On wara marha wîîkes Ow Aporin komo Kaan, on wara n̂expe omîn metatan, resce n̂ixan ha, tahruso mak n̂expe 6 kaamo po, awetapickacho komo po roro ha. Sabatu po roro tko tahrunkaxi tak n̂expe, nuun̂i yepatakacho po roro marha.

2 Ero kaamo po so omîn roron pona n̂ewomyasî awantoman̂e komo. Resce n̂ixan yaro rma n̂ewomyasî, metata yaro. Metata yecepu wararî rma n̂ecececesî. Ero yimaw noro nîmrî nakn̂iyaxe omîn yenîn̂e komo takn̂itîkaxmu me tîmsom, Aaxe xa wasî, kacho me tîmsom kom ha. Iito rma nahwowasî noro Kaan poko. Ero yinhîrî ero yaro rma tak n̂epatakes hara katpanaka. Metata tko ahrura ka n̂ehcowpe noro toche. Kokmamyataw mak nahrucowpe.

3 Ero metataw marha Aporin komo poko nahwotacowpe orowon pono komo. Awepokaretopo komo po roro iito nahwotacowpe, nuun̂i yepatakacho po roro marha.

4 On wara n̂expe awantoman̂e komo awepokaretopo komo po roro, 6 oper̂a xîkrî n̂ekpe. Kahn̂eru etîtîkaxapu marha n̂ekpe cewn̂e mak. Tupunporem komo mak n̂ekpe. Takn̂itîkaxmu me tîmtome n̂ekpe.

5 Kahn̂eru yakro nîmpe puruma cewn̂e epa wicakî. Oper̂a xîkrî komo yakro tîmsom marha nîmpe tanme ro mak puruma. Aseci marha nîmpe cewn̂e iin, puruma yakro tîmsom me. Cewn̂e epa wicakî tîmyataw puruma, cewn̂e iin wicakî nîmpe aseci hara. Ero wara roro nîmpe.

6 On wara n̂expe awantoman̂e komo nuun̂i yepatakacho po hara, ero po bui nîmpe owya kar̂pamxan warai. 6 oper̂a xîkrî marha nîmpe, kahn̂eru marha nîmpe cewn̂e, etîtîkaxapu. Tupunporem komo mak nîmpe.

7 Puruma nîmpe noro yipu komo yakro. Bui yakro cewn̂e epa wicakî nîmpe. Ero wicakî xa marha nîmpe kahn̂eru yakro hara. Oper̂a xîkrî komo yakro puruma nîmpe atî wicak ha na, tanmero mak nîmpe ero reha. Cewn̂e epa wicakî tîmyataw puruma ero yakro aseci hara nîmpe cewn̂e iin wicakî so.

8 On wara n̂expe awantoman̂e komo omîn yaka cewomyataw, metata yaro n̂ewomhe tîmîyem yaro. Cepataketaw hara ero yaro xa marha n̂epatakape hara.

9 Ero warahra n̂ehcowpe orowon pono komo Aporin komo mîn yaka tmokyataw so, awahwotacho komo po roro tmokyataw so. Ero po so anarî komo mokyatu nohce n̂ixan yaro, metata yaro. Opoko tahwotatîkache so mehxa tak n̂epatakacowpe hara suu n̂ixan yaro hara. Anarî komo mokyatu suu n̂ixan yaro. N̂examro cetaw hara, n̂epatakacowpe nohce n̂ixan yaro hara. Epatakara ro mak n̂ehcowpe cewomtoponhîrî komo yaro rma. Ecen̂an yaro mak n̂epatakacowpe hara.

10 Orowon pono komo yakro mokope awantoman̂e komo omîn yaka. N̂examro yewomyataw noro meero n̂ewompe. N̂examro yepataketaw hara noro marha n̂epatakape hara.

11 On warai n̂ehcowpe roro Ixaw Yana komo ahwotacho me exitaw so. Bui yekyataw tîmsom me puruma marha n̂ehcowpe cewn̂e epa wicakî mak. Kahn̂eru yekyataw ero wicakî xa marha n̂ehcowpe puruma. Oper̂a xîkrî yekyataw tanme ro so mak nîhtînope tînîmrî puruma. Aseci rma tko n̂ehcowpe puruma yakro. Cewn̂e epa wicakî ekyataw puruma cewn̂e iin wicakî aseci n̂ehcowpe marha ero wicakno yakro. Ero wara owya tîmsom n̂ehcowpe.

12 Anarimaw so on wara nai awantoman̂e komo, Tanmero mak nîhtînoya tînîmrî Aporin komo ya. Takn̂itîkaxmu tîmî xe na nai, Aaxe xa wasî, kacho me cehsom tîmî xe na nai. Ero yipu tîmî xe cexitaw omîn metatan nahrunkacowpe resce n̂ixan. Ero yaro n̂ewompe. Noro yewomuche tînîmrî nakn̂ipe takn̂itîkaxmu. Anarimaw, Aaxe xa wasî, kacho nakn̂iyas hara. Awepokaretopo po tînîmrî nakn̂iyasî ero warai xa marha nakn̂ipe. Akn̂itîkache omîn yai n̂epatakape hara. Noro yepatakache metata nahrucowpe hara ero yenîn̂e komo.

13 On wara xa ehcoko amyamro hara, ahnoro kaamo po roro cewn̂e oper̂a xîkrî ehcoko cewn̂e cimn̂ipu ewrutoponhîrî me cehsom. Tupunporem mak ehcoko takn̂itîkaxmu me, Aporin komo ya tîmsom me ha. Pahxaxaro so ehcoko.

14 Ero yakro puruma ehcoko aposokaxapu. Epa raconho wicakî mak ehcoko, sexta wicakî mak ha. Ero yakro esmacoko aseci iin raconho wicakî, tehsa wicakî mak. Ero wara aseci esmacoko cewkre n̂he ehtome. Ero wara puruma tîmcoko miya roro owya, Aporin komo ya ha.

15 Ero wara roro n̂ehcowpe pahxaxaro so, oper̂a xîkrî, puruma, aseci. Ero wara roro n̂ehcowpe takn̂itîkaxmu me, Aporin komo ya tîmsom me ha, wîîkes Ow Aporin komo.

16 On wara marha wîîkes Ow, Aporin komo Kaan, anarimaw tîrowon raconho na nîmya awantoman̂e komo tumumuru komo ya. Ero yipu tîmîche yîwya n̂examro rowon me tak nasî miya roro.

17 Anarimaw tko tîrowon raconho na nîmya awantoman̂e komo tumumuru pîn ya, tmaywen ya mak. Noro yipu ya tîmîche nahsîyas hara noro Xubirew kacho pona roro mak, cimn̂ipu pona roro. Ero po tak nahsîpe hara awantoman̂e komo. Yumumuru komo rowon me mak nasî noro rowontho.

18 On wara exihra ro mak cexpore nasî awantoman̂e komo, Ixaw Yana komo rowon yahsîra ro mak cexpore nasî. Awekenhîrî poi etoko. Wahsîyasî omumuru rowon me, kahra ro mak cexpore nasî. Tumumuru rowon tîmî xe cexitaw tîrowonî rma nîraconkape yîwya tîmtome. Oyanan komo yen̂epera ro mak cexpore nasî yîrowon komo poi, kekn̂e. Ero wara kekn̂e Kporin komo owya.

19 Ero yinhîrî oyar̂akn̂e xa hara tooto warai. Kaan mîn wacan metatan mîtwo xakn̂e anarî hara ewtarî, kewomtopo ha. Ero yaro oyar̂akn̂e amtakpo mko yaka nohce n̂ixanî mko yaka. Tîmsom pokono komo yamtakponî ro mak mîn xakn̂e, amtakpo mko. Amtakpo mapitaka oyar̂akn̂e oesce yaw roro. Iitono n̂enpekn̂e owya.

20 On wara kekn̂e owya, On Kaan mîn yenîn̂e komo yetapickacho. Tanî wooto nîyexe, Kicicme wehxe kica, kacho, kicicme cehtoponhîrî komo yahrutopo me tîmsom. Puruma marha naiyaxe tan Kaan ya tîmsom. Miya arîhra n̂ehcowpe mehxan pona roro pona iina esenmexapu komo yakir̂wamaxi tîcetaw so, kekn̂e tooto warai.

21 Ero yinhîrî anarî pona oyar̂akn̂e hara roro pona, Kaan mînî mkaino pona. Ceknuke xakn̂e ero wacan, 4 xakn̂e eknu mko. Eknu yaw so ween̂akn̂e roro xa hara, wahrai mko. Ero mko n̂enpekn̂e owya.

22 On wara xakn̂e roro mko, waaca yeknu yawno mko, twacaye so xakn̂e. Anarî xakn̂e 20 metru wicakî kawnon, 15 metru wicakî xakn̂e akwerî hara. Etîme re xakn̂e wahrai mko porin eknutawno mko. Ero wa xakn̂e roro mko.

23 Rorohci wacan porero xakn̂e aapo kawno, miya rorono mak xakn̂e rorohci tmamritîkaxi ro. Toopu rma mîn xakn̂e aapo, tmemehsem. Aapo makataw xakn̂e cehyakata yaake.

24 Ero mko yenpoche owya on wara kekn̂e, On cehyakata enko. Ero po so wooto nîyocowpe Kaan mîn yaw cetapickaxmu komo. Tooto komo nîmîtho nîyocowpe Kaan ya yînmîthîrî kom ha, kekn̂e. Ero wara kekn̂e tooto warai owya.