1-2 Ai, Ixaw Yana komo, awakro so nîmtapowasî xa hara Kporin komo. On wara kesî awya so, Xenciu komo yehtopo poko men ehcamhokara ro mak ehcoko. N̂eraswaxe reha n̂examro anarme kaapu exitaw. Ero yipu pona reha erasîra ehcoko amyamro.

3 Ero pîntho pokono ro me mak naxe anarî yana komo. Weewe namexe comota chewnonho. Ero yipu tak n̂enpor̂axe weewe yenporin̂e ro komo mariaci ke.

4 Enporitîkache porokucexe tak prata ke, ooru ke marha. Ero yinhîrî tak ecetî wexe aama ke potupoture ke. Ero wara n̂ecehcexe emacakara ehtome.

5 Piiri n̂iir̂axe you yepu wara. Yîmtapotan me thakwa nasî yîn̂enporithîrî komo. Etarin me marha nasî, taasom me kyam mak nasî kica. Ero yipu pona erasîra ro mak ehcoko amyamro reha. Awemetanmekîra so thakwa nasî, awakronomara so marha nasî, kesî Kporin komo awya so.

6 Ai Apa, anarî xa hara exihra ro mak nasî awarai. Amoro mak masî cewn̂e. Amna yopono ro mak Amoro. Karitî ro xa mîkro, kacho me masî.

7 Onoke ma re nai apoko twerîhra kopi? Mîk hak rowon pono komo kayaritomon marha Amoro. Yaaro xa n̂examro kayaritomon me masî. Naxe rma re takîhso yîhtînon̂e komo Xenciu kom ha. Mîk hak rowon pono komo chew rma re naxe takîhso cesehtînosom. Awarai tko exihra ro mak nasî takîhso cesehtînosom.

8 Wara mak cesehtînosom komo mak mîkyam ahnoro, akpîra cesehtînosom kom ha. Noro pîntho komo npanatanmekîtho mak mîkyam, enporixaputho npanatanmekîtho mak ha.

9 Prata n̂ekpexe anarî komo Tahsisi poi, aama ke papaknorexapu. Ooru marha n̂ekpexe Upas poi hara. Ero tak n̂enpor̂axe ahce na me prata pokono ro komo, ooru pokono ro komo marha. Enporitîkache tak pononmexe tîswayem ke, camnarexapu ke marha. Yaana me enporin̂e komo re mîkyam ero warai ciin̂e kom ha.

10 Kaanî ro xa tko Mîkro Kporin komo. Waipînî ro mak Mîkro Kaan ha. Kayaritomo Mîkro eroromerono. Yîrwonataw tak amn̂e Noro roowo n̂ewsîyasî kopi. Noro yîrwonîmtopo yînmîra ro mak naxe amn̂e Xenciu komo.

11 On wara kasko yîwya so, On wara men naxe amn̂e ponaro awehtopo komo, kaapu yakîhton̂enho pîn komo, roowo yakîhton̂enho pîn kom ha. Ero warai komo tak n̂ehcamnotîkexe amn̂e. Roowo po exihra ro mak tak naxe, kaapu makataw exihra marha.

12 Roowo yakîhton̂enho tko Mîkro Kaan. Kar̂pe cexirî ke nakîhcekn̂e. Roowo n̂ecehcekn̂e Noro takîhso cexirî ke. Kaapu mko marha nakîhcekn̂e tamtakem xa yuhnari yîhtînorî ke.

13 Noro yîmtapowataw kar̂pe tuuna tak nasî kah yaw mer̂pora ro mak. Tuuna yewru nanîmyasî Noro roowo yenatîtopo n̂ixan ha. Tuuna mokyataw pepe kan̂e marha n̂iir̂asî. Ocowo marha n̂en̂emhatakesî yîmtotopo yawnonho ha.

14 Akpîra naxe tooto komo ahnoro okwe, camkî ro mak naxe okwe. Camkîno me ro mak n̂esenpexe ooru pokono komo. Yin̂irithîrî komo rma nasî camkîno me enpon̂e komo me, Yin̂irithîrî komo nasî kemîknon̂e me. Kesesîtopo ken̂ehra ro thakwa mak nas okwe.

15 Ero pîntho ro mak mîn yin̂irithîrî komo, emîknono ritopo mak mîn ha. Pahxaro ero yipu komo yîhcamnotopo me kr̂a tak nasî. Ero yimaw n̂ehcamnotîkesî ahnoro.

16 Ero warahra ro makî reha nasî Xako yepamtho komo yecehton̂e. Miyan komo yakîhton̂enho rma Mîk Noro reha. Ixaw Yana komo naxe Noro yanan me. Kporin komo, kantoman̂e ro, kacho. Ero wa nasî Noro yetacitopo.

17 Taa, on wara wîîkes hara awya so, awemyawno komo tak enkacoko akumixin komo yaka so arowon komo poi awtotome so. Sowtatu ke wamtoxapu thakwa amyamro.

18 On wara kesî Kporin komo awya so, Oroto tak miya so ken̂epexe so, on roowo pono komo. Kahwokamexpexe so amn̂e awen̂epetopo komo me yîhtînotome tak awya so.

19 On wara tak mîîkexe amn̂e, Aka, aka. N̂erewasî ro mak oyeper̂an oko, mîîkexe. Oyeper̂anî ro thakwa on. Ero ke wînîmyasî mak, mîîkexe hara tko.

20 On wara marha mîîkexe amn̂e, Cixkaxi tak nasî omîntho. Cetawotoso tak nas okwe omîn micitho. Omxîkrî komo n̂ehcamnoce, exihra tak naxe ohyaw okwe. Omîn ciin̂e exihra tak nasî, yîhpoci ciin̂e marha exihra nas okwe, mîîkexe men amn̂e okwe, kesî Kporin komo.

21 On wara tak naxe oyok warai yenîn̂e komo, ceipu tak nasî yîropotarî komo, Kporin komo mtapotarî yenta xe wasî, kahra ro mak naxe okwe. Ero ke cehn̂axmu me mak naxe okwe ahce na poko cexitaw so. N̂etakpexe tak yîn̂enîthîrî komo oper̂a warai kom ha.

22 Entacoko ha ka, waapa yekaci tak n̂esencesî. Wara hakî kano tak n̂esencesî nohce n̂ixan wara. Xiya men wa mokyaxe kopi Xuta komo yewtontho yakn̂iso. Yîmînthîrî komo tak n̂iir̂axe kamara warai yeken me okwe. Noro yipu komo yekaci n̂esences ha kopi, kesî. Ero wara kesî Kporin komo awya so.

23 Apa, on wara wîhtînoyasî, Ero poko xa was amn̂e, kan̂e pîn thakwa amna tooto kaxi thakwa. Tanme ro mak yîhtînopîra ro mak nas amna, Iina xa tîtopore nai, kacho.

24 On wara marha wîîkes awya Apa, Owî rma panareko ha. Oyakîretopo me makî cma re ow mîpanaresî. Arwon me ow panarera ro makî cma re masî. Ero wara opanareche ow pen thakwa mak mîhcamnoyas okwe.

25 Xenciu komo poko xa yo arwonîmko Apa yîwîrîmatome so. Aponarono pîn komo n̂examro reha. Noro re me cehsom komo poko arwonîmko cerewre xa. Awosotî yetacin̂e pîn komo mîkyam ahce xe so na cexitaw so. Xako yepamtho komo yonotîkan̂e warai mak mîkyam okwe. Ermomn̂e wara mak naxe exihra cehso ro okwe. Ekenhîrî komo tak n̂iir̂atken̂e yarîhra ro mak okwe. Ero wara amna ciin̂e komo poko xa arwonîmko Apa, wîîkesî. Ero wara mak wîîkesî.