taa,

ero yimaw takî tî Xuaw yekaci n̂encekn̂e Xesus.

Xuaw pen tî nahruce okwe,

kacho tî n̂encekn̂e.

Ero yipu yentache Karireia pona takî tî cekn̂e hara Xesus.

13 Ero yimaw takî tî cekenhîrî nahsîpînkekn̂e Nasare ha.

Kapanaun pona takî tî n̂esekenmekn̂e hara.

Iito takî tî xakn̂e.

N̂ikitho yecihtawno mîn Kapanaun,

Seburon yepamtho komo yewton,

Nahtari yepamtho komo yewton marha.

Ero yipu mîn Kapanaun.

14 Iitono ro me takî tî xakn̂e Xesus Kaan Karitan yaw roro rma cehtome.

On wara tî kekn̂e pahxa kweronoman̂e pen,

Isaias pen ha,

15-16 Weeyu imo tak n̂een̂atken̂e okre awarpanawnonhîrî komo.

Saa kan̂e wara mak tak xakn̂e iito enmarî wara mak okre.

Twaihtopo pona ka n̂eraswatken̂e ro mak okwe iitono komo.

Ero wara roro thakwa xatken̂e awarpan chewno me cexirî ke so.

Noro yipu komo rma tak weeyu imo n̂een̂atken̂e.

Seburon yepamtho komo n̂een̂atken̂e,

Nahtari yepamtho komo marha.

Karireia pono komo mîkyam xatken̂e,

Xenciu yewton pono kom ha.

N̂ikitho yecihtawno mîn Karireia Xotaw yeco pono ha.

Ero pono komo weeyu imo n̂een̂atken̂e,

kekn̂e tî Isaias pen.

Ero wa kachonho yaw roro rma cehtome Xesus xakn̂e iito.

17 Taa,

iito cexitaw takî tî panatanmekno ritopo n̂ihciyakn̂e Xesus.

On wara tî kekn̂e centan̂e komo ya,

Kicicme awehtoponhîrî komo tak poxunkacoko.

Pahnoke tak men nasî kayaritomo me Kaan yesenpotopo,

kekn̂e tî yîwya so.

Emapona roro tî ero wa kekn̂e.

18 Taa,

anarî kaamo po Karireia n̂ikithon yecihtari takî tî cekn̂e Xesus.

Iina tîcetaw kîrkomo takî tî n̂een̂akn̂e asakî.

Simaw tî xakn̂e anarî yosotî.

Petru kacho rma tî mîk noro hara.

Noro yakno marha tî n̂een̂akn̂e Antre ha.

Ootî yanîmn̂e tî mîkyam xatken̂e.

N̂ikitho yecihtaw tî xatken̂e mîîye yar̂marî poko.

19 N̂examro yenîche on wara tî kekn̂e Xesus yîwya so,

Amohcoko owenari.

Oyakrono me roro tak ehcoko.

Tooto yanîmn̂e me tak kiir̂axe so hara,

kekn̂e tî yîwya so.

20 Ero ke ero yimaw rma takî nînomyatken̂e tîmîyenthîrî komo.

Xesus yakro takî tî cetken̂e.

21 Ero yinhîrî tuuna yecihtari rma tî ka cekn̂e Xesus.

Moro na tîtoche anarî komo takî tî n̂een̂akn̂e hara,

Sebetew mumuru komo tî.

Ciaku,

Xuaw,

ero wa xakn̂e n̂examro yosotî.

Ciaku yakno tî mîk xakn̂e Xuaw.

Kanawa yaw tî xatken̂e tîîm yakro,

Sebetew yakro.

Mîîye yeemirî poko tî xatken̂e ar̂machome yukwaka amn̂e.

N̂examro marha tî Xesus nan̂ikyakn̂e.

22 Ero ke ero yimaw rma tîkanawathîrî komo nînomyatken̂e.

Tîîm komo marha nînomyatken̂e.

Xesus yakro takî tî cetken̂e n̂examro hara.

Ero wa tî cetken̂e.

23 Taa,

ero yinhîrî mîn hak pona takî tî cekn̂e Xesus ewto mko pona.

Karireia pono mko tî n̂irikyakn̂e ewto mko.

Ahto so na cexitaw Xutew yesenmetopo yaka so tî cekn̂e roro.

Iina esenmexapu komo panatanmekyakn̂e.

Kayaritomo me xa Kaan yesenpotopo pokono n̂ekatîmyakn̂e yîwya so,

ahworetopo kom ha.

Kar̂pen komo marha tî karihcekn̂e.

Ceper̂ayem komo marha tî nakir̂wamekn̂e.

24 Ero ke Noro yekaci takî tî n̂encetken̂e miyan komo rma.

Siria pono komo meero tî n̂encetken̂e ahnoro.

Ero ke kar̂pen komo takî tî n̂ekyatken̂e Xesus yaka.

Mîn hakî ke ceper̂ayem komo n̂ekyatken̂e.

Worokyam ken̂arî komo marha tî n̂ekyatken̂e,

tîrohsom komo marha tî,

yîhrepun komo marha tî,

apohnî komo marha tî,

ero yipu komo tî n̂ekyatken̂e Xesus yaka.

Ero ke takî tî n̂examro nakir̂wamekn̂e Xesus.

25 Mer̂pono pîn komo takî tî cetken̂e Xesus wenari.

Karireia pono komo,

Tekapori pono komo,

Xerusaren pono komo,

Xuteia pono komo,

Xotaw yeco pono komo.

Ero warai komo tî cetken̂e Xesus wenari.

Ero wa tî cetken̂e.