1-2 Ero yinhîrî Xeremias yakro nîmtapowakn̂e xa hara Kporin komo. Tuuna mokuhra exirî poko nîmtapowakn̂e. On wara kekn̂e yîwya, Nîwracexe ro mak tak Xuta komo, tooto exihra tak naxe ewto potaw so okwe. Tîrowon komo pînîn yaw thakwa nîwracexe. Mooxe ro mak n̂esencesî Xerusaren pono komo yîwratarî.

3 Tanton komo n̂en̂epexe antomano rin̂e komo tuuna ka. Porin tuuna yen yaka rma re cexe. Iito tuuna yenîhra ro mak naxe okwe. Yarîhra rma twer̂an komo n̂ekyaxe hara okwe. Ero ke nahwokexe ro mak. Ahce wa tat okwe? kexe mak okwe. N̂esewopon̂axe mak okwe.

4 Turpe ro mak nasî roowo. Tuuna mokuhra ro mak nasî. Roowo pomon̂e komo nahwokexe mak okwe. N̂esewoponyaxe marha okwe.

5 On wara nasî kooso hara, woskara po cma re n̂ewruyasî ha. Tîmxîkîthîrî pen mak nînomyasî cuupu exihtorî ke okwe.

6 Îh po so n̂ecececesî buhu komo okno pîn. Comota ken̂arî pîn po n̂ecececesî. N̂erekayakayanasî kamara warai wara rma. Cewxîrpe tak n̂ehtîkesî cuupu exihtorî ke okwe, kekn̂e. Ero wara kekn̂e Kporin komo owya.

7 On wara tak wîîkekn̂e ow hara, Apa, on wara kes amna awya, kicicme ro mak amna yehtoponho nas amna yen̂ekan̂e wara rma okwe. Wara rma Apa, amna cma re makronomesî awosotî ponaro n̂he ehtome so tooto komo. Apona enîhkan̂e me tak amna n̂ehtîkesî emapona roro okwe. Awece kicicme ro mak xakn̂e amna.

8 Pona Ixaw Yana komo entopo Amoro. Amna kurunpen̂e xa Amoro amna yesemetanmekyataw. Ahce kacho tantono komo cheka mohxapu wara mai? Pawana wara mak masî yîwya so, cewn̂e ro cenmaxmu wara okwe.

9 Ahce kacho ceserepokaxmu wara mak mai okwe? Sowtatu wara rma re masî kukurunpen̂e pîn wara makî tko okwe. Ahce kacho ero wa mai? Amna chewno cma re Amoro Apa. Awosoken marha amna. Ero ke amna ahsîpînkara esko, kes amna awya Apa.

10 On wara tko kesî Kporin komo moxam poko, Twaimam xatî komo mak moxam apoyino komo. Miya so tohra ro mak esko, kahra naxe tîhtarî komo ya. Ero ke oyanan me tak moxam yetacira was Ow Aporin komo. Kicicme ehtoponhîrî komo ponaro tak wasî. Ero poyero n̂examro pen poko kesepanîyasî, kesî. Ero wa kesî Noro moxam poko.

11 Ero yinhîrî on wara kekn̂e Kporin komo owya, Moxamu cma re makronomesî, kahra ro mak tak esko owya apoyino komo poko.

12 Anarimaw so eseresmara rma re naxe. Wara rma yîmtapotarî komo yentara wasî. Tokuthîrî pun nakn̂iyaxe owya tîmsom me, tînatîrî yeperîrî marha nîmyaxe ha re owya. Wara rma oyanan komo moxam, kahra ro mak tak wasî poko so. N̂examro pen waihkesî kacipara imo ke, rooma ke, eper̂a ke, ero warai ke n̂examro pen waihkesî Owî rma, kekn̂e owya.

13 On wara Noro weyukyakn̂e, Ai Apa okwe. On wara xa matko kexe moxam weronoman̂e komo yîwya so, Ai oyakno komo, awaparî komo mokuhra ro mak naxe oona, kacipara ke cemyarkem komo mokuhra naxe. Rooma poko exihra marha taxe okre, esemetanmekîra rma maxe okre, kexe yîwya so, wîîkekn̂e.

14 On wara oyeyukyakn̂e Kporin komo, On wara naxe n̂examro weronoman̂e komo, oyanmen wara rma re weronomano n̂iir̂axe, cemaronwaxe mak kica. Oyanmera ro makî tko n̂ekatîmyaxe okwe. Omtapotarî yekatîmrî poko n̂examro yantomara ro mak wîxakn̂e. Akro so yîmtapotara ro mak wîxakn̂e. Cemaro mak mîn yîn̂enîthîrî komo. Tohnawno mak mîn yîn̂enîthîrî komo, awehtopo komo kuknon ha tî yîwya so. Ero pîntho mak n̂ekatîmyaxe awya so. Tanme ro so mak nîhtînoyaxe awemîknotopo komo okwe.

15 Oyanmen wara rma tko n̂ekatîmyaxe kica, on̂en̂epetho pîn kom ha. On wara kexe, Kwaparî komo mokuhra ro mak mexe naxe oona, kacipara imo ke cemyarkem komo mokuhra. Rooma poko exihra marha taxe, kexe. On wara wîîkes Ow Aporin komo ero wa kan̂e komo ya, Waapa kaciparan yorî ke rma mîwaiyaxe okwe, rooma yaka marha okwe. Ero yaka rma mîwaiyaxe okwe, wîîkesî.

16 On wara marha naxe yîmtapotarî yentan̂enho komo, n̂examro yokoputho nasî tar̂maxmu wara esama yaka, Xerusaren pono yaka. Rooma yaka marha n̂examro pen waihyaxe, waapa kaciparan ke marha oko. Okoputhîrî komo yahrun̂e exihra ro mak nas okwe. Yihcinhîrî komo yokoputho, yumumuthîrî komo yokoputho, emsîthîrî komo yokoputho, noro yipu komo yokoputho yahrun̂e exihra ro mak tak nasî ero yimaw. Kicicme ehtoponhîrî komo rma war̂mesî iipo so rma oko, wîîkesî yîwya so.

17 Ero yinhîrî on wara kasko hara yîwya so, Owrata xe ro mak wasî mer̂pora ro mak. Cetukmamsom wara ro mak exi xe was oyewyokru. Kosope owrata xe wasî, katpanaw marha. Yîtîtmamra ro mak owrata xe wasî. Oyanan komo yemsîtho pen pînîn yaw kîwracesî, iin̂omnî ro warai pînîn yaw okwe. Etapaxapu me thakwa nasî twaihkaxi ro okwe, yuhnaka paraxkaxapu me marha.

18 Mararî pore owcetaw oyanan komo yokoputho ween̂as okwe waapa nparaxkatho pen. Ewto pore owcetaw hara okoputhîri komo ween̂asî hara rooma yaka waihxapu pen kom hara. Weronomano rin̂e komo n̂etar̂axe tîrowon pîn komo pore rma, Kaan ya tîmsom pokono komo marha. Tîn̂enîthîrî komo pîn pore n̂etar̂axe okwe, kasko yîwya so, kekn̂e Kporin komo owya.

19 On wara wîîkes awya Apa, Xuta komo mahsîpînketîkekn̂e ro mak? Siaw pono komo xera ro mak tak mai ham okwe? Ahce poyero amna meper̂ancekn̂e ehceman me ro mak? Cerepore cexi xe cma re xakn̂e amna. Cerepotacho yenîhra rma amna xakn̂e okwe. Cecihtopo ponaro cma re xakn̂e amna. Cesemetanmetopo makî reha amna n̂een̂akn̂e hara okwe.

20 Apa, kicicme amna yehtoponho rma amna n̂ekatîmyas awya. Kicicme amna porin pen yehtoponho marha amna n̂ekatîmyas awya. Kicicme rma xakn̂e amna apoko kica.

21 Wara rma amna xatîmnokara cma re masî. Amna poxunketaw awya awosotî meero nîwîrîyakexe tooto komo okwe. Yîwîrîyakan me ro makî cma re mesenpesî, kayaritomo me xa okre. Amtapotachonhîrî ponaro marha cma re masî. Kakronmexe so oyewecataw awya so, kacho poko mîmtapowakn̂e amna yakro, ero ponaro cma re masî.

22 Enporixaputho ponaro mak naxe mîk hak rowon pono komo. Tuuna ma re n̂ekmexpetu noro yipu komo? Pîra ro mak. Tanme ro mak katî tuuna n̂ekmexpe kaapu? Pîra marha. Amoro xa tko Apa tuuna mekmexpesî. Ponaro amna yehtopo Amoro. Ero ke apona mak amna n̂een̂asî tuuna yekmexpotopo. Amoro xa yiixe amna yehtopo yakîhton̂e. Ero wa wîîkes apoko Apa.