Ero yinhîrî on wara kekn̂e hara Kporin komo owya, Ai Xeremias, warawantacho yaka etoko. Iito aponko awan̂apotun riin̂u kahxapu. Ahsîche amruko awecikrî to xa. Yukwaka tko cirihra ro mak esko, kekn̂e owya.

2 Ero ke oyan̂apotun waponukyakn̂e Kporin komo mtapotachonho yanme. Ero tak wamruyakn̂e owecikrî to xa.

3-4 Ero yinhîrî Kporin komo mtapotarî xa hara wencekn̂e. On wara kekn̂e owya, Xeremias, awan̂apotun tak mohkak hara. Miya arko Ewpratesî yecihtaka. Iito tak ewtarî yaka ahruko, kekn̂e owya.

5 Ero ke Ewpratesî yecihtaka kîwcekn̂e Kporin komo mtapotachonho yaw roro rma. Iina oyan̂apotuntho weyamyakn̂e.

6 Ero yinhîrî tak, pahkî exiche on wara kekn̂e hara Kporin komo owya, Ai Xeremias, etoko xa hara Ewpratesî yecihtaka. Awan̂apotunthîrî tak ehta hara, Iina eyamta ewtarî yaka, kachonho rma owya, kekn̂e tak owya.

7 Ero ke Ewpratesî yecihtaka kîwcekn̂e xa hara. Oyan̂apotun tak mohkekn̂e hara, ewtarî yai, on̂eyamîtho. Okwe, tatîhso ro mak tak xakn̂e. Kir̂wan̂he exihra ro mak xakn̂e okwe.

8-9 Ero yinhîrî on wara kekn̂e Kporin komo owya, Ero wa xa marha Xuta komo yehcoyoponkacho wîwîrîmetîkesî ro mak, Xerusaren pono komo yehcoyoponkacho marha. Cehcoyoponkaxmu komo xa mîkyam kica Xerusaren pono komo.

10 Kicicme ro mak naxe moxam. Omtapotarî yenta xera ro mak naxe kica. Tîropotaw so nîhtînoyaxe ero poko mak naxe tanme ro so. Ponaro anarî yana komo yehtopo marha n̂ewehcaxe. Oporin amoro, kexe noro yipu ya rma kica. N̂examro tak naxe awan̂apotunthîrî wara rma okwe, kir̂wan̂he exihra ro thakwa mak naxe okwe.

11 On wara nasî aan̂apotu, tooto pun poko cetahsîso nasî. Ero wa xa marha wîîkekn̂e Xuta komo ya, Ixaw Yana komo ya marha, Opoko etahsîcoko amyamro oyanan me tak awehtome so. Ero wa awexitaw so kir̂wan̂he xa tak maxe okre. Cekaiporesom me xa tak maxe okre, Kir̂wan komo mîkyam, kacho me ha, wîîkekn̂e yîwya so. Omtapotarî yentara rma tko xatken̂e okwe, kekn̂e Kporin komo owya.

12 On wara marha kekn̂e Kporin komo owya, Ero wa exirî ke so on wara men kasko yîwya so, Ai oyakno komo, on wara kesî Kporin komo awya so, ahnoro uupa yukun yenî mko tak n̂etarîces amn̂e uupa yukun ke, kesî. On wara tko aweyukyaxe, Ero wara rma kesî amna, Ahnoro wooku yen tak n̂etarîcesî wooku ke, kes amna.

13 Ero yinhîrî tak on wara kasko hara yîwya so, On wara marha kesî Kporin komo awya so oyakno komo, Ahnoro on roowo pono komo tak warîhcetîkesî wenîmtopo komo ke so okwe. Ero wara wiir̂asî kayaritomo komo, Tapi pen retawno komo, tîmsom pokono komo, weronomano rin̂e komo, ahnoro Xerusaren pono komo ero wa so wiir̂as okwe.

14 Etpo so tîtosom me rma n̂examro pen war̂mesî yîîm pen komo, yumumuthîrî pen komo marha, kar̂pe so war̂mesî etpo so oko. Yîpînîn yaw so exihra ro mak tak wasî. Okwe, waihkara n̂he tko na wai okwe, kahra ro mak tak wasî. Waihketîkesî ro mak, kesî Kporin komo awya so.

15 On wara marha wîîkes awya so oyakno komo, omtapotarî men entacoko awero ro so xa. Cehcoyoponkaxmu me exihra tak ehcoko. Kporin komo mtapotarî xa tan wekatîmyas awya so.

16 Kir̂wan̂he xa mai ham Apa, kacoko ka Kporin komo ya, ponaro awehtopo komo ya. Kahra awexitaw so awarpan men n̂ekyas aapo so. Îh po awarpantaxapu wara maxe cehrokaxmu wara. Aweyuru komo xe rma re maxe. Aweyuthîrî komo tko n̂eihkesî Kporin komo, awarpanaw xa tak maxe okwe cewcîkînînîhno chew xa okwe.

17 Yîmtapotarî yentara rma awexitaw so kîwracesî ro mak tak cewyaro. Anarî komo yopono me awesehtînorî komo ke kîwracesî. Cerewre ro makî kîwracesî, kewyokwasî ro mak okwe. Kporin komo yoku warai komo tak naar̂axe waapa komo okwe. Ero poyero kîwracesî, wîîkes awya so.

18 On wara kasko kayaritomo ya, yîson ya marha, Ai Apa, yeme komo, on wara wîîkes awya so, Anarî komo xawyakan me tak esenpocoko. Awaponthîrî komo poi ahtocoko. Kir̂wan̂he rma re nas awarokorî komo. Ahtîpîrî komo poi tko n̂epîrkes amn̂e okwe.

19 On wara tak nasî awewtonthîrî komo, suu n̂ixan komo, tahruso tak nas okwe. Ahrunkan̂e komo tko exihra ro mak nas amn̂e. Ahnoro Xuta komo naar̂axe waapa miya ro mak yîrowonthîrî komo poi rma okwe.

20 Miya tak encoko, nohce n̂ixa tmohsom komo encoko. Ahto tak natu awoh komo, oper̂a warai komo? Kaan nîmyakn̂e awya n̂examro ahto tak nat ha? Kir̂wan komo moxam awoh komo warai.

21 On wara mîxakn̂e pahxa n̂he ha re, anarî yana kayaritomon komo yakro mesencekn̂e awakronomacho komo poko. Amn̂e tak n̂examro n̂iir̂asî Kporin komo akayaritomon komo me hara okwe. Ahce wa mîîke ero wara n̂examro ciriche? Merewasî ro mak tak wooxam wara cewrusom wara oko.

22 On wara tko na mîîketu aropotaw so, Ahce poyero oyahwokacho mokye opona okwe? mîîketu na. Ero wa ketaw awya so on wara wîîkesî, mer̂pora ro mak nasî kicicme awehtoponhîrî komo kica. Ero ke asayanthîrî komo mohkan̂e wara tak n̂ehce awaparî komo. Kicicme tak n̂iice apun komo, wîîkesî.

23 Ahce wa nai Eciope komo awya, tîhcîpîthîrî ma re n̂iir̂atu anarme tîswai exihra tak ehtome? Ahce wa nai hara reopahtu mewrexapu? Tanme ro mak katî tmewthîrî nowya awya so? Pîra ro makî. Ero wa xa marha maxe amyamro hara, kir̂wan̂he exihra ro thakwa mak maxe cenpamso awexirî ke kicicme awehtopo komo poko kica.

24 Ero ke kakpayaxe so ro mak puruma pîpîtho wara. Puruma pîpîtho naar̂asî ocowo axawa imo n̂ixan ero wa xa marha kakpayaxe so okwe.

25 On wara kesî Kporin komo awya so, Ero wa nasî awitopo komo amn̂e, apoko so owya yîhtînotopo yaw roro okwe. Ero wara ciisom me thakwa maxe amn̂e. Ero wa maxe twen̂ekarî awexirî ke so opoko okwe, awemîknon̂e komo ponaro awexirî ke so marha.

26 Asayan komo wanîmyasî awewopon komo wara. Akicicin komo tak n̂esenpesî ahyapamnotome so tak okwe.

27 Kicicme ro mak nas apici yai rono wara awehtoponhîrî komo. Kawaru wara ro mak mîxatken̂e hihihi kan̂e wara woosî wece. Mîk hak pokono wara mîxatken̂e wooxam pokono wara. Yîhyapamra ro mak mîxatken̂e kica ero poko. Kicicme ro mak mîxatken̂e îh po so, woskara po so marha. Ero poko awehtoponhîrî komo ween̂akn̂e. Ai, Xerusaren pono komo, metwîrîmexe ro mak tak okwe. Atî wicakî pahkî matu etakir̂wamapon me kica? kesî. Ero wara kesî Kporin komo awya so.