Ero yinhîrî Kaan mîn metatan yaka oyar̂akn̂e xa hara tooto warai. Iito ween̂akn̂e tuuna. Kaan mîn metatan makatai rma n̂epatakekn̂e. Miya nîhcekn̂e resce yaw roro. Iina cewruno wara rma xakn̂e Kaan mîn resce yaw roro cewruno wara. Kaan mîn makatai rma n̂epatakekn̂e tuuna kaari n̂ixan makatai. Kaan ya tîmsom yakn̂itopo mehxa n̂epatakekn̂e suu n̂ixa.

2 Ero yinhîrî Kaan mîn wacan yai tak oyar̂akn̂e tooto warai. Ero metatan yaro oyar̂akn̂e nohce n̂ixan yaro. Kaan mîn wacan mehxa oyar̂akn̂e metata yaka hara, resce yaw roro kîwtotopo yaka. Iito tuuna ween̂akn̂e waaca makatai epatakaxapu, kaari n̂ixa epatakaxapu ha.

3 Ero yinhîrî tak cekn̂e tooto warai resce yaw roro xa hara. Xapopo naar̂akn̂e cemyaw tuuna yukuknomacho. 500 metru wicakî nukuknomekn̂e tuuna yakwerî. Ero wicakî oyar̂akn̂e tuuna kwari rma. Ohtakmarun toxa mak xakn̂e tuuna.

4 Ero yinhîrî 500 metru nukuknomekn̂e xa hara tuuna yakwerî rma. Ero wicakî marha oyar̂akn̂e tuuna kwari. Oyosokmuru toxa tak xakn̂e iitono tuuna hara. Ero yinhîrî 500 metru nukuknomekn̂e xa hara tuuna yakwerî rma. Ero wicakî marha oyar̂akn̂e yukwari. Oyeknu n̂ixa tak xakn̂e tuuna iitono hara.

5 Ero yinhîrî 500 metru nukuknomekn̂e xa hara tuuna yakwerî. Eepu me tak xakn̂e ero kwari owtorî yarohra. Weyun me xa tak xakn̂e tuuna okwe. Tperenîmpore mak xakn̂e iito. Watorî yarohra thakwa xakn̂e.

6 On wara kekn̂e tooto warai owya, Ai, tooto xîkrî, on tuuna meen̂a? kekn̂e owya. Ero yinhîrî oyar̂akn̂e ecihtaka hara.

7 Iina oyawomuche weewe yepu ween̂akn̂e tuuna yecihtaw, eeco po marha. Mer̂pora ro mak ween̂akn̂e.

8 On wara kekn̂e tooto warai owya, On tuuna nîhcesî resce yaw roro. Woskara pore nîhcesî, tuuna imo kwaka roro. Tuuna imo kwaka yîhtoche iitono tak nakir̂wamesî tuuna. Kmasmacho mera tak n̂iir̂asî.

9 Onok na komo ahnoro nasî kar̂pe on tuuna kwawno, ecihtawno marha. Mer̂pora ro mak nas on kwawno ootî komo. Kar̂pe tak nasî ahnoro mak on tuuna kwawno komo, ecihtawno komo marha.

10 Ootî yanîmn̂e komo nasî ecihtaw miya roro. Tîmîyen komo yaka n̂emcinoyaxe En Xeci pono komo. Miya rma naxe anîmn̂e komo En Ekrain pona roro. Anarmerpa so nasî ootî komo ero kwawno, porin tuuna imo kwawno wara rma. Mer̂pora ro mak nasî ootî on kwaw.

11 Etîyîmîtînkara tko nasî krarasî mko. Yîmîtî ken̂e rma nasî ero yipu.

12 Weewe yepu natîkwasî on yecitaw, eeco po marha. Cepetaxmu mîn okre weewe yepu. Aawaipîn me ro mak nasî. Epetan me exihra marha nas okre. Ahnoro nuun̂i po roro n̂eperwasî xa hara. Ero wara n̂eperwasî on tuuna torî ke yîhyari, Kaan mîn makatai epatakaxapu ha. Knahrî me nasî eperîrî. Ehci me reha nasî yarîthîrî. Ero wara nas amn̂e on yecihtawno weewe yepu, kekn̂e. Ero wara kekn̂e owya.

13 Ero yinhîrî Kporin komo mtapotarî wencekn̂e xa hara. On wara kekn̂e owya, Taa, Ixaw Yana komo rowon wokpanî mko wekatîmyas awya. N̂examro ya mîmyaxe amn̂e yîrowonî ro komo, yînahsîrî kom ha. 12 nasî tribu komo, Ixaw pen mumutho yosoken kom ha. Asakî raco tko nahsîyaxe tîrowon komo Xose pen yepamtho komo.

14 Etîme re mak nahsîyaxe anarî tribu komo. On wara wîîkekn̂e aporin pen komo ya pahxa, On roowo wîmyasî awepamthîrî komo ya amn̂e, wîîkekn̂e. Tapockantaxi wîîkekn̂e yaaro entachome omtapotarî. Ero ke wîmyasî tak amn̂e yîwya so.

15 Taa, arowon komo wokpan tan wekatîmyasî awya. Nohce n̂ixa n̂ihciyasî tuuna imo yecihtaw. En̂exa cesî Etîron yesamarî yaw Setace pona roro.

16 En̂exa ces hara Amace pona, Berota pona, Sibrain pona. Tamasku rowon yemyatwono mîn Sibrain, Amace rowon yemyatwono marha mîn ha. Mîya tak cesî Ase-Acikon pona. Awran rowon yemyatwono mîn Ase-Acikon.

17 Ero wa nasî yîrowon komo wokpan nohce n̂ixan. Tuuna imo yecihtai cesî Asa-Eton pona. Tamasku rowon wokpan porero cesî nohce n̂ixan porero. Amace rowon wokpan porero marha cesî suu n̂ixan porero. Ero wa nasî Ixaw Yana komo rowon wokpan nohce n̂ixan.

18 Taa, resce n̂ixan wekatîmyas hara yîrowon komo wokpan. Suu yaw roro cesî ewto yotaw, xehxa nasî Awran, mehxa nasî Tamasku. Xotaw yepu porero cesî. Mehxa nasî Xireace, xehxa nasî Ixaw Yana komo rowon. Miya cesî n̂ikitho imo yecihtari, resce n̂ixan yecihtari. Ero wa nasî n̂examro rowon wokpan resce n̂ixan.

19 Taa, suu n̂ixan wekatîmyas hara yîrowon komo wokpan. Tama poi cesî tuuna kwaka Meriba Kates kwaka. En̂exa cesî aporî porero tuuna imo yecihtaka hara, porin yecihtaka. Ero wa nasî arowon wokpan suu n̂ixan.

20 Taa, oesce n̂ixan wekatîmyas hara. Tuuna imo nasî yîrowon komo wokpan me. Miya roro nasî ero me Amace yecentono pona roro. Ero wa nasî yîrowon komo wokpan oesce n̂ixan hara.

21 Ero roowo ekamcoko amn̂e Ixaw Yana komo ya, tribu komo ya.

22 Ixaw Yana ya makî tko ekamra ehcoko, acheka so mohxapu komo yeken marha ekamcoko. Tîmxîkye exitaw so n̂examro yeken meero ekamcoko arowon komo poyino rma. Ixaw Yana me ewruxapu komo wara rma noro yipu komo encoko. Ero ke Ixaw Yana tribun ya roowo yekamyataw noro yipu komo yeken marha tîmcoko.

23 Ahce warai tribu cheka na cetu esekenmaxi n̂examro rowonî rma tîmcoko eken me so. Ero wara ehcoko acheka so mohxapu komo poko, wîîkesî. Aporin komo Kaan Ow wîîkesî, kekn̂e. Ero wara kekn̂e Kporin komo owya.