On wara wîîkes awya so, Kporin komo poko ahwotacoko. Kir̂wan̂he xa nasî ponaro kehtopo poko kewanomacho komo, centapore nasî. Tpoxwe xa nasî, Kir̂wan̂he xa mai ham okre, kacho Noro poko.

2 On poko nasî Kporin komo, Xerusaren pono n̂iir̂as hara mîîmo mko. Ixaw Yana komo marha n̂enmekyasî miya so etakpaxapunhîrî komo.

3 Ahwokaxapunhîrî komo nahworesî. Ahce wa so na erewru komo n̂ehcemesî.

4 Xir̂ko komo marha nukuknomesî iyakenon. Ahnoro xir̂ko mko nosohcesî. Noro yipu Mîk Kporin komo.

5 Kyopono ro xa Mîk Kporin komo, karitî marha Mîk ha. Yuhnari yîhtînon̂e marha Mîk, etpoyino pîn yîhtînon̂e. Ero wicakî mak nîhtînoyasî, kacho mera ro mak nasî.

6 Ehcoyoponkan komo yecehton̂e Mîk. Kicicme cehsom komo reha nar̂mesî roowo pona.

7 Kporin komo poko ewanomacoko. Kir̂wan̂he xa mai ham okre, kacho aacoko. Ahpa yakro rma aacoko. Kaan n̂entarî me aacoko, ponaro kehtopo komo n̂entarî me ha.

8 Kaapu nahruyasî Noro tuuna yewru ke. Tuuna n̂enmekyasî roowo tîhtopo me. Îh pore cuupu natîkresî.

9 Okno nahman̂e Mîk, comota pono komo nahman̂e marha. Maxweren̂e xîkrî marha nînahmesî, xee xee, ketaw. Ero wa nasî Kporin komo.

10 Tawake exihra tko nasî Noro kawaru poko, karitî poko. Tooto repu poko marha tawake exihra nasî.

11 Tponarono komo poko xa yo tawake nasî, Opînîn yaw cehtopo n̂enpesî Kporin komo owya amn̂e, kan̂e komo poko xa tawake nasî.

12 Kir̂wan̂he xa nai ham Kporin komo, kacoko amyamro Xerusaren pono komo. Ponaro awehtopo komo poko ahwotacoko amyamro Siaw pono komo.

13 Noro xa cewaxke n̂iir̂asî awacan komo metatan yecetî. Noro xa aapono komo xîkrî nakronomesî, ewto pono kom ha.

14 Arowon komo wokpan yawno komo n̂iir̂asî erasîra waapa pona. Tînahke xa marha awir̂axe so puruma ke kir̂wanî ro ke. Ero tak mokyaxe okre tmaxmitaxi ro.

15 Anarimaw roowo pona tak n̂en̂epesî tîmtapotarî. Kar̂pe xa tîtosom mîn ha.

16 Ero ke rma n̂eepi n̂ekpesî roowo pore kahn̂eru poci warai. Xeata pahyasî anarimaw wemronho wara.

17 Saraipa nar̂mesî roowo pona cuure mtîtho warai. Kececetotopo mera nasî Noro n̂iritho cwotu.

18 Ero yinhîrî tîmtapotarî n̂en̂epesî xa hara ceipamxapu yuxukrapamnon̂e me hara. Ocowo n̂ekpesî kapeperetopo hara. Ero ke tuuna tak nîhces hara. Ero wa n̂iir̂asî Kporin komo.

19 Xako komo ya tîmtapotarî n̂entamexpesî. Tîwya kpanatanmetopo n̂entamexpesî Ixaw Yana komo ya, tîwya kpanaretopo marha.

20 Ero warai entamexpora ro mak xakn̂e mîk hak rowon pono komo ya. Yîwya kpanaretopo komo yentara ro mak xatken̂e. Ero wa xatken̂e. On wara mak tak wîîkesî, Kporin komo poko ahwotacoko. Ero wa mak wîîkesî.