On wara wîîkes awya so, Kporin komo poko ahwotacoko. Kah yaw awexitaw so iito rma Noro poko ahwotacoko. Îh po awexitaw so kawno po iito rma Noro poko ahwotacoko.

2 Ancu komo amyamro, ahnoro Noro nantomarî komo amyamro, Noro poko ahwotacoko.

3 Kaamo, nuun̂i, amyamro marha Noro poko ahwotacoko. Xir̂ko mko, tweikemu mko ciki, amyamro marha Noro poko ahwotacoko.

4 Kaapu komo yepoyino komo xa awya so marha wîîkesî, Noro poko ahwotacoko, wîîkesî. Tuuna, kaapu yepoyino, amoro marha Noro poko ahwotakî.

5 Ero warai komo nahwotacowpe Kporin komo yosotî poko. Ero warai komo yakîhton̂enho Mîk Kporin komo. Tîmtapotarî ke mak nakîhcekn̂e. Ero ke nahwotacowpe Noro yosotî poko.

6 Eroromerono me tî ero komo nakîhcekn̂e. Towîhnî me ro makî tî nîmtapowakn̂e akîhtotopo poko.

7 Xehxa roowo poi kacoko amyamro hara tuuna imo kwawno komo, porin kom ha. Weyun yawno komo amyamro ahnoro kacoko. Kporin komo poko ahwotacoko.

8 Pepe kacho, saraipa, n̂eepe, tuuna yewru, ocowo karitî, yîmtapotarî yewetîn̂e amyamro,

9 îîpî komo, matîwîn komo ahnoro, weewe yepu cepetaxmu, setru yepu ahnoro,

10 kamara komo, meeku komo, noro yipu komo ahnoro, paaka komo marha, sehrere me tîtosom komo, tarin̂em komo,

11 roowo pono komo kayaritomon komo, anarî yana komo ahnoro, antomano rin̂e komo, en̂ekano rin̂e komo, roowo poko hakno komo,

12 kar̂pamxan komo, emasî komo, poritomo komo, rikomo komo,

13 noro yipu komo ahnoro nahwotacowpe Kporin komo yosotî poko. Noro yosotî mak nasî kahwotacho komo me. Kir̂wanî ro me Noro yehtopo nasî roowo yepoyino me, kaapu yepoyino me marha.

14 Tîyanan komo karihton̂e Mîkî, mîk hak rowon pono komo yopono me ciin̂e ha. Noro poko nahwowaxe yînakir̂wamathîrî komo ahnoro, Ixaw Yana kom ha. Yîmîtwono komo xa mîkyam Ixaw Yana komo. Taa, on wara wîîkesî xa hara, Kporin komo poko ahwotacoko, wîîkesî. Ero wa mak wîîkes awya so.