On wara wîîkes awya so, Kporin komo poko ahwotacoko. Oyekatî ya rma wîîkesî, Kporin komo poko ahwotakî, wîîkesî. Ero wa kepanatanmekyasî.

2 Noro poko kahwowasî miya roro owaitopo pona roro. Waano marha waar̂asî waipîra ka oyexitaw ro. Ponaro oyehtopo pokono mîn waar̂asî waano, kir̂wan̂he ehtopo pokono ha.

3 Kayaritomo komo pona mak enîhra ehcoko. Tooto kyam makî reha mîkyam kayaritomo komo, twaihsomtho kyam mak. Kukurunpen̂e pînî ro mak mîkyam.

4 Noro yipu komo yekatî toche roowo me tak n̂etakîces hara yupunthîrî komo okwe. Waihtopo komo po rma kaamo po tohnawno me tak n̂ehtîkesî yîhtînotoponhîrî komo, Ero poko men was amn̂e, kachonho yîwya.

5 Tawake xa tasî ponaro Xako yehtopo exitaw kakronoman̂e me. Tawake xa tasî Kporin komo pona mak een̂ataw kîwya so, Kaan pona een̂ataw ha.

6 Kaapu yakîhton̂enho Mîk Kporin komo, roowo yakîhton̂enho marha, tuuna imo, kah yawno komo, roowo pono komo, tuuna imo kwawno komo, miyan komo yakîhton̂enho rma Mîkî. Tîmtapotachonhîrî yaw roro kiin̂e Mîk miya roro.

7 Emetanmexapu komo yepanîn̂e Mîk. Rooma pokono komo nahman̂e marha Mîkî, kahrutopo yawno komo yahrunkan̂e marha.

8 Ewîhnînhîrî komo yewtanîren̂e marha Mîk, katuhkemînhîrî komo yanîmn̂e marha. Kir̂wan komo xatî marha Mîk ha.

9 Anarî yana chewno komo n̂een̂asî, yîmîhnî komo n̂ecehcesî, iin̂o waixapu komo marha n̂ecehcesî. Kicicme cehsom komo reha n̂ehn̂anmekyasî. Noro yipu Mîk Kporin komo.

10 Kayaritomo me nasî Noro miya roro etowîn me ro mak. Siaw pono komo, awya so wîîkesî, ponaro awehtopo komo Mîk Kporin komo. Awepamthîrî komo n̂ewetîrî Mîkî, miya rorono komo n̂ewetîrî ha. Ero warai komo kayaritomon me nasî Noro. Ero ke Kporin komo poko ahwotacoko.