On wara marha kesî Kporin komo awya so, Xerusaren pore etaricoko tarara yesamarî yaw so. Takîhsomu ika epocoko miya so, yaarono me cehsom ha. Noro yipu exitaw, cewn̂e n̂hema, on pono komo yehtoponho tak wîhcamnoyasî, ketîrwoxinkesî tak moxam poko noro yanme.

2 On wara rma re kexe ahce na yekatîmyataw, Yaaro xa tan wîîkesî. Waipîn me nasî Kporin komo, kacho wara rma nas omtapotarî yaaro xa, kexe. Tohnawno yekatîmyataw rma tko ero wara kexe kica.

3 On wara nasî awewru Apa, yaarono yeporîrî poko nasî. N̂examro penî tko metapekn̂e oko. Aka aka, kahra rma tko xatken̂e okwe. N̂examro mar̂mekn̂e ro mak. Wara rma awanwekyatken̂e tkko okwe. Cewru komo mak ceipamnoyatken̂e okwe, toopu yopo ceipamnoyatken̂e okwe. Ahyaka mokuhra ro mak xatken̂e okwe.

4 Ero yinhîrî on wara wîîkekn̂e, Emyawnomnî komo mak ero wara naxe Kaan poko. Camkîno komo mak mîkyam okwe. Kaan yehtopo yîhtînon̂e pîn komo mîkyam. Cesepansom men Mîk Kaan, kahra naxe okwe.

5 Antomano rin̂e komo yaka xa kîwcesî. Noro yipu komo yakro kîmtapowasî hara. Kporin komo yehtopo ponarono tko na mîkyam. Cesepansom men Mîk Kaan, kan̂e komo na mîkyam reha, wîîkekn̂e. Pîra okwe, kicicme xa tak naxe n̂examro. Tîpîmtawnonhîrî yaxikwon̂e wara ro mak naxe noro yipu komo okwe. Cimicithîrî warai yawoton̂e wara marha naxe okwe.

6 Ero ke reaw tak mokyasî n̂examro waparî, comota chei mokyasî. N̂examro pen tak waihkes okwe. Robu mokyasî axawa imo poi. N̂examro pen tak waihkesî noro yipu. Reopahtu marha nasî n̂examro yewton potaw so ewto poi cepatakaxmu komo yentome. Ewto poi epatakaxapu komo narixkesî ro mak oko. Ero wa waihyaxe mer̂pora ro mak exirî ke kicicme ehtoponhîrî komo. N̂epamtîketken̂e tak opona enîhkan̂e komo okwe.

7 Ahce wa thakwa re ero wa awehtoponhîrî komo wîhcamnoya? Ohyai n̂etowyatken̂e amxîkrî komo okwe. Yaarono wara nîmtapowatken̂e kaan warai yetacirî me, kaan pîn yetacirî me ha tko. Pahxa n̂he n̂examro wînahmekn̂e tmaxmitaxi ro okre. Ero yimaw rma tko cipici yairono me ro mak tak xatken̂e kica. Wooxam komo mîn yaka n̂esenmekyatken̂e kîrkomo mer̂pora ro mak, kîîrî pohkan̂e ro komo mîn yaka kica.

8 Kawaru kîîrî wara mak naxe kir̂wan̂he yînahmaxapu wara. Hehehehe, kan̂e wara ro mak xatken̂e tîmîtwono pici poko kica.

9 Ero wara ehtoponhîrî komo poyero n̂examro panarera ma re wai? Esepanpîra ma re wai noro yipu komo poko? Kesepanîyasî men wa ha, kesî Korin komo.

10 On wara marha kesî Noro, N̂examro natîrî chere etoko. Yînatîthîrî komo kr̂a tak amakî. Amatîkara tko esko. Peremkakî mak. Kporin komo yanan pînî rma tko mîkyam okwe.

11 Oyemîknotîketken̂e ro mak n̂examro kica. Ero wara xatken̂e Ixaw Yana komo, Xuta komo marha, kesî. Ero wara kesî Kporin komo.

12 On wara marha kesî Noro, On wara marha n̂examro xatken̂e, Kporin komo poko rma cemaronwatken̂e kica. On wara ketken̂e, Ahce wa na kiin̂e pînî ro mak Mîk Kaan. Esemetanmekîra ro mak mexe taxe amn̂e. Waapa komo mokuhra naxe, rooma pokohra marha taxe, kexe tohnaw ro mak okwe.

13 Ocowo me mak nasî n̂examro weronoman̂e komo mtapotarî. Kaanî mtapotarî exihra ro mak nasî yîropotaw so. Tpoyino komo yîwîrîmacho yekatîmn̂e me naxe. Ero ke ero wara rma n̂ehcowpe n̂examro hara, kesî Kporin komo.

14 Ero ke on wara marha kesî Kporin komo Kaan, kantoman̂e ha, On wara wîîkes awya so, Ero wara amtapotarî ke so on wara wiir̂asî omtapotachonho amtawno komo rma, wehto warai me rma wiir̂as iito. Wehto kamerî me tak moxam wiir̂as hara apoyino pen komo. N̂examro yakn̂in̂e me tak nasî omtapotarî oco.

15 Ai, Ixaw Yana komo amyamro, on wara kesî Kporin komo awya so, meyeno pono komo wekyas awaparî komo. Karitî komo men mîkyam. Pahxa ro mak n̂examro porin pen komo xatken̂e. Camkî ro mak maxe yîmtapotarî komo poko. N̂examro yentara ro mak maxe yîmtapowataw so.

16 On wara nasî n̂examro yemehnu, tooto pen yocho wara nas okwe ahrunkaxapu wara. Karitî komo mîkyam kopi.

17 Amn̂e amararîn komo yeperîrî nahtîkexe. Awru komo nohtîkexe. Amumuru pen komo yermomn̂e wara naxe, awemsîrî pen komo yermomn̂e wara marha. Awokuthîrî pen komo marha waihkexe ahnoro totî komo me, paaka pen komo, oper̂a pen komo marha. Anatîrî komo yeperîrî marha nahtîkexe, uupa yeperîrî, piiku yeperîrî marha. Awewton pono pen komo marha waihkexe kacipara imo ke, sowtatu ke tukuruyem pono pen komo rma. Kukurun komo mîkyam okre, mîîkexe sowtatu komo poko, n̂examro penî rma waihkexe okwe.

18 On wara tko kesî Kporin komo awya so, Ero yimaw tko awaikatîkara so wasî, kesî Kporin komo.

19 Pahxaro tak on wara kexe apoyino komo awya so, Ahce poyero on wara kemetanmekyatu so Kporin komo, ponaro kehtopo komo? kexe. On wara n̂examro meyukyaxe, On wara kesî Kporin komo, Ohyai metowyatken̂e okwe. Ponaro anarî yana komo yehtopo poko tak mîxatken̂e kica. Ero ke anarî yana komo yanton me tak maxe arowon pîn komo po hara, kasko yîwya so, mîîkexe.

20-21 On wara kasko Xako pen yepamtho ya, Xuta komo ya marha, Ai, camkîno komo amyamro, omtapotarî men entacoko, yuhnari yîhtînon̂e pîn amyamro okwe. Cewkemu rma re amyamro. Enîn̂e pîn me rma tko maxe okwe. Tpanakemu rma re amyamro. Entan̂e pîn me marha maxe okwe.

22 Oponarora ma mat ke okwe? kesî Kporin komo. Tatamra ma re mat ke ahyaka so omokuche? Tuuna imo wahkotopo ciin̂enho Ow. Axawa wiir̂akn̂e ero wahkototopo me. Eroromerono me ero warai me wiir̂akn̂e. Ero watohra thakwa nasî tuuna imo. N̂esewcokocokomesî rma re, axawa yoponkara ro makî tko nasî. N̂ewtunasî rma re yamarataka, axawa pore tohra ro mak nasî.

23 Ero warahra tko naxe moxam, kanwekn̂e me ro mak nasî yîropotarî komo, twerîhra ro mak kanwekn̂e me ha. Ohyai n̂etowyatken̂e, miya ro mak cetken̂e okwe.

24 On wara kahra naxe tîropotaw so, Tuuna yekmexpon̂e Mîk Kporin komo Kaan. Yihcirî me tmohsom n̂ekmexpesî, okomn̂i tmohsom marha n̂ekmexpesî. Emapona roro kir̂wan̂he n̂iir̂asî kaapu knatîrî komo yeperîrî yenmetopo me exitaw tak. Ero ke Noro ponaro xa tak cehcerî, ponaro kehtopo komo ponaro ha, kahra naxe okwe.

25 Kanwekn̂e me awehtoponhîrî komo xa nasî tuuna porohkan̂e me okwe. Kir̂wanî mko yamenmekn̂e me nasî kicicme awehtoponîrî komo mak.

26 Kicicitho ke tîchewnoi naxe oyanan komo kica. Kwapanton̂e komo mîkyam wooto yemcinon̂e wara. Tooto pen komo tko n̂emcinoyaxe n̂examro okwe.

27 Anarimaw mer̂pora na nai torowo ero re yaw kayora yaw, tawronohkatîkaxi na nai. Ero wara xa marha nasî n̂examro mîn, tawronohkatîkaxi nasî emîknono ritopo ke. Ero yipu ke rma tko re cemyawnoyem me so n̂ehtîketken̂e, tupurantayem me so marha.

28 Nupurukwatken̂e mak okwe n̂examro tmemehse tak nasî yupun komo. Kicicme xa naxe kicicitho komo yopo kica. Yîmîhnî komo yen̂ekan̂e komo yopo yîmtapotara ro mak naxe okwe. Cesemetanmesom komo yemetanmekî xatî komo yen̂ekara marha naxe okwe.

29 Ero wara ehtopo komo poyero noro yipu komo yemetanmekîra ma re wai awya so? Esepanpîra ma re wai noro yipu komo poko? kesî Kporin komo.

30-31 Keserepokesî ro mak orowon pono komo poko. Okwe ro mak okwe, wîîkesî n̂examro yehtopo poko. Cemaro mak n̂ekatîmyaxe weronoman̂e komo. Tanme ro so marha tpoyino komo nantomexe owya tîmsom pokono ro kom hara kica yukurumîkno me cexirî ke so. Tpoxwe rma tko nasî ero wa ehtopo komo oyanan komo ya. Awehtopo komo yenatîtopo yimaw tko ahce wa tak mat okwe? wîîkesî. Ero wa wîîkes Ow Aporin komo awya so.