On wara marha kesî Kporin komo, N̂etwîrîmexe ro mak okwe oyok warai yenîn̂e komo, owoskaran warai pono yenîn̂e komo. Oyok warai pen komo waihkexe okwe. Anarî pen komo nakpayaxe mak okwe, kesî.

2 Ero ke Kporin komo tak nîmtapowasî kicicme tîyanan nahman̂e komo yehtopo poko. Ponaro Ixaw Yana komo yehtopo Mîk nîmtapowasî. On wara kesî yîwya so, On wara mîxatken̂e kica, oyok warai komo makpayatken̂e mak okwe. Men̂epetken̂e kr̂a mak okwe. Ahce wa so na exirî komo yenîhra mîxatken̂e kica. Ero ke kemetanmekyaxe so tak men kicicme awehtoponhîrî komo yepetho me okwe.

3 Pahxaro tak oyok warai poyinonho komo, etîmtoxapu komo wenmekyas hara. Miya so ka n̂examro wen̂epekn̂e mîk hak rowon pono komo cheka. En̂exa tko wekyas hara oona yîmînî ro komo yaka. Tan tak nîmxîkwaxe okre, n̂epamyaxe mer̂pora hara.

4 Ero yimaw anarî komo tak wiir̂asî oyok warai komo yenîn̂e me. Kir̂wan̂he tak yînahmano n̂iir̂axe n̂examro reha. Erasîra tak naxe oyok warai komo ero yimaw, ahwokara marha naxe. Ahto tak nai noro hara okwe? kacho exihra ro mak tak nasî. Ero wara naxe oyok warai komo pahxaro, kesî Kporin komo.

5 On wara marha kesî Kporin komo, Pahxaro tak Tapi pen retawno wiir̂asî kayaritomo me. Kir̂wan Mîk Tapi pen peremru warai. Kayaritomo me xa tak nasî, ehn̂an me ro mak nasî ahce na ciitopo poko. Yaaro epanîno n̂iir̂asî Noro. Kir̂wan̂he marha roowo pono komo panatanmekyasî.

6 Kayaritomo me exitaw Noro tukurui so tak naxe Xuta komo. Ahnoro Ixaw Yana komo n̂enmayaxe erasîn me okre. On wara nasî Noro yetacitopo, Kporin komo, Takîhso Kehtopo Komo, kacho tak nasî Noro yetacitopo me.

7-8 On wara kahra tak naxe apoyino komo pahxaro, Waipîn me nasî Kporin komo, Ixaw Yana komo yekn̂enho Exitu poi, kahra tak naxe. On wara xa matko kexe, Waipîn me nasî Kporin komo Ixaw Yana yepamtho komo yekn̂enho roowo poi, nohce n̂ixan poi. Mîn hak pona n̂examro pen n̂en̂epekn̂e, en̂exa so ekn̂enhîrî Mîkî Kporin komo. Noro nasî waipîn me, kexe tak. Ero yimaw tak tîrowonî ro komo pono me naxe Ixaw Yana komo. Ero wara naxe.

9 Ahwora ro makî tko wasî moxam weronoman̂e komo poko. Tatanasî mak oyocho. Wenîmxaputho wara ro mak was okwe, tîyopo kawaxiyem yeen̂enho wara. Keserepokesî marha Kporin komo poko, yîmtapotachonhîrî poko marha. Kir̂wanî ro mîn yîmtapotachonhîrî.

10 Tawronohkatîkaxi nasî krowon komo cipici yairono komo ke kica. Kaan nîwîrîmatho me nasî krowon komo okwe, tîwrataxmu wara nas okwe. Turpe xa thakwa nasî woskara mko cuh ken̂arînhîrî okwe. Kicicme ro mak naxe tantono komo. Yukurumîkno me naxe, kicicitho me ha tko okwe.

11 Kaan yîhtînopîra ro mak naxe weronoman̂e komo rma, tîmsom pokono komo marha. Omîn yaw rma kicicme ehtoponhîrî komo ween̂asî kica, kesî Kporin komo.

12 Ero ke esama wara tak nasî n̂examro yehtopo, tapeswem wara. Ero yipu yaw en̂epexapu wara naxe, kosope en̂epexapu wara. Ero yaw tak n̂epîrkexe. Yîwîrîmacho komo xa tak wukuknomesî cimn̂ipu, poko so oyesepantopo me, kesî Kporin komo.

13 Poxumra ro mak ween̂e weronomano rin̂e komo yehtopo, Samaria pono komo yehtopo. Baaw mtapotarî xa matko n̂ekatîmyatken̂e kica. Oyanan komo panatanmekyatken̂e tohnawno poko kica. Ero yanme kicicme xatken̂e kica.

14 Kicicitho me ro mak ween̂asî Xerusaren pono komo yehtopo hara, weronomano rin̂e komo yehtopo. Cipici yairono me mak naxe kica. Kir̂wan wara n̂esenpexe yaarono mera ro mak kica. Kicicitho komo marha nahworexe kicicme ehtopo komo poko rma kica. Ero ke kicicme cehtopo komo poxunkara ro mak naxe oyanan komo, pîra ro mak okwe. Sotoma pono pen komo wara ro mak naxe owya, Komoha pono pen komo wara marha.

15 Ero ke on wara kesî Kporin komo tpoko weronomano rin̂e komo poko, N̂examro wînahmesî cîmîkno ke ro mak, tuuna ke marha n̂examro wokpesî erexkuthîrî warai ken̂arî ke kica. Kaan ponarora ro mak naxe oyanan komo ahnoro. Weronomano rin̂e komo yanme rma ero wara naxe Xerusaren pono komo yanme. Ero wa n̂examro wînahmesî cîmîkno ke.

16 On wara marha kesî Kporin komo, Weronomano rin̂e komo mtapotarî yentara ro mak ehcoko. Kahwokacho komo keporîra ro mak nasî, kexe. Tohnawno ponaro mak awir̂axe so okwe. Tanmero so mak nîhtînoyaxe tîn̂ekatîmrî komo kica. Aporin komo mtapotachonho pîn n̂ekatîmyaxe kica.

17 On wara roro kexe tpoyino komo ya, poxumra ro mak oyenîn̂e komo ya, On wara kesî Kporin komo, Ahwokan n̂e roro tak maxe okre, kexe yîwya so. On wara naxe oyanan komo, tîropotarî komo mak n̂ewehcaxe kica. Oyanwekn̂e me nasî yîropotarî komo, ero rma tko n̂ewehcaxe kica. Noro yipu komo ya rma kexe weronoman̂e komo, Awîrîmacho komo aweporîra ro mak nas okre, kexe kica.

18 Nai ha ma re awya so Aporin komo mtapotarî yentan̂e ro? Nai ha ma re awya so yîwya apanatanmetopo komo yentan̂e? Takîhso entan̂e nai ha ma re awya so?

19 Kporin komo yocowonî rma tko nocowonasî ro mak cetapomrisom, cerewrem oko. Woi woi woi kesî ro mak kicicitho komo tîpîrî po oko.

20 Poropîra rma ka nasî Kporin komo tîrwon̂e tîcetaw, tînîhtînorî ciitîkara rma ka cexitaw poropîra nasî. Amn̂e pahxaro tak on wara mîîkexe, Yaaro rma amna yîwîrîmacho n̂ekmexpekn̂e Kporin komo, mîîkexe tak.

21 Aweronoman̂e komo yantomara ro mak wîxakn̂e omtapotarî yekatîmrî poko. Wara rma miya so tî re n̂ekatîmyatken̂e omtapotarî tîwya so. N̂examro yakro yîmtapotara ro mak wîxakn̂e. Wara rma n̂ekatîmyatken̂e rma omtapotarî yentan̂e wara rma kica.

22 Owya apanatanmetopo komo yewetîn̂e me roro cexitaw so ketaw ha re omtapotarî xa tak n̂ekatîmcerî oyanan komo ya. N̂examro tak naknamacerî kicicme ehtoponhîrî komo yai, kicicitho poko ehtoponhîrî komo yai ha.

23 Kaanî me rma re Ow meen̂atu. Ahtono warai me katî Ow meen̂atu, tantono me makî katî Ow meen̂atu meyeno pîn me? Ero warai me katî Ow mîhtînoyatu?

24 Meseyamyat ha ma re awya so enîhnî na, awenîra so ro mak oyehtome ha? Kaapu poko hak exihra katî wai awya so, roowo poko hak exihra marha wai awya so? kesî Kporin komo.

25 Weronomano rin̂e komo mtapotarî rma wa wencesî. Kaanî mtapotarî tan wekatîmyasî, kexe kica. Cemaronwaxe mak kica. Kwosotmo kopi, kwosotmo xa hara, kexe kica.

26 Atî wicakî pahkî ero wa nîhtînoyatu n̂examro, cemaro yekatîmn̂e komo? Yaarono pîn ponaro mak nat ham. Ero ke ero rma n̂ekatîmyaxe kica.

27 On wara kexe tîhnaw so, Owosotîmtoponho yekatîmyataw yîwya so Kporin komo yosotî poko tak naxe twen̂ekarî. Pahxa Kporin komo yosotî poko nîtwen̂ekarînwatken̂e kporin pen komo Baaw poko tahwotarî komo ke. Ero wa xa marha Noro yosotî poko twen̂ekarî tak naxe moxam hara owosotîmtoponho yekatîmrî ke yîwya so, kexe kica.

28 Weronomano rin̂e komo wosowataw so ero rma n̂ekatîmcowpe. Omtapotarî yentan̂e komo reha n̂ekatîmcowpe omtapotarî yaaro mak ha. Kir̂wan̂he ma re nai puruma pîpîtho, yathîrî yakro ceske exitaw? Pîra ro mak kica.

29 Wehto wara rma exihra katî nai omtapotarî awya so? kesî Kporin komo. Aama wara exihra katî nai, toopu yahkan̂e wara exihra nai awya so? kesî.

30 Ero ke on wara kesî Kporin komo, Weronomano rin̂e komo naxe kicicme ro mak owya. Tpoyino komo mtapotarî mak nukukmexe omtapotarî warai me rma kica.

31 Kicicme ween̂asî weronomano rin̂e komo. Tîmtapotarî komo rma n̂ekatîmyaxe. Ero wara kesî Kporin komo, kexe rma tko kica.

32 Kicicme ro mak ween̂asî twosotîmtoponhîrî warai yekatîmn̂e komo. Anatono poko oyanan komo panatanmekyaxe kica, cemaro poko kica. Wara kyam mak n̂ekatîmyaxe yîwya so. N̂examro yantomara ro mak wîxakn̂e ero poko. Weronomano rin̂e me ehcoko, kahra ro mak wîxakn̂e yîwya so. Ero ke moxam yakîhrera ro mak naxe kica, kesî Kporin komo.

33 Anarimaw apoyino na nîmtapowa awakro. Weronomano rin̂e na nîîke awya, tîmsom pokono ha na anarimaw. On wara na nîîketu awya, Ahce wa tak nîîke Kporin komo kîwya so? nîîke na awya. Ero wa ketaw awya on wara eyuhko, Nai ha ma Kaanî mtapotarî awya so yîn̂entamexporî? On wara makî tko kesî Kporin komo, Kahsîpînkexe so ro mak okwe, kesî mak okwe, kasko yîwya so.

34 On wara rma tko nîîke apoyino anarimaw, weronomano rin̂e rma anarimaw, tîmsom pokono anarimaw, Kporin komo mtapotarî tan wekatîmyas awya so, nîîke. Ero wa kan̂e komo men wîwîrîmesî men okwe, yîhyawno komo meero.

35 On wara xa matko mîîkexe amîtwono komo ya, awakno komo ya marha, Ahce wa xa aweyukye Kporin komo? Ahce wa xa kekn̂e Kporin komo awya? mîîkexe yîwya so.

36 Kaanî mtapotarî xa tan, kahra ro mak tak ehcoko. Amtapotachonhîrî komo rma mekatîmyaxe Kaanî mtapotarî me kica. Kaanî mtapotarî mowyatken̂e, waipînî ro mtapotarî, kantoman̂e ro mtapotarî ha. Ponaro xa kehtopo Mîk, Noro mtapotarî rma mowyatken̂e kica.

37 Ero ke on wara mîîkexe weronomano rin̂e komo ya, Ahce wa aweyukye Kporin komo? Ahce wa kai Kporin komo awya? mîîkexe.

38 On wara tko mîîkexe okwe, Kaanî mtapotarî xa tan wekatîmyasî awya so, mîîkexe. On wara mexe wîîkekn̂e awya so, Kaanî mtapotarî xa tan wekatîmyasî awya so, kahra ro mak men ehcoko, wîîkekn̂e. Wara rma ero wara rma mîîkexe kica.

39 Ero ke twen̂ekarî tak wasî apoko so okwe. Kahsîpînkexe so takî. On ewto wahsîpînkesî awya so onmîtho, aporin pen komo ya onmîtho marha. Mooxe ro mak ken̂epexe so ohyai okwe.

40 Tîwîrîyakaxmu me tak kiir̂axe so erorome. Poxumnî me ro mak kiir̂axe so miya roro eroromero. Ero wara awehtopo komo ehcamnopîra ro mak nas okwe, wîîkes Ow, kesî Kporin komo. Ero wara kesî Kporin komo awya so.