On wara marha wîîkes awya Apa, kir̂wan̂he roro ow meyukyasî ahce na poko omtapowataw awakro. Wara rma on poko omtapota xe was awakro, etîme re awya ciino ritopo poko. Ahce kacho ehn̂ara natu kicicitho komo? Tahwokacho komo chewra so rma naxe okwe. Ahce kacho tawake roro natu kemîknon̂e ro komo?

2 Anatîrî wara naxe noro yipu komo an̂irithîrî wara rma. Yimicintaxapu wara naxe. Por̂mamyaxe, cepetaxmu wara marha naxe. Amîtwono wara rma nîmtapowaxe. Mooxe tko nasî yîropotarî komo okwe.

3 On wara tko masî Apa opoko reha, ow rma mîhtînoyasî. Owî rma meen̂akn̂e. Oropotarî marha mukukmekn̂e, Ooxe xa nai Xeremias, kachome tak awya. N̂examro penî reha yihxiko miya, oper̂a n̂ihxikyaxe tooto komo twaihkaxmu me ero wara rma n̂examro yihxiko hara. N̂examro pen yukuknomakî waihkachome so tak amn̂e waihkacho komo me enmayataw.

4 Atî wicakî pahkî tîwrataxmu wara nai on roowo? Atî wicakî pahkî naawaiya naatî pen mararî pono pen? Comota pono pen marha waihyasî, onoke na pen komo. Tarin̂em komo marha waihyasî. Ero wara nasî noro yipu pen komo kicicme exirî komo poyero ha, on pono komo poyero ha. On wara tko ketken̂e n̂examro, Kenîhra ro mak nasî Kaan amn̂e, ahce wa na kehtopo komo yenîhra, ketken̂e kica, wîîkesî. Ero wa wîîkes awya Apa.

5 On wara kekn̂e hara Kporin komo owya, Ai Xeremias, tîhtarî po cemahcisom komo yakro awcetaw mekar̂kekn̂e okwe. Ahce wa thakwa re kawaru mkawno yakro memahciya hara okwe? Mehrokekn̂e okwe woskara pore awcetaw rma, capahno pore rma. Ero ke ahce wa thakwa re mîîce Xotaw yecihtaw awexitaw so yukmetaw okwe?

6 Kicicme xatken̂e apoko apoyino komo rma, aamo pen yepamtho rma. Kicicme ro mak nîmtapowatken̂e apoko kica. Ai, kicicitho moso kica, ketken̂e apoko, kar̂pe ro mak ketken̂e kica. Ero ke n̂examro mtapotarî anweko tawakem wara rma yîmtapowataw so awakro, wîîkes awya, kekn̂e Kporin komo owya.

7 On wara marha kekn̂e Noro owya, Omîntho tak wahsîpînkesî. Oyanan komo meero marha wahsîpînkesî. Yiixe xa oyehtoponho rma war̂mapesî thakwa yiixatî pîn komo ya.

8 On wara tak naxe oyanan komo owya, reaw wara naxe owya, comota chewno wara. Mayanaxe opoko okwe. Ero ke yiixera so ro mak tak was oroto.

9 On wara marha naxe oyanan komo owya, kwacinama wara naxe kwacakwacano wara. Noro wamcexe anarî komo kwacinama komo waihkacho me so kr̂a. On wara kexe, Amohcoko, kamara warai komo an̂ihtatko, woskara pono komo. Xiya ehcoko tootî komo yonotome.

10 On wara xatken̂e oyanan yenîn̂e komo, onatîrî mak nîwîrîmetken̂e uupa yatî. Omararîn marha napikyatken̂e ceipu cehso ro okwe. Omararîn ka xakn̂e naatî ken̂e okre. Oroto tak ahce na atîhtara ro mak nas okwe ero po. N̂examro yanme ero wa nasî.

11 Pohnî me ro thakwa mak n̂iir̂atken̂e orowontho okwe. Turpe ro mak nas okwe, pohnî me ha. Ero wa nas ahnoro orowontho. Okwe ro mak okwe, kan̂e komo exihra ro mak nat okwe.

12 Mohce tak orowontho yîwîrîman̂e komo. Mînto naxe axawa imo po îh po so, comota ken̂arî pîn po so. Tootî yonon̂e wara nasî Kporin komo kaciparan oko. Oyanan pen komo pun yonon̂e wara nasî orowon yihcitopo n̂ixan pen komo, mapitaka rorono pen komo marha. Tahworem komo exihra ro mak tak naxe ero yimaw tooto komo, tooto pîn komo marha.

13 Puruma yatho rma re n̂iir̂atken̂e tînatîrî me so. Cekyekyem makî tko pohcaxe ero yeperîrî warai hara okwe. N̂ekaricexe ro mak cekar̂katîkaxi ro tmararîn komo ciitopo poko. Tohnaw ro makî tko n̂ekaricexe. Ero ke amararîn pono yeperîrî pona ahyapamcoko mak. Ero wa ahyapamcoko apoko so yîrwonîmrî ke Kporin komo, kesî Kporin komo awya so, kekn̂e.

14 Ero yinhîrî on wara kekn̂e hara Kporin komo owya, Kîmtapowasî omîtwono pen komo poko hara. On wîmyakn̂e roowo oyanan komo ya, Ixaw Yana komo ya. Omîtwono komo tko nahsîyatken̂e tîrowon komo me hara okwe. Ero ke n̂examro pen mohkan̂e wara was amn̂e yimicinthîrî warai meero. Yîrowonthîrî komo poi rma mohketîkesî. Xuta komo mohkan̂e wara marha wasî omîtwono komo chewnonho.

15 N̂examro mohkache tko yîpînîn yaw so was hara. Ero ke ahnoro rma wekyasî yîrowonthîrî komo pona hara, eken komo pona hara.

16 Amn̂e tak oyanan komo yehtopo poko na n̂ehcamhoketu. Cehcamhokacho komo ponaro xa tak natu. On wara marha ketu ahce na poko tîmtapotaw so, Yaaro tan wîîkesî, Kporin komo nasî waipîn me ero wara xa marha nas omtapotarî, kan̂e me tak natu. Pahxa oyanan komo panatanmekyatken̂e Baaw yetacitopo poko kica yaaro xa tîmtapotarî komo yentamexpotome entan̂e komo ya. Ero ke esemtaka tak nat hara okre, oyosotî yetacin̂e me hara. Ero wara ehcamhoketaw so oyanan komo chewno me tak naxe hara.

17 Omtapotarî yewetîn̂e pîn me rma tko na natu anarî rowon pono komo okwe. Ero ke noro yipu komo tak Ow mohkesî yimicinthîrî komo warai meero. N̂examro penî kr̂a wîhcamnoyasî, kesî. Ero wa xa kesî Kporin komo.