Ero yinhîrî karita mewrekn̂e Xeremias, weronomano rin̂e. Mewreche Xerusaren poi narpekn̂e Babiron̂a pona, iina aaxapu komo yaka. Xuta komo yaka narpekn̂e, poritomo komo yaka iina aaxapu komo yaka. Tîmsom pokono komo yaka marha narpekn̂e, weronomano rin̂e komo yaka marha. Ahnoro tpoyino komo yaka narpekn̂e, Nabukotonoso narîtho komo yaka. Xerusaren poi naar̂akn̂e Babiron̂a pona n̂examro yaka narpekn̂e.

2 Ero mewrekn̂e Xerusaren pononho pen komo yarîche. Xekon̂ias pen naar̂akn̂e, kayaritomonhîrî pen mîk noro, yîson pen, kayaritomo yakro cesentaxmunhîrî pen komo, Xerusaren pono yantoman̂enho pen komo, Xuta yantoman̂enho pen komo, ahce na yakîhton̂enho pen komo, ahce na ciin̂enho pen komo pehu ciin̂e kom ha. Ero warai pen komo yarîche karita mewrekn̂e Xeremias.

3 Karita mewreche ero narpekn̂e Erasa ya, Sapan mumuru ya, Xemarias ya marha, Iwkias mumuru ya. Setekias n̂en̂epetho tî mîkyam xatken̂e, Xuta yepamtho kayaritomon n̂en̂epetho. Nabukotonoso mtapotarî yentaxi tî n̂examro n̂en̂epekn̂e, n̂examro ya tîkaritan narpekn̂e Xeremias.

4 On wara kacho mîn xakn̂e Xeremias nmewretho, Ai oyakno komo, on wara kesî Kporin komo awya so, kantoman̂e ro Mîk kesî, ponaro Ixaw Yana komo yehtopo ha. Xerusaren poi aaxapu komo Babiron̂a pona amyamro, awya so kesî on wara,

5 Amîn komo ciicoko iito, ciriche ero yaw ehcoko. Amararîn komo marha ciicoko. Ero pono yeperîrî ahcoko.

6 Apici komo ahsîcoko iito rma. Amxîtacoko marha amumuru komo me, awemsîrî komo me marha. Amumuru komo pici marha aponcoko. Awemsîrî komo tîmcoko iin̂o komo ya. Ero wa n̂etahsîcowpe amumuru komo, awemsîrî komo marha n̂examro makîrha yîmxîtachome hara. Ero wara ehcoko asakman me tak exihra awehtome so, awepamtome so xa matko.

7 Iitono komo akronomacoko ehn̂an me ehtome so, ewton komo pona karpetken̂e so n̂examro akronomacoko. Kporin komo yakro marha amtapotacoko iitono komo yakronomacho poko. Ahwokan me exitaw iitono komo ahwokan xa marha maxe amyamro hara okre.

8 On wara kesî Kporin komo, kantoman̂e ro, ponaro Ixaw Yana komo yehtopo Mîk kesî, Achew so naxe aweronoman̂e komo, worokyam ponarono komo marha. Esemîknopora ro mak men ehcoko yîwya so. Yîmtapotarî komo ponarora ro mak ehcoko kica. Twosotîmtoponhîrî na n̂ekatîmyatu awya so awanme so mak enxapu kica. Ero yipu entara ro mak ehcoko.

9 Oyanmen wara n̂ekatîmyaxe awya so tohnaw ro mak kica. On̂en̂epetho pîn mîkyam, kesî Kporin komo.

10 On wara marha kesî Kporin komo awya so, 70 cimn̂ipu maxe iito Babiron̂a po. Ero wicakî cimn̂ipu yenatîche kakronomexe so hara. Omtapotachonho yaw roro rma kakronomexe so okre. Oona kekyaxe so hara.

11 Apoko so oyesehtînotopo rma wîhtînoyasî, kesî Kporin komo. Awakronomacho komo wîhtînoyasî cerepore awehtome so. Awîrîmacho pîn komo wîhtînoyas ha. On wara kan̂e me kiir̂axe so, Kir̂wan̂he ro mak tak kiir̂axe so Kaan amn̂e, kan̂e me tak kiir̂axe so okre.

12 Ero yimaw tak mîîcexe oyakro yîmtapotaxi. Awakronomacho komo poko mîmtapowaxe. Amtapotarî komo ponaro tak wasî.

13 Ow mepor̂axe ero yimaw. Ow tak meen̂axe. Yaaro xa mak oyepor̂ataw Ow meen̂axe.

14 Kesenpesî awya so, kesî Kporin komo. Oona kekyaxe so hara meye porohkaxapunhîrî. Oroto karpexe so on poi mîk hak yana cheka, mîk hak rowon pona. Iito porohkaxapu me ka maxe okwe. En̂exa so rma tko kekyaxe so oona hara okre. On poi karpetken̂e so, ero ke on pona kekyaxe so hara.

15 On wara tko mîîkexe, Kweronoman̂e komo rma Kporin komo n̂iir̂akn̂e tan kexitaw so Babiron̂a po, mîîkexe kica.

16 Ero wa karî ke awya so Kporin komo nîmtapowasî kayaritomo poko, Tapi retawno poko. Xerusaren po etîmtoxapu komo poko rma nîmtapowasî, awakno komo poko. Waapa narîtho pîn kom ha ka, n̂examro poko nîmtapowasî.

17 On wara kesî Aporin komo, awantoman̂e ro komo noro yipu komo poko, N̂examro pen cheka wen̂epesî kacipara ke cemyarkem komo iitono komo waparî me. N̂examro pen marha wînahkesî, eper̂a yaw marha n̂examro pen wiir̂asî. Piiku yeperîtho wara rma n̂examro pen wiir̂asî, mataxapu wara. Matatîkaxapu yapupra ro mak maxe kica, ero wara rma n̂examro wiir̂asî.

18 N̂examro pen poko ro kîwcesî kacipara imo ke cemyarke. Wînahkesî marha, eper̂a yawno me marha wîîr̂asî oko. Kayaritomo komo n̂emetanmekrî me n̂examro wiir̂asî, miyan komo n̂emetanmekrî me rma. N̂examro yîwîrîmacho kr̂a mokupe, kan̂e me wiir̂asî mîk hak rowon pono komo, eserepokacho komo me wiir̂asî, yîwîrîyakacho komo me marha, Kica ro mak, kacho me marha yîwya so. Ero wara n̂examro pen wiir̂asî mîk hak rowon pono komo ya, yîcheka so wen̂epesî n̂examro ya ha.

19 Ero wara n̂examro pen wiir̂asî omtapotarî ponarora ro mak exirî ke so okwe. Pahxaxaro so rma weronoman̂e komo wen̂epekn̂e yîhyaka so. Omtapotarî yentara tko xatken̂e okwe. Amyamro meero entara mîxatken̂e, kesî Kporin komo.

20 Ero ke omtapotarî men entacoko amyamro waapa narîtho komo. Xerusaren poi onarpotho amyamro Babiron̂a pona. Aporin komo xa Ow ha.

21 On wara kesî Kporin komo, awantoman̂e ro komo, ponaro Ixaw Yana komo yehtopo. Akabe poko nîmtapowasî, Koraias mumuru poko. Setekias poko marha nîmtapowasî, Maaseias mumuru poko ha. Cemaro mak n̂examro n̂ekatîmyaxe awya so oyanmen wara rma kica. N̂examro pen wahsîpesî Nabukotonoso ya, Babiron̂a pono komo kayaritomon ya. N̂examro pen tak waihkesî noro awero ro so rma.

22 N̂examro yosotîtho tak metahcaxe amn̂e yîwîrîmano ritopo yan̂ikyataw awya so. On wara mîîkexe, Kporin komo ya awiri xe wasî Setekias pen wara, Akabe pen wara marha. N̂examro pen nakn̂iyakn̂e Nabukotonoso oco, ero wara xa marha awiri xe wasî Kporin komo ya, mîîkexe. Ero wara mîîkexe amyamro Xuta rowon pononho komo, Babiron̂a pona aaxapu kom ha.

23 Ero wara Setekias komo wirpekn̂e kicicme ro mak exirî ke so Ixaw Yana komo chew rma okwe. Tîmîtwono komo pici poko naxe kica. Cemaro marha n̂ekatîmyaxe oyanmen wara rma kica. Ero wara ekatîmcoko, kahra ro mak wîxakn̂e yîwya so. N̂examro yehtoponho ween̂asî. Owero ro rma wa naxe, kesî Kporin komo, kekn̂e owya.

24-25 On wara marha kekn̂e Noro owya, Taa, on wara kasko Semaias ya, N̂eerama pono ya, Ai oyakno, on wara kesî Kporin komo, kantoman̂e ro, ponaro Ixaw Yana komo yehtopo Mîk kes awya, Akaritan mekpekn̂e Xerusaren pono komo ya, Sopon̂ias yaka mekpekn̂e, Maaseias mumuru yaka. Kaan yaka cewomsom mîk xakn̂e Sopon̂ias. Ahnoro Kaan ya tîmsom pokono komo yaka mekpekn̂e.

26 On wara kacho mekpekn̂e yîhyaka so, Oyakno komo, Kaan mîn yenîn̂e me awir̂atken̂e so Kporin komo Xoiata retawno me, Kaan yaka cewomsom rewtawno me ha. Ero warai me awir̂atken̂e so Kaan mîn yawno komo yenîn̂e me. Tîmtawaiwamsom komo tî natu iito, weronomano rin̂e me cesehtînosom komo. Noro yipu komo exitaw tahrupore nasî, kîhroyakîknotopo yaka cirpore nasî.

27 Ero ke ahce kacho Xeremias yeihra matu Anatoce pononho? Aweronoman̂e komo me n̂ecir̂asî tanmero mak kica. Awya so tî n̂ekatîmya.

28 Tîkaritan n̂ekpekn̂e noro amna yaka, Babiron̂a pono komo yaka. On wara kacho mewrekn̂e, Pahkî men maxe iito porohkaxapu me okwe. Ero ke amîn komo ciicoko, ciriche ero yaw so ehcoko. Amararîn komo marha ciicoko, ero pono yeperîrî ahcoko, kacho mewrekn̂e okwe Babiron̂a pono komo yaka, kacho mewrekn̂e okwe, kekn̂e Semaias karita yaka.

29 Ero yinhîrî noro karitan nîmtapotarekn̂e Sopon̂ias, Kaan yaka cewomsom. Xeremias n̂entarî me nîmtapotarekn̂e.

30-31 Ero yinhîrî on wara kekn̂e Kporin komo Xeremias ya, Ai, Xeremias, on wara kacho arpoko Babiron̂a pono komo yaka hara, iina porohkaxapu komo yaka, Oyakno komo, on wara kesî Kporin komo awya so, Semaias poko kesî N̂eerama pono poko, Omtapotarî tî n̂ekatîmyakn̂e noro awya so, Onantomatho pînî tko mîk ha. Cemaro ponaro mak awir̂atken̂e so kica.

32 Ero ke on wara kesî Kporin komo, Semaias pen poko kesepanîyasî, N̂eerama pono poko, noro yepamtho poko marha. Noro yanan komo tak waihtîkexe okwe. Noro yepamtho exihra naxe okwe moxam chewno me ehtome so. Oyanan komo yakronometaw amn̂e owya n̂examro yakronomacho yenîhra nas okwe. Ero wa noro pen wemetanmekyasî Kporin komo yanwetopo poko apanatanmekrî komo poyero kica, kesî. Ero wa kesî Kporin komo noro poko, Semaias poko.