1-2 Ero yinhîrî on wara kekn̂e hara Kporin komo owya, Yipitara ro mak men esko tan on ewto po. Apici ahsîra ro mak esko tan amumuru komo ewrura ehtome, awemsîrî komo ewrura ehtome marha.

3-4 On wara wîîkes Ow Aporin komo xa, on po ewruxapu komo poko wîîkesî, kîîrî mren pen poko, woosî mren pen poko marha, yîson pen komo poko marha wîîkesî, yîîm pen komo poko marha. On wara men naxe amn̂e, waihyaxe mak okwe eper̂a yaka cerewrem yaka oko. Yîpînîn yaw so tîwrataxmu komo exihra thakwa naxe waipuche so, ahrun̂e komo exihra marha naxe. Noro yipu komo yokoputho mak nasî pukno wa paaka wetî wara ro makî. Waapa kaciparan ke rma waihyaxe, rooma yaka marha waihyaxe. Okoputhîrî komo korîntho nahyasî kwacinama komo, kamara warai komo marha, roowo pore tîtosom kom ha, kekn̂e owya.

5 On wara marha kekn̂e Kporin komo owya, Anarimaw so mîîmo yaw nîwracexe apoyino komo. Ero wa yîwracetaw so yîhyaka so ewomra ro mak esko amoro ero mîîmo yaka. Yîpînîn yaw so yîwratara esko. Okwe okwe, kaxi tohra esko. Onkurunperî mera ro mak tak naxe okwe. Onwakrerî me exihra marha tak naxe n̂examro, yîpînîn yaw so oyehtopo mera ro mak. Ero ke n̂examro yakro yîwratara esko.

6 Cemyawnoyemînhîrî pen komo rma waihyaxe on roowo po, emyawnomnînhîrî pen komo marha. Ahrun me ro makî tko nasî okoputhîrî komo. Yîpînîn yaw so yîwratara ro mak naxe iyananînhîrî komo. Ecaikara so marha naxe, ekanamurinkara so marha naxe. Yîpînîn yaw sora so naxe okwe.

7 Waixapu pen komo pînîn yaw tîwrataxmu komo yînahmara ro mak naxe iitono komo amn̂e, ewyakîrera marha naxe. Wokpara ro mak naxe ahworechome so. Yîîm pen pînîn yaw so yîwratatopo me exitaw tîwrataxmu komo wokpara ro mak naxe ahworetome so okwe, yînocwan pen komo pînîn yaw tîwrataxmu komo marha wokpara naxe.

8-9 Ceseresmaxmu komo yaka marha tohra esko amoro. Akro so eremara marha esko aweseresmachome, awokru yeetome marha. On wara tko wîîkes Ow Aporin komo, awantoman̂e ro komo. Ponaro Ixaw Yana komo yehtopo Ow, Owî rma wîîkesî, on wara men ciino wiir̂asî awero ro rma, waipîra rma ka awexitaw, tahwotaxmu komo mtapotarî tak wîtîtmamnoyasî, cipitaxmu komo mtapotarî, cin̂ontaxmu komo mtapotarî, ero warai komo mtapotarî wîtîtmamnoyasî. On po esentara ro mak tak nasî noro yipu komo.

10 Ero wara kacho ekatîmko apoyino komo ya. Amtapotarî yentache on wara tak kexe awya, Ahce kacho ero yipu poko nîmtapotai Kporin komo amna yîwîrîmacho poko xa ha? Ahce poko amna xakn̂e kicicitho me yîwya? Ahce kacho tanwekn̂e wara amna n̂een̂a okwe? kexe awya.

11 Ero ke on wara n̂examro eyuhko, On wara kesî Kporin komo awya so, Aporin pen komo oyahsîpînketken̂e okwe. Ponaro anarî yana komo yehtopo ponaro tak xatken̂e kica. Noro yipu komo ya tîmsom nîmyatken̂e, Oporin amoro, ketken̂e marha yîwya so. Owî reha opînînketken̂e mak okwe. Owya tpanatanmetopo komo yewetîra xatken̂e okwe.

12 Oroto tak maxe amyamro hara kicicme xa tak aporin pen komo yopo okwe. Kicicme nasî aropotarî komo. Oyanme ro mak wehsî, kan̂e me mak maxe okwe. Ero ke omtapotarî yentara ro mak maxe okwe.

13 Ero ke on roowo poi tak ken̂epexe so kr̂a. Anarî pona ken̂epexe so hara anîhtînorî pîn komo pona. Aporin pen komo nîhtînotorî marha mîn, ero yipu pona ken̂epexe so. Iito tak anarî komo poko maxe, ponaro anarî yana komo yehtopo poko ha. Katpanaw ero yipu poko so maxe, kosope marha. Iito awexitaw so awakronoman̂e komo pîn me ro mak was okwe, kesî Kporin komo.

14 On wara tko kekn̂e hara Kporin komo, Pahxaro tak on wara kahra tak naxe tooto komo, Waipîra nasî Kporin komo Ixaw Yana komo yekn̂enho Exitu poi, kahra ro mak naxe.

15 On wara xa matko kexe, Waipîra nasî Kporin komo Ixaw Yana komo yekn̂enho nohce n̂ixan pononho. Pahxa mîk hak rowon pona n̂examro n̂en̂epekn̂e ero poi ekn̂enhîrî komo Mîk Kporin komo, waipîn ha, kexe. On roowo wîmyakn̂e n̂examro porin pen komo ya ero ke oona xa marha n̂examro wekyas hara.

16 On wara marha kesî Kporin komo, Ero yimaw ootî yanîmn̂e warai komo wantomesî Ixaw Yana komo yanîmrî poko. Ero yinhîrî tak cesetakaxmu warai komo wantomes hara. Ixaw Yana komo n̂epor̂axe mîn hak pore, îh pore, matîwîn komo pore, toopu chew so marha n̂epor̂axe, ewtarî yaw so marha. Ahnoro mak n̂epor̂axe oona ehtome so hara.

17 Ixaw Yana komo yehtopo rma tko ween̂asî. On̂enîrî mera eyamxapu me exihra ro mak naxe n̂examro. Kicicme ehtopo komo marha eyamxapu me exihra nasî.

18 Yihcirî me n̂examro yehtoponho cokorî ka wepanîyasî. Asakî ro wepanîyasî. Ero wicakî wepanîyasî orowon yîwîrîmarî poyero yîwya so. Orowon nawronohketîketken̂e ponaro cehtopo komo ke, okoputho warai ke. Poxumnî ro mak mîn kica yîn̂enporithîrî komo, kica kacho me ro mak nasî. Ero yiputho ke rma tko orowon nawronohketîketken̂e kica. Ero ke kesepanîyasî, kekn̂e Kporin komo. Ero wa kekn̂e owya Xuta Yana komo poko.

19 On wara wîîkekn̂e ow hara, Apa kah yawno, okariton̂e Amoro, okurunpen̂e marha. Pona oyetkurunpetopo Amoro oyesemetanmekyataw. Ahyaka mokyaxe amn̂e Xenciu komo. Roowo mapitawnonho komo rma mokyaxe. Tmokuche so on wara kexe awya, Apa, yaarono pîn komo mak xatken̂e ponaro amna porin pen yehtoponho komo. Ero pîntho ponaro mak xatken̂e kica, takronoman̂e pîn komo ponaro mak kica.

20 Ahce kacho on wara natu n̂examro, kaan pîn komo n̂enpor̂atu ponaro cehtopo komo me rma. Ahce kacho kopi? wîikesî.

21 On wara kekn̂e Kaan hara owya, On wara wasî ero wa cehsom komo poko, Cewn̂e ro mak tak oyehtopo wenpesî yîwya so, kar̂pe xa oyehtopo ha. Ero yimaw tak oyosotî tak nîhtînoyaxe. Kporin komo xa Mîk ham, kexe opoko, kesî. Ero wara kesî Kporin komo.