Ero yinhîrî nîmtapowakn̂e xa hara Kporin komo Xeremias yakro. Xuta yepamtho komo poko nîmtapowakn̂e. 4 cimn̂ipu tak xakn̂e Xeoiakin yehtoponho, Xuta kayaritomon me ehtoponhîrî. Yihcirî mîn xakn̂e cimn̂ipu Nabukotonoso yehtoponho, Babiron̂a komo kayaritomon me ehtoponhîrî.

2 Kporin komo mtapotarî yentache ero rma n̂ekatîmyakn̂e Xeremias Xuta komo ya, Xerusaren pono komo ya marha. Weronomano rin̂e tî mîk xakn̂e Xeremias.

3 On wara kekn̂e yîwya so, Pahxa rma Kporin komo mtapotarî wencekn̂e. Kayaritomo me ka xakn̂e Xosias pen, Amon pen mumutho. 13 cimn̂ipu xakn̂e kayaritomo me noro yehtoponho ero yimaw wencekn̂e yihcirî me ka. Ero yimawnonhîrî rma Noro mtapotarî wencesî roro. Oroto meero wencesî rma. 23 cimn̂ipu tak nasî Noro mtapotarî yentachonho owya. Ero rma wekatîmyakn̂e awya so. Pahxaxaro so rma kpakekn̂e ekatîmtome awya so. Omtapotarî ponarora rma tko mîxatken̂e kica.

4 Ahnoro tanton komo n̂en̂epekn̂e Kporin komo ahyaka so, tpoko weronomano rin̂e kom ha. Pahxaxaro so rma n̂examro n̂en̂epekn̂e ahyaka so. Yîmtapotarî komo yentara marha tko mîxatken̂e okwe. Enta xera ro mak mîxatken̂e okwe.

5 On wara ketken̂e aweronoman̂e komo awya so, Kicicme maxe kica, kicicitho ponaro mak maxe. Ero wara awehtopo komo tak poxunkacoko kr̂a on pono ro me tak awehtome so eroromero. Kporin komo nîmîtho on awya so, aporin pen komo ya marha. On pono ro me tak maxe miya roro en̂epenî ro me awehtoponhîrî komo poxunketaw awya so.

6 Ponaro anarî yana komo yehtopo poko exihra ro mak ehcoko. Oporin amoro, kahra ro mak ehcoko noro yipu komo ya. Orwonmekîra ehcoko an̂irithîrî komo ke. Orwonmekîra awexitaw so awemetanmetopo komo yekpora wasî, ketken̂e aweronoman̂e komo.

7 On wara kesî Kporin komo awya so, Omtapotarî ponarora rma tko mîxatken̂e okwe. Ow mak mîrwonmekyatken̂e an̂irithîrî komo ke rma okwe. Ero ke metwîrîmexe rma okwe, wîîkes awya so.

8-9 Ero ke on wara kes hara Noro Kporin komo awya so, kantoman̂e ro, Omtapotarî ponarora ro mak mîxatken̂e okwe. Ero ke nohce n̂ixan komo wan̂ikyasî ahnoro. Nabukotonoso wan̂ikyasî Babiron̂a pono komo kayaritomon. Oyanton mîk Nabukotonoso. N̂examro wekyasî tantono komo waparî me. Mîk hak rowon pono komo waparî me marha wekyasî, amîtwono komo waparî me. N̂examro pen marha waihkesî. Ekenhîrî komo wiir̂asî ewtotho me miya roro. Ekenhîrî komo yenîche iituxari tîtosom komo ya amn̂e n̂eserepokexe ro mak. Okwe ro mak, kexe. Ero wara kexe.

10 Tantono komo tak wîtîtmamnoyasî tawakem komo mtapotarî, tahworem komo mtapotarî marha. Cipitaxmu komo mtapotarî marha wîtîtmamnoyasî, cin̂ontaxmu komo mtapotarî marha. Puruma yatho yakihtopo marha esentara nasî. Esenpora marha nasî ramha n̂examro weyutho.

11 On roowo tak nasî pohnî me ro mak okwe ahnoro. Babiron̂a pono komo kayaritomon yanton me naxe tantono komo pahkî, 70 cimn̂ipu. Ero wa naxe Xuta yepamtho komo, yîmîtwononhîrî pen komo marha.

12 70 cimn̂ipu yenatîche tak Babiron̂a pono komo kayaritomon poko kesepanîyas hara, noro maywen pen komo poko marha, Babiron̂a pono pen komo ahnoro, Kawtew pen komo meero. Kicicme exirî ke so kesepanîyasî poko so. Yîrowonthîrî komo makîrha tak wiir̂asî pohnî me hara. Eroromero wiir̂asî pohnî me.

13 N̂examro pen rowontho wîwîrîmesîomtapotachonho yaw roro rma. Mîk hak rowon pono komo yîwîrîmacho mewrekn̂e Xeremias karita yaka. Tîmtarî ke marha n̂ekatîmyakn̂e ero wa kachonho yaw roro rma ciino wiir̂asî.

14 Babiron̂a pono pen komo makîrha tak naxe mîk hak rowon pono komo yanton me hara, noro yipu kayaritomon komo yanton me, yukurumîkno komo yanton me ha. Kicicme ehtoponhîrî komo yepetho rma wîmyasî Babiron̂a pono pen komo ya. N̂examro yehtoponho yecenarî rma wepemesî, tamorî ke yin̂irithîrî komo yecenarî ha, kesî Kporin komo awya so. Ero wara kesî Noro awya so.

15 Ero yinhîrî on wara kekn̂e hara Kporin komo owya, ponaro Ixaw Yana komo yehtopo, Ai Xeremias, on ha wooku parakwe yawno. Orwonî rma tan on yawno. On erpoko mîk hak rowon pono komo ya. Yîhyaka so ken̂epesî n̂examro ya erpoko, etpoyino pîn komo ya.

16 On yerîche tak epîrkaporo mak n̂etar̂axe, nîmtawaimamyaxe marha. Ero wara naxe kacipara imo ke cemyarkem komo yenîrî ke, yîcheka so on̂en̂epetho komo yenîrî ke ha.

17 Ero ke parakwe wahsîyakn̂e Kporin komo yemyawnonho. Mîk hak rowon pono komo ya werpekn̂e, yîhyaka so oyen̂epekn̂e n̂examro ya werpekn̂e.

18 Xerusaren pono komo ya werpekn̂e, Xuta yewton pono komo ya ahnoro, Xuta kayaritomon komo, antomano rin̂e komo marha. N̂examro ya werpekn̂e ewtotho me tak ehtome ewtonthîrî komo. Okwe ro makî, kacho me ehtome so marha n̂examro pen ya werpekn̂e, tîwîrîyakaxmu me ehtome so marha. N̂examro pen yîwîrîma xe wasî Kaan ya, kacho me ehtome so marha werpekn̂e yîwya so. Ero wara ehtome so wooku werpekn̂e yîwya so. Enko xe, ero wara rma naxe oroto.

19 Paraw ya marha werpekn̂e, Exitu pono komo kayaritomon ya, noro yanton komo ya, noro yesentayem komo ya, noro maywen komo ya etpoyino pîn komo ya, noro yipu komo ya werpekn̂e.

20 Etîchereno komo ya marha werpekn̂e. Usu pono kayaritomon komo ya, Piristew kayaritomon komo ya, Askaron pono ya, Kasa pono ya, Ekron pono ya, Astoci po rma etîmtoxapu komo ya marha, noro yipu kayaritomon komo ya werpekn̂e.

21-22 Eton pono komo ya, Moabe komo ya, Amon komo ya, Ciru pono kayaritomon komo ya etpoyino pîn komo ya, Siton komo kayaritomon komo ya, etpoyino pîn ya marha, tuuna imo yeco pono komo kayaritomon komo ya marha,

23-24 Tetan pono komo ya, Tema pono komo ya, Bus pono komo ya, meyeno komo ya etpoyino pîn komo ya. Arabe kayaritomon komo ya, etîchereno komo ya marha, axawa imo pono komo ya,

25-26 Sin̂hi pono komo kayaritomon komo ya marha werpekn̂e, Eraw pono ya, Mecia pono komo ya, nohce n̂ixan pono ya, meyeno komo ya, meyeno pîn komo ya marha, emahyaka re rma n̂eer̂axe, roowo poko hakno komo maywen komo ya werpesî. Ero yinhîrî Sesake pono komo kayaritomon ya marha werpesî. Ero warai komo ya werpesî wooku Kaan nîmîtho yîwya so.

27 Ero yinhîrî on wara kasko mîk hak rowon pono komo ya, On wara kesî Kporin komo kantoman̂e ro, ponaro Ixaw Yana komo yehtopo Mîk kes on wara, On wooku eecoko amyamro, awenîmcoko, arîrkacoko, epîrkacoko awomun me ro mak okwe. Ero wara thakwa maxe kacipara imo ke cemyarkem komo yanme, acheka so on̂en̂eperî komo yanme.

28 Anarimaw awanwekyatu ha na. Pîra, anmîthîrî yerîhra ro mak wasî, ket ha na awya. Ero wa ketaw awya on wara eyuhko, On wara men kesî Kporin komo awya so, kantoman̂e ro, Meer̂axe thakwa wa ha.

29 On ewto nasî oyosoke. Yîwîrîmano ritopo wihciyasî on pono komo yîwîrîmarî ke. Ero ke esepanpîra ma re wai apoko so hara? Erepen me exihra ro mak wa maxe ha. Kacipara imo ke cemyarkem komo wan̂ikyasî roowo poko hakno komo waparî me cehsom, kesî. Ero wara kesî Kporin komo, kantoman̂e ro, mîk hak rowon pono komo ya ero wa kesî.

30 Taa, on wara wîîkes xa hara awya, omtapotarî ekatîmtîkakî yîwya so. On wara kasko hara yîwya so, Kah yai rma mayanasî Kporin komo. Cekenî ro po cexitaw kar̂pe ro mak n̂emtarakesî, kir̂wanî ro po cexitaw ha. Tîrowon pono komo poko mayanasî ro mak kopi. N̂emtarakesî uupa yeperîrî yapikmon̂e wara. Roowo poko hakno komo poko mayanasî ro mak okwe.

31 Yîmtapotarî n̂esencesî miya ro mak roowo mapitaka roro. Mîk hak rowon pono komo n̂en̂ekesî Kporin komo. Miyan komo rma n̂en̂ekesî etpoyino pîn komo. Kicicme ehxapu komo tak waihkesî kacipara imo ke, kesî Kporin komo.

32 On wara marha kesî Kporin komo, kantoman̂e ro, Enko xe, yîwîrîmano ritopo n̂esenmamyasî. Mîk hak rowon pono komo n̂etwîrîmexe etpona re. Ocowo imo n̂etakîcesî cetapomrisom. Roowo mapitai rma tak mokyasî, kesî Kporin komo.

33 Ero yimaw mer̂pora ro mak tak naxe Kporin komo nwaikatho komo. Miya rma nasî okoputhîrî komo roowo poturu pona roro, xiya hara roowo mapitaka roro marha. Okwe okwe, kahra ro mak naxe tooto komo yîpînîn yaw so. Enmekîra so marha naxe, roowo cheka ahrura so marha okwe. Paaka wetî wara mak nasî kica roowo pore okoputhîrî. Ero wara nasî Kporin komo nwaikatho komo yokoputho amn̂e okwe.

34 Ai, oper̂a yenîn̂e komo warai, awya so wîîkesî, awratacoko tak. Okwe, okwe, kacoko. Ehmamacoko wermonho cheka. Oyok warai yenîn̂e amyamro. Awaikacho komo me tak n̂enmai okwe. Mepîrkexe tak, mecor̂or̂omexe mak tak parakwe wara panahno wara.

35 Oper̂a yenîn̂e warai komo yemahcitopo mera thakwa nas okwe. Oyok yaan̂e komo marha emahcitopo mera nas okwe.

36 Kahn̂eru yenîn̂e warai komo mtapotarî tak n̂esencesî. Oper̂a yîwratarî marha n̂esencesî poturme tîtosom yîwratarî. N̂examro woskaran nîwîrîmesî Kporin komo.

37 Ero yimaw waapa ponarono pîn komo tak waihyaxe okwe. Ero wa waihyaxe tîrwon̂e xa exirî ke Kporin komo.

38 Ceken poi n̂epatakesî Noro reaw wara kopi. N̂examro rowon tak nasî pohnî me ro mak okwe. Ero wa nasî mayanîmrî ke n̂examro waparî, Kporin komo yîrwonîmrî ke marha. Ero wa nasî yîrowonthîrî komo okwe.