Taa,

ero wa tî Xesus n̂ewruyakn̂e.

Beren po tî n̂ewruyakn̂e.

Eroces tî xakn̂e kayaritomo me ero yimaw.

Amn̂e n̂he takî tî xir̂ko yenîn̂e komo mokyatken̂e Xerusaren pona.

Mehxan komo tî mîkyam xatken̂e,

resce n̂ixan komo.

Ero warai komo tî mokyatken̂e.

2 On wara tî ketken̂e n̂examro iitono komo ya,

Ai,

oyakno komo,

ahto wa nai ha ewruxan ciki?

Xutew komo kayaritomon me ewruxapu ciki ahto wa nai ha?

Mehxa mohxapu amna resce n̂ixa ro.

Meye ka amna exitaw Noro kuknon amna n̂een̂akn̂e xir̂ko.

Ero ke amna mokye Noro mamakan me yutupentaxi,

ketken̂e tî.

Ero wa tî ketken̂e xir̂ko yenîn̂e komo.

3 Taa,

ero wa kacho yentache kayaritomo takî tî n̂eserepokekn̂e,

Eroces ha.

Ahnoro Xerusaren pono komo marha tî n̂eserepoketken̂e.

4 Ero ke takî tî an̂ikno n̂iir̂akn̂e Eroces.

Tîmsom pokono yenîn̂e komo tî nan̂ikyakn̂e,

kpanatanmetopo mewren̂e komo marha tî ahnoro.

Yîmtapotarî komo yentachome tî nan̂ikyakn̂e.

On wara tî kekn̂e Eroces yîwya so,

Ahto cewrusom tî Mîk Kristu,

kacho?,

kekn̂e tî.

5 Beren po cewrusom tî Mîkro,

Xuteia po ha,

ketken̂e tî yîwya.

On wara kacho rma mewrekn̂e kweronoman̂e pen pahxa,

6 Ai,

Beren,

wahrai cik mak amoro ewto.

Xuta rowon pono rma amoro.

Yaake rma re nai ewto Xuta pono mko.

Amoro xa tko masî cekaiporesom me.

Aapo xa tak n̂ewruyasî Ixaw Yana komo kayaritomon amn̂e.

Oper̂a yenîn̂e wa nasî Noro amn̂e oyanan komo yenîn̂e me ha.

Ero wa xa tak nas amn̂e aapo ewruxapunhîrî,

kacho tî mewrekn̂e,

ketken̂e tî Eroces ya.

Ero wa tî ketken̂e.

7 Ero yinhîrî takî tî xir̂ko yenîn̂e komo nan̂ikpekn̂e Eroces.

Yîmtapotarî takî tî n̂encekn̂e cewyaro mak.

On wara tî kekn̂e yîwya so,

Ahcemaw xa meen̂atken̂e xir̂ko?

kekn̂e tî yîwya so.

Ero ke takî tî n̂ekatîmyatken̂e yîwya.

8 Ero yipu yentache on wara takî tî kekn̂e Eroces yîwya so,

Taa,

etocoko tak Beren pona ewruxan yeposo.

Enîche tak awya so amohcoko hara xiya ekatîmso owya.

Ow marha owto xe wasî enso.

Oporin amoro ham okre,

ka xe wasî yîwya,

kekn̂e tî yîwya so.

Ero wa tî kekn̂e Eroces xir̂ko yenîn̂e komo ya.

9 Ero ke takî tî cetken̂e.

Pahxa ceken po rma cexitaw so xir̂ko tî n̂een̂atken̂e ero rma takî tî n̂een̂atken̂e xa hara.

Yîywapu so takî tî cekn̂e.

Cekn̂e,

cekn̂e,

amn̂e takî tî n̂ecececekn̂e.

Xesusu mren xakn̂e mîîmo yaw ero yepoi takî tî n̂ecececekn̂e.

Ero wa tî xakn̂e xir̂ko.

10 Ero ke takî tî tahwore xa xatken̂e enîrî ke xa hara.

11 Ero ke n̂ewomyatken̂e mîîmo yaka.

Iito takî tî rikomo n̂een̂atken̂e yîson yakro ciki,

Maria yakro.

Ero ke takî tî nutupenwatken̂e rikomo mamaka.

Oporin Amoro,

ketken̂e yîwya.

Yîwya tîmsom marha tî n̂ekyatken̂e tpakaran komo yaw.

Ero ke takî tî nahrunketken̂e tîmtome yîwya.

Ooru tî nîmyatken̂e yîwya,

kotoporem komo marha tî nîmyatken̂e,

insensu tî miiha marha tî.

Ero yipu tî nîmyatken̂e yîwya.

12 Ero yinhîrî iito rma nîwînîkyatken̂e.

Wosowatken̂e takî tî.

On wara tî Kaan kekn̂e yîwya so wosoto so,

Eroces yari tohra ro mak men ehcoko hara.

Anarî yaw mak etîramacoko hara,

kekn̂e tî.

Ero ke ero wa tî cetken̂e ceken komo pona hara.

Eroces yari takî tî tohra xatken̂e hara.

Ero wa tî xatken̂e.

13 Taa,

ero yinhîrî n̂examro toche tak Kporin komo yancun takî tî n̂esenpekn̂e Xose ya.

Wosoto tî n̂esenpekn̂e.

On wara tî kekn̂e yîwya,

Rikomo men n̂epor̂asî Eroces amn̂e etapachome okwe.

Ero ke miya arko Exitu pona.

Yîson yakro rma arko.

Iito makî ka ehcoko Exitu po.

Amn̂e kan̂ikyaxe so hara oona Kanan pona hara.

Ero wa men etocoko,

kekn̂e tî ancu Xose ya.

14 Ero ke nîhcekn̂e tak Xose kosope rma.

Xesusu mren ciki takî tî naar̂akn̂e miya Exitu pona yîson yakro rma.

15 Iito tî xatken̂e pahkî Eroces pen waihtopo pona roro.

Ero wa tî xatken̂e Kporin komo mtapotachonho yaw roro,

kweronoman̂e penî mtari kekn̂e,

ero wa kachonho yaw roro.

Exitu poi wekyakn̂e Omumuru,

kekn̂e tî.

Ero ke iito tî ka xatken̂e ero wa kachonho yaw roro rma.

Ero wa tî xatken̂e.

16 Taa,

amn̂e takî tî nîrwonakn̂e Eroces.

Ahto nat hara kica xir̂ko yenîn̂e komo.

Oyemîknoce mak ham kica,

kekn̂e tî.

Ero ke tî sowtatu komo nan̂ikyakn̂e.

On wara tî kekn̂e yîwya so,

Kîîrî mren komo etapatatko Beren pono komo,

Beren mîtwono komo meero ahnoro.

2 cimn̂ipu ehxapunhîrî komo etapacoko,

yîxawyakan komo marha,

kekn̂e tî.

Ero warai komo tî nukuknomekn̂e noro xir̂ko yeîn̂e komo mtapotacho yaw roro rma.

Ero yimaw xa xir̂ko amna n̂een̂akn̂e,

kachonho yaw roro.

Ero ke takî tî cetken̂e sowtatu komo rikomo pen komo waparî me okwe.

17 Ero ke yîsonînhîrî komo nîwracetken̂e okwe.

Kweronoman̂e penî mtapotachonho yaw roro rma tî xatken̂e,

Xeremias penî mtapotachonho yaw roro ha.

18 On wara tî kekn̂e noro,

Hama pono komo tak nîwracetken̂e,

Hakew yepamtho komo.

Okwe,

omxîkrî cik okwe,

ketken̂e xa.

Tîmxîkrî komo pînîn yaw so thakwa nîwracetken̂e.

Etîspepînkara ro makî tî nîwracetken̂e exihra exirî ke thakwa yîmxîkîthîrî pen kom okwe,

kekn̂e tî Xeremias pen.

Ero ke ero wa kachonho yaw roro tî xatken̂e.

19 Taa,

amn̂e takî tî Eroces pen waihyakn̂e.

Waipuche Kporin komo yancun takî tî n̂esenpekn̂e xa hara Xose ya.

Wosoto tî n̂esenpekn̂e xa hara yîwya Exitu po exitaw so.

20 On wara tî kekn̂e yîwya,

Taa,

etocoko hara Ixaw Yana komo rowon pona.

Xesus ciki tak arko,

yîson marha.

Waihce tak amxîkrî waparî me cexi xatînhîrî komo,

kekn̂e tî.

Ero wa tî kekn̂e ancu Xose ya.

21 Ero yinhîrî takî tî pakekn̂e Xose.

Cekn̂e hara tî Ixaw Yana komo rowon pona hara.

Xesus ciki tî naar̂akn̂e iina hara,

yîson yakro rma.

22 Tîcetaw so rma takî tî kayaritomo yekaci n̂encetken̂e hara.

Eroces mumutho tak nai kayaritomo me hara,

Xuteia pono komo kayaritomon me ha.

Ahkeraw mîk noro yosotî.

Noro tak nasî kayaritomo me hara,

tîîm pen retawno me,

kacho tî n̂encetken̂e.

Ero ke n̂eraswakn̂e tî Xose.

Iina tîto xera tî xakn̂e.

Kaan takî tî kekn̂e xa hara yîwya wosoto xa hara.

Iina tohra men ehcoko,

kekn̂e tî.

23 Ero ke anana mak takî tî cekn̂e Xose,

Karireia pona makî tî.

Ero pona takî tî n̂esekenmekn̂e hara,

Nasare pona tî.

Ero ke kweronoman̂e pen komo mtapotachonho yaw roro xa hara xakn̂e Xesusu mren.

Nasare pononho Mîkro,

kexe tak amn̂e,

kachonho yaw roro tî xakn̂e.

Ero wa tî xakn̂e.