On wara wîîkes ow, tuuna pîtho me mak exi xe wasî ohtîpîrî. Oyewyokru pîtho me exi xe wasî oyewru. Ero wa exitaw kîwracesî ro mak tak oyanan komo yemsîrî pînîn yaw. Katpanaw kîwracesî, kosope marha. Mer̂pora ro mak waihce okwe oyanan pen komo.

2 Mooxe tîtosom yenmacho yîhtînopu xe wasî meye ro mak pohnîntaw ro mak. Ero wara yîhtînoyataw owya opoyino komo yai kîwcesî. Mooxe ro mak owto xe wasî yîhyai so. Cipici yairono komo mak mîkyam ahnoro kica. Cesemîknosom komo marha mîkyam okwe, wîîkesî. Ero wara wîîkes ow.

3 On wara kesî Kporin kom hara, On wara naxe oyanan komo, tîkrapan komo naincexe waiwî yar̂machome wîî wara cehso ro. Ero wara xa marha tun̂uru komo wananîyaxe cemaro me tîmtapotachome hara kica. Yaaro tîmtapotaxmu komo yukurunpera naxe okwe. On wara xa matko naxe okwe kicicme ehxapunhîrî, kicicme xa hara naxe okwe. Ohtînopîra ro mak naxe okwe.

4 Twerî men ehcoko amîtwono komo poko. Awakno komo pona rma enîhra ehcoko. Awemîknoyaxe so men kica awakno komo rma ahnoro. Amîtwono komo rma naxe tîmtapotarî yakîhton̂e me apoko so okwe.

5 Ahnoro rma naxe tîmîtwono yemîknon̂e me kica. Yaaro yîmtapotara ro mak naxe kica. Tun̂uru komo panatanmekyaxe cemaro poko mak kica. Kicicitho poko naxe pahkî, cekar̂kaxi ro mak okwe.

6 Cesemkînosom komo chewno me mak mas okwe. Emîknono ritopo poko mak cexirî ke so oyehtopo poko cehcamhoka xera ro mak naxe okwe, kesî Kporin komo owya.

7 Ero ke on wara kes hara Kporin komo, kantoman̂e ro, On wara oyanan komo yemsîrî wiir̂asî, yukuyin̂e wara wasî akir̂wamachome so. Cerewrem ke n̂examro wukukmesî. Ahce wa tak oyanan komo wiir̂a kicicme ehxapu kom okwe?

8 Waiwî wara ro mak nasî yun̂uru komo, kwotopo wara oko. Cesemîknosom me nîmtapowaxe kica. Tawakem wara rma re nîmtapowaxe tîmîtwono komo yakro tîmtarî ke so mak. Tîropotaw so tko emcinon̂e wara rma naxe okwe.

9 Ero wara exirî komo poyero n̂examro yemetanmekîra ma re wai? Esepanpîra ma re wai noro yipu komo poko kica?

10 Kîwracesî ro mak, îîpî pînîn yaw. Okwe okwe, wîîkesî, comota pînîn yaw kîwracesî. Yarîhra ro mak nasî iitono mko, tooto komo mîntho mko okwe. Iituxari tohra naxe tooto komo. Moo moo, kacho tak esentara nasî paaka mtapotarî iito. N̂emahciyakn̂e tak torowo komo, tarin̂em kom ha. Roopori tîtosom komo marha exihra nas okwe, n̂emahciye mak okwe.

11 Xerusaren tak wiir̂asî wermonho me mak okwe. Kamara warai yeken me wiir̂asî. Ahnoro Xuta komo yewton wiir̂asî ewtotho me. Yarîhra ro mak tak nas amn̂e okwe.

12 Ahto nai takîhsom, yuhnari yîhtînon̂e, ero wara ciino ritopo yîhtînon̂e ha? Onoke xa Kaan nîhcamhokekn̂e ero wa tîn̂irithîrî yekatîmtome anarî komo ya takîhso? Ahce poyero tîwîrîmaxi tak nai on roowo? Ahce poyero axawa imo wara mak tak nai? On pore kîwtorî yarohra ro mak tak nas okwe. Ahce kacho ero wa nai ha?

13 On wara kekn̂e Kporin komo, Owya tpanatanmetopo komo nahsîpînketken̂e okwe. Wekatîmyakn̂e yîwya so ero nahsîpînketken̂e okwe. Oyewetîra naxe. Owya tpanatanmetopo komo yaw roro exihra naxe okwe.

14 Cetanwesom me mak nasî yîropotarî komo. Ero rma tko n̂ewehcatken̂e okwe. Baaw komo marha n̂ewehcatken̂e tporin pen komo ya tpanatanmetopo komo yaw roro rma.

15 Ero ke omtapotarî men entacoko. Aporin komo xa Ow, awantoman̂e kom ha, ponaro Ixaw Yana komo yehtopo Ow ha. On wara wîîkesî, On̂irirî encoko amn̂e, cîmîkno ke tak moxam wînahmesî, masmacho ken̂arî ke marha wokpesî tuuna ke.

16 Moxam wakpayasî ro mak Xenciu komo cheka. Yînîhtînorî pîn komo cheka wakpayasî, tporin pen komo nîhtînorî pîn komo cheka rma. Iito tak n̂examro paraxkan̂e komo wen̂epesî kacipara ke oko. N̂examro pen paraxkexe exihra cehso ro okwe, kesî Kporin komo.

17 On wara marha kesî Noro, On wara yîhtînocoko, wooxam komo an̂ihcoko tîwrataxmu ro komo. Tîwratacho poko ehcamhokaxapu komo xa an̂ihcoko.

18 Yohno men nîwratacowpe kîpînîn yaw so. Ero wa nîwratacowpe kewyotachome kîwyam hara. Tuuna pîtho wara ro mak n̂expe kewru picho komo.

19 Siaw pono komo yîwratarî n̂esencesî. On wara kexe iitono komo, Kewtonthîrî komo nasî tîwîrîmaxi okwe. Tîhyapamyaxe ro mak. Krowonthîrî komo poi thakwa tîhcexe cecahso exirî ke kîmînthîrî komo ahnoro okwe, kexe. Ero wara kexe Siaw pono komo.

20 Ai aaci komo, on wara wîîkes awya so hara, Kporin komo mtapotarî men entacoko, awya so kekn̂e ero ponaro men ehcoko. Awemsîrî komo yîhcamhokacoko yîwratacho komo poko. Amîtwono komo marha yîhcamhokacoko ero poko.

21 Kwaihtopo komo thakwa mokye kîhyaka so okwe. Kîmîn yewkanapan yaro n̂ewomye okwe, sowtatu wacan yaka meero n̂ewomye. Kîmxîkrî pen komo waihkekn̂e katpanaw rma, kar̂pamxan komo meero waihkekn̂e roro po rma okwe.

22 On wara kasko apoyino komo ya, On wara kesî Kporin komo awya so, Pahxaro kîrkomo pen yokoputho n̂emokocexe woskara po so. Paaka wetî wara ro mak naxe okwe. Puruma yeputho n̂emokocesî eperîrî yenmekn̂e marian yanme, ero wara xa marha n̂emokocexe kîrkomo pen yokoputho. N̂examro yokoputho yenmekn̂e exihra ro mak tak nas okwe ero yimaw, kesî.

23 On wara marha kesî Kporin komo awya so, takîhso awexitaw so ero wara awehtopo komo poko ahwotara ehcoko. Kar̂pe xa awexitaw so hara kar̂pe awehtopo komo poko ahwotara marha ehcoko. Tupurantai xa natu anarî komo. Ero wara awexitaw so ero poko marha ahwotara ehcoko.

24 Awahwota xe awexitaw so on poko xa yo ahwotacoko, Ow mîhtînoyaxe, yuhnari mîhtînoyaxe oyehtopo pokono. On wara mîîkexe, Kporin komo xa Mîkro, kakronoman̂e komo, yaaro ken̂ekan̂e komo marha. Kir̂wan̂he kiin̂e Mîk kpoko so okre, mîîkexe. Ero wara oyehtopo poko xa ahwotacoko. Ero wara awexitaw so kir̂wan̂he xa maxe owya okre, kesî Kporin komo.

25 On wara marha kesî Noro, Pahxaro tak anpikaxapu komo wemetanmekyasî, anpikan komo yakro rma.

26 Exitu pono komo, Xuta komo, Eton komo, Amon komo, Moabe komo, meyeno komo ahnoro, axawa imo pono komo meero. Ahnoro n̂examro naxe anpikan me. Ixaw Yana komo marha naxe anpikan me yîropotaw so. Noro yipu komo wemetanmekyas okwe, kesî. Ero wara kesî Kporin komo.