1-2 Ero yinhîrî tak Kporin komo mtapotarî n̂encekn̂e xa hara Xeremias. On wara kekn̂e yîwya, Ai, Xeremias, Kporin komo mîn yaka etoko. Iito tak ececetoko metataw rma. Metata yaro n̂ewomyaxe mer̂pono pîn komo Xuta komo. Aporin komo poko ahwotaxi mokyaxe. N̂examro ya ekatîmko omtapotarî. On wara kasko yîwya so.

3 Ai, oyakno komo, Xuta komo amyamro. Awakro so tî nîmtapowa Kporin komo, kantoman̂e ro komo. Ponaro Ixaw Yana komo yehtopo Mîkî kesî awya so on wara, Kicicme awehtoponhîrî komo tak ahsîpînkacoko. Kicicitho pokohra tak ehcoko. Ero wara awexitaw so tak on pono ro me kiir̂axe so.

4 On wara kacho mencexe, Onî Kporin komo mîn okre, Kporin komo mînî tan okre, Kporin komo mîn xa tan, kacho mencexe. Ero wa kacho ponarora ro mak tak ehcoko. Cemaro mak mîn kica ero wa kacho.

5 Kicicme awehtoponhîrî komo ahsîpînkatîkacoko ahnoro, kicicitho poko awehtoponhîrî komo pokohra ro mak tak ehcoko. Takîhso marha en̂ekano ciicoko etpoko exitaw so etmîtwono komo.

6 Acheka so mohxapu komo emetanmekîra tak ehcoko, yîmîhnî komo marha, iin̂o waixapu komo marha, ero warai komo emetanmekîra tak ehcoko. Kicicme exihnî komo marha waihkara tak ehcoko. Ponaro anarî yana komo yehtopo ponarora ro mak ehcoko. Noro yipu komo ponaro awexitaw so metwîrîmexe okwe.

7 Ero wara awehtoponhîrî komo yahsîpînketaw awya so on pono ro me rma kiir̂axe so okre. On wîmyakn̂e aporin pen komo ya roowo, eroromerono me wîmyakn̂e, ero pono me kiir̂axe so.

8 Cemaro ponaro makî tko maxe kica, awakîren̂e pîn komo ponaro okwe.

9 On wara marha maxe kica, apoyino komo yemyawno poko men̂epanaxe, waihkano marha miir̂axe, apici pîn komo poko maxe, yaarono wara mîmtapowaxe Kaan yetacirî me rma, tohnaw tko ero wara mîîkexe kica. Baaw tawakeretopo makn̂iyaxe kotoporem. Ponaro anarî yana komo yehtopo poko maxe, anîhtînorî pîn komo poko.

10 Ero wara ehxapu rma mîmokyaxe ohyaka, omîn yaka, oyosotî me osohtoxapu yaka. On wara mîîkexe tan, Kaan xa nasî kukurunpen̂e me okre. Ero ke ero yipu poko rma taxe, kicicitho poko ha, mîîkexe.

11 Oyosotî me osohtoxapu men tan on mîîmo. Ahce wa tak on meen̂atu oroto, cen̂epan̂em yeken me mak katî nai awya so? Awehtopo komo rma tko ween̂asî, kesî Kporin komo.

12 Siro pona tko ka etocoko. Pahxa ero wiir̂akn̂e oyosotî yeken me. Erotho rma tko wîwîrîmekn̂e ro mak kicicme exirî ke so oyanan komo, Ixaw Yana kom ha. Entatko xe tîwîrîmaxi exirî.

13 Ero ke on wara wîîkes awya so, kicicme ehxapu komo amyamro mîn hak poko ehxapu ha. Ero poko exihra ro mak ehcoko, wîîkekn̂e rma re awya so. Pahxaxaro rma kawomyakn̂e awakro so omtapotachome. Omtapotarî yentara ro makî tko mîxatken̂e okwe. Kan̂ikyatken̂e so rma ha re, oyeikura ro mak mîxatken̂e kica.

14 Ero ke ero wara xa marha on wîwîrîmes hara omîntho, oyosotî me osohtoxapunhîrî, ponaro awehtopo kom ha. Sirotho wîwîrîmekn̂e ero wa xa marha on mîîmotho wîwîrîmes hara. Roowo marha wîwîrîmesî, pahxa wîmyakn̂e awya so aporin pen komo ya marha erotho wîwîrîmesî.

15 Amyamro hara, miya tak ken̂epexe so on̂enîrî mera tak awehtome so. Kokon̂oro apoyino pen komo wen̂epekn̂e, Eprain pen komo ahnoro, ero wara xa marha ken̂epexe so amyamro pen hara okwe.

16 Ero ke on wara wîîkes awya Xeremias, moxam poko yîmtapotara ro mak tak esko oyakro. Moxamu cma re mukurunpes Apa okwe, kahra ro mak esko owya. Moxam pînîn yaw cma re mas okwe, kahra marha esko poko so. Awentara ro mak wasî ero wa ketaw owya.

17 Kicicme ro mak naxe Xuta komo yewton po so. Xerusaren po marha kicicme naxe tarara yesamarî yaw so. Enîhra katî mai ero wa exirî komo?

18 Wehto kamerî n̂enmekyaxe rikomo komo. Wehto n̂iriyaxe yîîm komo. Puruma n̂esmexe wooxam komo, ero nayaxe kah yawno komo kayaritomon ya tîmsom me ha tî kica, wooxam ya tîmsom me. Wooku marha nukmamyaxe ponaro anarî yana komo yehtopo ya tîmsom me. Ero wara orwonmekyaxe kica.

19 On wara marha kesî Kporin komo, Ow makî katî orwonmekyatu awya? N̂etwîrîmexe xa matko n̂examro rma. Nîhyapamyaxe men amn̂e cehtoponhîrî komo pona rma, kesî.

20 Ero ke on wara kes hara Kporin komo Kaan, Amn̂e kîrwonasî ro mak tantono pen komo poko okwe. Tooto pen komo poko, okno pen komo poko, comota poko meero, mararî pono mko poko marha. Ero yipu pen komo wakn̂iyasî tîrwon̂e. Wehto wara nasî orwon, eihkan wara ro mak nas oco, kesî.

21 On wara marha kesî Kporin komo, kantoman̂e ro. Ponara Ixaw Yana komo yehtopo Mîk kesî. Iina re tak ciicoko awoh komo takn̂itîkaxmu. Ahce na anîmrî komo yakro rma ciicoko. Awotî komo marha tonocoko.

22 Pahxa aporin pen komo wekyakn̂e Exitu poi. Ero yimaw owya tîmsom poko n̂examro yantomara wîxakn̂e, takn̂itîkaxmu poko, ahce na tîmsom poko yîmtapotara wîxakn̂e akro so.

23 On wara xa matko wîîkekn̂e yîwya so, Omtapotarî men ewetîcoko. Ero wa awexitaw so ponaro awehtopo komo me wasî. Oyanan me tak maxe amyamro hara. Owya apanatanmetopo komo yaw roro mak ehcoko esemetamekîn me roro awehtome so, wîîkekn̂e xa yîwya so.

24 Oyewetîra ro makî tko xatken̂e okwe. Omtapotarî ponarora ro mak xatken̂e. Tanme ro so mak nîhtînoyatken̂e poko cehtopo komo. Kicicitho me xakn̂e yîropotarî komo, kanwekn̂e ro me kica. Ero ke tîwya so yîhtînotopo komo yaw roro mak xatken̂e okwe. Ceepatai ro so tohra xatken̂e, n̂emaxixicetken̂e mak okwe.

25 Pahxa rma aporin pen komo mokyataw Exitu poi oyanton komo wen̂epekn̂e yîhyaka so weronoman̂e kom ha. Pahxaxaro so rma kawomyakn̂e en̂epetome so. Ero yimawnonhîrî n̂ixa ro rma wen̂epesî enmar̂atîxera.

26 Wara rma oyewetîra ro makî tko xatken̂e n̂examro pen okwe. Tîpîmîyewaxke mak xatken̂e, oyanwekn̂e me okwe. Kicicme ro mak tak xatken̂e okwe tporin pen komo yopo. Ero wara xatken̂e okwe.

27 Ero ke ero wa omtapotacho ekatîmko yîwya so. Awewetîra rma tko naxe okwe. Ai, kîmtapowasî cma re awakro so, mîîkes ha re yîwya so. Aweikura ro mak naxe okwe.

28 Ero ke on wara kasko yîwya so, Kporin komo mtapotarî yewetîn̂e pîn amyamro ham, ponaro awehtopo komo mtapotarî yewetîn̂e pîn. Atwermacho yentan̂e pîn amyamro ham. Yaarononhîrî tak n̂ehcamnoi ham okwe amtapotachonhîrî komo. Yaaro yîmtapotan me mak tak maxe kica, kasko yîwya so.

29 Ekanamurinkakî tak, ahpocithîri kr̂a ar̂makî. Îh pona tak etoko kawno pona, comota ken̂arî pîn pona. Iito tak awratakî apoyino komo pînîn yaw. Moxam pen tak wahsîpînkekn̂e Ow Aporin kom okwe. Poko orwonîmtopo mak moxam okwe.

30 Kicicme ro mak naxe Xuta komo owero ro, kesî Kporin komo. Kicicitho mko ro mak n̂iir̂axe omîn yaka rma, oyosotî yeken me nasî ero yaka rma. Ero wara omîn nîwîrîmexe okwe.

31 Îh po so n̂iir̂atken̂e tîmsom yakn̂itopo kica. Topece po n̂iir̂atken̂e Inon Mumutho woskaran po. Ero mko po tak tumumuthîrî pen komo ciki nakn̂iyatken̂e okwe, cemsîthîrî pen komo ciki marha okwe. Ero wara amxîkrî komo akn̂icoko, kahra ro mak wîxakn̂e yîwya so. Noro yipu komo yakn̂itopo poko esehtînopîra ro mak wîxakn̂e.

32 Ero ke on wara tak n̂esosocesî amn̂e Topece, kachonho, Inon Mumutho woskaran ha, Waihkaxapu Yocho woskaran me tak n̂esosocesî. Tooto pen yokoputho nahruyaxe amn̂e Topece po roowo pen tawronohkatîkaxi ro mak okwe.

33 N̂examro korîntho nasî kwacinama nahrî me, kamara warai komo nahrî me marha. Ero yahn̂e yen̂epen̂e komo exihra ro mak nasî.

34 Ero yimaw anarme wiir̂asî Xuta komo yewtontho mko. Anarme marha wiir̂asî Xerusaren yesamatho mko. Cewresom komo yewrecho esentara ro mak tak nasî iipo so, tahwotaxmu komo yahwotacho marha esentara. Cipitaxmu komo mtapotarî esentara nasî, ciin̂ontaxmu komo mtapotarî marha esentara. Ero wara n̂examro yewtontho wiir̂asî. Pohra tak nasî on roowo ero yimaw, kesî. Ero wara kesî Kporin komo.