Ero yinhîrî nîmtapowakn̂e xa hara Kporin komo oyakro. On wara kekn̂e owya, Ai Xeremias, parakwe arko er̂mo kahxapu. Antomano rin̂e komo arko awakro poritomo komo. Kaan ya tîmsom pokono komo marha arko, poritomo komo marha.

2 Miya n̂examro arko aporî yecihtaka, Inon Mumuru Yewkuru, yecihtaka. Ewto wacan metatan mehxa rma arko, Tahrem Etahkaxaputho, kacho mehxa. Iito awexitaw tak kîmtapowasî awakro. Omtapotarî ekatîmko yîwya so.

3 On wara kasko yîwya so, Ai, Xuta kayaritomon komo, Xerusaren pono komo marha, on wara kesî Kporin komo, kantoman̂e ro, ponaro Ixaw Yana komo yehtopo, Tantono komo yîwîrîmacho xa tak wekmexpesî. Yîwîrîmachonhîrî komo yentache amn̂e anarî komo ya, nîyorwasî tak panarî komo.

4 On wara xatken̂e kica tantono komo, oyahsîpînketken̂e okwe. Ponaro anarî yana komo yehtopo n̂ekyatken̂e oona yaake. Noro yipu komo tawakeretopo me kotoporem nakn̂iyatken̂e. Tînîhtînorî pîn komo tawakeretopo me nakn̂iyatken̂e, tporin pen komo nîhtînorî pîn, Xuta kayaritomon komo nîhtînorî pîn, noro yipu komo tawakeretopo me rma nakn̂iyatken̂e tan kica. Rikomo pen komo kamxukutho marha n̂en̂epetken̂e tan mer̂pora ro mak okwe, kicicme exihnî ro komo kkamxukutho rma.

5 Baaw mîn marha n̂iir̂atken̂e mer̂pora îh po so. Iito tak tumumuthîrî komo ciki nakn̂iyatken̂e Baaw ya tîmsom me okwe. Ero wara amxîkrî pen komo akn̂icoko, kahra ro mak wîxakn̂e yîwya so. Ero wa akn̂itopo komo poko twen̂ekarî ro mak wîxakn̂e.

6 Ero ke pahxaro tak on roowo nosohcexe anarme, kesî Kporin komo. Topece tan ha, kahra tak naxe, Inon Mumuru Yaporî tan ha, kahra marha naxe. Waihkano Ritoponho, kexe tak on poko apori poko.

7 Tanî rma tohnawno me tak wiir̂asî Xuta komo yesentachonho, Xerusaren pono komo yesentachonho marha. N̂examro xatî pîn komo ya n̂examro pen war̂mapesî, waparî komo ya. Okoputhîrî komo wîmyasî kwacinama yotî me, kamara yotî me marha.

8 Pohnî me ro mak on wiir̂asî ewtotho. Okwe ro mak, kexe tak ahnoro taixa tîtosom komo amn̂e on yenîche. N̂eserepokexe ro mak tîwîrîmaxi ro mak exirî ke.

9 Moxam pen wamcexe ro mak waapa komo tînahrî komo wece tohra ro mak ehtome so. Ero ke tak nahwokexe ro mak on pono komo. Tumumuthîrî pen komo punu rma non̂exe okwe, cemsîthîrî pen komo pun marha. Takrononhîrî pen komo pun marha non̂exe. Ero wara so tantono pen komo n̂iir̂axe yiixatî pîn komo, waihka xatî kom ha, kasko yîwya so.

10 Ero wara kache parakwe tak ahkakî awakrono komo wero ro.

11 Ahkache on wara kasko yîwya so, On wara kesî Kporin komo awya so, Ero wa xa marha on pono komo wahkesî, on ewtotho yahkan̂e wara xa marha wasî. Parakwe yahkache kapuhnî me ro mak tak nas hara okwe. Ero wa xa marha on pono pen komo yahkan̂e wara was okwe. Topece pona okoputhîrî komo nahruyaxe roowo pen tawronohkatîkaxi ro mak.

12 Ero wara men wiir̂asî on ewtotho, kesî Kporin komo, on pono pen komo marha ero wa wiir̂asî. On ewtotho tak wiir̂asî Topece warai me rma okwe.

13 Topece nasî kicicitho me ero wara rma nasî mîîmo mko Xerusaren pononho komo mîntho, Xuta kayaritomon komo mîntho marha. Kicicitho me so nasî. Tîmîn komo meretwo rma kotoporem nakn̂iyatken̂e kah yawno komo tawakeretopo me. Ponaro anarî yana komo yehtopo ya tîmsom me marha wooku nukmamyatken̂e mîîmo meretwo so. Ero ke kicicitho me so yîmînthîrî komo wiir̂asî, kasko yîwya so, kekn̂e Kporin komo owya.

14 Ero yinhîrî Topece poi tak mokyakn̂e hara Xeremias, Kporin komo n̂en̂epetho, weronoman̂enhîrî ha, en̂exa mokyakn̂e hara. Kporin komo mîn roron po tak n̂ecececekn̂e hara. Iina mohxapu komo yakro nîmtapowakn̂e xa hara.

15 On wara kekn̂e yîwya so, On wara men kesî Kporin komo, kantoman̂e ro, ponaro Ixaw Yana komo yehtopo, Mer̂pora kîmtapowakn̂e on ewto pono komo yîwîrîmacho poko, ewto panawno komo yîwîrîmacho poko marha. Ero wara kachonho yaw roro rma men wiir̂as amn̂e. Ero wara tantono pen komo wiir̂asî tîpîmyewaxkem me cecirirî ke so. Ero wara n̂ecir̂atken̂e omtapotarî yentan̂e pîn me cehtome so, kesî. Ero wa men kesî Kporin komo awya so.