Ero yimaw tak iito xakn̂e Pasuru, Ime mumuru. Kaan ya tîmsom pokono mîk xakn̂e Pasuru, Kporin komo mîn yawno komo kopenato me marha tî xakn̂e. Noro tî n̂encekn̂e Xeremiasî mtapotarî.

2 Ero ke Xeremias pen tak n̂etapekn̂e. Yîhroyakîknotopo yaka marha n̂iir̂akn̂e. Benxamin metatan mîtwo xakn̂e kîhroyakîknotopo, îh po, Kporin komo mîn mîtwo rma. Ero yaka n̂iir̂akn̂e.

3 Enmapuche tak Xeremias pen tak nahrunkekn̂e hara Pasuru. Yîhroyakîknotopo yawnonho n̂ekyakn̂e hara. Ero yimaw on wara kekn̂e Xeremias yîwya, Anarme tak awosohcesî Kporin komo. Pasuru me awetacira tak nasî, Mehxarpa Eraspeno Rin̂e, kacho me tak awosohcesî.

4 On wara kesî Kporin komo awya, Eraspeno rin̂e me xa tak kiir̂asî. Meseraspesî amoro rma. Awakrono komo yeraspen̂e me marha masî. Awakrononhîrî pen komo waihkexe aaxatî pîn komo awero ro rma. Xuta komo war̂mapesî Babiron̂a pono komo kayaritomon ya. N̂examro pen naar̂asî noro miya Babiron̂a pona. Iito tak n̂examro pen waihkesî kacipara imo ke okwe.

5 Mer̂pora rma re nasî on ewto pono komo yemyawno cepethîkem. Mer̂pora nasî yînakîtothîrî komo, yupurantan komo marha, Xuta kayaritomon komo yemyawno, ooru warai, prata warai, toopuci enporixapu. Ero yipu ahnoro wîmyasî aaxatî pîn komo ya. Ero tak n̂epor̂axe, nahsîyaxe marha. Miya tak naar̂axe Babiron̂a pona.

6 Amoro marha awaraxe. Ahnoro ahyawno komo marha naar̂axe mokuhnî me ro mak oona hara. Babiron̂a pona awar̂axe so. Iito tak mîwaiyasî. Ahnoro awakrononhîrî pen komo marha waihyaxe iito, amtapotachonhirî yentan̂enho pen komo waihyaxe ahnoro. Cemaro mekatîmyakn̂e yîwya so n̂examro pen waihyaxe okwe, kesî. Ero wara kesî Kporin komo awya Pasuru, wîîkekn̂e yîwya.

7 Ero yinhîrî on wara kekn̂e Xeremias hara Kporin komo ya, Ai Apa, oyakro mîmtapowakn̂e weronomano rin̂e me oyehtopo poko. Yaaro xa mîmtapowakn̂e. Ero ke tak kewehce. Ow mîyoponkai kar̂pe xa awexirî ke. Ero ke kewehce. Opoko tko n̂etaporexe tooto komo enmar̂atîxera okwe. Ahnoro opoyino komo n̂etaporexe opoko.

8 Amtapotarî yekatîmyataw roro owya kar̂pe wekatîmyasî. Ai, oyakno komo, waapa komo men mokyaxe, awemyawnonhîrî pen komo marha naar̂axe, wîîkesî kar̂pe. Poxumra ro mak oyen̂axe amtapotarî yekatîmrî ke owya, n̂etaporexe marha opoko.

9 Ero ke on wara wîîkekn̂e oropotaw, Kporin komo yetacira ro mak tak wasî. Kporin komo mtapotarî tan wekatîmyas yîwya so, kahra ro mak tak wasî, wîîkekn̂e cma re ka. Wehto wara ro mak tko xakn̂e yîmtapotarî oropotaw. Rerehrere kan̂e wara xakn̂e oco. Oyocho yaw ahruxapu wara xakn̂e oco. Kpokekn̂e makî tko ekatîmra oyexirî. Weronomano rin̂e pîn me exihra thakwa wasî, wîîkekn̂e.

10 Opoyino komo mtapotarî wencekn̂e, Ahto so na exitaw noro keraspetopo poko mak nîmtapowasî kopi, kexe. Ekatîmko ka, kexe owya. Amtapotachonhîrî tak amna n̂ekatîmyasî kayaritomo ya, kexe. Ahnoro oyakrononho komo kicicme omtapotacho yenta xe xatken̂e kica. On wara ketken̂e opoko, Noro penî kr̂a cemîknocerî kicicme yîmtapotachome. Ero wa kr̂a noro pen tîyoponkexe. Ero wa emîknorî ke cesepanîyaxe noro pen poko, kacho wencekn̂e okwe mer̂pono pîn komo mtapotarî.

11 On wara tko wîîkekn̂e. Oyakrono me rma tko nasî Kporin komo, Karitî ro, yukurumîkno ro mak. Ero ke n̂epîrkexe tak oyemetanmekn̂enho pen komo. Oyopono me exihra tak naxe amn̂e. Nîhyapamyaxe xa tak amn̂e cehn̂arî komo ke. Miya roro n̂examro yehn̂achonho n̂esencesî. Ero wara ehn̂achonhîrî komo yîhcamnopîra ro mak naxe tooto komo miya rorono komo rma.

12 Ero yinhîrî on wara wîîkekn̂e hara Kporin komo ya, Ai Apa, amna yantoman̂e ro Amoro. Kir̂wan komo yukukman̂e Amoro, Kir̂wan̂he xa na natu, kachome. Tooto yesehtînotopo yentan̂e Amoro, yîropotarî komo yenîn̂e marha. Ero ke owero ro rma cma re n̂examro pen poko ow mepanîyasî. Awya xa ooxatî pîn komo wen̂ekapesî. Ero ke ero wara ow epanko poko so, wîîkes awya.

13 Ai, Kporin komo poko cewanomacerî, Noro poko tahwotacerî okre. Cesemetanmesom komo waihkapora nasî Noro kicicitho komo ya.

14 Tîwîrîmaxi exi xe tko wasî kaamo, oyewrutoponho. Pahxa kewruyakn̂e yememe pen xîkrî me ero kaamo poko ahwotara ro mak n̂ehcowpe oyanan komo.

15 Tîwîrîmaxi exi xe wasî oyewrutopo yekatîmn̂enho apapa pen ya. Amxîkrî n̂ewru oroto kîîrî cik okre, kekn̂e apapa pen ya. Yîmtapotarî yentache tawake ro makî tî xakn̂e noro pen. Wara rma oyekatîmn̂enho n̂expe tîwîrîmaxi.

16 Pahxa ewtotho pen nakn̂iyakn̂e Kporin komo. Iipono pen komo pînîn yawra xakn̂e okwe. Ero wara xa marha tîwîrîmaxi n̂expe oyewrutoponho yekatîmn̂enho. Okwe okwe, kacho yentan̂e me mak n̂expe pahxaxaro. Waapa kopi, kacho yentan̂e me marha n̂expe kamarakataw tak.

17 Ero wara n̂etwîrîmape kr̂a noro pen oyetapara cexirî ke ewruxanî rma. Anarimaw yememe pen ropotarî rma na n̂exirî ha re oyokoputho yahrutopo me. Twepakye n̂exirî miya roro eroromero oyocho ke.

18 Ahce kacho ma re kewruyakn̂e oyetapickachome me mak, oyahwokacho chew mak oyehtome marha. Tan roowo po oyenmatopo wenatkesî ohyapamtopo poko mak okwe. Noro yiputho mak ow okwe.