Taa,

amn̂e n̂he takî tî mokyakn̂e Xuaw Bacista.

Kemicinon̂e,

kacho tî mîn Bacista,

kacho.

Xuteia po tî xakn̂e noro pohnîntaw mak,

Xuteia mapirî po mak.

Iina ti n̂esenmekyatken̂e tooto komo.

Kaanî mtapotarî tî n̂ekatîmyakn̂e yîn̂entarî komo me.

2 On wara tî kekn̂e Xuaw yîwya so,

Kîkayaritomon komo me xa tak Kaan n̂esenpes amn̂e.

Pahnoke tak nasî ero wa esenpotopo.

Ero ke men kicicme awehtoponhîrî komo tak poxunkacoko,

kekn̂e tî yîwya so.

3 Pahxa rma tî kweronoman̂e pen n̂ekatîmyakn̂e Xuaw yehtopo,

Isaias pen ha.

On wara tî kekn̂e,

Kweronoman̂e mtapotarî tak mencexe amn̂e.

Pohnîntaw ro mak n̂ekatîmyasî Kaanî mtapotarî.

On wara kes awya so,

Kporin komo yesamarî tak akir̂wamacoko.

Pataw xa tak ciicoko Noro yesamarî,

kes amn̂e awya so,

kekn̂e tî Isaias pen.

Xuaw poko twa ero wa kekn̂e.

4 On wara tî xakn̂e Xuaw,

kameru pocitho kahxapu makî tî xakn̂e ponon me.

Paaka picho reha tî xakn̂e aan̂apotun hara.

Rîîro warai tî xakn̂e iyotî.

Weenu marha tî xakn̂e yîn̂emerî comota chewno.

Ero wa tî xakn̂e Xuaw.

5 Noro yaka cetken̂e mer̂pono pîn komo yîmtapotarî yentaxi.

Xerusaren pono komo cetken̂e,

mehxan komo marha cetken̂e Xuteia pono komo ahnoro ewto pono komo.

Xotaw yecihtawno komo marha cetken̂e.

Ero wa tî cetken̂e yîhyaka.

6 Iito tî n̂emicinoyakn̂e kicicme cehtoponhîrî yekatîmn̂enho komo.

Ero wa tî emicinono n̂iir̂akn̂e Xuaw Xotaw kwaka.

7 Parisew komo marha tî cetken̂e Xuaw yaka Satusew komo yakro.

Esemicinoposo so marha tî re wa cetken̂e.

N̂examro yenîche on wara tî kekn̂e Xuaw yîwya so,

Okoyi yepamrî mak reha amyamro okwe.

Onoke wa kekn̂e awya so,

Etakir̂wamacoko.

Kaan men nîrwonasî kopi apoko so,

kekn̂e onok ha?

kekn̂e tî Xuaw yîwya so.

8 On wara marha tî kekn̂e yîwya so,

Awehtoponhîrî poxunkan̂e me xa ka ehcoko.

Kir̂wan̂he tak ehcoko hara ero wa awehtopo komo yesenpotome.

9 On wara marha wîîkes awya so,

kekn̂e Xuaw,

Abraaw yepamtho me awehtopo komo pona enîhra ehcoko.

Kir̂wanî ro mak amna okre Abraaw pen yepamtho me cexirî ke,

kahra ro mak ehcoko.

On toopu rma Kaan nakîhce Abraaw pen yepamtho me akîhto xe cexitaw.

10 On wara marha wîîkes awya so,

Moro to tak men nasî Kaan yawakan oko,

weewe yamacho ha.

Iike tak men weewe namesî Kaan epetan komo ahnoro.

Wehto ywaka tak nar̂mes okwe,

kekn̂e tî Xuaw tîhyaka mohxapu komo ya.

11 On wara marha tî kekn̂e yîwya so,

Tuuna kwaka mak kemicinoyaxe so ow awehtoponhîrî komo poxunkache awya so.

Anarî tak mokyas amn̂e ohretawno hara.

Noro xa nasî kar̂pe oyopo ro mak.

Yîhtarî yaan̂e pîn me ro thakwa mak wasî yîxawyakan me oyexirî ke.

Noro tak awemicinoyaxe so amn̂e Kir̂wanî ro Yekatî yaka tak.

Wehto ywaka marha awemicinoyaxe so,

kekn̂e tî Xuaw yîwya so.

12 Puruma yatho pupunkan̂e wara marha nasî Noro tmokuche.

Ahce wa puruma yatho miir̂atu enmekîche awya so yîpîpîtîkacho pona?

Mîpîpîtîkexe ha kapu.

Ero yinhîrî tak yathîrî menmekyaxe mîîmo yaka.

Yîpîpîthîrî takî reha makn̂iyaxe kr̂a.

Ero wa xa marha yîchewnonkano n̂iir̂asî Noro hara,

tmohsom ha.

Yathîrî warai komo naar̂asî tîmîn yaka yîchewnonkache.

Yîpîpîthîrî warai komo reha nakn̂iyasî oco eseikanî ro ke,

kekn̂e Xuaw yîwya so.

Ero wa kekn̂e.

13 Taa,

ero yinhîrî tak Xesus takî tî mokyakn̂e Karireia poi Xotaw kwaka.

Xuaw yaka tî mokyakn̂e esemicinoposo yîwya.

14 Anarî me tko kekn̂e Xuaw yîwya,

Ahce kacho ohyaka mîmoko esemicinoposo?

Oyemicinon̂e xa matko Amoro ha,

kekn̂e tî yîwya.

15 On wara tî n̂eyukyakn̂e Xesus hara,

Pîra,

Ow rma emicinoko.

Kir̂wan̂he kehtopo komo yaw roro rma oyexi xe was Ow meero,

kekn̂e tî Xesus yîwya.

Taa,

ero wa ham,

kekn̂e takî tî Xuaw.

16 Cemiciche tak ecihtaka nawomyakn̂e hara Xesus.

Ero yimaw takî tî kaapu n̂etahrunkekn̂e.

On warai takî tî n̂een̂akn̂e,

Kaan Yekatî takî tî nîhcekn̂e potkuku me.

Pow,

tai,

Xesus pona takî tî n̂etahsîyakn̂e.

17 Ero yimaw marha tak kah yawno mtapotarî n̂esencekn̂e.

On wara tî kekn̂e,

Omumuru cik Moso okwe,

yiixe xa oyehtopo.

Tawake xa wasî Moso poko,

kekn̂e.

Ero wa kacho tî n̂esencekn̂e.