1-2 Ero yinhîrî kîrkomo n̂en̂epekn̂e kayaritomo ohyaka. Setekias mîk xakn̂e kayaritomo yosotî. Pasuru n̂en̂epekn̂e, Mawkias mumuru, Sepan̂ias marha n̂en̂epekn̂e Maaseia mumuru, tîmsom pokono mumuru. On wara ketken̂e owya, Ai Xeremias, on wara tî nîîke Setekias awya, Kaan yakro cma re mîmtapowasî kpoko so. Kwaparî me mokye Nabukotonoso, Babiron̂a komo kayaritomon kopi. Pahxa tko tî yukurunpeno n̂iir̂akn̂e Kporin komo keserepokacho ke. Ero ke amtapowataw Noro yakro oroto keserepokacho na n̂iir̂a xa hara kukurunpetopo komo. Ero ke na Nabukotonoso nîîce hara kîhyai so, nîîke Setekias awya, ketken̂e owya.

3-4 On wara tko kekn̂e Xeremias yîwya so, On wara kacoko Setekias ya, On wara men kesî awya Kporin komo, ponaro Ixaw Yana komo yehtopo, On wara xa matko kiir̂axe so, akurun komo rma re mahsîyaxe. Ero ke rma re Babiron̂a kayaritomon yen̂epe xa matu. Kawtew komo awamcexe awaparî komo me. N̂examro ahnoro en̂epe xe matu. Akurun komo rma tko waknamesî awaparî komo me rma okwe. Kawtew wenmekyasî oona ewto roron pona rma.

5 Owî rma ketar̂mesî awakro so. Karitî xa oyaporî. Ketapoyankesî awar̂metome so. Orwon ro mak kar̂mexe so.

6 On ewto pono komo weper̂ancesî eper̂a imo ke. Ero yaka tak waihyaxe tooto pen komo, okno pen komo marha okwe.

7 Ero yinhîrî on ewto po etîmtoxapu komo wahsîpesî Nabukotonoso ya, Babiron̂a kayaritomon ya. Yiixatî pîn komo ya xa wahsîpesî, waihka xatî komo ya ha. Tantono pen komo paraxkexe kacipara imo ke. Yîmton me ro mak paraxkexe, yîpînîn yaw so exihra ro mak naxe okwe. Ero wa Setekias pen wahsîpesî yîwya so, Xuta kayaritomon pen. Noro maywen komo marha wahsîpesî yîwya so. Ahnoro eper̂a yaka waipîn komo rma, rooma yaka waipîn komo marha, kacipara imo ke waipîn komo marha. Ero wa etîmtoxapu pen komo waihkapesî Nabukotonoso komo ya, kesî Kporin komo, wîîkekn̂e. Ero wa wîîkekn̂e omtapotarî yentaxi mohxapu komo ya.

8 Ero yinhîrî on wara kekn̂e hara Kporin komo owya, On wara kasko moxam ya apoyino komo ya, Ai oyakno komo, on wara kesî Kporin komo awya so, esama wekatîmyas awya so. Waipîn me awehtopo komo yakan wekatîmyasî, awaitopo komo yakan marha wekatîmyasî.

9 Tanî rma awexitaw so ewto po mîwaiyaxe kacipara imo ke, rooma yaka, eper̂a yaka ha na. Awepataketaw so reha Kawtew komo yaka, awamton̂e komo yaka, waipîra rma maxe. Kar̂pe rma mîîcexe xehxa.

10 Anarme esehtînopîn me thakwa wîhtînoi on ewto yîwîrîmacho. On pono komo yakronomacho yîhtînopîra ro mak wasî. Babiron̂a kayaritomon ya wîmyasî. On ewto nakn̂iyasî kr̂a noro, kesî Kporin komo awya so.

11-12 Taa, on wara kasko Xuta kayaritomon ya, iyanan komo ya marha, Ai, Tapi pen yananînho komo amyamro, on wara kesî Kporin komo awya so, Yaaro men en̂ekano ciicoko pahxaxaro so kapu. Cen̂epan̂em komo marha en̂epecoko yîn̂emetanmekîthîrî komo yai. Ero wara ciino cirihra awexitaw so kîrwonasî tak men apoko so wehto wara ro mak oco. Eihkan me thakwa nasî orwon ero yimaw oco. Ero wara men kîrwonas apoko so kicicme awexirî ke so.

13 Awaparî komo men Ow, aporî yecihtawno komo amyamro, woskara pono komo marha amyamro, toh ken̂arî pono komo, kesî Kporin komo. On wara mîîkexe kica, Onoke ma re mokya amna waparî me, onoke ma re n̂ewomya amna mîn yaka? mîîkexe ha re.

14 Kepemexe so rma tko awehtoponhîrî komo yecenarî rma. Owî rma tak wehto wiriyasî. Acomotan komo chew wehto wiriyasî. Ero tak amararinthîrî komo meero nakn̂iyasî, amînthîrî komo marha, awemyawnonhîrî komo ahnoro mak nakn̂iyasî on̂iritho wehto, kesî Kporin komo. Ero wa men kesî Noro awya so.