Taa, Xeremias yakro nîmtapowakn̂e xa hara Kporin komo kayaritomo me exitaw Xeoiakin. Cewn̂e cimn̂ipu makî ka xakn̂e kayaritomo me noro yehtoponho. Xosias mumuru mîk xakn̂e Xeoiakin, Xuta komo kayaritomon mumuru ha. Ero yimaw nîmtapowakn̂e noro yakro.

2 On wara kekn̂e Kporin komo yîwya, paaka pîmîrî yakan akîhtoko, yimici ken̂e rma akîhtoko. Akîhtoche apîmtaka rma cirko.

3 Ero yinhîrî ero rma anakîtothîrî arpoko Eton pono komo kayaritomon yaka, Moabe yepamtho kayaritomon yaka, Amon yepamtho kayaritomon yaka, Ciru pono komo kayaritomon yaka, Siton pono komo kayaritomon yaka. Setekias yaka mokyaxe n̂examro maywen komo Xuta yepamtho kayaritomon yaka. Xerusaren pona mokyaxe. N̂examro ya arpoko kayaritomon komo yaka so.

4-5 On wara kacho entamexpoko n̂examro kayaritomon komo ya, On wara kesî Kporin komo akayaritomon komo ya, Roowo yakîhton̂enho Ow. Tooto marha wakîhcekn̂e, okno marha wakîhcekn̂e roowo pono kom ha. Karitî Ow, kekaricekn̂e oyaporî ke rma noro yipu komo yakîhtorî poko. Ero ke onakîtotho komo wîmye tooto ya, onîhtînoputho komo ya.

6 Kokon̂oro tak iitono komo wîmye ahnoro Nabukotonoso ya, Babiron̂a komo kayaritomon ya. Oyanton mîk ha. Noro yanton me men kîmce so amyamro hara. Awoh komo marha wîmye iyok me.

7 Ero ke ahnoro kayaritomo komo tak naxe noro yanton me, Ixaw Yana mîtwono komo kayaritomon kom ha. Noro mumuru yanton me marha naxe mn̂e, noro parî yanton me marha. Ero wa naxe kayaritomo me n̂examro yehtopo cenatîso ro. Ero yinhîrî tak mîk hak pono komo kayaritomon komo yanton me tak nasî Babirona komo kayaritomon hara. Yukurumîkno komo yanton me naxe.

8 On wara na nai ahtono ha na kayaritomo, Nabukotonoso yanton me cexi xera na nai okwe. Tîpîmîrî yenka xera na nai paaka pîmîrî yakan warai yaka, noro nakîhtotho warai yaka. Ero wara exitaw noro pen wemetanmekyasî, maywen komo yakro rma wemetanmekyaxe so okwe. N̂examro pen waihkesî kacipara imo ke, rooma yaka marha, eper̂a ke marha okwe. N̂examro pen waihkapetîkes Ow Nabukotonoso ya rma okwe.

9 Ero ke aweronoman̂e komo mtapotarî entara ro mak ehcoko. Iito marha naxe worokyam ponarono komo. Awosotîmtoponhîrî komo poko ahcamhokan̂e komo, yaskomo komo, eremkano rin̂e komo, noro yipu komo mtapotarî entara ro mak ehcoko. Babiron̂a pono komo kayaritomon yanton me exihra maxe, kexe awya so. Ero wa kacho entara ro mak ehcoko kica.

10 Cemaro mak n̂ekatîmyaxe awya so. Yîmtapotarî komo yewetîche awya so miya men mîîcexe arowonthîrî komo poi mooxe ro mak. Anarî rowon pona kr̂a ken̂epexe so. Iito tak mîwaiyaxe okwe.

11 On wara tko na natu anarî rowon pono komo, Babiron̂a komo kayaritomon nakîhtotho nahsîyatu rma paaka pîmîrî yakan warai. Noro yanton me tak naxe. Noro yipu komo wîmcesî yîrowon komo po rma. Tîrowon pomon̂e me rma naxe, iitono ro me naxe, kesî Kporin komo awya so, kacho wentamexpekn̂e kayaritomo komo ya.

12 Ero yinhîrî ero wa xa marha wîîkekn̂e Setekias ya, Xuta yepamtho komo kayaritomon ya. On wara wîîkekn̂e yîwya, Apîmîrî komo yumuncoko paaka pîmîrî yakan warai yaka. Babiron̂a pono komo kayaritomon nakîhtotho yaka ciicoko. Noro yanton me esko, noro maywen komo yanton me marha esko. Ero wara awexitaw so waipîra maxe.

13 Ahce kacho mîwaiyatu, amoro amaywen komo yakro? Kacipara imo ke rma mîwaiyaxe, rooma yaka marha, eper̂a ke marha. Ero poko rma kekn̂e Kporin komo. On wara kekn̂e, Ero wara waihyaxe mîk hak rowon pono komo. Babiron̂a pono komo kayaritomon yewetîra exitaw so waihyaxe men okwe, kekn̂e. Ero ke ahce kacho mîwaiyatu?

14 Aweronoman̂e komo mtapotarî ponarora ro mak esko. On wara kexe awya so, Babiron̂a komo kayaritomon yanton me exihra ro mak maxe, kexe kica. Cemaro mak mîn ero wara kacho.

15 On̂en̂epetho pînî ro mak mîkyam, kesî Kporin komo. Cemaro me mak n̂ekatîmyaxe oyanmen wara rma kica. N̂examro mtapotarî ponaro awexitaw miya kr̂a ken̂epexe so, awaitome so tak okwe. Aweronoman̂e komo yakro rma mîwaiyaxe meye tak okwe, kesî Kporin komo, kacoko akayaritomon komo ya, kasko iina mohxapu komo ya.

16 Ero yinhîrî tîmsom pokono komo ya makîrha wîîkekn̂e hara. Ahnoro iina mohxapu komo ya wîîkekn̂e, on wara wîîkekn̂e, On wara men kesî Kporin komo awya so, Aweronoman̂e komo mtapotarî ponarora ro mak ehcoko. On wara kexe n̂examro kica, Yohno rma Kporin komo mîn yawnonho mko n̂ekyaxe oona hara. Babiron̂a poi n̂ekyaxe hara, kexe kica. Cemaro mak n̂ekatîmyaxe awya so kica.

17 N̂examro mtapotarî ponarora ro mak ehcoko. Babiron̂a pono komo kayaritomon yanton me xa matko ehcoko waipîra awehtome so. Ahce kacho wermonho me mak n̂ecakya on ewtotho okwe?

18 Weronomano rin̂e me xa cexitaw so, Kporin komo mtapotarî xa exitaw yîhyaw so, Noro yakro nîmtapotacowpe cerewre, kantoman̂e ro komo yakro. On wara kacowpe yîwya, Apa kah yawno, nasî rma cik ha re ahce na mko amîn yaw, ahce na yenî mko, ahce na yanîmtopo mko marha. Ero yipu xa marha nasî Xuta kayaritomon mîn yaw hara. Ero yipu xa marha nasî mînto mînto wara Xerusaren po. Ero mko cma re arpora masî miya Babiron̂a pona, kacowpe Kporin komo ya.

19-20 On wara tko kesî Kporin komo, awantoman̂e ro komo, mîîmo mapatan poko kesî, tuuna yenî imo poko, esemokarî komo yaponî mko poko, ahce na mko poko, on ewto po rma etîmtoxapu poko kesî. Ero yipu yarîhra xakn̂e Nabukotonoso Xekon̂ias yaar̂ataw. Xeoiakin mumutho pen mîk, Xuta kayaritomon mumutho. Antomano rin̂e komo yakro rma n̂examro naar̂akn̂e. Xerusaren poi naar̂akn̂e Babiron̂a pona. Ero wa aano riyataw nînomyatken̂e rma ha re ahce na mko tan ewto po.

21-22 On wara kesî Kporin komo, awantoman̂e ro komo, ponaro Ixaw Yana komo yehtopo ha, Iito rma re nasî yînînomthîrî komo. Aporin komo mîn yaw nasî, Xuta kayaritomon mîn yaw marha nasî, miya so nasî Xerusaren po. Ero rma tko naar̂axe amn̂e Babiron̂a pona. Iito nasî pahkî. Pahkî exiche oyanan komo wakronomes hara. Ero yimaw tak omîn yawno mko wekyas hara, kesî. Ero wara kesî Kporin komo awya so, wîîkekn̂e yîwya so. Ero wara wîîkekn̂e.