Ero yinhîrî tak, ero cimn̂ipu po rma Anan̂ias nîmtapowakn̂e oyakro. Asu mumuru tî mîk xakn̂e Anan̂ias, weronomano rin̂e mumuru ha. Xibeon pononho tî mikyam xatken̂e. 4 cimn̂ipu makî ka xakn̂e kayaritomo me Setekias yehtoponho, 5-nhîrî nuun̂i po nîmtapowakn̂e. Kporin komo mîn yaw kekn̂e. Iito xatken̂e tîmsom pokono komo. Tooto komo marha xatken̂e iito mer̂pono pîn.

2 On wara kekn̂e Anan̂ias owya, On wara kesî Kporin komo, kantoman̂e ro, ponaro Ixaw Yana komo yehtopo ha, Babiron̂a pono komo kayaritomon nakîhtotho waxikwoi hara paaka pîmîrî yakan warai.

3 Asakî cimn̂ipu yenatîche Aporin komo mîn yawnonho mko wekmexpes hara oona. Nabukotonoso naar̂akn̂e, Babiron̂a pono komo kayaritomon, ceken pona naar̂akn̂e ero mko wekyas hara oona.

4 Oona marha wekyas hara Xekon̂ias, Xeoiakin mumuru, Xuta kayaritomon mumuru. Xuta komo ahnoro wekyas hara oona Babiron̂a pona aaxapunhîrî komo. Babiron̂a pono komo kayaritomon nakîhtotho waxikwesî kr̂a paaka pîmîrî yakan warai, kesî Kporin komo, kekn̂e. Ero wa kekn̂e Anan̂ias owya.

5-6 Ero yinhîrî Xeremias nîmtapowakn̂e hara. Weronomano rin̂e mîk xakn̂e. Anan̂ias yakro nîmtapowakn̂e, tîmsom pokono komo n̂entarî me rma. Mer̂pora xatken̂e tooto komo iito Kaan mîn yaw, n̂examro n̂entarî me nîmtapowakn̂e. On wara kekn̂e Anan̂ias ya, Amen, ero wara rma n̂irpe Kporin komo. Amtapotachonhîrî mekatmo Kaan mîn yawnonho yîramantopo poko, aaxapunhîrî komo yîramantopo poko, kpoyino komo yîramantopo poko marha oona mîîka, ero wara rma n̂irpe Kporin komo.

7-8 Omtapotarî tko ka entakî. Ow kîmtapowas hara an̂entarî me, tantono komo n̂entarî me marha. Pahxa weronomano rin̂e komo xatken̂e ewrura ka oyexitaw, ewrura ka awexitaw marha. N̂examro pen n̂ekatîmyatken̂e mîk hak rowon pono komo yîwîrîmacho, yukurumîkno komo yîwîrîmacho meero n̂ekatîmyatken̂e. Awaparî komo mokyaxe amn̂e, ketken̂e anarimaw so, awîrîmacho komo awepor̂axe so amn̂e, aweper̂an komo awahsîyaxe so amn̂e, ketken̂e anarimaw so noro yipu komo ya.

9 On wara nîîke anarî, Kaanî mtapotarî yekatîmn̂e, Cerepore tak maxe amn̂e esemetanmekîra ro mak okre, nîîke. Taa, yîmtapotachonhîrî yaw roro exitaw so tooto komo ero yimaw n̂esehtînomexpesî noro yehtopo. Kporin komo yanme mohxapu xa ham mîkro okre, tîtkesî noro yipu poko, kekn̂e yîwya.

10 Ero yinhîrî paaka pîmîrî yakan mohkekn̂e Anan̂ias Xeremias pîmtawnonho. Mohkache tak naxikwekn̂e.

11 On wara kekn̂e Anan̂ias iitono komo n̂entarî me, On wara kesî Kporin komo, Ero wa xa marha Nabukotonoso nakîhtotho waxikwes hara paaka pîmtawno warai. Asakî cimn̂ipu exiche tko noro wowyasî kayaritomo mera tak ehtome. Mîk hak rowon pono komo kayaritomon mera tak nasî Nabukotonoso ero yimaw, kesî Kporin komo, kekn̂e. Ero wa kache Anan̂ias ya anana mak cekn̂e Xeremias.

12 Ero yinhîrî Xeremias yakro tak nîmtapowakn̂e xa hara Kporin komo. Yîpîmtawnonho yaxikwoche Anan̂ias ya ero yimaw nîmtapowakn̂e.

13 On wara kekn̂e yîwya, Ai, Xeremias, etoko Anan̂ias yaka xa hara. On wara kasko yîwya, On wara kesî Kporin komo awya, paaka pîmtawno warai maxikwoi rma re. Ero yipu rma tko makîhtoi hara pehu warai tak okwe.

14 On wara kesî Kporin komo, ponaro Ixaw Yana komo yehtopo, paaka pîmîrî yakan warai wakîhtoi pehu warai tak. Ero wiir̂e mîn hak pono kayaritomon komo pîmtaka Nabukotonoso yanton me ehtome so. Noro yanton me thakwa naxe. N̂examro yokutho marha wîmyakn̂e yîwya iyok me, kesî. Ero wa kesî Kporin komo awya, kekn̂e Xeremias Anan̂ias ya.

15 Ero yinhîrî on wara kekn̂e hara Xeremias Anan̂ias ya, weronoman̂e ya, Omtapotarî men entakî amoro Anan̂ias, Kporin komo n̂en̂epetho pîn mexe amoro. Moxam miir̂asî cemaro ponaro makî kica.

16 Ero ke on wara kesî Kporin komo awya, roowo poi tak kar̂mesî kr̂a. On cimn̂ipu po rma mîwaiyasî. Yohno mîwaiyasî Kporin komo yanwetopo poko moxam panatanmekrî ke awya kica, kesî, kekn̂e Xeremias Anan̂ias ya.

17 Ero yinhîrî tak Anan̂ias pen waihyakn̂e ero cimn̂ipu po rma. Tohnaw weronomano rin̂enho pen mîk waihyakn̂e. 7-nhîrî nuun̂i po waihyakn̂e. Ero wa xakn̂e noro pen okwe.