1-2 Ero yinhîrî on warai n̂enpekn̂e Kporin komo owya, piiku n̂enpekn̂e owya asakî een yaw, kahxapu yaw. Kaan mîn potaw rma xakn̂e. Anarî yaw xakn̂e kir̂wan piiku, tpoxwem okre, yihcirî me yucutaxapu. Anarî yaw ween̂akn̂e piiku xa marha kicicitho xa tak kica. Kicicme ro mak xakn̂e apuhnî me ro mak kica. Xekon̂ias pen naar̂akn̂e Nabukotonoso, Babiron̂a kayaritomon. Xeoiakin mumuru mîk xakn̂e Xekon̂ias, Xuta komo kayaritomon mumuru. Noro pen naar̂akn̂e Nabukotonoso tapomiso okwe. Xuta yantoman̂e komo marha naar̂akn̂e, sahsamaxapu pokono komo, pehu pokono komo, noro yipu komo naar̂akn̂e Xerusaren poi Babiron̂a pona. N̂examro pen yarîche tak piiku n̂enpekn̂e owya.

3 Ero ke on wara kekn̂e Kporin komo owya, Ai, Xeremias ahce meen̂a? kekn̂e. On wara weyukyakn̂e, Piiku ween̂asî, anarî kir̂wan̂he ro mak ween̂asî. Anarî hara kicicitho me ro mak ween̂asî apuhnî me ro mak kica, wîîiekn̂e.

4-5 Ero yinhîrî on wara kekn̂e Kporin komo owya, On wara wîîkes Ow Aporin komo awya, anarî komo naxe kir̂wan wara, piiku wara. N̂examro ponaro wasî. Xuta rowon poi rma warpekn̂e tapomiso so rma re. N̂examro yakir̂wamachome rma tko warpekn̂e Kawtew komo cheka.

6 N̂examro ponaro xa wasî akronomachome. Pahxaro tak n̂examro wekyas hara oona. Oona ekîche so hara mîîmo warai me rma n̂examro wiir̂asî. Yixkan me ro mak tak wiir̂asî. Onatîrî wara marha wiir̂asî, mohkan warai me ro mak.

7 Ero yimaw anarî tak wîmyasî yîwya so yîropotarî komo, oponarono me cehsom mîn wîmyasî yîwya so. Tporin me xa tak ohtînoyaxe ero yimaw. Oyanan me tak naxe, ponaro n̂examro yehtopo me was Ow hara. Ohyaka tak mokyaxe hara yaarono me xa tak okre.

8 Anarî komo reha naxe kicicitho warai me hara piiku warai me, apupnutho warai me okwe. On wara wîîkes hara Ow Aporin komo, kicicitho piiku wara rma nasî Setekias, Xuta kayaritomon, antomano rin̂e komo, Xerusaren pono yakwenho komo, Exitu pono komo chewno komo marha, ero wara naxe kicicitho warai komo, piiku warai kom ha. Noro yipu komo tak wahsîpînkesî.

9 N̂examro wen̂epesî anarmerpan yana komo cheka, roowo poko hakno komo cheka. Iito so tak wemetanmekyasî. Tîwîrîyakaxmu me tak naxe. Osotî komo wiir̂asî mîk hak rowon pono komo nîwîrîyakarî me. N̂examro n̂etahcaxe yîwîrîmano ritopo yan̂ikyataw. Ero wa naxe ahna so na en̂epeche so owya.

10 N̂examro cheka wen̂epesî waparî komo, kacipara imo ke cemyarkem oko, rooma poko wiir̂asî iito, eper̂a ken̂e marha wiir̂asî. Ero wa n̂examro pen wîwîrîmesî twaihkatîkaxi ro, on roowo po exihra cehso ro. Yîwya so cma re on roowo wîmyakn̂e, n̂examro porin pen komo ya marha wîmyakn̂e. On po tko exihra tak naxe amn̂e, kekn̂e. Ero wa kekn̂e Kporin komo owya.