1-2 Ero yinhîrî tak Kporin komo mtapotarî n̂encekn̂e xa hara Xeremias. On wara kekn̂e yîwya, Ai, Xeremias, omtapotarî ka entak hara. Kakronomexe so oyewehcataw awya so, kacho wekatîmyas awya. Ero yentache ekatîmta Xuta komo ya hara, Xerusaren pono komo ya marha.

3-4 On wara kasko yîwya so, Oyakno komo, on wara kesî Kporin komo, ponaro Ixaw Yana komo yehtopo, Tîwîrîmaxmu me xa naxe omtapotarî yewetîn̂e pîn komo. Pahxa rma kîmtapowakn̂e aporin pen komo yakro. Kakronomexe so oyewehcataw awya so, wîîkekn̂e yîwya so. Exitu poi ekyataw so wîîkekn̂e yîwya so. Wehto yen yawno wara xatken̂e n̂examro pen, pehu warai yaw. Ero yai ekyataw so owya on wara wîîkekn̂e yîwya so, Omtapotarî men ewetîcoko ha. Apanatanmetopo komo tan wekatîmyasî awya so ero yaw roro men ehcoko ha. Ero wara awexitaw so oyanan me xa maxe. Ponaro awehtopo komo me was Ow hara, wîîkekn̂e yîwya so.

5 Ero wara ehcoko omtapotachonho yaw roro rma awitome so owya. On wara marha wîîkekn̂e aporin pen komo ya, Arowonî ro komo wîmyas awya so. Kir̂wan mîn roowo. Paaka mownu nas iito mer̂pora ro mak. Ween marha nas iito mer̂pora, tuuna yepu wara mak nasî. Ero yipu wîmyas awya so arowon komo me, wîîkekn̂e. Yaaro xa wîîkekn̂e yîwya so towîhnî me ro mak, kekn̂e Kporin komo owya. Taa, ero wa ham Apa, wîîkekn̂e yîwya.

6 Ero yinhîrî tak on wara kekn̂e xa hara Kporin komo owya, Omtapotarî ekatîmko Xuta komo yewton pore so, Xerusaren po marha. Esama yaw so ekatîmko iitono komo yesamarî yaw. On wara kasko yîwya so, Ai, oyakno komo, on wara kesî Kporin komo awya so ha, Omtapotachonho xa men entacoko ha, ewetîcoko marha, kachonho. Ero yaw roro tak ehcoko.

7 Pahxa aporin pen komo panatanmekyakn̂e Exitu poi ekyataw so rma. Cerewre panatanmekno wiir̂akn̂e. En̂exa ehtoponhîrî komo n̂ixa ro rma panatanmekno wiir̂asî roro. Pahxaxaro so rma kawomyakn̂e ero wara panatanmeso so. Omtapotachonho xa men ewetîcoko, wîîkekn̂e yîwya so.

8 Oyewetîra rma tko xatken̂e okwe. Omtapotarî ponarora mak xatken̂e kica. Kicicme mak xakn̂e yîropotarî komo kica. Tanme ro so rma nîhtînoyatken̂e ahce wa na cehtopo komo. Ero ke n̂examro yîwîrîmacho tak wekmexpesî omtapotachonho yaw roro rma, Kakronomexe so oyewehcataw awya so, kachonho yaw roro. Ero wara xa men ehcoko, wîîkekn̂e yîwya so. Ewetîra tko xatken̂e okwe, kasko men yîwya so, kekn̂e Kporin komo owya.

9 Ero yinhîrî on wara kekn̂e hara Kporin komo owya, On wara wencesî Xuta komo mtapotarî, Xerusaren pono komo mtapotarî marha, oyanwecho poko n̂esencexe okwe.

10 Ohyai cetowso tak naxe okwe tporin pen komo yehtoponho pona hara, kicicme ehtoponhîrî komo pona. Omtapotachonho ponarora ro mak xatken̂e n̂examro porin pen komo. Ero wara xa marha naxe iitono kom hara oroto. Ponaro anarî yana komo yehtopo ponaro mak naxe kica. Noro yipu komo yakro marha nîmtapowaxe, yîwya so tîmsom marha nakn̂iyaxe kica. Pahxa kîmtapowakn̂e n̂examro porin pen komo yakro akronomacho komo poko ero yewetîra rma tko naxe okwe. Ero wara naxe Ixaw Yana komo oroto, Xuta komo marha.

11 Ero ke on wara wîîkes Ow hara Aporin komo, n̂examro yîwîrîmacho xa tak wekmexpesî iipo so. Emahcira ro thakwa mak naxe. Apa, amna cma re mukurunpesî, kexe rma ha re. Yîmtapotarî komo yentan̂e pîn wara tko wasî.

12 Ero ke on wara tak naxe Xuta yewton pono komo, Xerusaren pono komo marha, ponaro anarî yana komo yehtopo yaka cexe xa hara okwe. Kotoporem nakn̂iyaxe meyeno komo anarî ro tawakerecho komo noro yipu yaka cexe. Amna yukurunpeko, kaxi cexe. Yukurunpeno cirihra rma naxe waapa mokyataw.

13 Ai, Xuta komo, mer̂pora ro mak naxe ponaro awehtopo komo. Mer̂pora nasî awewton komo ero wicakî xa marha nasî ponaro awehtopo komo. Mer̂pora nasî esama Xerusaren pono ero wicakî xa marha makîhcetken̂e aapo komo, ahyapamnotopo komo ya tîmsom yakn̂itopo, Baaw ya tîmsom yakn̂itopo kom ha. Ero wara men maxe okwe.

14 Ero ke on wara wîîkes awya Xeremias, n̂examro poko yîmtapotara tak esko oyakro. N̂examro cma re mukurunpesî, makronomesî marha cma ha re, kahra tak esko owya. Yîmtapotarî komo yentara ro mak tak was amn̂e owya ketaw n̂examro. Owya rma re kexe tahwokacho komo chew cexitaw so amn̂e. Ero yimaw tko yîmtapotarî komo yentara ro mak wasî, kekn̂e Kporin komo owya.

15 On wara marha kekn̂e Kporin komo owya, Yiixe xa oyehtopo komo amyamro. Wara rma ahce kacho ma re mîmokyatu omîn yaka hara. Kicicitho poko mîxatken̂e mer̂pono pîn komo yakro. Awokuthîrî komo punu rma re makn̂iyaxe, owya tîmsom me. Ero yanme ma re awîrîmara wai awya so? Kicicitho poko awexitaw so ero yimaw rma mahwowaxe kica.

16 On wara ka kosohcetken̂e so Ow Aporin komo, Piiku Yepu Taakem, kacho me ka kosohcetken̂e so. Taapore ka mîxatken̂e okre. Tpoxwe marha ka xakn̂e aweperîrî kom okre. Oroto tko kakn̂iyaxe so. Rerehrere kesî ro mak wehto awakn̂itopo komo kopi. Peremkaxapu wara mak maxe amn̂e okwe.

17 Aporin komo Ow, awantoman̂e ro komo. Onatîrî warai me awin̂enhîrî kom Ow. On wara wîîkes awya so Ixaw Yana komo ya, Xuta komo ya marha, awîrîmacho komo men wekmexpes amn̂e okwe kicicme awexirî ke so okwe. Ow mîrwonmekyatken̂e kotoporem yakn̂irî ke Baaw tawakerecho. Ero wa akn̂irî ke metwîrîmetîketken̂e amyamro rma okwe. Ero wa mak mîxatken̂e okwe, kekn̂e. Ero wa kekn̂e Kporin komo yîwya so.

18 Ero yimaw tak Kporin komo n̂ekatîmyakn̂e owya iitono komo yesentacho opoko. N̂examro yehtopo marha n̂enpekn̂e owya.

19 Owî reha wîxakn̂e oper̂a xîkrî wara mak, twaihkaxmu me aaxapu wara. Mayamnî me ro mak wîxakn̂e. Owaikacho poko esentacho komo yentara ro makî ka wîxakn̂e. On wara tko tî ketken̂e opoko, Weewe yepu kr̂a tamacerî, eperîthîrî yakpachome kr̂a kîwya so. Noro pen tak tîtwaikacerî waipîn komo chew exihra mak tak ehtome noro. Ero yinhîrî tak noro yosotî n̂ehcamnoyasî kr̂a, ketken̂e tî opoko.

20 On wara tko wîîkekn̂e Kaan ya hara, Apa, kantoman̂e ro Amoro. Takîhso en̂ekano rin̂e Amoro. Tooto ropotarî yukukman̂e Amoro, esehtînotopo komo yîhtînon̂e ro marha Amoro. Owî cma re mepanîyasî n̂examro poko owero ro rma. Apona xa ween̂as Apa, ero ke ero wara wîîkes awya, wîîkekn̂e.

21 Ero ke on wara oyeyukyakn̂e hara Kporin komo, Ai, Aporin komo Ow. On wara wîîkes awya Anatoce pono komo poko. Awaika xe naxe. On wara kexe awya, Kporin komo yanmen wara weronomano rihra ro mak tak esko. Ero wara ketaw rma awya awaikesî men amna, kexe awya.

22 Ero ke on wara tko wîîkes Ow awantoman̂e ro komo, kepanîyasî tak amn̂e. N̂examro pen tak waihyaxe kacipara imo ke, kar̂pamxan pen komo. Yumumuthîrî pen komo waihyaxe rooma yaka so, emsîthîrî pen komo marha.

23 Etîmtora ro mak waihyaxe okwe. Anatoce pono komo yîwîrîmatîkacho tak wekmexpesî. N̂examro pen yen̂ekacho me tak nasî ero cimn̂ipu po. Ero wara men waihyaxe n̂examro pen, kekn̂e Kporin komo owya.