1-2 Ero yinhîrî on wara kekn̂e hara Kporin komo owya, Xuta komo kayaritomon mîn yaka etoko. Iito awexitaw tak omtapotarî ekatîmko kayaritomo ya. On wara kasko yîwya, Ai, Xuta kom kayaritomon amoro, Kporin komo mtapotarî tan wekatîmyas awya, Tapi pen retawno amoro kayaritomo. Ero ke entakî Kporin komo mtapotarî, amaywen komo yakro rma entacoko, on metata yaro cewomsom komo yakro ha.

3 On wara kesî Kporin komo awya so, Yaaro men epanîno ciicoko, kir̂wan̂he marha en̂ekano ciicoko. Emetanmexapu komo yukurunpecoko, emetanmekn̂e komo panarecoko. Kicicme exihra ro mak ehcoko. Yîwîrîmano cirihra ro mak ehcoko. Acheka mohxapu komo, yîmîhnî komo, iin̂o waixapu komo, ero warai komo yîwîrîmara ro mak ehcoko, en̂epera marha ehcoko yîmîn komo yai. Kicicme exihnî komo marha waihkara ehcoko tan on ewto po.

4 Ero wa awexitaw so tak kayaritomo komo n̂ewomyaxe on mîîmo yaka metata yaro. Anarimaw so kawaru mkaw n̂ewomyaxe, anarimaw hara tarara yaw so mokyaxe. Tantoyem komo n̂ewomyaxe, antomnî komo marha. Tapi pen retawno komo mîkyam n̂ewomyaxe.

5 Omtapotarî yewetîra awexitaw so reha on mîîmo tak nasî wermonho me amn̂e. Yaaro tan wîîkesî, oyehtopo rma wetahcasî ero yewetîtome awya.

6 On wara marha kesî Kporin komo awya so Xuta kayaritomon yanan komo ya, Xireace warai amyamro owya. Ribanu meretîrî warai marha amyamro owya. Wara rma axawa imo wara tak kiir̂axe so. Pohnî me mak wiir̂asî awewtonthîrî komo.

7 Awaparî komo wen̂epesî awece so. Yukurun komo rma wîmyasî yîwya so. Acomotanthîrî komo namexe setru yepu komo, kir̂wanînhîrî komo. Amatîkache nakn̂iyaxe tak okwe.

8 Ero yinhîrî tak mîk hak rowon pono komo mokyaxe on ewtotho panari. Enîche on wara kexe takrono komo ya, Ahce poyero ewto imo n̂iir̂akn̂e Kporin komo ewtotho me okwe. Porinînhîrî on okwe, kexe.

9 On wara n̂eyukyaxe akrono komo, On wara xatken̂e on ewtotho pononho pen komo, kicicme xatken̂e kica. Tporin komo mtapotarî yai n̂etowyatken̂e, ponaro cehtopo komo mtapotarî yai ha. Omtapotari ewetîcoko awakronomachome so owya, kachonho yai n̂etowyatken̂e okwe. Anarî ro komo tak nîhtînoyatken̂e Tporin komo me. Noro yipu komo ya tîmsom nakn̂iyatken̂e marha. Ero poyero on wara nas on ewtotho me okwe, kexe. Ero wa kexe on poko ewtotho me exiche takî.

10 Ero ke on wara kesî Kporin komo awya so, Waixa pen komo pînîn yaw yîwratara ehcoko. Waapa narîtho komo pînîn yaw xa yo awratacoko, cerewre awratacoko yîpînîn yaw so. Oona mokuhra ro mak tak naxe hara. Tîrowonthîrî komo yenîhra ro mak tak naxe okwe, kesî. Ero wa kesî Kporin komo awya.

11-12 On wara marha kesî Kporin komo awya Sarun poko hara. Xosias pen mumutho mîk Sarun, Xuta kayaritomon pen mumutho. Kayaritomo me xakn̂e tîîm pen retawno me. Noro cekn̂e xehxa waapa narîtho me. Noro mokuhra ro mak tak nas hara oona. Tîrowonthîrî yenîhra ro mak tak nas hara okwe. Taan̂enhîrî komo rowon po rma waihyasî, kesî Kporin komo awya so.

13 On wara marha kesî Kporin komo tîmîn ciin̂e komo poko hara, Kicicme ro mak maxe kica anapickarî komo poko. Kir̂wan̂he exihnî me ro mak n̂examro mapickexe kica. Amîtwono komo mantomexe epethîmnî me ro mak kica. Ahce na tîmîhra ro mak maxe yîwya amîn ciitamci.

14 On wara mîîkesî ahnaw, Porin wiir̂as omîn. Porin marha wiir̂asî oyamtakponî mko. Cewkanapai wiir̂asî. Setru ke amtakponî mko wacancesî. Yîmkarî tak wucures okre, mîîkesî.

15 Kayaritomo me ma re mai pahkî setru me exiri ke mak amîn? Tînahke xakn̂e aamo pen, twokye marha. Yaaro epanîno n̂iir̂akn̂e noro, takîhso marha en̂ekano n̂iir̂akn̂e. Ero ke kir̂wan̂he xakn̂e noro reha, ahce na poko ehn̂ara.

16 Cesemetanmesom komo kurunpen̂e me xakn̂e. Emetanmekno rin̂e komo n̂en̂ekekn̂e yaaro. Ero ke kir̂wan̂he xakn̂e esemetanmekîra. Ohtînotopo rma moro ero wa ehtoponhîrî, kesî Kporin komo.

17 On ponaro mak mas amoro reha, awemyawno yepamnopu xe mak masî, kicicme exihnî komo waihka xe marha masî, epeman me apickano miir̂asî. On wara mîîkesî apoyino komo ya, Ow epemacoko mer̂pora. Oyepemara awexitaw so kahruyaxe so okwe, mîîkesî kica, kesî Kporin komo awya.

18 On wara marha kesî Kporin komo Xeoiakin poko hara. Xosias pen mumutho mîkî, Xuta kayaritomon pen mumutho ha. Noro pen waipuche yîpînîn yaw yîwratara naxe poyinonhîrî komo. Oyakno pen cik okwe, kahra naxe. Oyepeka cik okwe, kahra naxe yihcinhîrî poko hara noro pen waipuche. Yîwratara naxe yîpînîn yaw so. Oyantoman̂enho pen cik okwe. Kir̂wan pen mîk xakn̂e kayaritomo pen okwe, kahra naxe noro poko.

19 Buhu pen yokoputho n̂iir̂axe ero wara xa marha noro pen yokoputho n̂iir̂axe hara. N̂ihxikyaxe mak ewto wacan metatan yaro. Xeruxaren wacanî mkai mak nar̂mexe kr̂a. Ero wara noro pen yokoputho nar̂mexe okwe.

20 Ribanu pona etocoko, Okwe okwe, kaxi. Kar̂pe kacoko. Ero wa kacoko Basan po marha. Abarin po marha, Okwe okwe kacoko. Twaihso tak naxe yiixe awehtoponhîrî pen komo okwe.

21 Pahxa ka esemetanmekîra awexitaw so kîmtapowakn̂e awakro so. On wara tko mîîketken̂e, Amtapotarî ponarora ro mak nas amna, mîîketken̂e. Ero wara rma mîxatken̂e amrenai ro rma kica. Omtapotarî yewetîn̂e pîn me mak mîxatken̂e kica.

22 Ero ke antomano rin̂e pen komo naar̂asî ocowo okwe. Aaxatînhîrî komo naar̂axe waapa komo. Ero yimaw mîhyapamyaxe tak kicicme awehtoponhîrî komo pona. Tîwîrîyakaxmu me mak tak maxe kicicme xa awexirî ke.

23 On wara marha kekn̂e Kporin komo Ribanu pono komo ya hara, On wara wîîkes awya so awakowerî warai miir̂axe setru yepu pona rma re. Aka aka, mîîkexe tko amn̂e cerewrem aweporîche so. Wooxam wara rma merewaxe cewrusom wara oko. Ero wara wîîkes awya so Ribanu pono komo ya.

24 On wara wîîkesî Xekon̂ias poko hara, Xeoiakin mumuru poko, Xuta yepamtho kayaritomon mumuru mîk noro poko wîîkesî. Yaaro wasî waipîn me, ero wa xa marha yaaro wîîkesî on wara apoko, oyamoyeknarî warai me rma awexitaw ketaw ha re, kaari pokono warai me awexitaw rma en̂exa rma kmohkesî.

25 Awaika xe nasî Nabukotonoso, Babiron̂a pono komo kayaritomon. Kawtew komo ahnoro awaika xe naxe. N̂examro pona meraswasî. Yîwya so rma tko kahsîpesî.

26 On poi kr̂a ken̂epesî, anocwan yakro rma, aame n̂ewruyakn̂e noro pen yakro rma ken̂epexe so anarî pona roowo pona. Awewrutoponhîrî pîn pona ken̂epexe so. Iito rma mîwaiyaxe amyamro asakno roro rma okwe.

27 Oona amoku xe xa hara maxe ha re arowonthîrî komo pona. Oona mokuhnî me ro mak tko maxe okwe, wîîkes awya, kesî Kporin komo.

28 Onoke warai xa mîk Kon̂ias? Onoke kuknon me ciixapu warai katî mîk, poxumnîtho warai, etahkaxaputho warai? Tooto komo nîxatîmnokarî mîk ha? Ahce yanme anarî rowon pona cen̂epesom me nai, tîmxîkrî komo yakro rma cen̂epesom me natu ahce yanme? Tîn̂enîthîrî pîn pona cen̂epesom me naxe ahce yanme ha?

29 Ai, roowo pono komo, roowo pono komo, roowo pono komo, Kporin komo mtapotarî men entacoko.

30 On wara kesî Kporin komo Kon̂ias poko xa hara, Moso yehtopo mewreko on wara, Yîmxîkîn me tak mewreko moso, cehn̂axmu me marha nasî kayaritomo me cexitaw. Cehn̂axmu me marha naxe epamthîrî kom hara, Xuta yepamtho komo kayaritomo mera ro mak naxe, Tapi pen retawno me exihra naxe, kesî. Ero wa kesî Kporin komo Kon̂ias poko.