Ai, Benxamin yepamtho komo amyamro, On wara wîîkes awya so, emahcicoko Xerusaren poi. Tuu kacoko Tekoa pono komo n̂entarî me. Bece Akeren po yîsînpecoko awemacitopo komo kuknon me. Waapa komo men mokyaxe nohce n̂ixa. Awîrîman̂e komo xa mîkyam kopi.

2 Siaw yemsîrî nasî wooxam wara, cenporem wara, tupuncukmano wara.

3 Noro yipu yaka rma tak mokyaxe oper̂a yenîn̂e warai komo. Tîmîn komo n̂iir̂axe noro mamhoko wahkototome. Toh komo nînahmexe tîmîn mîtwono ke cuupu ke.

4 On wara kexe n̂examro Xerusaren pono komo poko, Iitono komo waparî me kaikatko. Awuhre komo ahsîcoko. Awomcoko tak ha. Kamarakataw rma kaikatko n̂examro pen yar̂maxi. Kokmamyasî rma tko yohno. Kaw n̂ehtîkes ekatî mko kokmamporo exirî ke.

5 Kosope rma kaikatko n̂examro pen yar̂maxi. N̂examro kayaritomon mîntho yakn̂iso kaikatko, kexe, kesî Kporin komo.

6 On wara marha kesî Kporin komo, kantoman̂e ro ha, Weewe amacoko, Xerusaren wacan pore akainîmtopo komo akîhtocoko ehyu mko. Tawronohkatîkaxi nasî ewto emetanmekno ritopo ke. Ero ke emetanmexapu pen komo epancoko.

7 Tuuna n̂epatakesî tuuna pîtho yai ero wa xa marha kicicme iitono komo yehtopo n̂epatakesî kica. Waihkano ritopo n̂esencesî iito ewto po, yîwîrîmano ritopo marha. Ceper̂ai n̂examro yehtopo ween̂asî roro, tamotosom me ehtopo kom ha.

8 Apanatacoko men amyamro Xerusaren pono komo. Panahra rma awexitaw so ahyai so men ketowyas okwe. Arowonthîrî komo tak wiir̂asî pohnî me ro mak okwe, kesî Kporin komo.

9 On wara marha kesî Kporin komo, kantoman̂e ro komo, Amn̂e Ixaw Yana komo yakwenho tak naxe uupa yatî wara, eperkaxapu wara. Eperîrî pohcaxe tînatkem komo etîmtoxapu, n̂etapoyankexe ero wece potutîkachome xa tak. Ero wara Ixaw Yana pen komo yakwenho naatîkexe waapa kom okwe, kesî. Ero wara kesî Kporin komo.

10 On wara wîîkes ow hara, Onok yakro ma re kîmtapowa okwe, onoke ha re weronome? Onoke ha re omtapotarî n̂ence okwe? Wapihra mak nai ham okwe n̂examro panarî. Ero ke thakwa oyentara naxe. Ceitopo wara n̂encexe Kporin komo mtapotarî. Centaporera ro mak n̂encexe okwe.

11 Copoyi ro makî tko nas oropotarî Kporin komo rwon ke. Ero ke tîtken̂e mak exihra thakwa wasî. Wooku yukmamn̂e wara wasî rikomo komo poko oko, katpanawno komo poko. Kar̂pamxan komo poko marha yukmamn̂e wara wasî cesenmesom komo poko rma. Waapa mokuche kîrkomo pen nahsîyaxe, yihcinhîrî pen komo marha, poritomotho pen komo meero okwe, mer̂pora cimn̂ipu ewrutoponhîrî ehxapu pen komo.

12 Yîmînthîrî komo tak nahsîyaxe anarî komo, mararînthîrî komo marha, yihcinhîrî komo meero okwe. Ketapoyankesî orowon pono komo yîwîrîmachome, kesî Kporin komo.

13 On wara naxe oyanan komo, cemyawno komo yepamnotopo ponaro mak naxe kica. Ero wara naxe ahnoro, emyawnomnî komo, cemyawnoyem komo marha. Ahnoro naxe cesemîknosom me kica. Ero wa naxe n̂examro weronoman̂e komo, tîmsom pokono komo marha okwe. Cesemîknosom me mak naxe ahnoro okwe.

14 Erekî imo ken̂arî wara naxe oyanan komo. Ero yipu yehceman̂e wara cma re naxe weronoman̂e komo, tîmsom pokono komo marha. Wara kyam makî tko ehcemano n̂iir̂axe okwe. Cerepore cehcerî, cerepore cehcerî ha, kexe, erepotacho komo mera exitaw thakwa okwe.

15 Ahce wa xatken̂e noro yipu komo, kicicitho poko ehxapunhîrî komo, nîhyapamyatken̂e katî? Pîra, yîhyapamra ro mak xatken̂e okwe. Camkî mak naxe cewcutacho komo poko. Ero ke twaihsom komo yakro rma n̂examro pen meero waihyaxe okwe. Epantopo me exitaw tak owya n̂examro pen meero war̂mesî. Ero wara men naxe okwe, kesî Kporin komo.

16 On wara marha kesî Noro awya so, Esama yetakpacho to ececetocoko. En̂exa esama encoko. Iitono komo ya marha kacoko, ahto nai esama pahxantho? Ahto nai esama kir̂wan, kacoko yîwya so. Ero yipu yîhtînopuche awya so ero yipu yaw tak etocoko. Ero yipu yaw awcetaw so cerepore tak maxe, kesî Kporin komo. On wara tko n̂eyukyatken̂e omtaka, Pîra, ero yipu yaw tohra nas amna, ketken̂e owya okwe.

17 Aweronoman̂e komo cma re wiire awewton komo po, Tuu kacho men entacoko amn̂e, wîîkekn̂e awya so. On wara tko ketken̂e owya, Pîra, tuu kacho yentara ro mak nas amna, mîîketken̂e mak kica.

18 Ero ke mîk hak rowon pono komo amyamro, on wara wîîkesî awya so hara, omtapotarî men entacoko. Oyanan komo yehtopo marha encoko amyamro.

19 Roowo pono komo amyamro ahnoro, awya so wîîkesî, oyanan komo yîwîrîmacho men wekpesî. Kicicitho me ro mak n̂esehtînoyatken̂e ahce wa na ciino ritopo poko. Ero wa esehtînotoponhîrî komo yeperîrî rma wekpesî n̂examro waparî me rma. Ero yipu wekpesî omtapotarî yentara ro mak exirî ke so. Poxumra owya tpanatanmetopo komo n̂encetken̂e, nanwekyatken̂e mak kica.

20 Tpoxwe ma re nai owya kotoporem Saba poi ehxapu? Tpoxwem okre, wîîke ma re paranci warai yakn̂iyataw awya so, mooxenonhîrî yakn̂iyataw ha? Kir̂wan̂he exihra ro mak nas owya awoh komo puntho yakn̂itopo, takn̂itîkaxmu me akn̂itopo ha. Poxumra mak nas owya anmîthîrî kom ha, kesî Kporin komo.

21 Ero ke on wara marha kesî Kporin komo awya so, Moxam yîhrokacho wiir̂asî esamarî komo yaka so. Ero yipu pona n̂ehrokexe, yîîm komo, yumumuru komo yakro rma. Mer̂pono pîn komo waihyaxe, etmîtwononhîrî pen komo, etîxatînhîrî pen kom ha, kesî Kporin komo.

22 On wara marha kesî Noro awya so, Enko xe, waapa pen komo kopi. Anarî yana komo mokyaxe nohce n̂ixa. Roowo mapitawno komo mîkyam, oona tmoku xe tak naxe kopi.

23 Tîkrapai so mokyaxe, tîrahnui so marha oko. Kakpotun̂e komo ro mak n̂examro, kîpînîn yawno pîn kom ha. Cewtun̂em wara mak mokyaxe kopi tuuna imo wara cewcokocokon̂em wara. Kawaru mkaw so mokyaxe. Cepanatoso marha mokyaxe ar̂mano riso tmokrî ke so. Awar̂maxi mokyaxe okwe, Siaw yemsîtho pen amoro, kesî Kporin komo awya so.

24 On wara kexe Xuta yepamtho kom hara, Waapa yekaci amna n̂encekn̂e kopi. Ero ke kar̂pera n̂ehtîkes amna yamorî. Nahwokesî ro mak amna. N̂erewasî ro mak amna wooxam wara rma, cewrusom wara.

25 Tohra men ehcoko oyakno komo, mararî pona so. Esama yaw so marha tohra ehcoko. Iito so men naxe kwaparî komo, tkaciparai so naxe oko. Mînto mînto wara so naxe eraspetono komo kopi, kexe Xuta komo.

26 On wara kesî Kporin kom hara, Ai, oyanan yemsîrî, on wara wîîkes awya so, kumixitho tak amrucoko aponon komo me. Ehmamacoko wermonho chere. Awratacoko marha cerewre ro mak okwe. Amrethîrî pen pînîn yawno wara rma awratacoko, cewn̂anînhîrî pen pînîn yawno wara. Ponan̂e rma awaparî komo mokyaxe okwe.

27 Ai, Xeremias, on warai me kiire, kuripara yukukman̂e me kiire. Oyanan komo naxe kuripara ken̂arî warai me, toopu warai me marha na. N̂examro yehtopo enko, yukukmakî kir̂wan̂he na natu, kachome.

28 Kanwekn̂e ro komo mak mîkyam okwe. Kir̂wan komo poko tîmtapotaxmu marha mîkyam, cemaronwaxe mak poko so. Bronse warai mak mîkyam, pehu warai marha kica. Kicicitho pokono komo mîkyam ahnoro.

29 Kar̂pe xa puu puu kesî wehto yaipotopo. Xumbu n̂etowyasî wehto ke. Tohnaw tko kuripara nukuyasî akir̂waman̂e. Ero wa xa marha naxe oyanan kom hara, iito rma naxe kicicitho komo okwe yîchew so rma.

30 Prata me rma re n̂examro n̂etahcaxe tooto komo, poxumnîtho me makî tko n̂etahcaxe. Ero wara n̂etahcaxe Kporin komo ya ahsîpînkarî komo ke okwe. Ero wara naxe okwe, kesî Kporin komo.