On wara marha kesî Kporin komo, On wara nasî kicicme Xuta yepamtho komo yehtoponho, tmewreso nasî yîropotarî komo poko rma. Mewretopo ke rma nasî tmewreso, pehu warai ke. Ciamanci ke tpotkem ke tmewreso nasî. Paaka meretîtho warai nasî ponaro awehtopo komo ya tîmsom yakn̂itopo po. Ero poko marha nasî tmewreso kicicme n̂examro yehtoponho.

2 N̂examro xîkrî komo meero n̂een̂axe ponaro awehtopo komo ya tîmsom yakn̂itopo. Axera kuknontho ponaro marha naxe. Ero yipu nasî weewe yapomyaw so, taakem yapomyaw so ha. Îh po so nasî kawno po so.

3 Ai oyîpîn, on wara wîîkes awya, orowon pono amoro. Ahce na cepethîkem mer̂pora nai aapo, puranta pen marha. Ero rma wîmyasî waapa komo ya. Yîtîwîn po so nai kicicme iitono komo yehtopo. Ero marha wîmyasî yîwya so. Arowon komo poko hakno komo rma wîmyasî yîwya so.

4 Kicicme awexirî komo poyero rma arowonthîrî komo mahsîpînkexe, awya so wîmyakn̂e ero ha. Anîhtînorî pîn po tak maxe roowo po. Iito tak maxe aaxatî pîn komo yanton me thakwa. Ow mîrwonmekyatken̂e wehto yirin̂e wara rma. Eseikan me ro mak tak nasî ero wehto warai, orwon ha.

5 On wara marha kesî Kporin komo awya so, Tîwîrîmaxmu me thakwa maxe tooto pona mak een̂ataw awya so. Ero wa xa marha maxe, Noro xa okaricesî, kan̂e me awexitaw so tooto poko mak. Kporin komo yai awetowyataw so marha tîwirîmaxmu me maxe okwe.

6 Ero wara awexitaw so peen wara mak maxe pohnîntawno wara. Ehn̂an me tak exitaw so anarî komo, ero wa ehtopo komo yenîhra rma maxe okwe. Axawa imo pono wara mak maxe amyamro reha tuuna ken̂arî pîn pono wara. Pohnîntawno me mak maxe, yîmîtî ken̂arî pono me mak okwe.

7 Kporin komo pona enîn̂e me awexitaw so reha takronomaxmu me xa tak maxe okre. Ero wara maxe Noro ponaro xa awexitaw so.

8 Weewe wara tak maxe tuuna yecihtawno wara. Ero yipu n̂imicinwasî tuuna yepu wece. Ero ke erasîra rma nasî kaamo me roro mak enmayataw. Aawaipîn me ro mak nas okre. Tuuna mokuhra exitaw tahwore rma nas okre. Epetantho mera ro mak nasî miya roro. Ero wara maxe amyamro okre Kporin komo pona enîn̂e me awexitaw so.

9 On wara tko nasî tooto ropotarî, cesemîknosom me ro mak nasî kica. Ahce na kemîknon̂e yopo ro mak nasî cesemîknosom me. Kicicitho me ro mak nas okwe. Ahce wa ma re kropotarî komo tîhtînoya, Ero wa xa nai ham oropotarî, kachome.

10 On warai tko Ow, Aporin komo, tooto komo ropotarî yentîkan̂e Ow. Esehtînotopo komo yukuknoman̂e marha Ow. Ero warai me oyexirî ke epemano wiir̂asî ehtoponhîrî komo yecenarî rma. Yaaro xa epemano wiir̂asî.

11 On wara naxe anarî komo, tupurantan komo nahsîyaxe emku me mak kica. Noro yipu komo naxe turukwarî warai wara rma. On wara nasî turukwarî warai, anarimaw tuhme pînî po rma na nai. Ero wa xa marha naxe tooto komo, kicicme tupurantan yahsîn̂enho komo. Poritomontara rma ka exitaw yîhyai thakwa ces hara okwe yupurantanthîrî. Poritomotho me exitaw so tak cehnaxmu me rma n̂esenpexe kica, kekn̂e Kporin komo.

12 On wara wîîkes ow hara, Kayaritomo yapon nasî amîn yaw Apa. Kir̂wanî ro mîn ha. Pahxanînhîrî rma mîn. Kir̂wan̂he ro mak nasî.

13 Ponaro Ixaw Yana komo yehtopo Amoro Apa. On wara naxe ahnoro awahsîpînkan̂enhîrî komo, cehn̂axmu me mak naxe okwe. On wara naxe ahyai etaknamaxapu komo, osotî komo nasî roowo po mewrexapu wara. Ero wara nasî Kporin komo yahsîpînkarî ke. Tuuna pîtho warai Mîk okre Kporin komo, waipîn me kiin̂e pîtho warai ha. Noro yipu rma tko nahsîpînkexe okwe, wîîkesî.

14 On wara marha wîîkekn̂e Kaan ya, Ow ehcemak Apa. Ero yinhîrî kar̂pe xa tak wasî. Ow yukurunpeko, etwîrîman me tak oyehtome. Apoko tahwotaxmu me wasî.

15 On wara kexe opoyino komo owya, Ahto tak nai Kporin komo mtapotarî? Ero yaw roro rma tak ciino ritopo yenî xe tak nas amna oroto, kexe owya.

16 Apa, awenîche ahyai etaknamara wîxakn̂e. Opoyino komo weronoman̂e me oyexi xera wasî, kahra wîxakn̂e. Poxumra rma wekatîmyasî yîwya so n̂examro yahwokacho me enmacho amn̂e. Omtapotarî rma mencekn̂e, an̂entarî me rma wekatîmyakn̂e yîwya so.

17 Oyeraspen̂e me exihra cma re mas Apa. Amna yîwîrîmacho me enmapuche Amoro mak masî pona oyetkurunpetopo me.

18 Oyemetanmekn̂e komo xa yo cirko cehn̂axmu me. Owî reha ehn̂anmekîra esko. N̂examro xa cirko tahwokaxmu me. Ahwokan me xa ow cirko. N̂examro pen waihkacho me tak n̂enmape amn̂e. Asakî ro n̂examro pen waihkakî.

19 Ero yinhîrî on wara kekn̂e hara Kporin komo owya, Ai, Xeremias, etoko ewto wacan metataka. Apoyino komo mohtopo yaka etoko, ewto pona mohtopo komo yaka. Metata yaro n̂epatakexe Xuta kayaritomon komo ero yaro xa marha n̂ewomyaxe hara ero yaka etoko. Ahnoro Xerusaren wacan metatan yaka etoko. Iina so ececetoko.

20 Iito awexitaw on wara kasko apoyino komo ya, Ai, oyakno komo, Xuta kayaritomon komo, Xuta yepamtho komo ahnoro, Xerusaren pono komo marha ahnoro. On metata yaro tîtosom komo ahnoro awya so wîîkesî. Kporin komo mtapotarî tan wekatîmyas awya so.

21 On wara kesî Noro awya so, Awepokaretopo po men tawsîn̂em arîhra ehcoko. Xerusaren wacan metatan yaro ero yipu ekîhra ro mak ehcoko ero kaamo po.

22 Tawsîn̂em arîhra ehcoko amîn komo yai awepokaretopo komo po. Ahce na poko etapickara ro mak ehcoko ero po. Awepokaretopo komo ciicoko anarme, oponaro awehtopo komo me xa. Ero wara rma wîîkekn̂e aporin pen komo ya pahxa.

23 Omtapotarî yentara tko xatken̂e n̂examro pen kica. Omtapotarî ponarora ro mak xatken̂e okwe. Tîpîmyewaxkem wara mak xatken̂e kica. Tpanatanmetopo komo yenta xera ro mak xatken̂e okwe. Ero wara xatken̂e aporin pen komo okwe.

24 N̂examro warahra ehcoko amyamro reha. Omtapotarî men entacoko, wîîkes Ow Aporin komo. Awepokaretopo komo po tawsîn̂em ekîhra ehcoko on yaro ewto metatan yaro. Oponaro awehtopo komo me mak xa ciicoko, awepokaretopo komo me marha. Ero po etapickara ro mak ehcoko.

25 Ero wara awexitaw so on ewto metatan yaro tak n̂ewomyaxe amn̂e kayaritomo komo, antomano rin̂e komo marha. Tapi pen retawno komo mîkyam naxe kayaritomo me. Tarara yaw so mokyaxe, kawaru mkaw so anarimaw. Tmaywei rma mokyaxe antomano rin̂e komo ke tmaywei ha. Xuta yepamtho komo marha n̂ewomyaxe xiya kayaritomo komo yakro, Xerusaren pono komo marha n̂ewomyaxe. Ar̂man me ro mak tak nasî on ewto. Ero wa nasî miya roro eroromero.

26 Ero yimaw mokyaxe apoyino komo. Xuta yepamtho yewton pono komo mîkyam mokyaxe. Xerusaren mîtwono komo, Benxamin rowon pono komo, woskara pono komo, îîpî chewno komo, suu n̂ixan komo, ero warai komo mokyaxe oona. Owya tîmsom n̂ekyaxe tookuthîrî komo, takn̂itîkaxmu, ahce wa na tîmsom, tmararîn komo pono yeperîrî, kotoporem, ero warai komo n̂ekyaxe oona Aporin komo mîn yaka owya tîmsom me. Kir̂wan̂he xa mai ham okre, kexe ero yipu yekyataw rma. Ero warai komo mokyaxe etapickara awexitaw so awepokaretopo komo po so.

27 Omtapotarî yentara tko na mat okwe. Oponaro awehtopo komo ro me cirihra na matu awepokaretopo komo. Ero po rma na on ewto metatan yaro mîmokyatu tawsîn̂em yekn̂e komo rma. Ero wara rma awexitaw so wehto tak wiriyasî on ewto metataw so rma. Ero yimaw tak kayaritomo mîntho pen n̂ecakyasî yaake Xerusaren pononho pen. Eseikan me ro mak nas on̂iritho oco, kesî. Ero wara kesî Kporin komo awya so.