On wara marha kesî Kporin komo awya so, Ero yimaw tak Xuta yepamtho pen komo yokoputho nahrunkexe, iyochîrî komo nowyaxe. Kayaritomo pen komo yocho, antoman̂e pen komo yochotho, tîmsom pokono pen komo yochotho, weronoman̂e pen komo yochotho, Xerusaren pono pen komo yochotho mer̂pora. Ewtarî yawnonho nowyaxe.

2 Ero yipu tak nakpayaxe kr̂a kaamo ywaka, nuun̂i nweiporî me marha, xir̂ko nweiporî me marha, ahnoro nweiporî me. Kah yawno xatînhîrî pen komo mîkyam xatken̂e. Ero yipu yanme xatken̂e, ero yipu nantomarî me xatken̂e, ero yipu mtapotarî n̂encetken̂e, ero yipu poko nahwowatken̂e, ero wara n̂examro pen xatken̂e kica. Ero ke iyochîrî enmekîn me tak nasî, ahrun me marha nasî. Roowo ratari takpaxi mak nasî yukpurukpuruntho wara ro mak kica.

3 Ero yimaw, owaipu xe mak wasî, waipîn me rma oyexi xera ro mak wasî, kexe waipîn komo rma ciki, n̂examro poyinonho komo, kicicitho poyinonho kom ha. Miya so on̂en̂epetho ciki re mîkyam mîn hak pona so roowo pona. Iito so n̂etîmcexe asak mak. Ero wara kexe n̂examro, twaipu xatî me mak nîmtapowaxe okwe, kesî. Ero wara kesî Kporin komo, kantoman̂e ro.

4 On wara kasko yîwya so amoro, Ai, oyakno komo, on wara men kesî Kporin komo awya so, Ahce wa matu awepîrkache so? Awomun me ro mak mat hara awya so? Mawomyaxe hara. Ahce wa matu miya cewru awetaknamache so, xiya cewru etaknamara ro mak mat hara? Xiya cewru metaknamexe hara.

5 Ero ke ahce kacho opona n̂enîhketken̂e hara moxam okwe? Ahce kacho Xerusaren pono komo opona n̂enîhketken̂e eroromero okwe? Cesemîknosom me cexi xe so ro mak naxe miya roro okwe. Ohyaka tmoku xera so ro mak naxe okwe.

6 Yîmtapotarî komo wencekn̂e. Takîhso yîmtapotara ro mak naxe okwe. Kicicme cehtoponhîrî komo poxunkara ro mak xatken̂e kica. Ahce kacho ero wa weexi kica? kahra ro mak xatken̂e okwe. Tanme ro so mak nîhtînoyaxe ahce wa so na cehtopo komo. Kawaru wara mak naxe kica. Anarimaw kawaru cesî kar̂pe ro mak cetar̂maxmu komo cheka. Ero wara rma xatken̂e moxam Xuta komo, n̂etaknametken̂e tînîhtînorî ro wece.

7 Ahce wa nai sekon̂a, kaikokoro tîtosom ha? Cetuhmekacho nîhtînoyasî anarimaw so, cwotu yimaw tîtotopo marha nîhtînoyasî. Ero wa xa marha nîhtînoyas hora, krou, antorin̂a komo. Tîtotopo komo nîhtînoyasî, tmohtopo kom hara. Camkî reha tko naxe oyanan komo. Tporin komo ya tpanatanmetopo komo yîhtînopîra ro mak naxe okwe.

8 Ahce wa mîîket hara kopi, Takîhso cehsom amna, mîîketu? Ahce kacho, Kporin komo ya kpanatanmetopo nasî kîhyaw so, mîîketu? Ahce kacho ero wa mîîketu kopi? Enko ka, apanatanmetopo mewren̂e ro komo tî re mewretu karita yaw. Cemaro me mak mewrexe kica.

9 Camkîno me mak tak naxe amn̂e takîhsomînhîrî komo. Nahwokexe ro mak. Waapa nahsîrî me mak tak naxe okwe. Kporin komo mtapotarî mak nanwekyaxe okwe. Ero ke ahce wa ma re noro yipu komo takîhso nat hara okwe?

10 Ero wara exirî ke so yihcinhîrî komo wîmyasî anarî komo ya hara. Mararînthîrî komo marha wîmyas anarî komo ya. On wara naxe ahnoro ro mak okwe, emyawnomnî komo, cemyawnoyem komo marha, cemyawno komo yepamnotopo ponaro mak naxe kica. Ahnoro ro marha naxe cesemîknosom me kica. Ero wara naxe n̂examro weronoman̂e komo, owya tîmsom pokono komo marha.

11 Wahra mak oyanan komo yemsîrî yeper̂an n̂ehcemexe. Tahwore mak ehcoko ha, kahwotacho me tak nas okre, kexe mak kica. Ero wara kexe awerepotacho komo me exihra ro mak exitaw okwe.

12 Ahce wa katî natu kicicitho poko ehxapunhîrî komo, nîhyapamyatu katî? Pîra ro mak, yîhyapamra ro mak naxe kica. Camkî mak naxe cewcutacho komo poko. Ero ke tooto komo yepîrketaw tak n̂examro pen meero n̂epîrkexe okwe. N̂examro yemetanmetopo me exitaw tak n̂examro pen war̂mesî, kesî Kporin komo.

13 N̂examro pen marha wînahkesî, kesî Kporin komo. Uupa yeperîrî exihra ro mak tak nasî yatî poko. Piiku yeperîrî exihra marha nasî eepu poko hara. Yînatîrî komo tak naawaiyas okwe. Onîmîtho mîn yînahrî komo. Erotho rma tko n̂ehcamnoyas hara okwe.

14 On wara tak kexe amn̂e, Ahce kacho tan mak tat hara? Xiya amohcoko ahnoro kîwtotome so. Ewto imo pona so kaikatko, sowtatu ke tukuruyem pona. Iito tak tîtwaicerî okwe. Twaihkaxmu me thakwa wa maxe okwe, kai ham Kporin komo, ponaro kehtopo kom ha. Kpoko so nîîkai. Kutunarî komo kwaka kmasmacho n̂iir̂akn̂e ham kica. Ero wara kwaihkexe so kicicme kexirî ke so Noro poko, kexe.

15 Cerepore na tatu amn̂e, tîtketken̂e cma re. Enîhra rma tko taxe kerepotacho komo. Kupun komo yehcemacho ponaro cma re tîxatken̂e. Kerahtîmtopo komo makî tko kepor̂axe so okwe.

16 Moroto mak naxe kwaparî komo Taan rowon po. En̂exa n̂esencesî iyoh komo kawaru kîîrî hehehehe kacho. Ero wa kacho n̂encetken̂e mak ahnoro on roowo pono komo. Ero ke tatanaxe mak okwe cerahtîmrî ke so. Krowonthîrî yermomn̂e wara mohce kopi, iipono pen yermomn̂e wara marha. Ewto mko yermomn̂e wara naxe okwe, iipono pen komo yermomn̂e wara marha okwe, kexe tantono komo amn̂e. Ero wa kexe, kesî Kporin komo.

17 On wara marha kesî Kporin komo awya so, Okoyi tak wen̂epesî acheka so oko, cerewre xa keskan̂e oko. Esewkucanmekîra ro mak nasî noro waano poko. Aweskexe so tak oko, kesî Kporin komo.

18 On wara marha wîîkes ow hara, Ahwora ro mak was okwe. Oyahworen̂e xe ro mak was okwe.

19 On wara nîîke oyanan komo yemsîrî. Meyeno po cexitaw tak amn̂e on wara nîîke, Ahto tak nai Kporin komo, Siaw po exihra tak ma nai okwe? Iitono komo kayaritomon exihra ro mak ma nai okwe? kexe. On wara kesî Kporin kom hara, Ahce kacho orwonmekyatken̂e n̂examro ciixaputho poko cexirî ke so? Ponaro anarî yana komo yehtopo ponaro cexirî ke so orwonmekyatken̂e okwe, kesî Noro.

20 Oroto tak n̂enahce mararî pono yeperîrî yenmetopo. Kaamo me exihra tak nas okwe. Wara rma kicicitho yai towso exihra rma taxe okwe.

21 On wara marha kesî Kporin komo, Oyanan komo yemsîrî n̂erewasî ro mak oko. Oropotarî marha n̂erewas oko n̂examro pînîn yaw. Kîwracesî, keserepokesî ro mak poko so.

22 Keper̂an yehci exihra ma nai Xireace po? Iito exihra ro mak ma nai kehceman̂e okwe? Exitaw ahce kacho oyanan yemsîrî nai tamotosom wara roro, ekariton me ro mak okwe? kesî. Ero wara kesî Kporin komo.