Taa, nîmtapowakn̂e xa hara Kporin komo Xeremias yakro. Cewn̂e cimn̂ipu xakn̂e kayaritomo me Xeoiakin yehtoponho. Xosias pen mumutho mîk xakn̂e Xeoiakin, Xuta komo kayaritomon pen mumutho. Ero yimaw nîmtapowakn̂e Kporin komo noro yakro.

2 On wara kekn̂e yîwya, Ai, Xeremias, etoko omîn roron pona. Iito tak omtapotarî ekatîmko. Xuta yewton pono komo ya ekatîmko Kaan mîn yaw. Ahwotaxi mohxapu komo ya ekatîmko. Ahnoro omtapotachonho ekatîmtîkakî yîwya so, Ero men ekatîmko yîwya so, kachonho owya. Wahrai rma watohra esko omtapotachonho.

3 Amtapotarî na n̂encetu n̂examro ahnoro rma. Kicicime cehtoponhîrî komo yai na n̂etowyatu. Ero wa exitaw so anarme tak kesehtînoyasî Ow hara. N̂examro pen waihkesî kicicitho poko exirî ke so, kachonho tak wowyasî.

4 On wara kasko yîwya so, On wara kesî Kporin komo awya so, Omtapotarî yentara na matu. Wentamexpekn̂e awya so apanatanmetopo komo, ero rma tko na ewetîra matu.

5 Oyanton komo cma re wen̂epekn̂e ahyaka so. Pahxaxaro so rma kawomyakn̂e en̂epetome so. N̂examro mtapotarî ponarora tko mîxatken̂e kica.

6 Ero wa awexitaw so rma omîntho tak wiir̂asî Siro pononho wara hara okwe. Ewto wiir̂asî mîk hak rowon pono komo yîwîrîman̂e me okwe, roowo poko hakno komo yîwîrîman̂e me, kasko. Ero wa kasko iina mohxapu komo ya, kekn̂e Kporin komo owya.

7 Ero ke ero wara rma kekn̂e Xeremias. Kporin komo mîn roron po rma kekn̂e. Ahnoro iitono komo n̂encetken̂e yîmtapotarî. Tîmsom pokono komo n̂encetken̂e, weronomano rin̂e komo, ahnoro iitono komo n̂encetken̂e.

8 Kporin komo mtapotachonho n̂ekatîmtîkekn̂e yîwya so. Ero wa men kasko yîwya so, kachonho n̂ekatîmtîkekn̂e. Katîkache tak noro pen nahsîyatken̂e tîmsom pokono komo, weronomano rin̂e komo marha. Ahnoro iitono komo noro pen nahsîyatken̂e okwe. Mîwaiyasî kr̂a wa ha okwe, ketken̂e yîwya.

9 On wara marha ketken̂e owya, Ahce kacho ero wa mîîke Kporin komo yanmen wara kica? On wara mîîkesî, Siro pono pen wara men nasî on amn̂e Kaan mîntho. Pohra tak nas on ewtotho, tooto exîhra ro mak nas okwe, mîîkesî ahce kacho? ketken̂e yîwya. Ero ke Xeremias pen tak wamcetken̂e iitono komo. Yiixatî pîn me ro mak xatken̂e okwe.

10 Ero yinhîrî tak noro pen yahsîtopo n̂encetken̂e Xuta yantoman̂e komo. Ero ke kayaritomo mîn yai cetken̂e Kporin komo mîn yaka. Iina tak n̂eremetken̂e yaxan yaw metata yaw, Kporin komo mîn yaka kewomtopo yaw ha.

11 Eremache so antomano rin̂e komo yakro nîmtapowatken̂e tîmsom pokono komo, weronomano rin̂e komo marha. Ahnoro iina mohxapu komo nîmtapowatken̂e. On wara ketken̂e yîwya so Xeremias poko, Twaihkapore kr̂a nasî moso. On ewto yîwîrîmacho n̂ekatmo kica. Yîmtapotachonhîrî rma tko mentacow amyamro rma, ketken̂e. Ero wa ketken̂e antomano rin̂e komo ya.

12 On wara tko kekn̂e Xeremias antomano rin̂e komo ya, iina mohxapu komo ya ahnoro, Yaaro, Kporin komo rma oyen̂epekn̂e tîmîn yîwîrîmacho yekatîmtome, ewto yîwîrîmacho yekatîmtome marha. Noro mtapotarî mak wekatmo an̂entarî komo me.

13 Ero ke awehtoponhîrî komo tak akir̂wamacoko. Poko awehtoponhîrî komo ahsîpînkacoko. Kporin komo mtapotarî tak ewetîcoko ponaro awehtopo komo mtapotarî. Ero wa ewehcataw awya so tîmtapotachonhîrî tak nowyasî Kporin komo, Kîwîrîmexe so men okwe, kachonho nowyasî. Awîrîmara so tak nasî.

14 Tan was owî reha anahsîthîrî komo me. Ow tak ciicoko anîhtînorî komo yaw roro rma, Ero wa xa cirpore nasî, kacho yaw roro.

15 Owaiketaw tko awya so on wara men yîhtînocoko, kicicme exihnî wapatho me tak maxe okwe. Ero wara xa marha naxe on ewto pono komo. Yaaro tan wîîkesî, Ero wa kasko n̂examro n̂entarî me, kekn̂e Kporin komo owya. Ero ke wa ero wa wîîkesî, wîîkekn̂e.

16 Ero wara kacho yentache on wara ketken̂e antomano rin̂e komo. Iina mohxapu komo marha ketken̂e n̂examro wara xa marha, Twaihkaporem pînî tko moso. Kporin komo yanmen wara nîmtapota, ponaro kehtopo komo yanmen wara, ketken̂e. Ero wa ketken̂e tîmsom pokono komo ya, weronomano rin̂e komo ya marha.

17-18 Ero yinhîrî piiri nawomyatken̂e anarî kom hara. Xuta poritomon komo mîkyam xatken̂e. Esenmexapu komo yakro nîmtapowatken̂e. On wara ketken̂e, Ai, oyakno komo, amna mtapotarî ka entacoko. On wara kes amna awya so, pahxa tî weronomano rin̂e xakn̂e kayaritomo me exitaw Esekias pen, Xuta komo kayaritomon pen. Mikeias pen tî mîk xakn̂e, Morasci pononho pen. Xuta komo yakro tî nîmtapowakn̂e noro pen. On wara tî kekn̂e yîwya so, Ai oyakno komo, on wara kesî Kporin komo, pahxaro tak tpomoso nas on roowo Siaw pen ewtotho. Wermonho me mak tak nasî Xerusaren pononho mîîmotho. Yiiponomra marha nasî îîpî, iipo nasî Kaan mîn ero. Anarî îîpî wara mak nas ero, iiponomnîtho mko wara, kekn̂e. Ero wa tî kekn̂e Mikeias pen.

19 Ahce wa tî xakn̂e Esekias noro poko, Xuta yepamtho kayaritomon? Ahce wa xatken̂e Xuta komo ahnoro noro poko? Noro katî waihketken̂e awya so? Pîra, Kporin komo poko twerî takî tî xakn̂e. Noro yakro tî nîmtapowakn̂e Esekias takronomacho poko yîwya. Ero ke tîmtapotachonhîrî tak nowyakn̂e Kporin komo, Kîwîrîmexe so men, kachonho. Kîwyam reha ketwîrîmacho imo yan̂ikn̂e wara rma taxe kopi, ketken̂e. Ero wa ketken̂e poritomo komo.

20 Ero yimaw rma anarî xakn̂e hara Kporin komo yanme weronomano rin̂e. Urias tî noro yosotî xakn̂e. Semaias mumuru tî mîk xakn̂e. Kiriace Xearin pononho pen mîk xakn̂e. Xerusaren yîwîrîmacho xa marha n̂ekatîmyakn̂e noro hara, ahnoro iitono komo yîwîrîmacho ha. Xeremias n̂ekatmo ero wara xa marha n̂ekatîmyakn̂e noro hara.

21 Ero yinhîrî takî tî Urias mtapotachonho n̂ekatîmyatken̂e tooto komo Xeoiakin ya, kayaritomo ya ha. Noro sowtatun yantoman̂e komo ya marha n̂ekatîmyatken̂e, tooto komo yantoman̂e komo ya marha. Yîmtapotachonhîrî yentache Urias pen yahsî xe tî xakn̂e kayaritomo waihkachome kr̂a. Twaihka xe noro yehtopo tko tî n̂encekn̂e Urias. N̂eraswakn̂e takî tî. N̂emahciyakn̂e tî, Exitu pona tî cekn̂e.

22 Ero ke Exitu pona takî tî kîrkomo n̂en̂epekn̂e Xeoiakin. Ewnatan tî n̂en̂epekn̂e Akboro mumuru. Anarî komo marha cetken̂e noro yakro.

23 Urias pen takî tî n̂ekyatken̂e Ewnatan komo Exitu poi. Kayaritomo yaka tî naar̂atken̂e Xeoiakin yaka. Noro tî Urias pen waihkekn̂e kacipara imo ke okwe. Noro yokoputho nahruyakn̂e mîk hak yocho yewtarî yaka mak. Ero wa ti xakn̂e Urias pen okwe.

24 On wara tko xakn̂e Xeremiasî reha, noro nukurunpekn̂e Aikaw, Sapan mumuru. Noro yanme noro tîmîhra xatken̂e antoman̂e komo tooto komo ya, waihka xatî komo ya tîmîhra xatken̂e. Ero wa tî xatken̂e iitono komo Xeremias poko.