1-2 Ero yinhîrî on wara kekn̂e hara Kporin komo owya, Ai, Xeremias, etoko takî tahrem kahn̂e ro mîn yaka. Iito awexitaw tak omtapotarî wekatîmyas awya, kekn̂e.

3 Ero ke tahrem kahn̂e ro mîn yaka kîwcekn̂e. Iito rma xakn̂e noro tahrem kahtopo mîtwo. Tahrem kahyakn̂e.

4 Kahyataw n̂etwîrîmekn̂e tak okwe yînkahrî. Ero ke erotho rma kahyakn̂e xa hara. Anarme kahyakn̂e tînîhtînorî yaw roro rma.

5-6 Noro yeen̂ataw owya on wara kekn̂e Kporin komo owya, Ai Xeremias, on wara wîîkesî Ixaw Yana komo ya, Ai Ixaw Yana komo, Moso tahrem kahn̂e warahra katî wai Ow apoko so? Enko xe, er̂mo nasî moso yemyaw. Tînîhtînorî yaw roro rma kahyasî. Ero wa xa marha maxe amyamro hara Ixaw Yana komo. Oyemyaw maxe on̂irirî me ha.

7 Anarimaw anarî rowon pono komo poko na kîmtapowa, tîkayaritomoyem komo poko na kîmtapowa. On wara na wîîke yîwya so, Ai, kar̂mexe so tak okwe, kwaihkexe so tak okwe, amînthîrî komo marha wixkesî, wîîke na yîwya so.

8 Ero yimaw rma tko on wara tak na natu n̂examro, kicicme cehtoponhîrî komo yai tak na n̂etowyatu. Ero wara exitaw so omtapotachonho tak wowyasî, Awaparî komo men wekmexpesî, kachonho wowyasî. N̂examro waihkara rma wasî.

9 Anarimaw anarî rowon pono komo poko na kîmtapowa hara, tîkayaritomoyem komo poko ha. On wara na wîîke yîwya so, Kepamnoyaxe so tak amn̂e okre, ar̂man me kiir̂axe so on roowo pono ro me, wîîke na yîwya so.

10 Ero yimaw rma tko na on wara natu n̂examro, kicicme na natu owero ro. Omtapotachonho yewetîra na nat okwe. Ero wara exitaw so omtapotachonho tak wowyas hara, Kakronomexe so amn̂e, kachonho owya. N̂examro akronomara rma was okwe.

11 Ero ke on wara kasko Xuta komo ya, Xerusaren pono komo ya marha, Ai oyakno komo, on wara kesî Kporin komo awya so, Awaikacho komo men wîhtînoyasî, awar̂macho kom ha. Wara rma kicicme awehtoponhîrî komo yai tak etowcoko. Kir̂wan poko mak tak ehcoko, kesî Noro awya so, kasko yîwya so.

12 On wara tko aweyukyaxe, Ahce kacho ero wa amna nai? Pîra ro mak. Tînîhtînorî yaw roro mak nas amna. Kicicitho rma tan amna ropotarî. Wara rma tîropotaw amna nîhtînoyasî ahce wa na amna yehtopo. Ero yaw roro mak nas amna, kexe awya okwe.

13 Ero ke on wara kesî Kporin komo, On wara kacoko Xenciu komo ya, Kicicitho komo yehtoponho ma re mencetken̂e Ixaw Yana komo yehtoponho warai xa marha, kicicme cehsom komo xa? Emasî warai rma re mîkyam Ixaw Yana komo. Kicicitho me ehxapu komo ro makî tko mîkyam okwe.

14 Kir̂wanî ro mîn n̂eepe yuxukrapamxapu Ribano poi yîhtoxapu. Toopu yatumnai epatakaxapu mîn tuuna, twotmem mîn okre. Ero yipu ma re tahsîpînke anan̂ixan yeetome hara kica?

15 Opoko nîtwen̂ekarînwatken̂e mak okwe oyanan komo rma. Kotoporem nakn̂iyaxe ero pîntho tawakeretopo me, tîn̂enporithîrî tawakeretopo me. Tanmero so rma n̂ehroketken̂e esamatho yai cetowtome okwe. Esamaci yaw so mak cexe, tamtakem yaw xa tohra tak naxe okwe, kir̂wan yaw tohra.

16 Ero ke pohra ro mak tak nas amn̂e yîrowonthîrî komo. Okwe ro mak, kexe tak ero pore tîtosom komo. Miya roro ero wa kexe yîrowonthîrî komo yeen̂ataw. N̂eserepokexe ro mak, n̂epanamexe mak ceserepokarî komo ke.

17 N̂examro pen wakpayasî waapa ke rma. Katayarî nakpayasî ocowo ero wa n̂examro pen wakpayasî waapa ke. Omkarî mak wenpesî yîwya so, oyewru enpora wasî yîwya so. Ero wara wasî n̂examro poko yîwîrîmacho komo me enmayataw tak okwe, kesî Kporin komo apoko so, wîîkekn̂e yîwya so.

18 Ero yinhîrî tak on wara ketken̂e Xuta yepamtho komo Xeremias poko, Amohcoko, cesentacerî noro yîwîrîyakacho poko. Kaan ya kpanatanmetopo komo yekatîmn̂e me rma naxe Kaan mîn yenîn̂e komo. Kakîhretopo yekatîmn̂e me rma naxe takîhsom komo, Kaanî mtapotarî n̂ekatîmyaxe rma kweronoman̂e komo. Ero ke Xeremias pen poko tîmtapotacerî kicicitho me ro mak. Yîmtapotarî yentara ro mak cehcerî, ketken̂e kica opoko.

19 On wara tko wîîkekn̂e Kaan ya, Apa, oponaro rma cma re masî. Owîrîyakan̂e komo mtapotarî cma re mencesî.

20 Yîwîrîmano ma re cicir̂a kakronoman̂enhîrî yepetho me? On wara tko naxe n̂examro, ewtarî yahton̂e wara naxe ero yaka oyepîrkachome. Etwîrîmara n̂examro yehtopo ponaro rma cma re wîxakn̂e Apa. Amîtwo rma kecececekn̂e, N̂examro cma re makronomesî, n̂examro poko marha cma re metîrwoxinkesî, wîîkekn̂e awya.

21 Ero ke n̂examro xîkîtho pen waihkakî rooma ke. N̂examro pen kamxukutho en̂epeko kr̂a kacipara ke. Yihcinhîrî komo kr̂a cirko iin̂onkaxapu me, yîmxîkaxapu me marha. Kîrkomo waihkakî, kar̂pamxan komo meero waihkakî kacipara imo ke waapa yakro etar̂metaw so.

22 Waapa kopi, kacho tak n̂esentape yîmîn yawno komo mtapotarî. Ponan̂e rma sowtatu komo eeko n̂examro waparî me. Ero wa n̂examro cirko Apa kicicme exirî ke so opoko. Ewtarî nahcetken̂e ero yaka oyahsîtome. Oyemcinotopo marha n̂eyamyatken̂e ohromxitome okwe.

23 Yîmtapotarî komo rma mences Apa. N̂esencexe owaikacho poko, ero wara yîmtapotarî komo mencesî. Kicicme n̂examro yehtoponho yahrutopo cirihra ro mak esko Apa. Kicicme ehtoponhîrî komo yickara ro mak esko. Ero yenîn̂e me rma esko. Awero ro rma n̂examro ar̂mapoko waapa komo ya. Ero wara n̂examro pen cirko arwonîmtopo me xa exitaw tak, wîîkesî. Ero wara wîîkes awya Apa n̂examro poko.