Ero yinhîrî on wara kekn̂e xa hara Kporin komo owya, Ahce wa wai awya so tan Moises pen komo exitaw, Samuew pen yakro. Tan n̂examro pen exitaw oyakro tîmtapotaxmu me oyanan komo yukurunpetopo poko, yîmtapotarî komo yanme rma moxam pînîn yaw exihra rma was okwe. On̂enîrî mera ro mak tak en̂epeko oyanan komo. Tocowpe ro kr̂a makî.

2 Anarimaw on wara na ket hara moxam awya, Ahna thakwa re amna cee ha? ketu. Ero wara ketaw awya on wara eyuhko, On wara men kesî Kporin komo awya so, Twaihkaxmu me yukuknomaxapu komo cexe etwaikaposo. Kacipara nparaxkarî me yukuknomaxapu kom hara cexe eparaxkaposo. Rooma yaka twaihsom me yukuknomaxapu kom hara cexe rooma yaka waihso. Waapa narîrî me yukuknomaxapu kom hara cexe waapa narîrî me hara, kasko mak yîwya so, kekn̂e owya.

3 On wara marha kesî Kporin komo awya so, wîîkekn̂e Xuta komo ya, 4 komo wantomesî n̂examro pen yîhcamnon̂e komo. Kacipara imo ke cemyarkem komo wantomesî n̂examro waihkan̂e me. Xapari komo marha wantomesî yupunthîrî komo yihxikn̂e me. Kwacinama komo wantomesî korînthîrî komo yahn̂e me, kamara komo wantomesî tonon̂e me. Noro yipu komo wantomesî oyanton komo yokoputho tonon̂e me, yîhcamnon̂e me marha.

4 Mîk hak kayaritomon komo nîîxatîmnokarî me wiir̂asî Xuta komo, roowo poko hakno komo nîîxatîmnokarî me. Ero wa n̂examro wiir̂asî Manases poyero. Esekias pen mumutho mîk xakn̂e Manases, Xuta komo kayaritomon pen mumutho. Kicicme ro mak ciino n̂iir̂akn̂e noro Xerusaren pono pen komo. Ero ke ero yipu yanme moxam wiir̂asî cemetanmesom me, kesî Kporin komo awya so.

5 Xerusaren pono komo, awya so wîîkesî, onoke thakwa re apînîn yaw so nai ha? Onoke thakwa re nîwrace apînîn yaw so hara. Onoke thakwa re awece so n̂esewkor̂me amtapotarechome so? Onok ma re ero wa nai awya so?

6 On wara xa kesî Kporin komo awya so, Ow mahsîpînketken̂e okwe. Awehtoponhîrî komo rma re mîpoxunkexe ha, ero yinhîrî mîpoxurexe xa hara kica. Ero wara roro maxe kica. Ero ke kahsîyaxe so tak ha men oyamorî ke. Kîhcamnoyaxe so tak okwe. Kpoka tak omtapotachonho towrî poko, Kwaihkexe so men, kachonho towrî poko.

7 N̂examro pen war̂mesî. Puruma yatho aposokaxapu mar̂mexe kahsî yîpîpîthîrî yaatome ocowo ya. Ero wara n̂examro pen waihkesî ewton komo potaw so rma. Oyanan pen komo wîmxîketîkesî, N̂examro pen meero wîhcamnoyasî okwe. Ero wara wiir̂asî kicicme ehtoponhîrî komo yahsîpînkara rma exirî ke so okwe.

8 Iin̂o waixapu komo xa hara wepamnoyasî mer̂pora cehso ro. Axawa yopo ro mak tak naxe okwe mer̂pora ro mak tuuna imo yecihtawno yopo. Kamarakataw wekyasî wooxam pen waihkan̂e komo, kar̂pamxan yon pen waihkan̂e kom ha. Tîhra rma wekyasî iipo so eraspetono komo, waihkan̂e kom ha.

9 Ero yimaw takî 7 ro yîmxîtaxapunhîrî rma n̂ekar̂kesî. Esesîra tak nas okwe. Kokmamxapu wara rma nasî noro yipu katpape rma exitaw. Tîwîrîyakaxmu me tak naxe noro yipu komo, cehnaxu komo me marha okwe. Noro yipu komo poyinonho komo rma wîmyasî yiixatî pîn komo ya kacipara imo ke yînparaxkarî komo me okwe. Yîîxatî pîn komo wero ro rma paraxkexe okwe, kesî. Ero wa kesî Kporin komo awya so.

10 Ero yinhîrî on wara wîîkekn̂e, onocwan pen yan wara rma wîîkekn̂e, Okwe ro mak wîîkesî yeme. Ahce kacho ow mewrunohkekn̂e okwe? Omtayar̂mexe mak opoyino komo ahnoro, oyakro mak n̂eseseyukyaxe okwe. Opurantan tîmîhra ro mak wîxakn̂e yîwya so tîramansom me, poko ehtoponhîrî yepetho yakro rma tîramansom me ha. Owya marha tîmîhra xatken̂e tupurantan kom hara tîramansom me, poko oyehtoponho yepetho yakro rma tîmsom me ha. Wara rma owîrîmacho yan̂ikn̂e me mak naxe okwe ahnoro, wîîkekn̂e.

11 On wara tko oyeyukyakn̂e Kporin komo, Kukurunpesî rma akronomano ciitome tak awya amn̂e. Aaxatî pîn komo rma mokyaxe amn̂e cesemetanmekyataw so, onok na pona ceraswataw so. On wara kexe awya, Kaan yakro cma re mîmtapowasî amna poko, kexe n̂examro awya, aaxatî pîn komo rma, kekn̂e owya.

12 Ero yinhîrî on wara kekn̂e hara Noro Xuta komo ya hara, Ai, Xuta komo, ahce wa matu pehu poko, mahket ha ma re awya so? Ahce wa matu mehxan poko pehu poko, nohce n̂ixan poko ha, bronse poko hara, ero yipu ma re mahketu amyamro tooto mak ha? Pîra ro mak okwe.

13 Awemyawnonhîrî komo tak wîmtîkesî aan̂e komo ya, epethîmra ro mak wîmyasî yîwya so. Apurantanthîrî komo marha wîmyasî yîwya so. Ero wa wîmyasî yîwya so kicicme awehtopo komo poyero. Kicicme mîxatken̂e arowon komo poko hakî.

14 Aaxatî pîn komo men awar̂axe so anarî rowon pona an̂enîtorî komo pona. Wehto yirixapu wara rma nas orwon apoko so. Ero tak awakn̂iyaxe so oco, kekn̂e Kporin komo.

15 On wara wîîkekn̂e ow hara Kporin komo ya, Oyahwokacho rma tko meen̂as Apa. Oponaro rma cma re masî, owî cma re mukurunpesî roro. Oyemetanmekn̂e komo poko ow epanîko. Amna yehtoponho yînîmn̂e xa Amoro Apa, pahkî yînîmn̂e. Ero ke owî cma re waihkara masî. Awanme owîrîyakacho wencesî ro mak okwe. Ero wa oyehtopo ponaro cma re mas Apa.

16 Amtapotarî rma tko ween̂e. Ero yahn̂e wara tak wîxakn̂e okre. Oyahworekn̂e ro mak, kahwowakn̂e ro mak ero poko okre. Kporin komo yakrono, kacho ow ha. Noro yipu ow Apa Kaan. Kantoman̂e ro komo Amoro Apa.

17 Aponarono komo poko cetaporesom komo yakro eremara ro mak wîxakn̂e ow. Noro yipu komo yakro ahwotara ro mak wîxakn̂e. Cewyaro mak keremekn̂e awamorî ke oyahsîn̂e wara awexirî ke. Kicicitho komo poko arwonîmtopo ke rma oropotarî marîhcekn̂e.

18 Ahce kacho oyerewrî eserewkara ro mak nai oko? Ahce kacho oparaxkachonho warai nai ecpîn me ro mak? Tuuna yaporî wara katî mai opoko Apa, kemîknon̂e wara? Tuuna pîtho wara katî mai opoko, yohno tapaitîkaxmu wara hara okwe? wîîkekn̂e yîwya.

19 On wara tko kekn̂e Kporin komo owya, Amtapotachonhîrî poxunketaw awya, kîkaricesî xa hara okre oyanton me rma awehtome. Takîhso xa amtapowataw, akpîra yîmtapotara ro mak awexitaw omtarî wara rma mas okre. Awewetîn̂e me mak n̂ehcowpe n̂examro. N̂examro yewetîn̂e me exihra ro mak men esko amoro reha.

20 Ewto wacan wara rma kiir̂asî, bronse warai wara, sowtatu ke kanahtawnoyem wara. Awakro rma re n̂etar̂mexe ha. Awar̂mara rma tko naxe okwe. Awakro xa tko was Ow akurun me okre. Ero ke kukurunpesî, kekn̂e Kporin komo owya.

21 Kicicitho komo ya awar̂mapora wasî, apînîn yawno pîn komo nahsîrî mera kiir̂asî. Ero wara kakronomesî, kekn̂e. Ero wara kekn̂e Kporin komo owya.