145
Tapi Wanorî On, Kporin Komo Poko Kahwotacho Kom Ha Kir̂wan Mîkî Kaan, Kîpînîn Yawno Marha Mîkî
1 On wara wîîkes awya Apa, kir̂wanî ro xa Amoro, wîîkesî. Ponaro oyehtopo Amoro, okayaritomon ha. Awosotî poko kahwowasî miya roro yîtîhkan me ro mak.
2 Enmar̂atîxera kahwowasî apoko. Awosotî poko kahwowasî miya roro yîtîhkan me ro mak.
3 Kyopono xa Mîk Kporin komo. Yaaro xa tahwowaxe Noro poko. Kyopono ro mak Mîk Noro. Entatîkarî yopo ro mak nasî Noro yehtopo.
4 Awya ciino ritoponho n̂ekatîmyaxe yîîm komo tîmxîkrî komo ya. Kar̂pe awehtopo menpekn̂e roro ahce wa na ciino ritopo poko, ero n̂ekatîmyaxe yîwya so.
5 Kyopono me ro mak masî. Kayaritomo xa Amoro. Kesehtînoyasî roro ero wa awehtopo poko, an̂irithîrî poko marha. Keserepokesî ro mak ero poko.
6 Awehtoponhîrî marha n̂ekatîmyaxe aponarono komo Apa. Kar̂pe ro mak cehtopo n̂enpekn̂e Kporin komo cirihnî cirirî ke, kexe. Ow marha wekatîmyasî kyopono me xa awehtopo.
7 Kakronoman̂e me xa awehtoponhîrî marha n̂ekatîmyaxe tooto komo. Kir̂wanî ro me awehtopo poko n̂ewanomexe.
8 Kponarono xa Mîk Kporin komo, kîpînîn yawno ro. Yamoro mak tîrwon̂em Mîk, kîpînîn yawno ro xa.
9 Kir̂wan̂he nasî Kporin komo miyan komo poko rma. Tînakîtothîrî komo pînîn yaw nasî, miyan komo pînîn yaw rma.
10 Kir̂wan̂he xa awehtopo yenpon̂e me rma nas ahnoro anakîtothîrî Apa. Kir̂wan̂he xa nai ham okre Kporin komo, kexe anakir̂wamathîrî kom hara apoko.
11 Tawake ro mak taxe Noro exitaw kîkayaritomon me, kexe. Kar̂pe awehtopo poko marha n̂ekatîmyaxe.
12 Ero wa ekatîmrî ke tak kar̂pe awehtopo n̂encexe miyan komo rma. Kayaritomo ro xa Mîk Noro, kacho marha n̂encexe.
13 Miya roro kayaritomo me mas Apa etowîn me ro mak, miya roro ehretawnomaxapu komo kayaritomon me rma.
14 Epîrkaxapu komo yecehton̂e marha Mîkî Kporin komo, katuhtaxapu komo yanîmn̂e marha.
15 Apona n̂een̂axe ahnoro anakîtothîrî komo tînahmachome. Yînahmano miir̂asî yînahmacho me exitaw roro ha.
16 Awamorî mankesî mîk hak ya tîmtome yiixe ehtopo kom ha.
17 Kir̂wan̂he ciino n̂iir̂asî Kporin komo ahce wa so na kiir̂ataw. Ahce wa so na kiir̂ataw yîwya kakronomacho komo me rma nasî.
18 Kîmîtwo so rma nasî Kporin komo, Ow cma re makronomes Apa, kan̂e komo mîtwo, yaaro kan̂e komo mîtwo ha.
19 Yiixe kehtopo tîmn̂e Mîk tponarono komo ya. Yîmtapotarî komo n̂encesî yukurunpetome so tak.
20 Tîîxatî komo yecehton̂e Mîk Kporin komo. Kicicme cehsom komo reha nîhcamnoyasî.
21 Kir̂wan̂he xa Kporin komo yehtopo wekatîmyasî. Ahnoro yînakîtothîrî komo nîmtapowaxe Noro yosotî poko, kir̂wanî ro me ehtopo poko ha. Miya roro ero wa nîmtapotawaxe yîtîhkan me ro mak. Ero wa nîmtapowaxe.